کراچی (25 اگست 2025): کرکٹ کے معتبر رسالے وزڈن نے دنیا کے بہترین نوجوان کرکٹرز کی فہرست جاری کر دی جس میں 4 پاکستانی کھلاڑی بھی شامل ہیں۔
وزڈن کی جانب سے دنیا بھر کے کرکٹ کھیلنے والے ممالک سے منتخب 40 نوجوان کرکٹرز کی فہرست جاری کی ہے۔ اس فہرست میں پاکستان کے چار کرکٹرز جگہ بنانے میں کامیاب رہے ہیں۔
وزڈن کی جانب سے اس فہرست میں 23 سال سے کم عمر کرکٹرز کو ان کی کارکردگی کی بنیاد پر منتخب کیا گیا ہے اور یہ لسٹ 2019 کے بعد پہلی بار جاری کی گئی ہے، جس میں کھلاڑیوں کی موجودہ کارکردگی اور طویل مدتی صلاحیت کو مدنظر رکھا گیا ہے۔
دنیا کے 40 بہترین نوجوان کرکٹرز کی فہرست میں جن پاکستانی کھلاڑیوں نے جگہ حاصل کی ہے۔ ان میں فاسٹ بولر نسیم شاہ، جارح مزاج اوپنر صائم ایوب، مڈل آرڈر میں تیز رفتاری سے رنز کرنے والے حسن نواز اور مخالف بلے بازوں کو اپنی گھومتی گیندوں سے پریشان کرنے والے علی رضا شامل ہیں۔
ٹاپ ٹین فہرست میں ٹیسٹ کرکٹ اور ون ڈے کی عالمی چیمپئن آسٹریلیا کا کوئی بھی نوجوان کرکٹر جگہ بنانے میں ناکام رہا ہے۔
وزڈن نے اس فہرست میں بھارتی کرکٹر یشوی جیسوال کو پہلے نمبر پر رکھا ہے۔ دوسرے نمبر پر ویسٹ انڈیز کے فاسٹ بولر جیڈن سیلز، تیسرے نمبر پر انگلینڈ کے جیکب بیتھل، چوتھے نمبر پر نیوزی لینڈ کے ول او رورکے، پانچویں نمبر پر جنوبی افریقہ کے لوان ڈری پریٹوریئس ہیں۔
پاکستان کے باصلاحیت فاسٹ بولر نسیم شاہ دنیا کے چھٹے بہترین نوجوان کرکٹر قرار دیے گئے ہیں۔ ساتویں پر افغانستان کے رحمان اللہ گرباز، آٹھویں نمبر پر جنوبی افریقہ کے کیونا میپھاکا، نویں نمبر پر بھارت کے سائی سدھارسن اور دسویں نمبر پر افغانستان کے ابرہیم زردان کو رکھا گیا ہے۔
اس فہرست میں پاکستانی بلے باز صائم ایوب کی 11 ویں پوزیشن ہے، حسن نواز 26 ویں اور علی رضا 37 ویں نمبر پر ہیں۔
وزڈن کی 40 بہترین نوجوان کرکٹرز کی فہرست میں سب سے زیادہ بھارت کے 6 کھلاڑی شامل ہیں۔ آسٹریلیا کے 6 کرکٹرز اس فہرست میں جگہ بنانے میں کامیاب رہے ہیں جب کہ انگلینڈ کے 5 کھلاڑی یہ اعزاز حاصل کرنے میں کامیاب رہے ہیں۔
پاکستان کے 4 کرکٹرز کو دنیا کے 40 بہترین کرکٹرز میں شمار کیا گیا ہے۔ افغانستان کے بھی چار کھلاڑی اس فہرست میں شامل ہیں۔ ان کے علاوہ جنوبی افریقہ کے 3، ویسٹ انڈیز، بنگلہ دیش اور نیوزی لینڈ کے 2، 2 جب کہ سری لنکا اور زمبابوے کا ایک ایک کھلاڑی اس فہرست جگہ بنا سکے ہیں۔
وزڈن کا تعارف
‘وزڈن کرکٹ المناک’ کرکٹ کا ایک سالانہ رسالہ ہے جس کا اجرا پہلی مرتبہ 1864 میں انگلینڈ سے ہوا. اسے کچھ لوگ کرکٹ کی بائبل بھی کہتے ہیں اور اس میں اپنا نام دیکھنے کا خواب دیکھتے ہیں۔ اب تک اس کے 156 ایڈیشن آ چکے ہیں جن میں گزشتہ سال ہونے والے انٹرنیشنل اور ڈومیسٹک کرکٹ میچز کے اسکور کارڈ، تجزیے اور فیچرز شامل کیے جاتے ہیں۔
سن 1889 میں ‘وزڈن کرکٹرز المناک’ نے ‘وزڈن فائیو کرکٹرز آف دی ایئر’ کا آغاز کیا۔ اس لسٹ میں شامل ہونے والے کھلاڑیوں کے ناموں کا اعلان انگلش سیزن کے اختتام پر کیا جاتا ہے۔
وزڈن بہترین کھلاڑی کا اعزاز پانے والے پاکستانی کرکٹرز:
سب سے پہلے ‘وزڈن فائیو کرکٹرز آف دی ایئر’ میں جگہ بنانے والے پاکستانی کھلاڑی فضل محمود تھے، جنہوں نے یہ اعزاز 1955 میں حاصل کیا۔
ان کے بعد 1963 میں مشتاق محمد، 1968 میں حنیف محمد اور آصف اقبال، 1970 میں ماجد خان اور 1972 میں ظہیر عباس نے یہ اعزاز حاصل کیا۔
پاکستان کرکٹ کے لیجنڈز جاوید میاں داد اور عمران خان بالترتیب 1982 اور 1983 میں وزڈن کرکٹر آف دی ایئر قرار پائے۔ جب کہ سلیم ملک کو 1988 میں یہ اعزاز ملا۔
ان کے علاوہ وسیم اکرم، وقار یونس، سعید انور، مشتاق احمد، ثقلین مشتاق، محمد یوسف، مصباح الحق، یونس خان بھی یہ اعزاز اپنے نام کر چکے ہیں۔
