Category: اہم ترین

چین نے پاکستانی معیشت کو استحکام دینے اور زرمبادلہ کے ذخائر کو فروغ دینے کے لیے پاکستان کو 3.4 ارب سے زائد ڈالر کے کمرشل قرضے رول اوور کر دیے۔

خبر ایجنسی رائٹرز کے مطابق چین نے اسٹیٹ بینک کے پاس 3سال سے جمع 2.1 ارب ڈالر رول اوور کیا جب کہ پاکستان کا مزید 1.3 ارب ڈالر کا کمرشل قرض رول اوور کیا۔

خبر ایجنسی کا کہن اہے کہ مشرق وسطیٰ کےکمرشل بینک سے ایک ارب ڈالر موصول ہوئے ہیں اور کثیرجہتی ذرائع سے 50کروڑ ڈالر مزید موصول ہوئے ہیں۔

رول اوور اور نئے کمرشل قرض ملنے سےملکی زرمبادلہ ذخائر 14 ارب ڈالر ہو جائیں گے۔ 7ارب ڈالر بیل آؤٹ پروگرام سے پاکستانی معیشت کو استحکام ملا ہے۔

آئل اینڈ گیس ریگولیٹری اتھارٹی (اوگرا) نے بلک صارفین، پاور سیکٹر اور انڈسٹری کےلیے گیس کی قیمتوں میں اضافہ کر دیا۔

اوگرا کی جانب سے جاری نوٹیفکیشن کے مطابق گیس کی قیمتوں میں  یکم جولائی سے اضافے کا فیصلہ کیا گیا ہے۔

گھریلو صارفین کے لئے صرف ماہانہ فکسڈ چارجز میں اضافہ کیا گیا ہے۔

گھریلوصارفین، کمرشل، کیپٹیو، سی این جی کیلئے گیس کی قیمتیں تبدیل نہیں کی گئیں۔ سی این جی، سیمنٹ اور کھاد کیلئے بھی گیس کی قیمتوں میں ردوبدل نہیں کیا گیا۔

گزشتہ روز وزیرخزانہ محمد اورنگزیب کی زیر صدارت اقتصادی رابطہ کمیٹی کا اجلاس ہوا، جس میں گھریلو صارفین کیلئےگیس کی قیمتیں برقرار رکھنے اور فکسڈ چارجز میں اضافے کا فیصلہ کیا گیا۔

ذرائع کا کہنا ہے پروٹیکٹڈ صارفین کے فکسڈ چارجز 400 سے بڑھا کر 450 روپے ماہانہ جبکہ نان پروٹیکٹڈ صارفین کے فکسڈ چارجز ایک ہزار سے بڑھا کر 1400 روپے کردیے گئے۔

ایک اعشاریہ پانچ کیوبک میٹر سے زائد گیس استعمال کرنے والوں کے فکسڈ چارجز 2 ہزار سے بڑھاکر 2400 روپے کردیے گئے۔

ذرائع کے مطابق گیس پر چلنے والے پاور پلانٹس اور صنعتی صارفین کے لیے قیمتوں میں دس فیصد اضافہ کی منظوری دے دی گئی۔

اسلام آباد: صدر مملکت آصف علی زرداری نے اسلام آباد ہائیکورٹ کے ججز کی سینیارٹی کا تعین کر دیا جس میں جسٹس سرفراز ڈوگر سینئر ترین جج قرار دیے گئے۔

صدر مملکت آصف علی زرداری کی جانب سے سپریم کورٹ کے فیصلے کی روشنی میں سینیارٹی فہرست جاری کی گئی جس میں جسٹس سرفراز ڈوگر، جسٹس خادم حسین سومرو اور جسٹس محمد آصف کا مستقل تبادلہ کیا گیا۔

آصف علی زرداری نے اسلام آباد ہائیکورٹ کے ججز کی سنیارٹی کا جائزہ لیا اور جسٹس سرفراز ڈوگر کو سنیارٹی میں اول قرار دیا۔

یہ بھی پڑھیں: سپریم کورٹ کے ججز کو بیرون ملک جانے کیلئے چیف جسٹس سے این او سی لینا ہوگا

