فیلڈ مارشل عاصم منیر کا کہنا ہے کہ نوجوان اور میڈیا بھارتی ڈس انفارمیشن مہم کے خلاف آہنی دیوار ثابت ہوئے۔
فیلڈ مارشل سید عاصم منیر نے سیاسی قیادت اور مسلح افواج کے اعلیٰ حکام کے اعزاز میں عشائیہ دیا جس میں صدر مملکت آصف علی زرداری، وزیراعظم شہباز شریف، چیئرمین سینیٹ، اسحاق ڈار، ایاز صادق، وفاقی وزرا، وزرائے اعلیٰ اور گورنرز نے بھی شرکت کی۔
عشائیے میں چیئرمین جوائنٹ چیفس آف اسٹاف کمیٹی، فضائیہ اور بحریہ کے سربراہان نے بھی شرکت کی، شرکا نے مسلح افواج کی قربانیوں اور جرأت کو سراہا۔
آرمی چیف عاصم منیر نے معرکہ حق کے دوران سیاسی قیادت کے عزم کو خراج تحسین پیش کیا اور آپریشن بنیان مرصوص میں مسلح افواج کی کو آر ڈی نیشن اور کامیابی کو سراہا۔
ترجمان پاک فوج نے کہا کہ تقریب میں شرکا کا عزم قومی یکجہتی کا منہ بولتا ثبوت ہے۔
فیلڈ مارشل عاصم منیر نے کہا کہ پاکستان کے نوجوان اور میڈیا نے ڈس انفارمیشن کے خلاف موثر کردار ادا کیا، پاکستانی سائنسدان، انجینئرز اور سفارتکاروں کا کردار بھی لائق تحسین ہے۔
اسلام آباد: آئی ایم ایف مشن کے سربراہ نتھن پورٹر نے کہا ہے کہ آئی ایم ایف چاہتا ہے کہ آئندہ مالی سال کے بجٹ میں ٹیکس آمدن بڑھائی جائے۔
تفصیلات کے مطابق آئی ایم ایف کے مشن کا دورہ پاکستان مکمل ہونے پر اعلامیہ جاری کر دیا گیا، آئی ایم ایف کے مشن نے نتھن پورٹر کی سربراہی میں پاکستان کا دورہ کیا ہے، جس کا آغاز 19 مئی سے ہوا تھا۔
اعلامیے میں کہا گیا ہے کہ اس دورے کا مقصد پاکستان میں آئندہ بجٹ کی حکمت عملی اور تجاویز پر مشاورت کرنا تھا، نتھن پورٹر نے کہا کہ پاکستان کے ساتھ بجٹ سے متعلق بات چیت مثبت رہی۔
نتھن پورٹر نے کہا ’’اس مشاورت کا مقصد 2024 کے قرض پروگرام میں اصلاحات پر عمل درآمد جاری رکھنا تھا، ہم چاہتے ہیں پاکستان 1.6 فی صد سرپلس پرائمری بیلنس کا ہدف حاصل کرے۔‘‘
انھوں نے مزید کہا کہ آئی ایم ایف چاہتا ہے آئندہ مالی سال کے بجٹ میں ٹیکس آمدن بڑھائی جائے، اور آئندہ بجٹ میں اخراجات کی ترجیحات پر مشاورت ہو۔
مشن کے سربراہ نے کہا بجٹ مشاورت میں توانائی کی اصلاحات، پاکستان میں توانائی کی لاگت کم کرنے کے لیے بھی بات چیت ہوئی، معاشی ترقی کی شرح بڑھانے کے لیے بنیادی اصلاحات پر بھی مشاورت ہوئی، معاشی پالیسی مضبوط اور دیرپا بنانے کے لیے بھی زور دیا گیا تاکہ کوئی خلا نہ رہے۔
آئی ایم ایف نے مطالبہ کیا کہ معاشی پالیسی کے لیے مانیٹری پالیسی سخت بنائی جائے، اور اسٹیٹ بینک افراط زر کو مدنظر رکھتے ہوئے مانیٹری پالیسی بنائے، پاکستان میں آیندہ مالی سال افراط زر کی شرح 5 سے 7 فی صد کے مقررہ ہدف تک کنٹرول رکھی جائے، آیندہ مالی سال زرمبادلہ کے ذخائر مستحکم رکھے جائیں، پاکستان میں کرنسی کا ایکسچینج ریٹ مارکیٹ کے مطابق رکھا جائے تاکہ بیرونی دباؤ کو برداشت کر سکے۔
نتھن پورٹر نے کہا کہ دورہ پاکستان میں وفاقی اور صوبائی حکومتوں کے تعاون کے مشکور ہیں، اور تعمیری بات چیت کرنے پر حکومت پاکستان کی کوششوں کو سراہتے ہیں، پاکستان کا معاشی پالیسی میں استحکام کے لیے کاربند رہنا قابل ستائش ہے، پاکستان کے ساتھ بات چیت مثبت انداز میں آیندہ بھی جاری رہے گی، اور موجودہ قرض پرگرام موسمیاتی تبدیلیوں سے متعلق فنڈنگ پر آئی ایم ایف وفد 2025 کی دوسری ششماہی میں دوبارہ پاکستان آئے گا۔
