Category: اہم ترین

اسلام آباد کی انسداد دہشت گردی عدالت نے ججز نظر بندی کیس میں وزارت داخلہ کو پرویز مشرف کی سکیورٹی سے متعلق مفصل رپورٹ جمع کرانے کی ہدایت کردی۔

ججز نظر بندی کیس کی سماعت انسداد دہشت گردی کی عدالت کے جج عتیق الرحمٰن نے کی، دوران سماعت پرویز مشرف کی سکیورٹی کے حوالے سے رپورٹ جمع کروائی گئی۔

عدالت نے رپورٹ پر آئی جی اسلام آباد کے دستخط نہ ہونے پر رپورٹ دوبارہ جمع کروانے کی ہدایت کر دی جبکہ پرویز مشرف کے ضامن کو بھی طلب کرلیا۔

ضامن نے عدالت کو بتایا کہ پرویز مشرف کو سکیورٹی دینا حکومت کا کام ہے، سیکیورٹی دے دی گئی تو پرویز مشرف عدالت میں پیش ہو جائیں گے، عدالت نے سکیورٹی کے حوالے سے سیکرٹری داخلہ کو طلب کرلیا ہے۔

جس پر وزارت داخلہ کی جانب سے طارق لودھی پیش ہوئے اور استدعا کی کہ انھیں رپورٹ جمع کروانے کیلئے مہلت دی جائے، جس پرعدالت نے نو جنوری تک رپورٹ جمع کروانے کی مہلت دیتے ہوئے سماعت ملتوی کردی۔

وزیراعظم نوازشریف نے کہا ہے کہ پاکستان اور افغانستان اور انڈیا کے پاس اچھا دوست بننے کے علاوہ کوئی اور آپشن نہیں ہے، پڑوسی تبدیل نہیں ہو سکتے ہم سب نے اکٹھے ہی رہنا ہے۔

ترک ٹیلی ویژن کو انٹرویو دیتے ہوئے وزیراعظم نوازشریف نے پاکستان کے افغانستان سمیت پڑوسی ملکوں سے تعلقات پر کہا ہے کہ وہ اور حامد کرزئی اس بات پر متفق ہیں ایک دوسرے کے خلاف اپنی سرزمین استعمال نہیں ہوگی۔

نوازشریف کا کہنا تھا کہ ہمسائے تبدیل نہیں ہوسکتے، انھوں نے کہا کہ پاکستان، افغانستان اور بھارت کے پاس ایک ہی آپشن ہے کہ وہ اچھے دوست بن جائیں۔

وزیراعظم نوازشریف نے کہا کہ خطے میں امن اور خوشحالی کیلئے ضروری ہے کہ پاکستان افغانستان اور انڈیا تعلقات بہتر کریں اور ایک دوسرے کے خلاف اپنی سرزمین استعمال نہ ہونے دیں۔

نوازشریف نے کہا کہ افغان صدراس پر متفق ہیں کہ انتہا پسندی کے خاتمے کیلئے پاک افغان تعلقات معمول پر آنا اور دہشت گردوں کو مشترکہ دشمن تصور کیا جانے ضروری ہے۔
       

امریکا نے اپنی فوج کے لیے سال دو ہزار چودہ کے مجوزہ بجٹ میں کہا ہےکہ طورخم کے راستے نیٹو سپلائی نہ کھلنے پر پاکستان کودہشت گردی کے خلاف ملنے والی امداد روک دی جائے گی۔

امریکا نے طورخم کے راستے نیٹو سپلائی نہ کھلنے پر پاکستان کی امداد روکنے کی دھمکی دے دی، دوہزار چودہ کے بجٹ میں پاکستان کو امداد نیٹو سپلائی کی بحالی سے مشروط کر دی گئی ہے۔

ایوان نمائندگان نے دفاعی بجٹ تجاویز کی منظوری دے دی ہے، اب سینیٹ سے منظوری لی جائے گی، مشروط امداد کے تحت کہا گیا ہے کہ امریکی وزیر دفاع سے فوجی سامان کی محفوظ ترسیل کی ضمانت کے بغیر رقم جاری نہیں کی جائے۔

