Category: اہم ترین

پاکستان نے عالمی عدالت میں کشن گنگا ڈیم کیس جیت لیا، عالمی عدالت نے مقبوضہ کشمیر میں بھارت کی جانب سے زیر تعمیر کشن گنگا ہائیڈرو الیکٹراک پروجیکٹ کے ڈئزاین پر پاکستان کے اعتراض کو تسلیم کرلیا ہے۔

ہیگ کی عالمی عدالت نے کشن گنگا ہائیڈرو الیکٹراک پروجیکٹ کے ڈیزائن میں تبدیلی کے پاکستان کے موقف کو تسلیم کرتے ہوئے بھارت کو منصوبے کے نقشے میں تبدیلی کی ہدایت کی ہے۔

عدالت نے بھارت کو نو کیوبک فٹ پانی فی سیکنڈ چھوڑنے کی ہدایت بھی کی ہے، ہیگ کی عالمی عدالت نے رواں سال کے شروع میں اس تنازعے کا عبوری فیصلہ سنایا تھا، جس میں پاکستانی موقف کو تسلیم کیا گیا تھا۔

عدالت نے حتمی فیصلے سے قبل بھارت اور پاکستان سے پانی کے بہاؤ اور متعلقہ ماحولیاتی پہلوؤں کی مکمل تفصیل طلب کی تھی، جس کی بنیاد پر حتمی فیصلہ جاری کیا گیا، تین سو تیس میگا واٹ کا یہ ڈیم مقبوضہ کشمیر میں تعمیر کیا جانا تھا۔
   

سپریم کورٹ کے دو ہزار بارہ کے فیصلے کی روشنی میں ایف آئی اے نے اصغر خان کیس کی تحقیقات کا با قاعدہ آغاز کردیا اور ایف آئی اے نے کیس کے محرک اصغر خان کا بیان ریکا رڈ کرلیا ہے۔

سپریم کورٹ کے اصغرخان کیس پر فیصلے کے ایک سال کے بعد ایف آئی اے نے تحقیقات کا با قاعدہ آغاز کردیا ہے اور اصغر خان نے ایف آئی اے کو اس ضمن میں اپنا بیان ریکارڈ کرادیا ہے۔

سپریم کورٹ نے گزشتہ سال اکتوبر میں اصغرخان کیس کا فیصلہ سناتے ہوئے کہا تھا کہ انیس سو نوے کے انتخابات میں دھاندلی کے لیے اس وقت کے آرمی چیف اور ڈی جی آئی ایس آئی نے سیاستدانوں میں رقوم تقسیم کی تھیں۔

سپریم کورٹ نے اپنے فیصلے میں اُس وقت کے صدر سے متعلق کہا تھا کہ غلام اسحاق خان نے ایوانِ صدرمیں جو سیاسی سیل قائم کیا وہ غیر آئینی اورغیر قانونی تھا، عدالت نے اپنے فیصلے میں لکھا تھا کہ صدر وفاق کی علامت ہے اور وہ کسی گروہ یا جماعت کی حمایت نہیں کرسکتا۔

ایف آئی اے کو ابھی سابق آرمی چیف اسلم بیگ اور مہران بینک اسکینڈل کے مرکزی کردار یونس حبیب کا بیان بھی ریکارڈ کرنا ہے، سپریم کورٹ نے اس کیس کا فیصلہ کرنے میں سولہ سال کا وقت لیا تھا، دیکھنا ہے کہ اب ایف آئی اے اس تحقیقات میں کتنا وقت لیتی ہے۔

وفاقی وزیر داخلہ چودھری نثار علی خان نے کہا ہے کہ قومی اسمبلی اور سینٹ کی کاروائی کسی کی مرضی اور تعصب کے تحت نہیں قانون اور ضابطے کے مطابق چلے گی۔

قومی اسمبلی میں خطاب اور میڈیا سے گفتگو کرتے ہوئے چودھری نثار نے کہا کہ لفظ تماشا پارلیمانی تاریخ میں سینکڑوں بار استعمال ہو چکا ہے یہ کوئی غیر پارلیمانی لفظ نہیں جو واپس لیا جائے انہوں نے کہا کہ ماضی میں اس لفظ پر کوئی اعتراض نہیں کیا گیا اپوزیشن اسمبلی کو یر غمال اور ہائی جیک کر نا چاہتی ہے۔

ان کا کہنا تھا کہ حکومت بلیک میل ہو گی نہ اسمبلی کی کاروائی ہائی جیک ہو نے دے گی چودھری نثار نے کہا کہ دھرنے الیکشن کمیشن اور سپریم کورٹ کے معاملات یہ تحریک انصاف کا تماشا نہیں تو اور کیا ہے ان کا کہنا تھا کہ اپوزیشن ٹی اے ڈی اے بھی لے رہی ہے اور بائیکاٹ بھی کر رہی ہے اپوزیشن کو عوامی مسائل سے کوئی غرض نہیں ہے۔