وفاق کا بجٹ اب 2 کے بجائے 10 جون کو پیش کیے جانے کا امکان ہے۔
اے آر وائی نیوز کے مطابق پاکستان اور آئی ایم ایف کے درمیان بجٹ مذاکرات تاحال مکمل نہ ہوسکے جس کی وجہ سے بجٹ اب 2 کے بجائے 10 جون کو پیش کیے جانے کا امکان ہے۔
پاکستان اور آئی ایم ایف کے درمیان بجٹ مذاکرات کے تفصیلی سیشن ہوئے جس میں بجٹ سے متعلق بیشتر ترجیحات سے اتفاق کیا گیا، بجٹ سے متعلق آئی ایم ایف سے آن لائن مشاورت بھی ہوگی۔
ذرائع کے مطابق قومی اقتصادی سروے 9 جون کو پیش ہونے کا امکان ہے۔
مشیر برائے وزارت خزانہ خرم شہزاد نے تصدیق کی ہے کہ بجٹ 10 جون کو پیش کیا جائے گا، اقتصادی سروے 9 جون کو پیش ہوگا۔
چند روز قبل وزیر مملکت برائے قومی ورثہ حذیفہ رحمان نے اے آر وائی نیوز سے خصوصی گفتگو کرتے ہوئے غربت کی چکی میں پستی پاکستانی عوام کو خوشخبری دی ہے کہ آئندہ مالی سال کے بجٹ میں عوام پر کوئی نیا ٹیکس نہیں لگایا جا رہا ہے۔
حذیفہ رحمان نے کہا کہ بجٹ میں ڈیفنس یا جنگ سے متعلق کوئی مخصوص ٹیکس نہیں لگ رہا ہے۔ ڈیفنس بجٹ سے متعلق زیادہ مبالغہ آرائی نہیں ہونی چاہیے۔
ان کا کہنا تھا کہ فوج نے بھارتی جارحیت کے جواب میں بہترین کارکردگی دکھائی۔ حکومت دفاعی ضروریات سے آگاہ ہے۔ سوال حکومت کی ذمہ داری ہے کہ فوج کو بجٹ، ٹیکنالوجی اور دیگر وسائل فراہم کرے۔
راولپنڈی : ڈی جی آئی ایس پی آر لیفٹیننٹ جنرل احمد شریف کا کہنا ہے کہ فتنہ الہندوستان کا تعلق بلوچستان سے نہیں صرف بھارت سے ہے، درندے ہندوستان کےاحکامات پردہشت گردی کر رہے ہیں۔
تفصیلات کے مطابق تفصیلات کے مطابق ڈی جی آئی ایس پی آر لیفٹیننٹ جنرل احمد شریف نے سیکرٹری داخلہ آفتاب درانی کے ہمراہ پریس کانفرنس کرتے ہوئے کہا فتنہ الہندوستان کاتعلق بلوچستان سےنہیں صرف بھارت سے ہے، فتنہ الہندوستان کے دہشت گرد حیوانیت پر اتر آئے ہیں، انھوں نے بلوچستان میں نہتے مزدوروں کوشہیدکیا، بھارتی دہشت گردی کے ایسے کافی شواہدہمارے پاس ہیں۔
ڈی جی آئی ایس پی آر کا کہنا تھا کہ یہ پاکستان نہیں بلوچستان کے بلوچ بھی پوچھ رہے ہیں، دہشت گردی کا بلوچیت سے کیا تعلق ہے، پاکستان کے مسلمان پوچھ رہے ہیں، اس کا اسلام، انسانیت سے کیا تعلق ہے، یہ کون سااسلام اورکون سی بلوچیت ہے ، درندے ہندوستان کے پیسوں،احکامات پربربریت کررہے ہیں، یہ کون سی آئیڈیالوجی ہے یہ حیوانیت ہے، فتنہ الہندوستان کاتعلق صرف ہندوستان سے ہے۔
لیفٹیننٹ جنرل احمد شریف نے بتایا کہ 25 اپریل کوجہلم میں ایک دہشتگرد پکڑا گیا، فرانزک پر شاکنگ فیکٹس سامنےآتے ہیں، سرونگ انڈین میجر سندیپ دہشت گردوں سے بات چیت کر رہا تھا وہ آڈیوسنیں، سرونگ انڈین میجربتارہاہےبلوچستان سےلیکرلاہورتک اورپورےپاکستان میں دہشتگردی کروارہا ہے۔
انھوں نے سوال کیا کہ معصوم پھول شہید ہوئے ان کی موت کاذمہ دارکون ہے؟ میجرسندیپ کتنی تفصیل سے بتا رہا ہے، کتنے پیسے دینے ہیں، کئی سال کی پلاننگ ہے، جن مساجد میں بھارت نےحملہ کیاوہاں کوئی ٹریننگ کیمپ نہیں تھے۔
