Category: اہم ترین

نائب وزیراعظم اسحاق ڈار کا کہنا ہے کہ اسرائیلی جارحیت سے عالمی امن کو خطرہ ہے۔

اسلامی تعاون تنظیم وزرائے خارجہ کونسل اجلاس سے خطاب کرتے ہوئے نائب وزیراعظم اسحاق ڈار نے کہا کہ اسرائیلی جارحیت سے خطے کے امن کو شدید خطرات لاحق ہیں، پاکستان ایران کے دفاعی موقف کی بھرپور حمایت کرتا ہے۔

انہوں نے کہا کہ عالمی برادری اسرائیلی جارحیت روکنے کے لیے فوری اقدامات کرے۔

نائب وزیراعظم نے کہا کہ ایرانی خود مختاری پر حملہ عالمی قوانین کی کھلی خلاف ورزی ہے، غزہ میں بھی اسرائیلی مظالم ناقابل برداشت ہوچکے ہیں۔

اسحاق ڈار کا کہنا تھا کہ فلسطینیوں پر ظلم رکوانا امت مسلمہ کی مشترکہ ذمہ داری ہے، پاکستان فلسطینی ریاست کے قیام کی حمایت جاری رکھے گا، اسرائیلی جارحیت کی وجہ سے خواتین اور بچوں سمیت ہزاروں افراد شہید ہوچکے ہیں، غزہ میں فوری اور غیر مشروط جنگ بندی کا مطالبہ کرتے ہیں۔

ان کا کہنا تھا کہ امت مسلمہ کو مختلف چیلنجز درپیش ہیں جن سے نمٹنے کے لیے مل کر کام کرنا وقت کی ضرورت ہے، اسلامو فوبیا کی روک تھام کے لیے ہم سب کو مل کر اقدامات کرنا ہوں گے۔

اسحاق ڈار کا کہنا تھا کہ بھارت کی جانب سے پاکستان کے حصے کا پانی روکنا کسی صورت قبول نہیں، مسئلہ کشمیر کا اقوام متحدہ کی قراردادوں کے مطابق حل چاہتے ہیں، خطے میں پائیدار امن کے لیے مسئلہ کشمیر کا حل ناگزیر ہے۔

نائب وزیراعظم اسحاق ڈار کی ترک صدر رجب طیب اردوان سے اہم ملاقات ہوئی ہے۔

اے آر وائی نیوز کے مطابق ترک صدر رجب طیب اردوان سے اسحاق ڈار کی ملاقات 51ویں او آئی سی وزارئے خارجہ اجلاس کے موقع پر ہوئی جس میں فیلڈ مارشل عاصم منیر اور ترک وزیر خارجہ بھی موجود تھے۔

ملاقات میں دونوں ممالک کے تعلقات کو مزید وسعت دینے کے عزم کا اعادہ کیا گیا۔

ترک و پاکستانی قیادت نے اسرائیلوں حملوں کی شدید مذمت کی، قیادت نے ایران کی خود مختاری اور دفاع کے حق کی حمایت کا اعادہ کیا۔

اسحاق ڈار کا کہنا ہے کہ وزیراعظم شہباز شریف کی نیک تمنائیں ترک صدر ترک پہنچائیں، پاکستان ترکیہ کے ساتھ برادرانہ تعلقات کو انتہائی اہمیت دیتا ہے۔

انہوں نے کہا کہ ترک صدر کو او آئی سی یوتھ فورم ایوارڈ پر مبارک باد پیش کرتے ہیں، او آئی سی اجلاس کے کامیاب انعقاد پر ترک قیادت کو خراج تحسین پیش کرتے ہیں۔

ترک و پاکستانی قیادت کا کہنا تھا کہ عالمی برادری غزہ میں فوری جنگ بندی اور امداد رسائی یقینی بنائے، غزہ میں اسرائیلی جارحیت فوری بند کی جائے، انسانی امداد کی بلا روک ٹوک فراہمی ناگزیر ہے۔

وزیراعظم شہباز شریف کا کہنا ہے کہ پاکستان مشرق وسطیٰ میں امن کے لیے مثبت کردار ادا کرنے کو تیار ہے۔

وزیراعظم شہباز شریف اور امریکی وزیر خارجہ کی ٹیلیفونک گفتگو ہوئی، شہباز شریف نے ٹرمپ کی قیادت کو جرأتمندانہ قرار دیا اور پاک بھارت سیز فائر میں امریکی سفارتی کرادار کو سراہا۔

شہباز شریف نے کہا کہ جنوبی ایشیا میں امن کے لیے پاکستان بھارت مذاکرات ضروری ہیں، جموں و کشمیر، پانی، تجارت اور دہشت گردی پر مذاکرات ناگزیر ہیں۔

انہوں نے کہا کہ ایران اسرائیل تنازع کا حل صرف مذاکرات اور سفارت کاری ہے، پاکستان مشرق وسطیٰ میں امن کے لیے مثبت کردار ادا کرنے کو تیار ہے۔