انہوں نے تینوں ججز کو مستقل طور پر اسلام آباد ہائیکورٹ منتقل کر دیا۔ ہائیکورٹ میں جسٹس سرفراز ڈوگر پہلے اور جسٹس محسن اختر کیانی کا دوسرا نمبر ہے جبکہ جسٹس میاں گل حسن اورنگزیب سنیارٹی میں تیسرے نمبر پر آگئے۔

اس حوالے سے نوٹیفکیشن بھی جاری کر دیا گیا۔

ججز ٹرانسفر کیس کا فیصلہ

19 جون 2025 کو سپریم کورٹ نے ججز ٹرانسفر کیس کا فیصلہ سناتے ہوئے کہا کہ ججز کا تبادلہ غیر آئینی نہیں۔ کیس کا فیصلہ جسٹس محمد علی مظہر نے پڑھ کر سنایا جو 2-3 کے تناسب سے تھا۔

جسٹس محمد علی مظہر، جسٹس شاہد بلال، جسٹس صلاح الدین پنہور نے اکثریتی فیصلہ سنایا جبکہ جسٹس نعیم افغان اور جسٹس شکیل احمد نے اکثریتی فیصلے سے اختلاف کیا۔

فیصلے میں ججز سینیارٹی کا معاملہ صدر پاکستان کو واپس ریمانڈ کیا گیا۔ فیصلے میں کہا گیا کہ ججز تبادلے کیلیے صدر پاکستان کا اختیار باقاعدہ طریقہ کار کے تحت استعمال ہوتا ہے، وہ ججز کا تبادلہ متعلقہ جج، چیف جسٹس پاکستان کی مشاورت سے کرتے ہیں۔

آئین کے آرٹیکل 200 اور 175 دونوں علیحدہ ہیں، آرٹیکل 200 صدر مملکت کو ٹرانسفر کا اختیار دیتا ہے، سنیارٹی کے فیصلے تک جسٹس سرفراز ڈوگر بطورقائمقام چیف جسٹس فرائض جاری رکھیں گے، آئین کے آرٹیکل 175 ججز کی جوڈیشل کمیشن کے ذریعے تقرری سے متعلق ہے۔

شمالی وزیرستان میں فورسز کے قافلے پر دہشت گردوں کے حملے میں 13 جوان شہید ہوگئے جوابی کارروائی میں 14 خوارج ہلاک ہوگئے۔

پاک فوج کے شعبہ تعلقات عامہ (آئی ایس پی آر) کے مطابق شمالی وزیرستان کے علاقے میر علی میں فورسز کے قافلے پر دہشت گردوں نے حملہ کیا جس کے نتیجے میں 13 جوان شہید ہوگئے۔

ترجمان پاک فوج کا کہنا ہے کہ شہدا میں صوبیدار زاہد اقبال،حوالدار سہراب خان، حوالدار میاں یوسف شامل ہیں۔

آئی ایس پی آر کا بتانا ہے کہ نائیک خطاب شاہ، لانس نائیک اسماعیل، سپاہی روحیل، سپاہی محمد رمضان، سپاہی نواب، سپاہی زبیر احمد، سپاہی محمد سخی، سپاہی ہاشم عباسی، سپاہی مدثر اعجاز، سپاہی منظر علی شہدا میں شامل ہیں۔

بھارتی حمایت یافتہ فتنہ الخوارج کی بزدلانہ کارروائی میں دو بچے اور خاتون شدید زخمی ہوئے۔

ترجمان پاک فوج کا کہنا ہے کہ خودکش بم بار نے دھماکا خیز مواد سے بھری گاڑی قافلے سے ٹکرائی تھی، جوابی کارروائی میں 14 خوارج مارے گئے۔

آئی ایس پی آر کا کہنا ہے کہ سیکیورٹی فورسز بھارتی حمایت یافتہ دہشت گردوں کے خاتمے کے لیے پرعزم ہے، بہادر جوانوں اور شہریوں کی قربانیاں ہمارے عزم کو تقویت دیتی ہیں۔

فیلڈ مارشل عاصم منیر کا کہنا ہے کہ اگر دشمن ہماری خود مختاری کو چیلنج کرتا ہے تو نتائج کی ذمہ داری اسی پر ہوگی۔

پی این ایس رہبر میں پاسنگ آؤٹ پریڈ سے خطاب کرتے ہوئے فیلڈ مارشل عاصم منیر نے کہا کہ بھارت کی اشتعال انگیزیوں کے باوجود پاکستان نے صبرو تحمل کا مظاہرہ کرتے ہوئے امن کو ترجیح دی۔

