Category: اہم ترین

پاکستان ایشیا کا مہنگاترین ملک بن گیا۔ یواین اکنامک جائزہ رپورٹ میں سترہ معیشتوں میں سب سے زیادہ مہنگائی پاکستان میں ریکارڈ کی گئی۔ ایشیائی ممالک میں مہنگائی کے اعتبار سے پاکستان پہلے نمبرپر آگیا۔

اقوام متحدہ کے ذیلی ادارے یو این اکنامک اینڈ سوشل کمیشن فارایشیا کی رپورٹ میں کہا گیا ہے پاکستان مہنگائی کے اعتبار سے ایشیا کی سترہ معیشتوں میں سب سے آگے ہے۔ رپورٹ کے مطابق مالی سال دوہزار چودہ میں مہنگائی کی شرح دہرے ہندسے11 فیصد تک بڑھ جائے گی۔

جوتیس جون تک سات اعشاریہ چار فیصد رہنے کا امکان ہے،سروے رپورٹ میں کہا گیا ہے کہ پاکستان میں معاشی ترقی کا سفر سست روی سے جاری ہے، اور رواں سال اقتصادی شرح افزائش تین اعشاریہ چھ فیصد اور آئندہ مالی سال چاراعشاریہ ایک فیصد متوقع ہے، جبکہ نوجوانوں میں بیروزگاری کی شرح بھی گیارہ اعشاریہ دو فیصد رہے گی۔

تحریک انصاف کی جانب سے لاہورمیں مہنگائی کیخلاف احتجاجی دھرنا میں شرکت کے لئے لوگ پہنچنا شروع ہوگئے ہیں۔ پاکستان تحریک انصاف کے سربراہ عمران خان نےحکومت سے مہنگائی کیخلاف ایجنڈے کا مطالبہ کردیا،

لاہور میں سخت سردی اورابرآلود موسم کے باوجود احتجاجی دھرنے میں شرکت کے لئے تحریک انصاف کے کارکنان جمع ہونا شروع ہوگئے ہیں۔ تحریک انصاف عمران خان کا کہنا ہے کہ احتجاج کرنا اُن کی پارٹی کا جمہوری حق ہے۔ وہ دھرنےمیں مہنگائی کیخلاف صرف احتجاج ہی نہیں بلکہ حکومت کو تجاویز بھی دیں گے کہ اس کو کس طرح کم کیا جاسکتا ہے، 

دھرنے میں شرکت کے لئے آنے والی تحریک انصاف کی خواتین ورکرز کا کہنا ہے کہ مہنگائی نے عام آدمی کی کمر توڑ کر رکھ دی ہے۔اُن کا کہنا ہے کہ موسم کی سختیاں عوام کو ریلی میں شرکت سے نہیں روک سکتیں۔ دھرنے سے عمران خان کے علاوہ تحریک انصاف کے دیگر رہنما بھی خطاب کریں گے۔

حکومتی رد عمل دیتے ہوئے وزیر اطلاعات پرویز رشید نے پوچھا ہے کہ کیا عمران خان نے اپنے انتخابی منشور کے تحت خیبر پختونخوا میں منتخب ایس ایچ او لگا دیے،کیا اراضی کا ریکارڈ کمپیوٹرائزڈ کردیا، کیا صوبے کی پولیس کو غیر سیاسی بنا دیا؟ عمران خان نے سابق صوبائی حکومتوں کی کرپشن کے کتنے کیس پکڑے اور ان پر کیا کارروائی کی؟
    

انڈس واٹر کمشنرکاکہناہے عالمی ثالثی عدالت نے کشن گنگا ڈیم پر پاکستان کا مؤقف تسلیم کرتے ہوئے بھارت کو دریائے نیلم میں فی سیکنڈ نو کیوبک میٹر پانی چھوڑنے کا پابند کر دیا ہے۔

   
انڈس واٹر کمشنر مرزا آصف بیگ نےمیڈیاکوبتایا عالمی ثالثی عدالت نے بھارت کو دریائے نیلم پر کشن گنگا ڈیم بنانے سے روکنے کی استدعا مسترد کر تے ہوئے دریائے نیلم کا رخ موڑنے کا اختیار بھی دےدیا ہے لیکن بھارت پاکستان کو مقررہ مقدار میں پانی فراہم کرنے کا پابند ہو گا۔ 

مرزا آصف بیگ کاکہناتھااس فیصلے سے نیلم جہلم ہائیڈرو پاور پراجیکٹ کی پیداواری صلاحیت زیادہ متاثر نہیں ہو گی، وفاقی وزیر پانی و بجلی خواجہ آصف کاکہناہے پانی پر پاکستانی حق تسلیم کرنابڑی کامیابی ہے،،جہلم اور چناب کے پانی پر بھی پاکستان کا حق مسلمہ بن گیا ہے۔ اپوزیشن لیڈرخورشیدکاکہناہے نوازشریف پاکستان کے حق میں فیصلے کریں گے خورشیدشاہ خورشیدشاہ کاکہناتھا کشن گنگا ڈیم کے حوالے سےعالمی عدالت کاپاکستان کے حق میں فیصلہ اچھی بات ہے۔

مری کے علاقے تریٹ سیداں میں مسافر بس کھائی میں گر گئی  حادثے کے نتیجےمیں ایک بچہ جاں بحق ہو گیا ، خواتین اور بچوں سمیت سینتیس زخمیوں کو پمز اسپتال منتقل کر دیا گیا ، پانچ زخمیوں کی حالت نازک ہے۔

