کوئٹہ (21 جولائی 2025): وزیراعلیٰ بلوچستان سرفراز بگٹی نے بلوچستان میں قتل ہونے والے جوڑے سے متعلق دعویٰ کیا ہے کہ یہ شادی شدہ جوڑا نہیں تھا۔

اے آر وائی نیوز کے مطابق وزیراعلیٰ بلوچستان سرفراز بگٹی نے پریس کانفرنس کرتے ہوئے قتل ہونے والا شادی شدہ جوڑا نہیں تھا۔ خاتون شادی شدہ اور 5 بچوں کی ماں تھی۔ تاہم یہ قتل اور بربریت ہے۔ میری ساری ہمدردیاں قتل ہونے والے افراد کے ساتھ ہیں اور ہم مظلوم کے ساتھ کھڑے ہیں۔

وزیراعلیٰ بلوچستان نے کہا کہ مذکورہ واقعہ سے متعلق سوشل میڈیا پر ویڈیو وائرل ہونے سے پہلے ہی مل گئی تھی، جس کے بعد آئی جی بلوچستان کو فوری طور پر واقعہ کا نوٹس لینے کا کہا اور قبائلی سردار کو گرفتار بھی کیا گیا ہے۔

سرفراز بگٹی نے کہا کہ حکومت واقعہ کی شفاف تحقیقات کرا رہی ہے اور دہرے قتل میں قبائلی سردار سمیت 11 افراد گرفتار ہیں جب کہ دیگر ملزمان کی گرفتاری کے لیے چھاپے مارے جا رہے ہیں۔

انہوں نے کہا کہ بلاول بھٹو نے مجھے کال کر کے اسے ٹیسٹ کیس کے طور پر دیا ہے۔ جو بھی اس میں ملوث ہیں، ان کو قانون کے کٹہرے میں لائیں گے۔ ہم کسی جرگے کی حمایت نہیں کریں گے بلکہ آئینی اور قانونی راستہ اختیار کریں گے۔

وزیراعلیٰ بلوچستان نے مزید کہا کہ وکٹم بلیمنگ پر نہیں جانا چاہتا، مگر حقائق بیان کرنا ضروری ہے۔ قتل کے اس کیس میں دونوں فریقین ایف آئی آر درج کرانے کو تیار نہیں۔ قتل کے واقعہ پر متعلق ڈی ایس پی کو معطل کیا جا چکا ہے۔ اس طرح کے جرگے ہوتے ہیں، جن کو روکنا حکومت کا کام ہے اور ہم نے روک کر ایکشن بھی لیا ہے۔

انہوں نے یہ بھی بتایا کہ گاؤں کے مرد فرار ہیں۔ پولیس جب وہاں جاتی ہیں، تو خواتین پتھراؤ کرتی ہیں۔ یہاں قبائلی معاشرہ ہے اور یہ حقیقت ہے کہ خطہ اسلحہ سے پاک نہیں۔

سرفراز بگٹی نے صوبے میں دہشتگردی کے حوالے سے گفتگو کرتے ہوئے کہا کہ دہشتگردی کی روک تھام کے لیے آپریشنز کیے اور مزید اقدامات بھی کر رہے ہیں۔ ایک سال میں 300 دہشتگردوں کو مارا گیا ہے۔ بسوں پر حملوں میں ملوث 10 دہشتگردوں کو جہنم واصل کر چکے۔ بلوچستان کی جو تصویر دکھائی جا رہی ہے، ایسا بالکل نہیں، چیزیں بہتر ہو رہی ہیں۔

واضح رہے کہ گزشتہ روز سوشل میڈیا پر میاں بیوی کے قتل کی ویڈیو وائرل ہوئی تھی۔ جس کے بعد بلوچستان حکومت کی مدعیت قتل کا مقدمہ درج کر لیا گیا تھا۔

بلوچستان میں پسند کی شادی کرنے والے خاتون اور مرد کے قتل کے واقعے کا مقدمہ تھانہ ہنہ اورڈک میں درج کیا گیا جب کہ اس قتل کے حوالے سے اہم اور سنسنی خیز انکشافات بھی سامنے آئے۔

https://urdu.arynews.tv/balochistan-couple-incident-case-registered/

کوئٹہ : بلوچستان میں پسند کی شادی کرنے والے جوڑے کے قتل کا مقدمہ درج کرلیا گیا، جس میں بتایا کہ سردار کے فیصلے کے بعد مرد اور خاتون کو گاڑیوں میں سنجیدی ڈیگاری مارگٹ لاکر قتل کیا گیا۔

تفصیلات کے مطابق بلوچستان میں پسند کی شادی کرنے والے خاتون اور مرد کے قتل کے واقعے کا مقدمہ تھانہ ہنہ اورڈک میں درج کرلیا گیا۔

مقدمہ انسداد دہشت گردی اور دیگر دفعات کے تحت متعلقہ ایس ایچ او نوید اختر کی مدعیت میں درج کیا گیا۔

مدعی مقدمے نے بتایا کہ خاتون اور مرد کے فائرنگ سےقتل کی ویڈیووائرل ہوئی، پولیس نفری کے ساتھ جائے وقوعہ سنجیدی ڈیگاری مارگٹ پہنچا، معلومات کرنے پر علم ہوا کہ واقعہ عیدالاضحیٰ سے 3 روز قبل کا ہے۔

مدعی کا کہنا تھا کہ فائرنگ کرکے بانو بی بی اور احسان اللہ کو قتل کیا گیا ، فائرنگ کرنے والے ملزمان میں شاہ وزیر، جلال،ٹکری منیر ، بختیار، ملک امیر، عجب خان، جان محمد سمیت15 نامعلوم ملزمان شامل ہیں۔

مقدمے میں مزید کہا گیا کہ ملزمان مرد اور خاتون کو قتل کرنے سے قبل سردار شیر باز خان کےپاس لیکر گئے، سردار نے فیصلہ سنایا کہ دونوں کاروکاری کےمرتکب ہوئےہیں، قتل کیا جائے اور سردار کے فیصلے کے بعد مرد اور خاتون کو گاڑیوں میں سنجیدی ڈیگاری مارگٹ لاکر قتل کیا گیا۔

مزید پڑھیں : بلوچستان : میاں بیوی کے قتل میں ملوث قبیلے کے سردار سمیت 11 گرفتار

ویڈیوبناکرسوشل میڈپر اپ لوڈ کرکے عوام میں خوف وہراس پھیلا گیا۔

یاد رہے گذشتہ روز بلوچستان میں پسند کی شادی کرنے والے جوڑے کو قتل کرنے کا واقعہ سامنے آیا تھا، فائرنگ کے دردناک مناظر کی ویڈیو سوشل میڈیا پروائرل ہوئی۔

بتایا جاتا ہے میاں بیوی ڈیڑھ سال سے روپوش تھے، دونوں کو دعوت کے بہانے بلایا گیا، جرگے میں فیصلہ سنایا گیا اور پھر کھلے میدان میں لے جا کر گولیاں چلا دی گئیں۔

وزیراعلیٰ سرفراز بگٹی نے ایکس پر بتایا مقتولین کی شناخت ہوگئی ہے اور قاتل کو گرفتار کرلیا گیا ہے۔