اسلام آباد: پاکستان میں 16 اگست سے پیٹرول مہنگا اور ڈیزل سستا ہونے کا امکان ہے۔

اے آر وائی نیوز کے مطابق ذرائع کا کہنا ہے کہ پیٹرول کی قیمت میں ایک روپے 32 پیسے فی لیٹر اضافے کا امکان ہے، ڈیزل 11 روپے 75 پیسے، مٹی کا تیل 6 روپے 25 پیسے فی لیٹر سستا ہوسکتا ہے۔

لائٹ ڈیزل آئل 7 روپے 11 پیسے فی لیٹر سستا ہونے کا امکان ہے۔

ذرائع کے مطابق پیٹرولیم مصنوعات کی قیمتوں کی ابتدائی ورکنگ تیار کرلی گئی ہے، وزارت پیٹرولیم، خزانہ مشاورت کے بعد وزیراعظم کو بھجوائیں گی۔

یہ پڑھیں: پیٹرول پر گاڑیاں چلانے والے افراد کے لیے بڑی خبر

ایکسچینج ریٹ ایڈجسٹمنٹ، لیوی کی شرح میں ردوبدل کے بعد ورکنگ بھجوائی جائے گی۔

واضح رہے کہ وزیراعظم شہباز شریف قیمتوں میں ردوبدل کا حتمی فیصلہ کریں گے جس کا اطلاق 16 اگست رات 12 بجے سے ہوگا۔

لاہور (13 اگست 2025): نائب وزیر اعظم و وزیر خارجہ اسحاق ڈار نے محسن نقوی کو وزیر اعظم اور نواز شریف کو صدر مملکت بنانے کی خبروں پر اپنے ردعمل کا اظہار کر دیا۔

حضرت داتا گنج بخش کے مزار پر آمد کے دوران اسحاق ڈار نے میڈیا سے گفتگو کی۔ اس دوران ایک صحافی نے کہا کہ خبریں آ رہی ہیں محسن نقوی کو وزیر اعظم اور نواز شریف کو صدر بنانے کی باتیں ہو رہی ہیں۔

اس پر اسحاق ڈار نے جواب دیا کہ ڈس انفارمیشن اور افواہوں سے پرہیز کرنا چاہیے، محسن نقوی کے حوالے سے ایسی کوئی بات درست نہیں جبکہ نواز شریف کے حوالے سے بھی ایسی کوئی بات نہیں۔

یہ بھی پڑھیں: فیلڈ مارشل کے صدر بننے کی باز گشت، ترجمان پاک فوج کا دوٹوک مؤقف

انہوں نے واضح کیا کہ حکومت اپنی مدت پوری کرے گی۔

میڈیا سے گفتگو کے دوران نائب وزیر اعظم نے کہا کہ جب تک ادارے اور سیاسی جماعتیں پاکستان کو مل کر آگے لے کر نہیں جائیں گی تو وقت ضائع ہوگا، کل وزارت خارجہ میں امریکا سے آئے لوگوں سے ڈائیلاگ ہوئے، گزشتہ ایک سال سے امریکا کو ثبوت دے رہے ہیں کہ مجید بریگیڈ بی ایل اے کا حصہ ہے، کل امریکی وفد کے ہیڈ نے مجھے مجید بریگیڈ کو دہشتگرد تنظیم قرار دینے کی خوشخبری دی۔

انہوں نے کہا کہ وزیر اعظم شہباز شریف نے دوٹوک کہا ہے کہ اگر ہمارا پانی روکا گیا تو جنگ تصور کریں گے، بھارت خود انٹرنیشنل فورم پر گیا تھا، عالمی قوانین کے مطابق انڈس واٹر ٹریٹی ختم نہیں ہو سکتی۔

اس سے قبل ان کا کہنا تھا کہ پاکستان ترقی کی منزل کی جانب گامزن ہے، اللہ تعالیٰ سفارتی محاذ پر بھی ہم پر کرم نوازی کر رہے ہیں، پاکستان کا جشن آزادی بھی ہے، آج رات اور کل کا دن ہمارے لیے مبارک ہے، اللہ کا کرم ہے عرس مبارک اور یوم آزادی ساتھ ساتھ آئے ہیں۔

انہوں نے کہا کہ 3 دنوں میں پاکستان کی ترقی اور کامیابی کیلیے خصوصی دعائیں کریں، حضور ﷺ فرماتے ہیں جب دعا کرو تو یہ نا سوچو کہ قبول ہوگی یا نہیں، میری دعا ہے اللہ پاکستان کی شان و شوکت میں مزید اضافہ کرے، اپنی دعاؤں میں پاکستان کو بھی یاد رکھیں، پاکستان میں ترقی کا سفر شروع ہو چکا ہے، بہت تیزی سے ترقی کے سفر کو مکمل کریں گے۔

