Category: اہم ترین

ایم کیو ایم نے اے آروائی نیوز اور پروگرام کھرا سچ کے اینکر پرسن مبشر لقمان کے خلاف زیب النسا اسٹریٹ پر احتجاجی مظاہرہ کیا، مظاہرے میں کارکنان اور ایم کیو ایم اراکین رابطہ کمیٹی نے شرکت کی۔

مظاہرین سے خطاب میں رکن رابطہ کمیٹی حیدر عباس رضوی کا کہنا تھا کہ ایم کیو ایم میڈٰیا کی آزادی اور غیرجانبداری کی حمایت کرتی ہے لیکن میڈٰیا کو آزادی کے ساتھ ساتھ ذمے داری کا بھی احساس ہونا چاہئے۔

انہوں نے کہا کہ پروگرام کھرا سچ میں ایک خاص پالیسی کے تحت متحدہ قومی موومنٹ اور الطاف حسین اور اب مہاجر قوم کے خلاف ہتک آمیز رویہ اختیار کیا جارہا ہے جو قابل مذمت ہے۔

کراچی میں پریس کانفرنس کرتے ہوئے تحریک انصاف کے سربراہ عمران خان نے کہاکہ ملک پرویز مشرف کا ملک سے جانا تیسرا این آر او ثابت ہوگا، الطاف حسین کی تقریر پر ردعمل دیتے ہوئےکہاکہ عوام کو سندھ ون اور ٹو نہیں انصاف چاہئے۔

زہرہ شاہد کے قاتلوں کی گرفتاری کے بارے میں عمران خان کا کہنا تھا کہ  انتخابات کے دوران بدترین دھاندھلی ہوئی کراچی کے تین حلقوں کے نتائج سب کے سامنے ہیں، کراچی میں تحریک انصاف کے ذمہ داران کو قتل کرکے انتخابی دھاندھلی کا آغاز کردیا گیا۔
   

سعودی وزیر خارجہ سعود الفیصل نے مشیر خارجہ سرتاج عزیز کے ہمراہ مشترکہ پریس کانفرنس کی۔

سعودی وزیر خارجہ سعود الفیصل نے کہا کہ سعودی عرب نے پرویز مشرف کا مسئلہ پاکستان کا اندرونی معاملہ قرار دے دیا، جس میں انہوں نے وضاحت کی کہ وہ نہ کسی مشن پر پاکستان آئے ہیں اور نہ ہی وہ پرویز مشرف کیلئے پاکستان آئے ہیں۔

سعودی وزیر خارجہ نے کہا کہ وہ صدر ممنون حسین کے لئے سعودی فرما رواں کا خصوصی پیغام لیکرآئے ہیں، سعود الفیصل نے یہ نہیں بتایا کہ خصوصی پیغام ہے کیا، سعود الفیصل کا کہنا تھا کہ افغانستان میں دہشت گردوں کو دوبارہ منظم نہ ہونے دیا جائے۔

انہوں نے پاکستان اور سعودی عرب کے معاملات کے جائزے کے لیے ایک کمیٹی بنانے کی تجویز دی، اور کہا کہ سعودی عرب دوسرے ملکوں کے معاملات میں مداخلت نہیں کرتا، بجلی کے شعبے میں پاکستان سے تعاون بڑھانا چاہتے ہیں، علاقائی صورتحال پر بھی دونوں ممالک کا تعاون جاری رہنا چاہئے۔

وزیراعظم نواز شریف کے مشیر خارجہ سرتاج عزیز کا کہنا تھا کہ معاشی ترقی کیلئے سعودی تعاون کو قدر کی نگاہ سے دیکھتے ہیں، پاکستان اور سعودی عرب کے تعلقات کو مزید مضبوط کیا جائے گا۔

اسلام آباد میں سعودی وزیرخارجہ شہزادہ سعود الفیصل کے ساتھ مشترکہ پریس کانفرنس کرتے ہوئے سرتاج عزیز نے کہا کہ پاک سعودی تعلقات دونوں ممالک کے عوام کے لئے فائدہ مند ہیں، دونوں ممالک مذہبی عقائد، اقدار اور روایات سے جڑے ہوئے ہیں۔