پاک فوج کے ترجمان نے کہا کہ جن مساجد میں بھارت نے حملہ کیا وہاں کوئی ٹریننگ کیمپ نہیں تھے، 6 اور7 مئی کو کیا شواہد تھے جس پر فیصلہ کیا گیا کہ مساجد دہشت گردوں کے اڈےہیں، 7 مئی کی صبح تمام میڈیا ان مساجد میں گیا تھا، آپ کو کہیں ٹریننگ کیمپ یا دہشت گرد کی نشانی ملی۔
ڈی جی آئی ایس پی آر کا کہنا تھا کہ بھارت نے پاکستان پر حملے کےدوران اپنی پراکسی فتنہ الہندوستان کو بھی ایکٹوکیا ہوا تھا، بھارت دہشت گردوں کو پیسہ دینے کے ساتھ اسلحہ بھی دیتا ہے، بلوچستان کے غریب تو اتنا جدید اور مہنگا اسلحہ نہیں خرید سکتے۔
لیفٹیننٹ جنرل احمد شریف نے مزید کہا کہ فتنہ الہندوستان کے ساتھ فتنہ الخوارج کاگٹھ جوڑ بھی بھارت کیساتھ ہے، دہشت گردوں کی پرائم موٹیویشن صرف پیسہ ہے، ناقدین کہتے ہیں باڑلگانے کا کیا فائدہ شواہد سب کے سامنے ہیں۔
انھوں نے مزید بتایا کہ 9مئی کی رات2بجے 10مئی کوفتنہ الہندوستان نےبلوچستان میں دہشتگردانہ کارروائیاں کیں، ہم نےاس رات 5دہشتگردمارےہیں ، یہ وہ وقت ہےجب ہندوستان نے پاکستان اپنےڈرون بھیجےتھے، ڈی جی فتنہ الہندوستان اورفتنہ الخوارج کابھارت سےگٹھ جوڑ دنیاکونظرآرہا ہے۔
ترجمان کا کہنا تھا کہ 6 اکتوبر 2024 کو کراچی میں چائنیز پر حملہ ہوتا ہے، انڈین سوشل میڈیا را کے ہینڈلرز پہلے سے ہی آگاہ کردیتےہیں، جیسے ہی جعفر ایکسپریس ہوتا ہے، اس سے پہلے ہی وہ آگاہ کردیتےہیں ، صبح 7 بجکر 58 منٹ پر خضدار واقع ہوتا ہے، اس کے فوری بعد ہی انڈین میڈیا پر خوشیاں شروع ہوجاتی ہیں، دنیا کا کون سا ملک ہے جو دہشت گردوں کے حملوں پرخوشی مناتاہے، تاریخ میں ایسا کوئی ملک یا میڈیا نہیں ملتا جو بچوں کی شہادت پرخوشی منائے۔
لیفٹیننٹ جنرل احمد شریف نے کہا کہ کیا کالعدم بی ایل اے کی دھمکیوں سے ہم ڈرجائیں گے، فتنہ الہندوستان کابلوچیت یاپاکستانیت سےتعلق نہیں، پوری دنیا دیکھ رہی بھارت خطے میں دہشت گردی کرہا ہے، اپنی دہشت گردی چھپنے کیلئے پاکستان پرالزام لگاکرڈرامہ کیا جاتا ہے۔
ان کا کہنا تھا کہ معرکہ حق میں اللہ کی نصرت سےپاکستان دشمن کامنہ کالاکرتاہے، بہادرفوج اور فضائیہ نےجعفرایکسپریس حملےمیں شہریوں کوبچایا، ریاست نے دہشت گردوں کومارا اور اپنے لوگوں کوبچایا، فتنہ الہندوستان کےترجمان بھارتی چینل پردہشتگردی کاپرچار کرتے ہیں۔
ڈی جی آئی ایس پی آر نے مزید کہا کہ بھارت میں آزاد میڈیا کا وجود نہیں بھارتی ریاست کنٹرول کرتی ہے، آپ پاکستان میں آزاد میڈیا پر سوال اٹھاتے تھے اب پتا چلا انڈیا کا میڈیا کیا ہے۔
انھوں نے بتایا کہ چیف نے کہا تھا 13 لاکھ انڈین آرمی ہمیں شکست نہیں دے سکتی، 1300 فتنہ الہندوستان کیا دیں گے ، پوری دنیادیکھ رہی ہےخطےمیں ریاستی دہشتگردی کون کررہاہے، اپنی دہشتگردی سےچھپنےکیلئےبھی ڈرامہ کیاجاتاہےکیونکہ اپنےملک میں ظلم کررہےہیں، یہ ہےہندوستان اورفتنہ الہندوستان کابدنماچہرہ ہے۔
پاک فوج کے ترجمان کا بتانا تھا کہ دہشت گرداسلم اچھوبھارت کے اسپتال میں زیرعلاج ہے، یہاں زخمی دہشت گردوں کوبھارت اپنے ملک لیکرجاتا ہے، فتنہ الہندوستان کاکمانڈرخلیل چیئرمین بھارت میں ہے۔
ان کا مزید کہنا تھا کہ بھارت دہشت گردی کیلئے معصوم بلوچوں کواستعمال کرتا ہے، دہشت گردی کیلئے بھارت بلوچستان کی بچیوں کوبلیک میل کرتا ہے، بھارت اوراس کے فتنے اب کھل کرسامنےآرہے ہیں، سوشل میڈیاپر فتنہ الہندوستان کی حمایت میں ہزاروں اکاؤنٹس آپریٹ ہورہے ہیں، فیس بک اور ایکس پر موجود ہزاروں اکاؤنٹس بھارت سےچل رہے، سوشل میڈیا پر ہزاروں اکاؤنٹس بھارتی ایجنسیاں چلارہی ہیں۔