مری میں تریٹ سیداں کے قریب آڑو کس کے مقام پر مسافر بس کھائی میں جا گری حادثہ بس کے بریک فیل ہونے کے باعث پیش آیا جسکی اطلاع ملتے ہی امدادی کارکنوں نے موقع پر پہنچ کر زخمیوں کو اسلام آباد کے پمز اسپتال روانہ کر دیا۔ 

حادثے کا شکار ہونے والی بس میں اڑتیس مسافر سوار تھے جن کا تعلق ایک ہی خاندان سے ہے جو لاہور سے مری کی سیر کیلئے آئے تھے، پمز اسپتال کی ترجمان ڈاکٹر عائشہ عیسانی نے میڈیا کو بتایا کہ پانچ زخمیوں کی حالت نازک ہے۔

ڈی سی او راولپنڈی ساجد ظفر نے میڈیا کو بتایا کہ حادثے کی تحقیقات کیلئے کمیٹی تشکیل دے دی گئی ہے حادثے کی وجہ ڈرائیور کی لاپروائی بھی ہو سکتی ہے۔

 وزیراعظم نوازشریف نے کمشنر راولپنڈی کو ذاتی طور پر امدادی سرگرمیوں کی نگرانی اور زخمیوں کو فوری امداد فراہم کرنے کی ہدایت کرتے ہوئے حادثے کی رپورٹ طلب کر لی ہے۔

حکومت نے مہنگائی کی ماری عوام کیلئے نیو ایئر گفٹ کی تیاری کرلی ہے، حکومت نے یکم جنوری سے پٹرولیم مصنوعات کی قیمتوں میں اضافہ کی تیار کرلی ہے۔

نئے سال کی آمد اور سرد موسم کے ساتھ حکومت نے بھی غریب عوام کے چولہے ٹھنڈے کرنے کی تیاری کرلی ہے، حکومت سال نو کا تحفہ پٹرولیم مصنوعات کی قیمتوں میں اضافے کی صورت میں دے گی۔

وزارت پٹرولیم و قدرتی وسائل کے زرائع کے مطابق یکم جنوری سے پٹرول تین روپے تیس پیسے ،ہائی آکٹین پانچ روپے، ہائی اسپیڈ ڈیزل چارروپے ستر پیسے، لائیٹ ڈیزل تین روپے پچھتر پیسے مہنگا ہونے کا امکان ہے۔

جب کہ غریبوں کے ایندھن مٹی کا تیل بھی دو روپے اٹھانوئے پیسے فی لیٹر مہنگا ہونے کا امکان ہے، تجزیہ کاروں کے مطابق پیٹرولیم مصنوعات پرعائد ٹیکسوں اور عالمی منڈی میں تیل کی قیمتوں میں اضافے کے باعث پیٹرولیم مصنوعات کی قیمتوں میں اضافہ کیا جا رہا ہے۔

وزیراعظم نوازشریف نے کہا ہے کہ تمام مذاہب امن سلامتی اور محبت کا درس دیتے ہیں، مذہبی منافرت پھیلانے والوں کو روکنا ہوگا، تمام پاکستانیوں کو بلاامتیازعلم امن اور سلامتی دینا چاہتے ہیں۔

گورنر ہاؤس پنجاب میں میسحی برادری سے خطاب کرتے ہوئے وزیراعظم نوازشریف نے کہا ہے کہ حضرت عیسیٰ کی تعلیمات پوری دنیا کیلئے مشعل راہ ہیں، تمام مذاہب امن سلامتی اور محبت کا درس دیتے ہیں۔

وزیراعظم نے کہا کہ پاکستان میں بعض عناصرمذہب کو ذاتی مفاد کےلئے استعمال کررہے ہیں، مذہبی منافرت پھیلانے والوں کا راستہ روکنا ہوگا، انھوں نے کہا کہ مذہبی بنیاد پرشہریوں میں امتیاز رکھنا پاکستانی آئین کےخلاف ہے۔

جب جہالت دہشت گردی اور غربت کا کوئی مذہب نہیں تو علم امن اور خوشحالی کے لئے مذہب کو کیوں دیکھا جائے، مسیحی برادری سے اظہار یکجہتی کے لئے وزیراعظم نوازشریف نے کرسمس کا کیک کاٹا اور میسحی برادری کو پیشگی مبارکباد بھی دی، تقریب میں مسیحی برادری کے رہنما اور صوبائی وزراء بھی شریک تھے۔
       

سابق صدر پرویز مشرف نے اپنے خلاف غداری کیس کی خصوصی عدالت میں سماعت کو اسلام آباد ہائیکورٹ میں چیلنج کردیا ہے۔

انہوں نے خالد رانجھا ایڈووکیٹ کے ذریعے درخواست میں موقف اختیار کیا ہے کہ ان کے خلاف مقدمہ کی سماعت بنیادی انسانی حقوق کی خلاف ورزی ہوگی۔

واضح رہے کہ خصوصی عدالت نے پرویز مشرف کو24 دسمبر کو طلب کر رکھا ہے، درخواست میں موقف اختیا ر کیا گیا ہے کہ پرویز مشرف نے 3نومبر 2007 کو ایمرجنسی کے نفاذ کا فیصلہ تنہا نہیں کیا تھا بلکہ اس کیلئے ضروری مشاورت کی گئی تھی۔

اس لئے صرف ان کے خلاف مقدمہ چلانا انصاف کے تقاضوں کے منافی ہے۔ درخواست میں سیکرٹری داخلہ،سیکرٹری دفاع اور خصوصی عدالت کو فریق بنایا گیا ہے۔