انہوں نے کہا کہ علاقائی اور عالمی امور پردونوں ممالک کے یکساں خیالات ہیں، مذاکرات کے دوران دونوں ممالک نے باہمی تعلقات پراعتماد کا اظہارکیا۔

پرویزمشرف کو پیشی کے لئے مزید دو دن کی مہلت مل گئی، میڈیکل رپورٹ مزید مددگار ثابت ہوگی یا نہیں فیصلہ جمعرات کو سنایا جائے گا، مقدمے میں غداری کا لفظ استعمال نہ کیا جائے مشرف کے وکیل نے خصوصی عدالت سے درخواست کر دی۔

پرویز مشرف کے خلاف مقدمے کی سماعت کرنے والے تین رکنی بنچ کے سربراہ جسٹس فیصل عرب نے کہا ہے کہ فریقین کے وکلا میڈیکل رپورٹ کا جائزہ لے لیں، مقدمے کا فیصلہ جمعرات کو سنایا جائے گا۔

عدالت کو ملنے والی میڈیکل رپورٹ کا بنچ کے تینوں ارکان نے معائنہ کیا اور وکلا کی درخواست پر انہیں میڈیکل رپورٹ کی نقول فراہم کرنے کی ہدایت کردی، جسٹس فیصل عرب نے کہا کہ وکلا دو دن تک رپورٹ کا بغور مطالعہ کرلیں۔

اس سے قبل عدالت میں دلائل دیتے ہوئے وکیل صفائی انور منصور کا کہنا تھا کہ پرویز مشرف کے خلاف مقدمے کی سماعت کرنے کے لئے بنائی گئی خصوصی عدالت عام عدالت نہیں، سنگین غداری اور توہین عدالت آئینی جرائم ہیں اور ان کے لئے رہنمائی بھی آئین سے لینی ہوگی۔

انور منصور نے کہا کہ آرٹیکل چھ اور دو سوچار یا ان کے تحت بنائے گئے قوانین میں دوران سماعت گرفتاری کی کوئی شق نہیں اور انیس سو چھہتر کی خصوصی عدالت کے قانون میں ملزم کی گرفتاری کی کوئی شق نہیں، انور منصور کی اس دلیل پر جسٹس فیصل عرب نے سوال کیا کہ اگر مقدمہ توہین عدالت کا ہو یا آرٹیکل چھ کا۔ملزم کے پیش نہ ہونے پر وارنٹ گرفتاری کیے جا سکتے ہیں۔

انہوں نے کہا کہ وکیل صفائی کے مطابق اگر عدالت کو گرفتاری کا اختیار نہیں ہے تو ملزم صرف اس لیے حکم عدولی کرسکتا ہے کہ اسے گرفتار نہیں کیا جائیگا۔
       

وزیراعظم نوازشریف اور صدر ممنون حسین سے سعودی وزیر خارجہ سعود الفیصل کی ملاقات ہوئی، ملاقات میں دونوں رہنماوں نے دو طرفہ تعلقات، علاقائی سلامتی کے امور خصوصا افغانستان کی صورتحال پر تبادلہ خیال کیا۔

وزیراعظم نواز شریف کا کہنا تھا کہ پاکستان اور سعودی عرب کے درمیان اسٹریٹیجک، تعلقات پر نیا دور شروع کرنے کی ضرورت ہے، پاکستان اسلامی ممالک کے درمیان اتحاد کی کوششوں کی حمایت سمیت ، پر امن اور مستحکم افغانستان کا حامی ہے۔

  وزیراعظم نے اس موقع پر کہا کہ سعودی عرب پاکستان کا مثالی دوست ہے اور مختلف شعبوں میں دو طرفہ تعاون کو فروغ دینے کا خواہش مند ہے، وزیراعظم نواز شریف نے سعودی وزیرخارجہ کو خادم حرمین شریفین شاہ عبداللہ کے لئے نیک خواہشات کا پیغام بھی دیا۔