راولپنڈی : ڈی جی آئی ایس پی آر لیفٹیننٹ جنرل احمد شریف نے بھارت کی 20 سال سے جاری دہشت گردی کی تفصیلات پیش کردیں۔
تفصیلات کے مطابق ڈی جی آئی ایس پی آر لیفٹیننٹ جنرل احمد شریف نے سیکرٹری داخلہ آفتاب درانی کے ہمراہ پریس کانفرنس کرتے ہوئے کہا کہ بھارت خطے میں امن کو سبوتاژ کررہاہے، بھارت 20سال سےدہشتگردی کی پالیسی جاری رکھے ہوئے ہے، بھارت دہشت گردوں کوفنڈنگ فراہم کرتا ہے۔
لیفٹیننٹ جنرل احمد کا کہنا تھا کہ پاکستان نے 2009 میں بلوچستان میں بھارت کےملوث ہونےکاڈوزیئراقوام متحدہ میں پیش کیا، سال 2016میں بھی بھارت کے دہشت گردی میں ملوث ہونے کے شواہد دنیا کے سامنے رکھے، گرفتار مختلف دہشت گردوں نے بھارتی پشت پناہی کا اعتراف کیا۔
انھوں نے بتایا کہ خضدار واقع میں فتنہ الہندوستان ملوث ہے، کلبھوشن یادیو نے اعترافی بیان میں تمام حقائق بتائے، 21 مئی کو بھارت کے حکم پرفتنہ الہندوستان نے حملہ کیا، فتنہ الہندوستان بھارت کے حکم پرمعصوم شہریوں کوٹارگٹ کر رہا ہے۔
ترجمان پاک فوج نے کہا کہ پاک سرنڈر کرنے والے دہشت گردوں نے تمام حقائق بتادیے، ایسی دہشت گردی میں کوئی انسانیت،بلوچیت،پاکستانیت ہے؟
خضدر حملے کے حوالے سے ڈی جی آئی ایس پی آر نے بتایا خضدر اسکول بس حملےکےکئی بچےاسپتال میں زیرعلاج ہیں، یہ ہےبھارت کادہشت گردچہرہ، یہ وہ بچے ہیں جنہیں 21 مئی کوبھارت کے حکم پر دہشت گردی کانشانہ بنایا گیا لیکن فتنہ الہندوستان دہشت گردی کے باجود بلوچستان کےعوام کاحوصلہ نہ توڑ سکے۔
ان کا مزید کہنا تھا کہ فتنہ الہندوستان بھارت کااصل دہشت گرد چہرہ ہے ، 21مئی کو 6 معصوم پچوں کو شہید کیا اور 51زخمی ہیں۔
ڈی جی آئی ایس پی آر نے کہا کہ میں آپ کے سامنے اپریل 2024 تقریباً1 سال سے زائد کے واقعات رکھ رہا ہوں، 12 اپریل 2024 نوشکی میں 12 مزدوروں ، 28 اپریل 2024 کو کیچ میں فتنہ الہندوستان نے مزید 2 مزدوروں کو شہید کیا جبکہ 9 مئی 2024 سربندر گوادر میں 4 حجاموں کو شہید کیا گیا۔
انھوں نے مزید بتایا کہ 28 ستمبر 2024 کو پنجگور میں 7مزدوروں ، 10اکتوبر2024 کودکی میں غریب 21 مزدوروں، 13 نومبر 2024 کو زیارت میں 3 مسافروں ، 10 فروری 2025 کو کیچ میں 2 درزیوں کو شہید کیا گیا۔
ترجمان کا کہنا تھا کہ 14 فروری کو ہرنائی میں 10 معصوم لوگوں کو ، 19 فروری کو بارکھان میں7مسافروں کو بس سے اتار ، 26 مارچ کو گوادر میں 6 مزدوروں اور 9 مارچ کو پنجگورمیں دوبارہ 3 حجاموں کو فتنہ الہندوستان نے شہید کیا۔
لیفٹیننٹ جنرل احمد نے کہا کہ 13 مئی کو نوشکی میں4 مزدوروں پر حملہ کیا گیا، 21 مئی2025 کو 6 معصوم پھولوں کو شہید کیا جاتا ہے، یہ ہےفتنہ الہندوستان کااصل چہرہ ہے۔
پاک فوج کے ترجمان کا کہنا تھا کہ اس کے بعد فتنہ الہندوستان نے جعفر ایکسپریس کا اندوہناک واقعہ کیا، 6 اور7 مئی کو فتنہ الہندوستان کا اصل باپ خود آکر حملہ کرکے مساجدوں کو شہید کرتا ہے۔
اسلام آباد : تعلیمی اداروں میں موسم گرما کی تعطیلات 5جون سے شروع کرنے کا اعلان کردیا گیا۔
