Category: اہم ترین

امریکی میڈیا کا سابق صدرپرویز مشرف کے قریبی عزیزوں کے حوالے سے کہنا ہے کہ وہ علاج کی غرض سے رواں ماہ کے آخر تک بیرون ملک جا سکتے ہیں۔

امریکا میڈیا کی رپورٹس کے مطابق سابق صدر پرویز مشرف علاج کے لئے بیرون ملک جاسکتے ہیں، پرویز مشرف کے قریبی عزیزوں کا کہنا ہے کہ وہ بیمار ہیں اور انہیں علاج کی غرض سے رواں مہینے کے آخر تک بیرون ملک منتقل کیا جا سکتا ہے تاہم مشرف علاج کے لئے کہاں جائیں گے، اس بارے میں کوئی بات نہیں کی گئی۔

اعلی سیکورٹی اہلکار نے نام ظاہر نہ کرنے کی شرط پر کہا کہ سابق صدر کا ملک سے باہر چلے جانا، ملک اور خود ان کے لئے اچھا ہوگا، مشرف کو آرٹیکل چھ کے مقدمے سمیت دیگر مقدمات کا سامنا ہے۔

خصوصی عدالت نے مشرف کو عدالت میں پیش ہونے کا حکم دیا تھا لیکن وہ عدالت میں پیش نہیں ہوئے، انہیں علالت کے باعث ملٹری اسپتال منتقل کردیا گیا تھا جہاں وہ تاحال زیرعلاج ہیں۔
       

سپریم کورٹ نے الیکشن کمیشن کی درخواست بلدیاتی انتخابات کرانے کے لئے سندھ میں تئیس فروری اور پنجاب میں تیرہ مارچ کی نئی تاریخیں دے دیں۔

الیکشن کمیشن آف پاکستان نے عدالتی فیصلوں، اتنظامی تبدیلیوں اور سیکورٹی پرنٹنگ پریس کی جانب سے بیلٹ پیپرز کی بروقت فراہمی سے معذرت کے باعث سندھ اور پنجاب میں بلدیاتی انتخابات کرانے کے لئے دی گئی تاریخوں میں مہلت کے لئے سپریم کورٹ سے رجوع کیا تھا۔

سیکریٹری الیکشن کمیشن نے عدالت عظمیٰ کو بتایا کہ بلدیاتی انتخابات میں استعمال ہونے والے بیلٹ پیپرز کی چھپائی کے لئے تین ہفتے درکارہیں، جس کے باعث سندھ میں بلدیاتی انتخابات تیئس فروری جبکہ پنجاب میں تیرہ مارچ کو کرا ئے جاسکتے ہیں۔

سیکریٹری الیکشن کمیشن کا موقف تھا کہ اس مقصد کے لئے سندھ اور پنجاب میں دیئے گئے انتخابی شیڈول کو منسوخ کرنا ہوگا جبکہ نیا شیڈول سپریم کورٹ کی ہدایات کی روشنی میں تیار کیا جائے گا۔

سپریم کورٹ نے سیکریٹری الیکشن کمیشن کے موقف کو تسلیم کرتے ہوئے سندھ میں بلدیاتی انتخابات تیئس فروری اور پنجاب میں تیرہ مارچ کی تاریخ کی منظوری دیتے ہوئے فریقین کو طلب کرلیا ، مقدمے کی سماعت ستائیس جنوری کو ہوگی ۔

خصوصی عدالت نے پرویز مشرف کیخلاف غداری مقدمے کی سماعت جاری ہے، مقدمے کی سماعت جسٹس فیصل عرب کی سربراہی میں تین رکنی بینچ کر رہا ہے۔

خصوصی عدالت نے پرویز مشرف کو آرٹیکل چھ کے تحت مقدمے میں حاضری سے استثنیٰ دینے یا نہ دینے کے حوالے سے فیصلہ محفوظ کرلیا،  جوابی دلائل دیتے ہوئے پراسیکیوٹر اکرم شیخ نے کہا کہ خصوصی عدالت کے قانون میں کوئی سقم نہیں، اگر کہیں کوئی کمی ہے تو عام قانون کا اطلاق ہوگا۔

گزشتہ روز پرویزمشرف کے وکیل انور منصور نے اپنے دلائل میں کہا تھا کہ خصوصی عدالت کا قیام ایک خصوصی قانون کے تحت عمل میں لایا گیا، جس پر فوجداری قوانین کا اطلاق نہیں ہوتا، اس لئے عدالت پرویز مشرف کو عدالت طلب کرنے کے لئے انکے وارنٹ گرفتاری جاری نہیں کرسکتی، ان کی یہ دلیل بھی تھی کہ خصوصی عدالتوں کے انیس سو چھیتر کے قانون میں گرفتاری سے متعلق کوئی شق شامل نہیں ہے۔

خصوصی عدالت میں مشرف غداری کیس کی سماعت آج پھر ہوگی، کیس کی سماعت جسٹس فیصل عرب کی سربراہی میں تین رکنی بینچ کرے گا۔