وزیراعظم نے کہا کہ پاکستان اور امریکا کو تجارت، توانائی، معدنیات، آئی ٹی میں تعاون بڑھانا ہوگا۔

امریکی وزیر خارجہ مارکو روبیو نے پاکستان کی علاقائی امن کی کوششوں کی تعریف کی اور انسداد دہششت گردی کی کوششوں کو سراہا۔

گفتگو میں پاکستان امریکا تعلقات کو عملی اقدامات میں بدلنے پر اتفاق کیا گیا۔

اعلامیے کے مطابق وزیراعظم نے امریکی صدر ٹرمپ کو دورہ پاکستان کی دعوت کو دہرایا اور وزیر خارجہ کو بھی پاکستان آنے کی دعوت دی۔

امریکی وزیر خارجہ نے کہا کہ پاکستان کے ساتھ تمام شعبوں میں تعاون بڑھانے کے خواہاں ہیں، پاکستان ایران سے قریبی تعلقات کے باعث اہم کردار ادا کرسکتا ہے۔

راولپنڈی: فوج کے شعبہ تعلقات عامہ (آئی ایس پی آر) نے امریکی صدر ڈونلڈ ٹرمپ اور فیلڈ مارشل عاصم منیر کی ملاقات کا اعلامیہ جاری کر دیا گیا۔

آئی ایس پی آر کے مطابق امریکی صدر ڈونلڈ ٹرمپ اور فیلڈ مارشل عاصم منیر کے درمیان اعلیٰ سطحی ملاقات وائٹ ہاوٴس کے اوول آفس میں ہوئی، قبل ازیں امریکی صدر نے سپہ سالار کے اعزاز میں کیبنٹ روم میں ظہرانہ دیا۔

امریکا کی طرف سے ملاقات میں ڈونلڈ ٹرمپ کے ساتھ سیکریٹری خارجہ مارکو روبیو اور امریکی خصوصی نمائندہ برائے مشرق وسطیٰ سٹیو ویٹکوف موجود تھے جبکہ فیلڈ مارشل عاصم منیر کے ساتھ نیشنل سکیورٹی ایڈوائزر ملاقات میں موجود تھے۔

یہ بھی پڑھیں: فیلڈ مارشل عاصم منیر سے ملاقات میرے لیے اعزاز ہے، ڈونلڈ ٹرمپ

آرمی چیف نے پاکستان اور پاکستان کی عوام کی جانب سے پاکستان اور انڈیا کے درمیان جنگ بندی میں مثبت اور نتیجہ خیز کردار ادا کرنے پر امریکی صدر کا شکریہ ادا کیا۔ انہوں نے ڈونلڈ ٹرمپ کی اقوام عالم کو در پیش متعدد چیلنجز کو سمجھنے اور اْن سے نبرد آزما ہونے کی قائدانہ صلاحیتوں کی تعریف کی۔

امریکی صدر نے پاکستان اور امریکا کے درمیان انسداد دہشتگردی کی مد میں جاری تعاون اور خطے میں پاکستان کی قیام امن کی کوششوں کو سراہا، امریکا اور پاکستان کے درمیان انسداد دہشتگردی میں تعاون کو جاری رکھنے پر دونوں جانب سے اتفاق کیا گیا۔

ڈونلڈ ٹرمپ نے پاکستان کے ساتھ باہمی مفاد پر قائم مثبت تجارت کے معاہدہ کا اظہار کیا، امریکا اور پاکستان کے درمیان معاشی اور تجارتی تعاون، مائنز اور منرلز، آرٹیفیشیل انٹیلیجینس، انرجی سیکٹر، کرپٹو کرنسی اور دیگر شعبوں میں تعاون بڑھانے کے بارے میں اتفاق ہوا۔

امریکی صدر کے ساتھ فیلڈ مارشل عاصم منیر کی ملاقات کے دوران ایران اسرائیل تنازع پر تفصیلاً گفتگو بھی کی گئی جبکہ ڈونلڈ ٹرمپ نے پاکستانی سپہ سالار کی قائدانہ اور فیصلہ کن صلاحیتوں کو سراہا۔

فیلڈ مارشل عاصم منیر نے صدر ٹرمپ کو حکومت پاکستان کی جانب سے دورہ پاکستان کی دعوت دی، امریکی صدر کے دورے کی تاریخ کا تعین باہمی مشاورت سے ہوگا۔

آئی ایس پی آر کے مطابق اگرچہ ابتدائی طور پر یہ ملاقات ایک گھنٹہ کیلیے طے تھی لیکن بات چیت دو گھنٹے سے زیادہ تک جاری رہی، یہ ملاقات امن، استحکام اور خوشحالی کے مشترکہ مقاصد پر مبنی پاکستان اور امریکا کے درمیان دیرینہ شراکت داری کے فروغ میں ممد و معاون ثابت ہوگی۔