تفصیلات کے مطابق وفاقی نظامت تعلیمات نے وفاقی تعلیمی اداروں کے لیے موسم گرما کی تعطیلات 2025 کے شیڈول کا اعلان کر دیا ہے۔
نوٹیفکیشن میں کہا گیا ہے کہتمام اسکولز اور کالجز میں 5جون سے یکم اگست تک گرمیوں کی چھٹیاں ہوں گی اور گرمیوں کی تعطیلات کے بعد تعلیمی ادارے 4 اگست بروز پیر دوبارہ کھلیں گے۔
ڈائریکٹوریٹ نے 26 مئی سے 4 جون تک اسکولوں کے اوقات میں بھی تبدیلی کی ہے، نوٹیفکیشن کے مطابق سنگل شفٹ اسکول 26 مئی سے 7:30 سے12:30 تک کام کریں گے جبکہ ڈبل شفٹ والے اسکولوں کو شام کے اوقات میں کام کرنے کی ہدایت کی ہے۔
سندھ میں تعطیلات
ایک روز قبل سندھ میں موسم گرما کی چھٹیوں 2025 کا اعلان کیا گیا تھا ، جس کے تحت تمام سرکاری اور نجی سکولوں میں یکم جون سے 31 جولائی تک موسم گرما کی تعطیلات 2025 میں ہوں گی۔
خیبرپختونخوا میں تعطیلات
خیبرپختونخوا حکومت نے 15 جون سے شروع ہونے والی موسم گرما کی چھٹیوں کا اعلان کیا تھا۔
صوبائی محکمہ تعلیم نے نوٹیفکیشن جاری کرتے ہوئے کہا تھا کہ گرم خطے میں پرائمری اسکول یکم جون سے 31 اگست تک بند رہیں گے۔
پنجاب میں تعطیلات
پنجاب حکومت نے موسم گرما کی چھٹیوں کا شیڈول بھی جاری کیا ، جس کے تحت چھٹیاں 28 مئی 2025 سے شروع ہو رہی ہیں، جو 14 اگست 2025 بروز ہفتہ تک جاری رہیں گی۔
خضدار میں اسکول بس پر بھارتی اسپانسرڈ فتنہ الہندوستان کے دہشت گردوں کے حملے میں شدید زخمی ہونے والے مزید 2 بچے زخموں کی تاب نہ لاکر شہید ہوگئے۔
تفصیلات کے مطابق خضدار میں اسکول بس پر بھارتی اسپانسرڈ فتنہ الہندوستان کے دہشت گرد حملے میں شہید ہونے والے طلبا کی تعداد 6 ہوگئی جس میں 5 طالبات اور ایک طالب علم شامل ہیں۔
سیکیورٹی ذرائع کا کہنا ہے کہ خضدار دہشت گردانہ حملے میں طالب علم حیدر شدید زخمی ہوا جو جانبر نہ ہوسکا اور آج شہید ہوگیا جبکہ آج ایک اور معصوم جان بھی پاکستان میں دہشتگردی کی بھینٹ چڑھ گئی، خضدار حملے میں شدید زخمی ہونے والی طالبہ ملائکہ بھی شہید ہو گئی۔
سیکیورٹی ذرائع کا کہنا ہے کہ ذلت آمیز شکست اور ہزیمت کے بعد بھارت بزدلانہ کارروائیوں پر اتر آیا ہے، بھارت بلوچستان اورکےپی میں دہشتگردی کیلئے اپنی پراکسیوں کا استعمال کررہا ہے، معصوم بچوں کے خون کا حساب فتنہ الہندوستان اور ان کے ہندوستانی آقاؤں سے لیا جائیگا۔
دوسری جانب صوبیدار سلیم کی شہید بیٹیوں عیشا سلیم اور سحر سلیم کی نماز جنازہ آبائی علاقے کلر سیداں میں ادا کی گئی، جس میں سابق وزیر اعظم راجہ پرویز اشرف اور علاقہ معززین سمیت شہریوں کی بڑی تعداد نے شرکت کی، حملے میں شہید طالبہ حفصہ کوثر کو اوکاڑہ اور ثانیہ سومرو کو رحیم یار خان میں سپرد خاک کردیا گیا۔
واضح رہے کہ منگل کو خضدار میں اسکول بس پر حملے میں 3 طالبات سمیت 5 افراد شہید جبکہ 39 زخمی ہوگئے تھے جبکہ گزشتہ روز آٹھویں جماعت کی طالبہ سحر سلیم بھی زخموں کی تاب نہ لاکر شہید ہوگئی تھی۔
راولپنڈی : ڈی جی آئی ایس پی آر نے لیفٹننٹ جنرل احمد شریف چوہدری کا کہنا ہے کہ کوئی پاگل ہی یہ سوچ سکتا ہے وہ پاکستان کے عوام کاپانی بند کر سکتا ہے یہ ممکن نہیں۔