سعودی وزیر خارجہ کا کہنا تھا کہ سعودی عرب پاکستان میں سیاسی و اقتصادی استحکام چاہتا ہے، ذرائع کے مطابق ملاقات میں جنرل (ر) پرویز مشرف کے خلاف سنیگن غداری کے مقدمہ پر بھی بات چیت ہوئی،

ملاقات میں وفاقی وزراء چوہدری نثار علی ،اسحاق ڈار ،سر تاج عزیز اور دیگر سینئر حکام بھی موجود تھے، اس سے پہلے صدر مملکت اور سعودی وزیر خارجہ کی ملاقات میں دو طرفہ امور پر تبادلہ خیال کیا گیا اور دونوں برادر ممالک کے تعلقات کو مزید استحکام دینے کے عزم کا اظہار کیا گیا۔

سابق صدر پرویزمشرف کی میڈیکل رپورٹ خصوصی عدالت میں پیش کردی گئی، جس کا جائزہ لے کر پرویز مشرف کو عدالت میں پیشی سے استثنٰی دینے یا نا دینے کا فیصلہ کیا جائے گا۔

اس سے قبل پرویز مشرف کی میڈیکل رپورٹ عدالت میں پہنچائی گئی، سابق صدر پرویز مشرف کی میڈیکل رپورٹ کو انتہائی خفیہ رکھا گیا ہے، جو سربمہر لفافے میں بند ہے۔

پرویز مشرف کی میڈیکل رپورٹ ملنے پر تین رکنی بنچ نے رپورٹ کا معائنہ کیا ، بنچ کے سربراہ جسٹس فیصل عرب نے فریقین کے وکلا کو رپورٹ ملنے کی اطلاع کر دی ہے۔ 

وکلا کی درخواست پر انہیں میڈیکل رپورٹ کی نقول فراہم کرنے کی ہدایت کردی، جسٹس فیصل عرب نے کہا کہ وکلا دو دن تک رپورٹ کا بغور مطالعہ کر لیں۔

آرمڈ فورسز انسٹی ٹیوٹ آف کارڈیا لوجی کے ذرائع سے ملنے والی اطلاعات کے مطابق سابق صدر پرویز مشرف کے جسم میں یورک ایسڈ کی مقدار، بلڈ سی ٹی اور کولیسٹرول لیویل جانچنے کے لئے خون کے تازہ نمونے لے کر ٹیسٹ کے لئے لیبارٹری بھجوایئے گئے تھے۔

اسپتال ذرائع کے مطابق پرویز مشرف کو سی سی یو سے وارڈ میں منتقل کرنے کا ابھی فیصلہ نہیں کیا گیا ۔
   

سعودی عرب کے وزیر خارجہ سعود الفیصل پاکستان پہنچ گئے ، وہ آج وزیر اعظم نوازشریف سے ملاقات کریں گے۔

سعودی وزیر خارجہ سعود الفیصل پیر کی شام سعودی عرب سے اسلام آباد پہنچے، جہاں انکا وزیراعظم کے مشیر برائے خارجہ امور سرتاج عزیز نے استقبال کیا، وزیراعظم سے سعود الفیصل کی ملاقات میں سیکورٹی سمیت دیگر امور میں تعاون بڑھانے پر بات چیت ہوگی۔

سعودی وزیر خارجہ کی آمد سے قبل وزیراعظم کی زیر صدارت اہم اجلاس ہوا، جس میں مشیر خارجہ امور سرتاج عزیز نے اجلاس کے شرکاء کو بریفنگ دی، نواز شریف سے سعود الفیصل کی ملاقات کے بعد دفتر خارجہ میں سرتاج عزیز اور ان کے سعودی ہم منصب مشترکہ پریس کانفرنس سے خطاب کریں گے۔
    
   

خصوصی عدالت میں پرویز مشرف کیخلاف غداری مقدمے کی سماعت جاری ہے، سماعت میں مشرف کے وکیل انور منصور نے جوابی دلائل دیتے ہوئے سب سے پہلے گزشتہ روز عدالت میں ہونے والے شور شرابے پر معذرت کی۔