امریکا کے دفاعی بجٹ میں پاکستان کو امداد میں ایک سال توسیع کی تجویز ہے مگر مجموعی مالیت کم کر دی گئی ہے، فوجی بجٹ میں پاکستان کو امداد کیلئے نئی شرائط بھی رکھی گئی ہیں، اب القاعدہ، تحریک طالبان پاکستان اور حقانی نیٹ ورک اور کوئٹہ شوریٰ طالبان کے خلاف کاروائی پر کانگریس کا اطمینان ضروری ہوگا۔

کانگریس کو یہ یقین بھی دلانا ہوگا کہ پاکستانی سرحد کے اندر امریکی یا افغان فوج پر ہونے والے حملوں کو روکنے کے لیے اسلام آباد مؤثر قدم اٹھا رہا ہے، ساتھ ہی امریکی فوجی امداد کے درست استعمال کے شواہد بھی پیش کرنا ہوں گے۔

حضرت امام حسین کے چہلم کے موقع پر ملک بھر میں سیکیورٹی سخت کی جا رہی ہے، کئی شہروں میں موٹرسائیکل کی ڈبل سواری اور موبائل فون سروس بند رہے گی۔

حضرت امام حسین اور شُہدائے کربلا کے چہلم کے موقع پر کسی ناخوشگوار واقعے سے بچنے کیلئے ملک بھر میں سیکورٹی کے سخت انتظامات کیے جارہے ہیں، چہلم امام حسین کے موقع پر اسلام آباد میں تمام اہم امام بارگاہوں اورمساجد پرسکیورٹی بڑھا دی گئی ہے ، فوج تیار حالت میں رہے گی اور پولیس کے تین ہزاراہلکارتعینات ہونگے۔

اس موقع پر سندھ میں سیکورٹی انتظامات کا جائزہ لینے کیلئے صوبائی سیکرٹری داخلہ کی زیر صدارت اہم اجلاس ہوا، جس میں فیصلہ کیا گیا کہ کراچی اور حیدرآباد سمیت صوبے کے چھ شہروں میں موٹرسائیکل کی ڈبل سواری پر پابندی عائد کی جائے گی اور اہم شہروں میں موبائل سروس بند کرنے اور فوج کو اسٹینڈ بائی رہنےکیلئے وزارت دفاع کو خط لکھا جائے گا۔

سی سی پی او لاہور چوہدری شفیق کے مطابق میں چہلم حضرت امام حسین، حضرت داتا گنج بخش کے عرس اور کرسمس کے لئے سکیورٹی کے لئے انتظامات مکمل کرلئے گئے ہیں، اس موقع پر موٹرسائیکل کی ڈبل سواری پر پابندی رہے گی جبکہ موبائل فون سروس کی بندش کا فیصلہ چہلم سے ایک روز پہلے کیا جائے گا۔

فیصل آباد میں ڈویژنل انٹیلی جنس کمیٹی کے اجلاس میں چہلم محرم اور کرسمس سیکیورٹی انتظامات کا جائزہ لیا گیا۔
    
    
    
    
   

اے آر وائی نیوز کے اینکر مبشر لقمان کو دیئے گئے خصوصی انٹرویو میں سابق صدر پرویز مشرف نےکہا ہےکہ پاکستان سے بھاگوں گا نہیں، مقدمات لڑکر ختم کرنا چاہتا ہوں تاکہ دودھ کا دودھ پانی کا پانی ہوجائے، ضمانت پر رہائی کے بعد پرویز مشرف کا پہلا انٹرویو۔

اے آر وائی نیوز کے اینکر مبشر لقمان کو دیئے گئے خصوصی انٹرویو میں پرویز مشرف کا قریبی ساتھیوں کے ساتھ چھوڑ جانے کے حوالے سے کہنا تھا کہ زندگی میں نشیب و فراز آتے رہتے ہیں، آئندہ بھی اگر موقع ملاتو وہ ہی کرونگا جو ملک کیلئے بہتر سمجھتا ہوں۔

نواز شریف سے اختلاف اپنی جگہ لیکن پاکستان سب سے پہلے ہے، طالبان کے حوالے سے پوچھے گئے سوال پر سابق آرمی چیف نے کہا کہا امن کیلئے بھیک مانگنے پر یقین نہیں رکھتا، پرویز مشرف نے اس خواہش کا اظہار کیا کہ وہ اپنے خلاف دائر تمام مقدمات لڑکر ختم کروانا چاہتے ہیں، سابق صدر پاکستان نے انکشاف کیا کہ میڈیا کو آذاد کرنے کی اُس وقت کے نوے فیصد حکومتی عہدیداروں نے مخالفت کی لیکن میں نے پھر بھی میڈیا کو آذاد کرنے کا فیصلہ کیا۔