تفصیلات کے مطابق ڈی جی آئی ایس پی آر نے لیفٹننٹ جنرل احمد شریف چوہدری الجزیرہ ٹی وی کو دیئے گئے انٹرویو میں کہا ہم ہمیشہ کہتے ہیں کہ یہ جنگ ہماری ہے، مگر فتح اللہ تعالیٰ کی ہے۔ اگر آپ پاکستان کی گلیوں، شہروں میں جائیں تو عوام کے چہروں پر جواب موجود ہے، خوشی، جشن جو وہ منا رہے ہیں۔ کیوں؟ کیونکہ یہ صرف عسکری میدان کی بات نہیں، نہ ہی صرف فضائی یا زمینی لڑائی کی۔
معرکۂ حق ، سچائی کی جنگ
لیفٹننٹ جنرل احمد شریف چوہدری کا کہنا تھا کہ یہ ایک سچائی کی جنگ (معرکۂ حق) ہے، پاکستان نے جھوٹ، فریب، جبر، اور بھارتی جارحیت کا پردہ چاک کیا، پہلگام کے بعد بھارت ایک من گھڑت کہانی لے کر آیا۔
ڈی جی آئی ایس پی آر نے کہا کہ پاکستان نے صرف ایک بات کہی: اگر آپ کے پاس ہمارے کسی شہری یا ریاست سے تعلق کا ثبوت ہے، تو سامنے لائیں اور وہ بھی بین الاقوامی برادری یا کسی تیسرے، قابلِ اعتماد فریق کے سامنے تاکہ شفاف تحقیقات ہو سکیں لیکن بھارت کے پاس کوئی جواب نہیں تھا، اور آج تک نہیں ہے۔ حتیٰ کہ چند دن پہلے ان کی وزارتِ خارجہ نے کہا کہ تفتیش ابھی جاری ہے۔ تو 6 اور 7 تاریخ کو جو انہوں نے کیا، اس پر بھی ان کے پاس اخلاقی جواز نہیں۔ ہم شفاف رہے، سچ بولا، جھوٹ نہیں بولا، باتوں کو توڑا مروڑا نہیں۔
ہم گولڈن ٹیمپل جیسے مقدس مقام پر کیوں حملہ کریں گے؟
انھوں نے بتایا کہ دنیا نے دیکھا کہ بھارت کا میڈیا اور ریاست خود معلومات کی جنگ میں جھوٹ بول رہے تھے، ان کے پاس بہت ترقی یافتہ تھیٹر اور فلم انڈسٹری ہے، پاکستان سے کہیں آگے، اسی لیے وہ نت نئے بیانیے گھڑتے رہتے ہیں۔ مثلاً، کل ہی میں نے سنا کہ بھارت کہہ رہا تھا کہ پاکستان نے گولڈن ٹیمپل پر حملہ کیا، اس سے بڑا جھوٹ کوئی نہیں ہو سکتا، ہم سکھوں کے مقدس مقامات جیسا کہ ننکانہ صاحب، پنجہ صاحب اور دیگر مزہبی مقامات کی حفاظت کرتے ہیں، کرتارپور صاحب کا احترام کرتے ہیں۔ ہم اپنے سکھ بھائیوں سے محبت کرتے ہیں۔
ڈی جی آئی ایس پی آر نے کہا کہ ہمارے پنجاب (پاکستان اور بھارت) میں مشترکہ ثقافت، زبان اور قربت ہے۔ پاکستان کے مسلمانوں اور سکھوں کے درمیان گہرے تعلقات ہیں، ہم گولڈن ٹیمپل جیسے مقدس مقام پر کیوں حملہ کریں گے؟ یہ ہمارے کلچر، اقدار اور مذہب کے خلاف ہے کہ ہم کسی مذہبی یا سولین مقام پر حملہ کریں۔
ان کا کہنا تھا کہ بھارت اپنے اعلیٰ افسران اور جرنیلوں کو میڈیا پر جھوٹ بولنے کے لیے لاتا ہیں، آپ بھارتیوں کی باتوں پر کیسے یقین کریں؟ انہیں پہلے خود اپنا اعتبار بحال کرنا ہوگا، اعتبار سچ بولنے سے آتا ہے نہ کہ ہزاروں ویب سائٹس بند کرنے، میڈیا پر پابندی لگانے یا حکومت پر تنقید کرنے والوں کو جیل میں ڈالنے سے، کیا پاکستان نے اس تنازع میں کسی صحافی کو جیل میں ڈالا؟ بالکل بھی نہیں۔
لیفٹننٹ جنرل احمد شریف نے کہا کہ میں اپنی فضائیہ اور پائلٹس پر فخر ہے، اس فوجی تنازع میں آپ نے تینوں افواج کی ہم آہنگی دیکھی ، صرف آرمی، ایئرفورس، اور نیوی کے درمیان نہیں، بلکہ سیاسی قیادت اور پاکستانی عوام کے ساتھ بھی ایک مضبوط ہم آہنگی دیکھنے کو ملی۔
پاک افواج کی مکمل طاقت ابھی تک استعمال ہی نہیں کی
پاک فوج کے ترجمان کا کہنا تھا کہ آہنی دیوار ’’بنیان المرصوص‘‘ بھارتی جارحیت کے خلاف متحدہ مزاحمت تھی، پاکستان ایئر فورس ہمارا فخر ہے، 6 اور 7 تاریخ کی شب کی فضائی جنگ پوری دنیا نے دیکھی، یہ دہائیوں تک فضائی جنگی کالجوں اور فوجی اداروں میں پڑھائی اور زیر بحث لائی جائے گی۔
انھوں نے مزید بتایا کہ ہم اپنے پائلٹس کی پیشہ ورانہ مہارت کو سلام پیش کرتے ہیں، جے ایف-17 تھنڈر، جے-10 سی، اور زمین پر فتح-1 اور فتح-2 میزائل ، یہ سب پاکستان کی تکنیکی ترقی کی مثالیں ہیں، ہم نے اپنی روایتی افواج کی مکمل طاقت ابھی تک استعمال ہی نہیں کی، اس کا بڑا حصہ بلوچستان اور خیبر پختونخوا میں بھارت کی حمایت یافتہ دہشتگردی کے خلاف مصروف ہے۔
بھارت کے حوالے سے ترجمان کا کہنا تھا کہ دنیا جانتی ہے کہ بھارت اس خطے میں سب سے بڑا دہشتگردی کا سرپرست ہے، ہم نے ان آپریشنز سے ایک بھی فوجی نہیں ہٹایا، ہم نے اپنی تمام ٹیکنالوجی بھی ظاہر نہیں کی۔
بھارت کا جنگی جنون آگ سے کھیلنے کے مترادف
لیفٹننٹ جنرل احمد شریف نے کہا کہ عالمی طاقتیں جانتی ہیں 2 حریف ایٹمی ممالک میں جنگ کا تصور ہی خطرناک اورمضحکہ خیز ہے، بھارت کئی برسوں سے جنگی جنون میں مبتلا ہے جو کہ آگ سے کھیلنے کے مترادف ہے، بھارت ایک ایسا ماحول بنارہاہے جوباہمی تباہی کاسبب بنےگا۔
پاک فوج کے ترجمان نے مزید کہا کہ پاکستان نےدانشمندی سے کام لیا اور اس پورے تنازع میں کشیدگی کوبڑھنےنہ دیا، جنگ بندی کا مطلب ہے دونوں فریقوں نے فائرنگ بندکر دی، مگرامن تب آئے گا جب بھارت اپنی جنگی جنون میں مبتلا سیاسی سوچ سے چھٹکارا پائے گا۔
انتہا پسندی اور ہندوتوا نظریہ
بھارت میں مسلمانوں اوراقلیتوں پر مظالم سے متعلق ان کا کہنا تھا کہ ان کے اشرافیہ مسلمانوں اوراقلیتوں کے خلاف ظلم پریقین رکھتےہیں، یہ ایک سنگین مسئلہ ہے،صرف مسلمانوں پر ہی نہیں دیگراقلیتوں پربھی ظلم ہوتاہے، اس ظلم سے قدرتی طورپرردعمل پیدا ہوتا ہے جسے بھارت حل کرنے سے انکارکرتاہے۔
ڈی جی آئی ایس پی آر نے کہا کہ انتہا پسندی اورہندوتوانظریہ کےفطری نتائج ہوتے ہیں ، بھارت اس کا الزام پاکستان پرڈال کر بیرونی مسئلہ بناتا ہے، جب تک بھارت ان اندرونی مسائل کوخود حل نہیں کرتا امن ممکن نہیں۔
کشمیر سے متعلق سوال پر ان کا کہنا تھا کہ کشمیرایک حل طلب بین الاقوامی مسئلہ ہے، جس میں پاکستان،چین،بھارت شامل ہیں، مسئلہ کشمیراقوام متحدہ کی قراردادوں اورکشمیری عوام کی مرضی کے مطابق حل ہونا چاہیے۔
اگر کشمیر پاکستان میں شامل ہوجاتاہے تو یہ تمام دریا پاکستان کے ہوں گے
پاکستان کا پانی بند کرنے کے حوالے سے ترجمان نے کہا کہ بھارت اس مسئلے کو ظلم سے اندرونی معاملہ بنانے کی کوشش کرتا ہے لیکن امن اس راستے ممکن نہیں، صرف کوئی پاگل ہی یہ سوچ سکتا ہے وہ پاکستان کے عوام کاپانی بند کر سکتا ہے یہ ممکن نہیں۔
انھوں نے بتایا کہ حقیقت سمجھنی چاہیے کشمیر سے 6 دریا نکلتے ہیں، یواین قراردادوں کےمطابق کشمیرمتنازع علاقہ ہے، اگر عوام کی خواہش کے مطابق کشمیر پاکستان میں شامل ہوجاتاہے تو یہ تمام دریا پاکستان کے ہوں گے۔
ترجمان نے کہا کہ بھارت ایک لوئرریپیرین اسٹیٹ بن جائے گا اور پھر یہ ہمارے اوپر ہوگا اس کو کیسے دیکھنا ہے، چین بھی اس تنازع میں ایک فریق ہے جس کا کشمیر کے کچھ حصوں پر دعویٰ ہے۔
بھارت کو پیغام