انہوں نے کہا کہ آج پاکستان خطے میں ’نیٹ ریجنل اسٹیبلائزر‘ کے طور پر جانا جاتا ہے، اگر دشمن یہ سمجھے کہ آئندہ پاکستان اپنی خود مختاری پر حملے برداشت کرے گا تو یہ ایک خطرناک غلط فہمی ہوگی۔

فیلڈ مارشل نے کہا کہ دنیا کو سمجھ لینا چاہیے مسئلہ کشمیر کے حل تک جنوبی ایشیا میں پائیدار امن قائم نہیں ہوسکتا، پاکستان یو این قراردادوں کے مطابق مسئلہ کشمیر کے حل کا حامی ہے، کشمیری عوام کی خواہشات کے مطابق مسئلہ کشمیر حل کرنے کے حامی ہیں۔

آرمی چیف نے کہا کہ پاکستان دہشت گردی کے خلاف جنگ میں کامیابی کے قریب ہے، بھارت جان بوجھ کر خطے میں کشیدگی پیدا کررہا ہے، ملک کو دہشت گردی کے خلاف ہمیشہ نجات دلائیں گے۔

عاصم منیر نے کہا کہ پاکستان ہر حال میں اپنی خود مختاری، قومی مفادات کا دفاع کرے گا، اس میں کسی قسم کی جھجک نہیں دکھائے گا۔

کیڈیٹس کو مخاطب کرتے ہوئے انہوں نے کہا کہ آپ پاک بحریہ کا حصہ بننے جارہے ہیں جس کی پہچان اعلیٰ عسکری اخلاقیات ہیں، پاک بحریہ کی پہچان غیرمعمولی مہارت اور بے مثال پیشہ ورانہ روایات ہیں، اپنی آپریشنل صلاحیتوں کو مزید بہتر اور مضبوط بنانے کے لیے کوششیں جاری رکھیں۔

وفاقی وزیر اطلاعات عطا تارڑ کا کہنا ہے کہ سوات میں ریسکیو کے لیے ہیلی کاپٹر کو استعمال نہیں کیا گیا جو عمران خان بھی استعمال کرتے رہے ہیں۔

اسلام آباد میں نیوز کانفرنس کرتے ہوئے وزیر اطلاعات عطا تارڑ نے کہا کہ سیاح چیخ و پکار کرتے رہے لیکن 8 گھنٹے گزرنے کے باوجود کوئی مدد کو نہ آیا، یہ لوگ اسلام آباد میں آکر چڑھائی کرتے ہیں یہ کوئی بہادری نہیں کارنامہ تو تب ہوتا کے پی میں بہترین ریسکیو سسٹم ہوتا۔

انہوں نے کہا کہ علی امین کا اصل کام اسلام آباد پر چڑھائی، لوگوں کو ڈنڈے فراہم کرنا ہے، یہ لوگ اسلام آباد پر چڑھائی کرکے اہلکاروں کو شہید اور توڑ پھوڑ کرتے ہیں، سوات میں سیاحوں کی موت نہیں ہوئی بلکہ پی ٹی آئی نظام کی موت ہوئی ہے۔

عطا تارڑ نے کہا کہ پی ٹی آئی 12 سال میں ریسکیو آلات بھی خرید نہ سکی، پی ٹی آئی کارکردگی کو دکھا نہیں سکی لیکن کم از کم اپنا منہ تو بند رکھیں۔

وزیر اطلاعات نے کہا کہ صوبائی حکومت نے واقعے پر ڈی سی سوات کو معطل کیا، سانحہ سوات پر ڈی سی کے بجائے وزیر اعلیٰ کے پی کو معطل کیا جائے۔

انہوں نے کہا کہ وزیر اعلیٰ کے پی کہتے ہیں میرا کام خیمے دینا نہیں، علی امین گنڈا پور نے اپنا کیمپ آفس اڈیالہ جیل کو بنایا ہوا ہے، عوام نے انہیں خدمت کے لیے مینڈیٹ دیا تھا لیکن خیبرپختونخوا میں ورک فرام اڈیالہ چل رہا ہے۔

وزیر اطلاعات نے کہا کہ پی ٹی آئی نے 12 سال میں کے پی کا انفرا اسٹرکچر تباہ کردیا۔