اسحاق ڈار نے مزید کہا کہ پاکستان کو اسلام کا ترقی یافتہ قلعہ بنانے کی دعا بھی کریں، اللہ کے فضل و کرم سے پاکستان کو بے مثال کامیابی عطا کی، اللہ تعالیٰ نے معرکہ حق میں پاکستان کو بہت بڑی کامیابی عطا کی، معاملہ 22 اپریل سے ہی شروع ہوگیا تھا لیکن 6 مئی سے 10 مئی اہم دن تھے، ہم پرامن ملک ہیں وزیر اعظم کی قیادت میں پاکستان معاشی ترقی کر رہا ہے۔

وزیراعظم شہباز شریف نے ہونہار نوجوانوں کو میرٹ پر ایک لاکھ مفت لیپ ٹاپ فراہم کرنے کا اعلان کردیا۔

اے آر وائی نیوز کے مطابق نوجوانوں کے عالمی دن کے موقع پر منعقدہ تقریب سے خطاب کرتے ہوئے وزیراعظم شہباز شریف نے کہا کہ لیپ ٹاپس کی تقسیم چاروں صوبوں، وفاقی دارالحخومت، گلگت بلتستان اور آزاد کشمیر میں ہوگی۔

انہوں نے کہا کہ یہ لیپ ٹاپ سود پر مبنی قرضوں کے ذریعے لیپ ٹاپ کی اسکیم کے علاوہ ہوں گے۔

شہباز شریف کا کہنا تھا کہ پاکستان کا مستقبل نوجوانوں کے ہاتھوں میں ہے، ملکی ترقی کے لیے میرٹ پر عملدرآمد یقینی بنائیں گے۔

یہ پڑھیں: وزیراعظم یوتھ لیپ ٹاپ اسکیم کی میرٹ لسٹ جاری

علاوہ ازیں انہوں نے کہا کہ چار دن کی جنگ میں ہمارے دلیر جوانوں نے دشمن کو وہ سبق سکھایا جو اسے رہتی دنیا تک یاد رہے گا۔

وزیراعظم نے کہا کہ 6 اور 10 مئی کو افواج پاکستان نے دشمن پر کاری ضرب لگائی، چار دن کی جنگ میں ہمارے دلیر جوانوں نے دشمن کو وہ سبق سکھایا جو اسے رہتی دنیا تک یاد رہے گا، پاک فضائیہ نے چار رافیل سمیت بھارت کے چھ طیارے گرائے، بھارت کا غرور دس مئی کو غرق ہوگیا۔

شہباز شریف کا کہنا تھا کہ دشمن ذہن میں رکھے اپکستان کے پانی کی ایک بوند بھی چھین نہیں سکتے، دشمن نے ایسی حرکت کی تو ایسا سبق سکھائیں گے کہ وہ کانوں کو ہاتھ لگائیں گے۔

ان کا کہنا تھا کہ بھارت پاکستان کے حصے کے پانی کی ایک بوند بھی نہیں چھین سکتا، سندھ طاس معاہدے کے تحت پاکستان کا پانی نہیں روک سکتا۔

سندھ حکومت نے کراچی کے شہریوں کو سستی بجلی فراہم کرنے کا اعلان کردیا۔

وزیر توانائی سندھ ناصر شاہ کا کہنا ہے کہ کراچی کی صنعت اور رہائشیوں کو سیپرا کے تحت سستی بجلی فراہم کی جائے گی، سستی بجلی کا نرخ کے الیکٹرک کی نسبت بہت کم ہوگا۔

انہوں نے کہا کہ ہم جو بجلی بنائیں گے وہ ایس ٹی ڈی سی کے تحت خود ترسیل کریں گے، بجلی کے نرخ اب ہم خود طے کرسکیں گے، ایس ٹی ڈی سی کی ترسیل شدہ بجلی کا نیپرا کے نرخوں سے تعلق نہیں ہوگا اور اس کا نرخ نیپرا سے بہت کم ہوگا۔

ناصر شاہ نے کہا کہ سیپرا میں لوگوں کو بھرتی کرلیا، رواں ماہ ہی نوٹیفکیشن جاری ہوجائے گا، ہماری بنیادی توجہ کا مرکز اکنامک زونز ہیں، کوشش ہے سیپرا کے تحت بجلی کی پہلی ترسیل کے فور کے گرڈ کو فراہم کی جائے۔