لیفٹننٹ جنرل احمد شریف نے زور دیا کہ بھارت کو سمجھنا چاہیے کہ وہ کس آگ سے کھیل رہا ہے، پاکستان اور چین کئی دہائیوں سے مختلف شعبوں میں شراکت دار ہیں، پاکستان، چین اور دیگر ذمہ داراقوام امن کےلیےکوشش کرتے ہیں، جس طرح پاکستان نے اپنی جنگ خود لڑی اگر بھارت میں خود داری ہے تو وہ بھی اپنی جنگ خود لڑے۔
ان کا کہنا تھا کہ بھارتیوں کو بھی خود داری سیکھنی چاہیے جھوٹ اورجارحیت پر انحصار بند کرنا چاہیے، جب بھارت نے کھلم کھلا جارحیت کی، ہم ڈٹ کر کھڑے ہوئےاورآج بھی کھڑے ہیں، اگر بھارت نے دوبارہ ایسی حرکت کی تو ہمارا ردعمل اس سے بھی زیادہ تیز اور شدید ہوگا۔
واشنگٹن : ترجمان امریکی محکمہ خارجہ کی پریس بریفنگ کے دوران بھارتی صحافی پاکستان کیخلاف زہر اگلنے لگا، جس پر ترجمان نے بھارتی صحافی کو روک دیا۔
تفصیلات کے مطابق ترجمان امریکی محکمہ خارجہ ٹیمی بروس کی پریس بریفنگ کے دوران بھارتی صحافی پاکستان کیخلاف زہراگلنے لگا۔
بھارتی صحافی نے سوال کی بجائے پاکستان پرالزام لگانا شروع کردیے ، ٹیمی بروس نے بھارتی صحافی کو بیچ میں روک کر جواب دیا۔
ترجمان امریکی محکمہ خارجہ نے کہا کہ پاکستان بھارت کے درمیان مسائل کی وجہ سے خطے میں دہشت گردی، تشدد رہا ہے۔
ان کا کہنا تھا کہ پاکستان اوربھارت کے درمیان اب جنگ بندی ہے، جانتے ہیں پاکستان بھارت مکمل جنگ شروع کرنے کے بہت قریب تھے، امریکا کی مدد نے پاک بھارت جنگ کو روکنے میں کردار ادا کیا جو خوش آئند ہے۔
امریکی ترجمان نے کہا کہ دنیا نے دوبارہ محسوس کیا ہے کہ یہ مسئلہ حل نہیں ہواہے، جنگ بندی سے طویل مدتی مسائل کے حل ہونےکی صلاحیت واپس آگئی، اچھی خبریہ ہے دوسرے خطوں کے برعکس جنگ بندی کا عہد کیا گیا ہے۔
پاکستان نے بھارتی وزیر اعظم نریندر مودی کی راجستھان جلسے کے دوران لگائے گئے بے بنیاد، اشتعال انگیز اور غیر ذمہ دارانہ الزامات کو واضح طور پر مسترد کر دیا ہے۔
تفصیلات کے مطابق ترجمان دفتر خارجہ شفقت علی خان نے ان الزامات کو بے بنیاد اور اشتعال انگیز قرار دیتے ہوئے کہا کہ بھارتی وزیراعظم کے بیانات علاقائی کشیدگی بڑھانے کی کوشش ہیں، اس طرح کے بیانات خطے کے امن و استحکام کے لیے خطرہ ہیں۔
ترجمان دفتر خارجہ نے کاہ کہ جھوٹے الزامات، عسکری دعوے یواین چارٹر اور عالمی قوانین کی خلاف ورزی ہیں، پاکستان عالمی دہشتگردی کے خلاف مسلسل اور مؤثر شراکت دار ہے۔
ترجمان نے کہا کہ پاکستان کو دہشتگردی سے جوڑنے کی کوشش گمراہ کن اور ناقابل قبول ہے، بھارت کشمیریوں پر مظالم سے توجہ ہٹانے کے لیے پاکستان کو نشانہ بناتا ہے، مقبوضہ جموں وکشمیر میں بھارتی مظالم بین الاقوامی سطح پربے نقاب ہوچکے ہیں۔
ترجمان دفتر خارجہ کا کہنا تھا کہ پاکستان نے بھارتی قیادت پر ذمہ داری اور ضبط کا مظاہرہ کرنے پر زور دیا اس اشتعال انگیز بیانات سے خطے میں امن کو خطرہ لاحق ہوتا ہے جبکہ پاکستان امن، استحکام اور تعمیری مکالمے کے لیے پرعزم ہے۔
ترجمان دفتر خارجہ کا مزید کہنا تھا کہ پاکستان کی امن کی خواہش کو کمزوری نہ سمجھا جائے، پاکستان اپنی خودمختاری کے تحفظ کی مکمل صلاحیت رکھتا ہے، کسی بھی جارحیت کا منہ توڑ جواب دیا جائے گا۔
دفتر خارجہ نے عالمی برادری پر زور دیا کہ وہ بھارت کے جارحانہ انداز اور نفرت پر مبنی بیانیے کا سنجیدگی سے نوٹس لے جس سے علاقائی امن کو خطرہ ہے۔
