پاکستان اور بھارت کے ڈائریکