لاہور (25 اگست 2025): بھارت کی جانب سے دریائے راوی میں چھوڑا گیا سیلابی ریلا پاکستانی حدود میں داخل ہو گیا ہے اور پانی کی سطح اچانک بلند ہو گئی ہے۔

فلڈ فور کاسٹنگ ڈویژن کے مطابق کہ بھارت کی جانب سے دریائے راوی میں چھوڑا گیا سیلابی ریلا پاکستانی حدود میں داخل ہو گیا ہے اور دریائے راوی میں جسڑ کے مقام پر پانی کی سطح اچانک بلند ہو گئی ہے۔

فلڈ فور کاسٹنگ ڈویژن کی جانب سے فراہم کی جانے والی اطلاع میں کہا گیا ہے کہ دریائے راوی میں جسڑ کے مقام پر پانی کی سطح 61 ہزار کیوسک سے بڑھ گئی اور اس وقت یہاں نچلے درجے کا سیلاب ہے۔ یہ سیلابی ریلا آج رات شاہدرہ سے گزرے گا۔

دریں اثنا دریائے ستلج پر ہیڈ سلیمانکی کے مقام پر ایک لاکھ 181 کیوسک کا ریلا پہنچ گیا ہے اور یہاں درمیانے درجے کا سیلاب ہے۔ اس وقت وہاں سے ڈاؤن اسٹریم میں پانی کا اخراج 93 ہزار 522 کیوسک ہے۔

دریائے ستلج ہیڈ سلیمانکی پر پانی کی سطح مسلسل بلند ہونے لگی ہے۔ پانی اطراف کے متعدد دیہات میں داخل ہو گیا ہے اور فصلوں کو بھی شدید نقصان پہنچا ہے۔ جس کے باعث یہاں پہلے سے سیلاب متاثرہ علاقوں میں لوگوں کو مشکلات کا سامنا ہے۔

دوسری جانب ذرائع کا کہنا ہے کہ بھارت نے 24 گھنٹے میں پاکستان سے دوسری بار سفارتی رابطہ کیا اور دریائے ستلج میں سیلاب کی پیشگی اطلاع دی۔

سفارتی ذرائع کا کہنا ہے کہ بھارت سے سیلاب سے متعلق معلومات سندھ طاس معاہدے کے تحت فراہم نہیں کیں بلکہ سفارتی روابط کو استعمال کرتے ہوئے بھارتی ہائی کمیشن اسلام آباد نے وزارت خارجہ سے رابطہ کرکے اس کی اطلاع دی جب کہ معاہدےکے طریقہ کار کے تحت بھارت ایسی معلومات انڈس واٹر کمشنر کے ذریعہ دیتا ہے۔

مذکورہ صورتحال پر ترجمان دفتر خارجہ شفقت علی خان نے بتایا کہ بھارت نے گزشتہ روز سیلاب کی وارننگز سندھ طاس کمیشن کے ذریعے نہیں دی بلکہ سفارتی ذرائع سے فراہم کیں۔

مزید پڑھیں : سندھ طاس معاہدہ معطل، بھارت کا پاکستانیوں کو فوری ملک چھوڑنے کا حکم

ترجمان دفتر خارجہ کا کہنا ہے کہ بھارت پر لازم ہے کہ سندھ طاس معاہدےکی تمام شقوں پر مکمل عملدرآمد کرے۔ بھارت کا معاہدے کو یکطرفہ معطل رکھنا بین الاقوامی قانون کی سنگین خلاف ورزی ہے اور یہ اقدام جنوبی ایشیا میں امن و استحکام پر انتہائی منفی اثرات مرتب کر سکتا ہے۔

اسلام آباد : سابق نگراں وزیراعظم انوار الحق کاکڑ کا کہنا ہے کہ الیکشن پر میرے مطمئن ہونے سے کیا ہوتا ہے، لوگ مطمئن نہیں تو ٹریبونلز میں جائیں۔

تفصیلات کے مطابق سابق نگراں وزیراعظم انوار الحق کاکڑ  نے اے آر وائی نیوز کو دیئے گئے خصوصی انٹرویو میں کہا کہ قانون بن گیا ہے سروسز چیفس 5 سال کے لیے عہدوں پر رہیں گے، میری سمجھ کےمطابق اب کسی نئے نوٹیفکیشن کی ضرورت نہیں، 5 سال کی مدت کا قانون موجودہ عسکری قیادت پر لاگو ہوتا ہے۔

بلوچ عسکریت پسندوں کے حوالے سے ان کا کہنا تھا کہ عسکریت پسندوں کا ہدف حاصل کرنے کا جواب یقیناً نفی میں ہے، ریاست کی جیت طے شدہ ہے، بس وقت کے تعین کا فیصلہ ہونا باقی ہے۔

معرکہ حق کے بعد اب پاکستان ایک ہی وقت میں واشنگٹن اور بیجنگ سے کالز وصول کر رہا ہے

انہوں نے کہا کہ چین نے پاکستان سے کبھی نہیں کہا کہ امریکا سے جنگ کی صورت میں آپ کس طرف کھڑے ہوں گے۔ “آج پاکستان ایسی پوزیشن میں ہے کہ ایک طرف واشنگٹن سے کال آتی ہے تو دوسری طرف بیجنگ سے بھی کال وصول ہو رہی ہے۔”

سابق وزیراعظم کا کہنا تھا کہ بیجنگ پاکستان کا خاندان اور گھر ہے جبکہ امریکا ایک دوست ہے، “خاندان سے قطع تعلق ممکن نہیں، البتہ دوست آپ اپنی مرضی سے بدل سکتے ہیں۔”

انتخابات کے حوالے سے سوال پر انوار الحق کاکڑ نے کہا کہ میرے مطمئن ہونے یا نہ ہونے سے کوئی فرق نہیں پڑتا، اگر عوام مطمئن نہیں تو وہ ٹریبونلز میں جائیں۔

سوشل میڈیا سے متعلق گفتگو کرتے ہوئے انہوں نے کہا کہ کچھ بہروپیے مختلف اکاؤنٹس چلا رہے ہیں جن کے بارے میں علم ہی نہیں کہ وہ کہاں موجود ہیں، تقریباً 90 فیصد لوگ سوشل میڈیا پر رائے دینے کا مطلب صرف گالی دینا سمجھتے ہیں۔

فیصل آباد : انسدادد ہشت گردی کی عدالت نے 9 مئی کو رانا ثنا اللہ کے گھر پر حملے کے مقدمے میں پی ٹی آئی کے شبلی فراز، عمرایوب ، زرتاج گل سمیت دیگر رہنماؤں کو10سال قیدکی سزاسنا دی۔

تفصیلات کے مطابق فیصل آباد کی انسداد دہشت گردی کی عدالت نے 9 مئی کو رانا ثنا اللہ کے گھر پر حملے کے مقدمے کا فیصلہ سنا دیا۔

اے ٹی سی نے شبلی فراز،عمرایوب ، زرتاج گل کو10 سال قید کی سزا سنا دی جبکہ کنول شوذب، احمد چٹھہ ، رائےحسن نواز، انصر اقبال ، بلال اعجازکوبھی 10 سال قید کی سزا سنائی گئی۔

انسداد دہشت گردی کی عدالت نے فواد چوہدری اور زین قریشی کو مقدمے سے بری کردیا۔

عدالت نے 109 ملزمان میں سے 75 کو سزائیں سنائیں اور 34 کو بری کردیا جبکہ 59ملزمان کو 10،10 سال اور 16 ملزمان کو 3،3 سال کی سزا سنائی گئی۔

انسداد دہشت گردی عدالت کے جج جاوید اقبال نےمحفوظ فیصلہ سنایا ، 9 مئی 2023کو راناثنااللہ کے گھر حملے کا مقدمہ تھانہ سمن آباد میں درج ہے۔

یاد رہے سابق وزیر داخلہ رانا ثنااللہ کے گھر حملہ کیس کا ٹرائل جاری تھا اور تھانہ سمن آباد کے مقدمے کے ملزمان کے بیانات ریکارڈ کئے جا رہے ہیں