چیف آف آرمی اسٹاف جنرل راحیل شریف اور چیئرمین جوائنٹ چیفس آف اسٹاف کمیٹی جنرل راشدمحمود کو نشان امتیاز سے نوازا گیا ہے۔

چیئرمین جوائنٹ چیفس اورآرمی چیف کو نشان امتیازملٹری دینے کی تقریب اسلام آباد میں منقعد ہوئی، جس میں صدرممنون حسین اور وزیراعظم نواز شریف کے علاوہ مسلح افواج کےسربراہان اوروفاقی وزرا شریک ہوئے۔
    
   

دفترخارجہ نے کہا ہے کہ بنگلہ دیش کو ماضی کو بھول کر آگے بڑھنا چاہیئے، عراق میں ہونے والے بس حملے میں کوئی پاکستانی ہلاک نہیں ہوا۔

ہفتہ وار پریس بریفنگ کے دوران ترجمان دفتر خارجہ تسنیم اسلم نے کہا کہ امید ہے بنگلہ دیش انیس سو چوہترکے معاہدے کے تحت مفاہمت کی پالیسی اپنائے گا، پاکستان کی پارلیمنٹ میں ایک خود مختار ادارہ ہے، پارلیمنٹ میں بنگلہ دیش میں جماعت اسلامی کے لیڈر کو پھانسی دیئے جانے کی مذمتی قرارداد یہ جذبہ ظاہر کرتا ہے کہ بنگلہ دیش کو ماضی کو بھول کر آگے بڑھنا چاہیے۔

پاکستان کی امداد کو نیٹو سپلائی سے مشروط کرنے پر میڈیا کی رپورٹ سے متعلق ترجمان نے کہا کہ امریکا نے اس بارے میں آگاہ نہیں کیا، پاکستان کسی قسم کی شرائط قبول نہیں کرے گا، پاکستان نے بے پناہ قربانیاں دی ہیں اور پاکستان کی نیت پر شک نہیں کیا جانا چاہیے، ترجمان نے کہا کہ عراق میں ہونے والے بس حملے میں کوئی پاکستانی ہلاک نہیں ہوا۔

ترجمان کا کہنا تھا پاک بھارت ڈی جی ایم اوز 24 دسمبر کو ملاقات کرینگے، پاکستان نے تجویز دی تھی کہ ملاقات میں دفتر خارجہ کے حکام بھی شامل ہوں لیکن انہوں نے یہ تجویز نہیں مانی۔
       

وزارت داخلہ کی جانب سے سینیٹ میں لاپتا افراد کیسز کے حوالے سے تحریری جواب جمع کرا دیا گیا ہے، وزارت داخلہ کے مطابق ملک میں لاپتہ افراد کیسز کی تعداد چودہ سو اٹھائیس ہے۔

لاپتہ افراد سے متعلق وزارت داخلہ سینیٹ میں جمع کرائے گئے تحریری جواب کے مطابق ملک میں لاپتہ افراد کیسز کی تعداد چودہ سو اٹھائیس ہے، سپریم کورٹ میں ان کیسز کی تعداد تین سو چار ہے جبکہ لاہور ہائی کورٹ میں لاپتہ افراد کیسز کی تعداد چودہ ہے۔

سندھ ہائی کورٹ میں ان کیسز کی تعداد ایک سو چوہتر ہے، وزارت داخلہ کے اعداد و شمار کے مطابق پشاور ہائی کورٹ میں ایک سو ایک لاپتہ افراد کے کیسز ہیں جبکہ بلوچستان ہائیکورٹ میں کیسز کی تعداد بائیس ہے۔

وزارت داخلہ کے تحریری جواب کے مطابق انکوائری کمیشن میں لاپتہ افراد کی تعداد آٹھ سو تیرہ ہے، خیبر پختونخوا میں سب سے زیادہ افراد لاپتہ ہیں، جن کی تعداد تین سو انسٹھ ہے، سندھ میں لاپتا افراد کی تعداد ایک سو انہتر ہے جبکہ پنجاب میں ایک سو پینسٹھ افراد لاپتہ ہیں۔

انکوائری کمیشن کے مطابق اسلام آباد سے سترہ افراد لاپتہ ہیں میں کے بلوچستان میں لاپتہ افراد کی تعداد اکہتر ہے جبکہ فاٹا اکیس اور آزاد کشمیر میں دس افراد لاپتہ ہیں گلگت بلتستان میں بھی لاپتہ افراد کا ایک کیس ہے، وزارت داخلہ کے مطابق دو ہزارایک سے اب تک اسلام آباد سے بارہ مسخ شدہ لاشیں بھی برآمد ہوئیں۔