اپنے دلائل میں انور منصور کا کہنا تھا کہ پرویز مشرف کے خلاف غداری کے مقدمے کی سماعت کرنے کے لئے بنائی گئی خصوصی عالت ایک خصوصی قانون کے تحت قائم کی گئی ہے ضابطہ فوجداری کے تحت نہیں، اس عدالت کے خصوصی مقاصد اور اختیارات ہیں یہ عام عدالت نہیں ہے ، سنگین غداری اور توہین عدالت آئینی جرائم ہیں اور ان کے لئے رہنمائی بھی آئین سے لینی ہوگی۔

مشرف کے وکیل کا کہنا ہے کہ آرٹیکل 6 اور 204 یا ان کے تحت بنائے گے قوانین میں دوران سماعت گرفتاری کی کوئی شق نہیں ہے، نہ ہی انیس سو چھیتر کے خصوصی عدالتوں کے قانون میں ملزم کی گرفتاری کیلئے ایسی کوئی شق موجود ہے۔

انور منصور کی اس دلیل پر جسٹس فیصل عرب نے سوال کیا کہ اگر مقدمہ توہین عدالت کا ہو یا آرٹیکل چھ کا، ملزم کے پیش نہ ہونے پر وارنٹ گرفتاری کیے جاسکتے ہیں، انہوں نے کہا کہ وکیل صفائی کے مطابق اگر عدالت کو گرفتاری کا اختیار نہیں ہے تو ملزم صرف اس لیے حکم عدولی کرسکتا ہے کہ اسے گرفتار نہیں کیا جائیگا، جسٹس فیصل عرب کے اس سوال پر پرویز مشرف کے وکیل نے کہا کہ وہ چائے کے وقفے کے بعد عدالت کے سوالات کا تسلی بخش جواب دیں گے ۔۔   

سی این جی اسٹیشن آج صبح آٹھ سے اڑتالیس کی بجائے چوبیس گھنٹے کیلئے بند رہیں گے۔

سوئی سدرن گیس کمپنی ذرائع کےمطابق سندھ بھر کے تمام سی این جی اسٹیشن آج صبح آٹھ بجے سے کل صبح تک بند رہیں گے جبکہ بدھ سے تمام سی این جی اسٹیشن چوبیس گھنٹے تک کھلے رکھے جانے کے بعد جمعرات کی صبح آٹھ بجے سے دوبارہ چوبیس گھنٹوں کیلئے بند ہونگے۔
   

پرویز مشرف غداری کیس کی سماعت آج پھر ہوگی، ذرائع کا کہنا ہے کہ عدالتی حکم پر خصوصی عدالت میں پرویز مشرف کے اسپتال میں داخلے کے سرٹیفیکیٹ پیش کردیئے جائیں گے، میڈیکل رپورٹ بیرون ملک سے آنے کے بعد پیش کی جائے گی۔

اس سے قبل خصوصی عدالت میں غداری کیس کی چوتھی سماعت میں بھی پرویز مشرف بیماری کے باعث پیش نہ ہوئے تو خصوصی عدالت نے پرویز مشرف کو ایک دن کا اور استثنیٰ دیا تھا، جسٹس فیصل عرب کی سربراہی میں تین رکنی بنچ کو پرویزمشرف کے وکیل نے بتایا کہ ان کے موکل بیمار ہیں پیش نہیں ہوسکتے۔

انورمنصور کا کہنا تھا کہ مقدمہ اخلاقی جرم سے متعلق نہیں، آئین کے حوالے سے ہے اس میں ملزم کو گرفتار نہیں کیا جاسکتا، جسٹس فیصل عرب نے کہا کہ خصوصی عدالت کے طریقہ کار پر فوجداری قانون کا اطلاق ہوتا ہے یا نہیں پہلے اس بات کا فیصلہ کریں گے۔

وکیل استغاثہ اکرم شیخ نے دلائل میں کہا کہ خصوصی عدالت طے شدہ اختیارات سے تجاوز کرسکتی ہے نہ اس عدالت پرعام عدالتوں کی طرح قوانین کا اطلاق ہوتا ہے۔