گزشتہ روز سماعت میں پرویز مشرف کی میڈیکل رپورٹ خصوصی عدالت میں پیش کی گئی، عدالت کو ملنے والی میڈیکل رپورٹ کا بنچ کے تینوں ارکان نے معائنہ کیا اور وکلا کی درخواست پر انہیں میڈیکل رپورٹ کی نقول فراہم کرنے کی ہدایت کردی، جسٹس فیصل عرب نے کہا کہ وکلا دو دن تک رپورٹ کا بغور مطالعہ کرلیں، مقدمے کا فیصلہ جمعرات کو سنایا جائے گا۔

میڈیکل رپورٹ کی نقول وکلاء کو فراہم کردی گئی، اس سے قبل عدالت میں دلائل دیتے ہوئے وکیل صفائی انور منصور کا کہنا تھا کہ پرویز مشرف کے خلاف مقدمے کی سماعت کرنے کے لئے بنائی گئی خصوصی عدالت عام عدالت نہیں، سنگین غداری اور توہین عدالت آئینی جرائم ہیں اور ان کے لئے رہنمائی بھی آئین سے لینی ہوگی۔

انور منصور نے کہا کہ آرٹیکل چھ اور دو سوچار یا ان کے تحت بنائے گئے قوانین میں دوران سماعت گرفتاری کی کوئی شق نہیں اور انیس سو چھہتر کی خصوصی عدالت کے قانون میں ملزم کی گرفتاری کی کوئی شق نہیں، انور منصور کی اس دلیل پر جسٹس فیصل عرب نے سوال کیا کہ اگر مقدمہ توہین عدالت کا ہو یا آرٹیکل چھ کا، ملزم کے پیش نہ ہونے پر وارنٹ گرفتاری کیے جا سکتے ہیں۔

انہوں نے کہا کہ وکیل صفائی کے مطابق اگر عدالت کو گرفتاری کا اختیار نہیں ہے تو ملزم صرف اس لیے حکم عدولی کرسکتا ہے کہ اسے گرفتار نہیں کیا جائیگا۔

کراچی سمیت سندھ کے مختلف شہروں میں اے آروائی نیوز کی نشریات بند کرادی گئیں، وزیراعلیٰ سندھ نے جبری بندش کانوٹس لے لیاکہتے ہیں میڈیاہاؤسز کوہرممکن سیکیورٹی فراہم کی جائے گی۔

کراچی سمیت سندھ کےکئی شہروں میں اے آروائی نیوز کی نشریات جبری طور پربند کرادی گئیں ۔کئی کیبلز پر اے آروائی کو آخری نمبرز پر ٹیون کردیا گیا ۔ اے آروائی کے ناظرین تازہ ترین خبروں تجزیوں اور تبصروں سے محروم کراچی، حیدرآباد، میر پورخاص، ٹنڈو اللہ یار میں اے آروائی نیو زکی نشریات کیبل پر نہیں آرہی ہیں۔

اگر کسی چینل پر نشریات آرہی ہیں تو وہاں اے آروائی نیوز کو آخری نمبروں پر ٹیون کیا گیا ہے۔ عوام کے ساتھ ساتھ سیاسی رہنماوں نے بھی نشریات بند کرائے جانے کی مذمت کی ہے ۔ وزیراطلاعات سندھ شرجیل میمن نےاےآروائی نیوزکی نشریات بند کرانے کی مذمت کردی ۔

وزیراعلیٰ سندھ قائم علی شاہ نے بھی اے آروائی نیوز کی نشریات کی بندش کا نوٹس لے لیا۔ وزیراعلیٰ سندھ کاکہناتھا صحافیوں اورمیڈیاہاؤسزکوہر ممکن سیکیورٹی فراہم کی جائےگی، سندھ حکومت آزادی رائے پرمکمل یقین رکھتی ہے۔

پیپلزپارٹی کی رہنما شازیہ مری نے اے آروائی کی نشریات کی بندش کی مذمت کرتے ہوئے کہامیڈیا کی آزادی پرکوئی قدغن برداشت نہیں کی جائے، سنی اتحادکونسل کے چیئرمین صاحبزادہ حامد رضا نے اے آروائی نیو زکی نشریات کی بندش کی مذمت کی اور کہا سچ چھپانےکیلئےغیرجمہوری ہتھکنڈےاستعمال کیےجارہےہیں۔

امیر جماعت اسلامی سید منور حسن نے اےآروائی کی نشریات بندکرانے کے عمل کی سخت الفاظ میں مذمت کی ہے، وزیرقانون پنجاب رانا ثنااللہ نے سندھ کے مختلف علاقوں میں نشریات بند کرانے کی مذمت کر تے ہوئےکہا مسلم لیگ ن میڈیا کی آزادی اور اظہار رائے کی آزادی پر یقین رکھتی ہے، رہنماجماعت اسلامی لیاقت بلوچ اور فرید پراچہ نے بھی اےآروائی کی نشریات بند کرانے کی شدید الفاظ میں مذمت کی ہے۔

رہنماپی ٹی آئی شیریں مزاری نے اےآروائی کی نشریات بندکرانے کی مذمت کردی، مسلم لیگ ن کے رہنما مشاہداللہ نے اےآروائی کی نشریات بندکرانے کی مذمت کی ہے۔۔پیپلز پارٹی کے رہنما اور معروف قانون دان عتزازاحسن نے بھی اے آروائی کی جبری بندش کی مذمت کی ہے۔