یہ پڑھیں: وزیر توانائی نے 300 یونٹ والے بجلی صارفین کو بڑی خبر دے دی

وزیر توانائی سندھ نے کہا کہ اسمبلی سے سیپرا کو آئینی طور پر منظور کروالیا ہے، کراچی کے شہری بھی سستی بجلی حاصل کرسکیں گے، ترسیلی نظام ایس ٹی ڈی سی کے پاس ہونا چاہیے، کے الیکٹرک کے بورڈ میں سندھ کی نمائندگی نہیں، وفاق کے تین ڈائریکٹر ہیں، وفاق سے کہا ہے ایک نمائندہ وفاق اور باقی دو سندھ سے ہوں۔

ناصر شاہ نے کہا کہ سندھ حکومت کا کے الیکٹرک کو سولر پارکس سے سستی بجلی فراہم کرنے کا معاہدہ ہوا ہے، کے الیکٹرک سے کہا ہے سولر سے جب بجلی بن رہی ہے تو مہنگے ایندھن والی نہ خریدیں۔

اسلام آباد : وزیر توانائی اویس لغاری نے بجلی کے پروٹیکٹڈ صارفین کی حد 300 یونٹ تک بڑھانے کی خبروں کو مسترد کردیا اور کہا 300 یونٹ کا ریٹ دینے سے سالانہ 275 ارب روپے کی سبسڈی دینا پڑے گی۔

تفصیلات کے مطابق وفاقی وزیر توانائی اویس احمد خان لغاری نے قومی اسمبلی میں سوالات کے جواب دیتے ہوئے کہا ہے کہ کرپٹو کرنسی کے لیے ابھی تک بجلی کا کوئی ریٹ آفر نہیں کیا گیا، سسٹم میں تقریباً 7 ہزار میگاواٹ اضافی بجلی دستیاب ہےجبکہ 200 یونٹ سے کم استعمال کرنے والے صارفین کو سبسڈی اور رعایتی ٹیرف فراہم کیا جا رہا ہے۔

وفاقی وزیر توانائی کا کہنا تھا کہ ملک میں گرڈ سے منسلک صارفین کی تعداد ساڑھے 3 کروڑ سے زائد ہے، جن میں 0 سے 100 یونٹ استعمال کرنے والوں کو 90 فیصد اور 100 سے 200 یونٹ والے صارفین کو 70 فیصد تک سبسڈی فراہم کی جارہی ہے۔

انہوں نے کہا کہ اگر 201 یونٹ پر قدغن نہ لگائی جائے تو یہ پابندی 251 یا 301 یونٹ پر لگانی پڑے گی، اس لیے سلیب سسٹم میں کسی نہ کسی حد پر ایک یونٹ کا اثر ضرور آتا ہے۔

مزید پڑھیں : ماہانہ 300 یونٹ تک بجلی استعمال کرنے والے صارفین کے لئے بڑی خبر

وفاقی وزیر کا مزید کہنا تھا کہ 200 یونٹ والے صارف کو 300 یونٹ والے کا ریٹ دینے سے سالانہ 275 ارب روپے کی سبسڈی دینا پڑے گی، جو موجودہ معاشی حالات میں ممکن نہیں۔

اویس لغاری نے بتایا کہ 200 یونٹ سے کم استعمال کرنے والے صارفین کی تعداد 1 کروڑ 83 لاکھ تک پہنچ چکی ہے اور پچھلے 9 ماہ میں ان کے لیے بجلی 60 فیصد سستی کی گئی جبکہ جون 2024 میں انڈسٹری سے 255 ارب روپے کی کراس سبسڈی لی گئی جو اب کم ہوکر 94 ارب رہ گئی ہے۔

وزیر توانائی کے مطابق بشمول ٹیکس بجلی کا ٹیرف 48.7 روپے فی یونٹ سے کم ہوکر 38.4 روپے ہوگیا ہے جبکہ پروٹیکٹڈ صارفین کے لیے ٹیرف میں 58 فیصد اور نان پروٹیکٹڈ صارفین کے لیے 11 سے 17 فیصد کمی کی گئی۔

انہوں نے مزید بتایا کہ وفاقی کابینہ نے انڈسٹری کے لیے بجلی کی مسابقتی مارکیٹس کی منظوری دے دی ہے اور وہیلنگ چارج کے تعین کے لیے ریگولیٹر کو درخواست دے دی گئی ہے، جبکہ حکومت نے فیصلہ کیا ہے کہ اب مزید بجلی نہیں خریدی جائے گی۔