نو مئی کے 4 مقدمات میں پی ٹی آئی قیادت سمیت 21 ملزمان نامزد ہیں ، جس مین اپوزیشن لیڈر عمر ایوب ، شبلی فراز ، زرتاج گل ، علی امین ، فرخ حبیب ، فواد چوہدری ، شاہ محمود ، فیض اللہ کموکا بھی نامزد ہیں۔

ملزم ارکان اسمبلی میں صاحبزادہ حامد رضا،علی سرفراز ،عمر فاروق، خیال کاسترو، ایم پی ایز شاہد جاوید ، لطیف نذر ، اسماعیل سیلا بھی شامل ہیں۔

راولپنڈی : پاکستانی انٹیلیجینس نے مقبوضہ کشمیر میں را کے مذموم مقاصد کو بے نقاب کر دیا اور ایل اوسی سے متصل جنگلات میں خفیہ تربیتی مراکزمیں غیر مقامی دہشتگردوں کا انکشاف کیا۔

تفصیلات کے مطابق پاکستانی انٹیلیجنس اداروں نے مقبوضہ جموں و کشمیر میں بھارتی خفیہ ایجنسی "را” کے مذموم مقاصد کو بے نقاب کرتے ہوئے عالمی برادری کو نئی انٹیلیجنس رپورٹ ارسال کر دی۔

اسپیشل انٹیلیجنس رپورٹ میں کہا گیا کہ مقبوضہ کشمیر کے مختلف علاقوں میں غیر مقامی دہشت گردوں کی موجودگی کی مصدقہ اطلاعات ملی ہیں۔

ذرائع کا کہنا تھا کہ یہ غیر ملکی دہشت گرد بدنام زمانہ بھارتی ایجنسی را کی پشت پناہی میں سرگرم ہیں اور قابض افواج کے اڈوں، مورچوں اور ٹریننگ ایریاز کے قریب آزادانہ گھومتے پھرتے نظر آتے ہیں۔

رپورٹ میں انکشاف کیا گیا ہے کہ لائن آف کنٹرول کے ساتھ جنگلاتی علاقوں میں خفیہ تربیتی مراکز قائم ہیں، جہاں ان غیر مقامی دہشت گردوں کو عسکری تربیت دی جا رہی ہے۔

ذرائع کے مطابق یہ دہشت گرد آپس میں پشتو اور دری زبان میں گفتگو کرتے ہیں، جس سے قوی امکان ہے کہ وہ غیر ملکی کرائے کے قاتل ہیں۔

انٹیلیجنس رپورٹ میں خدشہ ظاہر کیا گیا ہے کہ یہ دہشت گرد یا تو کشمیری مجاہدین کے خلاف کارروائیوں میں استعمال کیے جائیں گے یا پھر پاکستان کو بدنام کرنے کے لیے "فالس فلیگ آپریشنز” میں۔

پاکستان نے اس خصوصی رپورٹ کو عالمی برادری اور دوست ممالک کے ساتھ شیئر کرتے ہوئے واضح کیا ہے کہ بھارت کی یہ سرگرمیاں کشمیری عوام کے بنیادی حقوق دبانے اور خطے کے امن کو سبوتاژ کرنے کی نئی سازش ہیں۔

انٹیلیجنس ذرائع کا کہنا ہے کہ پاکستان نے اپنے مراسلے میں عالمی برادری سے مطالبہ کیا ہے کہ وہ مقبوضہ کشمیر میں مشکوک کیمپس اور غیر ملکی دہشت گردوں کی سرگرمیوں پر سوال اٹھائے اور را کے مذموم عزائم پر کڑی نظر رکھے۔

ذرائع نے بتایا کہ پاکستانی انٹیلیجنس ایجنسیاں ان خفیہ کیمپس اور دہشت گردوں کی سرگرمیوں پر گہری نظر رکھے ہوئے ہیں تاکہ بھارت کی کسی بھی نئی چال کو ناکام بنایا جا سکے۔