Category: اہم ترین

اسلام آباد : وزیراعظم کے مشیر برائے سیاسی و عوامی امور رانا ثنااللہ کا کہنا ہے کہ محسن پاکستان ڈاکٹر عبدالقدیر خان کو ’ہیرو‘ نہیں کہا جا سکتا۔

تفصیلات کے مطابق وزیراعظم کے مشیر رانا ثنااللہ نے اے آر وائی نیوز کو خصوصی انٹرویو میں کہا بھارت کےخلاف فتح پر فخر کے لمحے کے حق دار تو مسلح افواج ہیں۔

ایٹمی پروگرام کے حوالے سے سیاسی مشیر کا کہنا تھا کہ ایٹمی پروگرام شروع کرنے کا کریڈٹ ذوالفقار علی بھٹو کو جاتا ہے۔

ڈاکٹرعبدالقدیر خان سے متعلق وزیراعظم کے مشیر کا کہنا تھا کہ ڈاکٹرعبدالقدیر خان کوبطورسائنسدان ہمیشہ یادرکھاجائے گا مگر وہ لیڈر نہیں، ڈاکٹرعبدالقدیر خان کو ہیرو نہیں کہا جا سکتا ہے۔

ڈاکٹرعبدالقدیرخان ​​کو حکومتی سطح پر نظر انداز کیے جانے سے متعلق سوال کے جواب پر انھوں نے کہا کہ ڈاکٹر قدیر کو وہ پذیرائی ملتی ہے، جس کے وہ حقدار تھے تاہم پاکستان کےایٹمی قوت بننے کا ہیرو صرف نواز شریف کوقراردیا جا سکتا ہے۔

سیاسی مشیر نے مزید کہا کہ "یہ سمجھنا ضروری ہے کہ کئی ممالک اور سائنسدانوں نے جوہری بم تیار کیے ہیں، اصل کامیابی جوہری تجربہ کرنے اور اپنے ملک کو ایٹمی طاقت قرار دینے میں ہے۔

ان کا کہنا تھا کہ وزیراعظم نواز شریف کی قیادت میں پاکستان نے ایٹمی تجربات کیے، اگر اس دن یہ فیصلہ نہ کیا جاتا تو شاید کبھی ایسا نہ ہوتا۔

انھوں نے مخالفین پر تنقید کرتے ہوئے کہا کہ لوگ حسد اور بغض میں اندھے ہو کر کہتے ہیں نواز شریف دھماکے نہیں چاہتے تھے۔

اسلام آباد : چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے کہا ہے مستقبل میں اگر پاک بھارت جنگ ہوئی تو وہ متنازع علاقہ تک محدود نہیں رہے گی۔

تفصیلات کے مطابق چیئرمین جوائنٹ چیفس آف اسٹاف کمیٹی جنرل ساحر شمشاد مرزا نے رائٹرز کو اںٹرویو دیتے ہوئے کہا کہ دونوں ممالک کی فوجیں 22 اپریل سےپہلی کی پوزیشن پر واپس آرہی ہیں ۔تاہم مستقبل میں کشیدگی کا امکان برقرار ہے۔

چیئرمین جوائنٹ چیفس آف اسٹاف کمیٹی کا کہنا تھا کہ ماضی میں کشیدگی صرف متنازع علاقوں تک محدود رہتی تھی لیکن اس بار بھارت نے پہلے شہروں کو نشانہ بنایا اور پھربین الاقوامی سرحد اور لائن آف کنٹرول پر جارحیت کی، یہ انتہائی خطرناک ہے۔

انھوں نے خبردار کیا کہ مستقبل میں پاک بھارت جنگ متنازع علاقے تک محدود نہیں رہے گی۔

چیئرمین جوائنٹ چیفس آف اسٹاف کمیٹی نے کہا کہ بھارت نے پہلگام حملے کے 24 گھنٹےمیں ہی سندھ طاس معاہدہ معطلی کا اعلان کیا، یہ فیصلہ بغیر کسی ثبوت کے آیا، پاکستان نے آزاد تحقیقات کی پیشکش کی لیکن اس کے باوجود بھارت نے یہ قدم اٹھایا۔

انھوں نے بتایا کہ اس دوران جوہری ہتھیاروں کی جانب پیش رفت نہیں ہوئی، لیکن حالات میں سنگینی ضرور موجود تھی، مستقبل میں جارحیت ہوئی تو متنازع علاقوں کیساتھ دونوں ممالک متاثرہوسکتے ہیں،۔

جنرل ساحر شمشاد کا کہنا تھا کہ شنگری لا فورم پر بھارتی چیف آف ڈیفنس اسٹاف سےملاقات کا ارادہ نہیں، دونوں ممالک میں کشیدگی کے خاتمے کیلئےبیک ڈوررابطے یا غیررسمی بات نہیں ہوئی۔

انھوں نے مزید کہا کہ یہ جارحانہ کشیدگی تھی جس کی شدت میں اب کمی آگئی ہے۔

اسلام آباد : صدر مملکت آصف زرداری نے کم عمر بچوں کی شادی کی ممانعت کے بل پر دستخط کر دیے، جس کے تحت کم عمر بچوں کی شادی کرانے کا جرم ناقابل ضمانت ہوگا۔

تفصیلات کے مطابق صدر مملکت آصف زرداری نے 18 سال سے کم عمری کی شادی کی ممانعت کے بل پر دستخط کر دیے۔

سینیٹ اورقومی اسمبلی نے کم عمری کی شادی کی ممانعت کا بل منظور کیا تھا ، قومی اسمبلی میں بل شرمیلا فاروقی،سینیٹ میں شیری رحمان نے پیش کیا تھا۔

قانون کے تحت نکاح خواں ایسا نکاح نہیں پڑھائے گا، جہاں فریق 18سال سےکم عمرہوں، خلاف ورزی پر نکاح خواں کو ایک سال قید اورایک لاکھ جرمانہ ہوسکتاہے۔

18سال سے بڑی عمر کے مرد کو کم عمر لڑکی سے شادی پر 3 سال تک قیدبامشقت ہوگی اور کم عمری کی شادی کا علم ہونے پر اسے روکنے کا حکم دے گی۔

مزید پڑھیں : اسلامی نظریاتی کونسل نے کم عمری کی شادی کی ممانعت کا بل غیراسلامی قرار دیدیا

کم عمر بچوں کی شادی کرانے کا جرم ناقابل ضمانت ہوگا، عدالت کیس کی کارروائی 90روز میں مکمل کرے گی۔

نئے قانون میں کہا گیا ہے کہ 18 سال سے قبل ساتھ رہنے کو بچے سے زیادتی تصور کیا جائے گا اور کم عمرمیں شادی پر مجبور کرنے والے کو 7 سال تک قیداور10 لاکھ تک جرمانہ ہوگا۔

بچے کی شادی کیلئے ٹریفکنگ پر 7سال تک قیداور جرمانہ جبکہ کم عمر بچے کی شادی میں معاونت پر 3سال تک قید اور جرمانہ ہوگا۔

خیال رہے اسلامی نظریاتی کونسل کم عمری کی شادی کے بل کو غیراسلامی قراردے چکی ہے، کونسل نے18 سال سے کم عمر کی شادی پر سزاؤں کو غیر اسلامی قرار دیا تھا۔