  پرویز مشرف دعوی کیاکہ پاکستان میں اصل جمہوریت ہم لیکر آئے، ضلعی حکومتوں کا نظام بناکر عوام کو بااختیار کیا، عورتوں اور اقلیتوں کو حقوق دیئے، ایک سوال پر اُن کا کہنا تھاکہ ایک بڑے چینل کے معروف اینکر نے کہا کہ آپ لال مسجد پر حملہ کیوں نہیں کررہے۔

پرویز مشرف نے ماضی میں کئے گئے اپنے کئی متنازعہ فیصلوں کے حوالے سے کہا کہ جوکچھ کیا پاکستان اور عوام کیلئے کیا، ملک میں جاری دہشت گردی کے حوالے سے سابق آرمی چیف نے دو ٹوک الفاظ میں کہا کہ فرقہ وارانہ،،بلوچستان میں شورش اور طالبان کے حملے ان سب میں بیرونی ہاتھ ملوث ہے اور اس کا مقابلہ پورے ملک کو مل کر کرنا ہوگا۔

وزیراعظم محمد نوازشریف نے کہا ہے کہ پاکستان ترکی کے ساتھ اپنے تعلقات کو خصوصی اہمیت دیتا ہے۔ ترکی کے ساتھ تجارت کا حجم دگنا کرنے کیلئے تمام ترکوششیں بروکار لائی جائیں گی۔

  ترک وزیر خارجہ احمد د اوگلو نے ایوان وزیراعظم میں وزیراعظم نواز شریف سے ملاقات کی ملاقات میں دوطرفہ تعلقات اور علاقائی امور پر تبادلہ خیال ہوا وزیراعظم نے اس موقع ترکی کے ساتھ برادرانہ تعلقات کو پاکستان کی جانب سے دی جانے والی اہمیت کا اعادہ کیا ۔

وزیراعظم نے کہا کہ پاکستان اور ترکی علاقائی اور عالمی سیاست میں یکساں وژن رکھتے ہیں ۔ ہم ترکی کے ساتھ تجارت کا حجم دگنا کرنے کیلئے کوششیں کریں گے وزیراعظم نے کہا کہ پاکستان میں غیر ملکی سرمایہ کاری کے تحفظ کیلئے مضبوط جمہوریت ‘ فعال عدلیہ اور سرگرم ذرائع ابلاغ موجود ہیں۔

ترکی وزیر خارجہ نے کہا کہ برادر ملک پاکستان کو بین الاقوامی تعلقات میں ہر ممکن حمایت فراہم کریں گے انہوں نے کہا کہ پاکستان ابھرتی ہوئی اقتصادی قوت اور تابناک مستقبل کا حامل ملک ہے ۔اقتصادی اور مستحکم جمہوریت کی حیثیت سے پاکستان صحیح سمت میں گامزن ہے ۔

انہوں نے کہا کہ وزیراعظم طیب اردوان قریبی اقتصادی روابط کے قیام کے لئے ایک بہت بڑے کاروباری وفد کے ساتھ پاکستان آرہے ہیں ۔انہوں نے کہا کہ ترکی اقتصادی خوشحالی کی شاہراہ پر پاکستان کا شراکت دار بننے کیلئے تیار ہے ۔

سپریم کورٹ نے کامران فیصل قتل کیس کی تحقیقات کیلئے نئی مشترکہ تفتیشی کمیٹی اور نیا میڈیکل بورڈ تشکیل دینے کا حکم دیدیا۔

عدالت نے حکم دیا ہے کہ نئی تفتیشی ٹیم کی سربراہی اے آئی جی کریں گے جبکہ نیا میڈیکل بورڈ سینئر اسپیشلسٹ ڈاکٹر ز پر مشتمل ہو گا۔

عدالت نے یہ احکامات کامران فیصل کے والد کے وکیل کی جانب سے تفتیشی ٹیم اور میڈیکل بورڈ پر عدم اعتماد اور اٹھائے گئے اعتراضات کی بنیاد پر کیا ۔

عدالت نےکامران فیصل کے وکیل کی جانب سے نئی ایف آئی آر کے اندراج کی درخواست مستر دکر دی۔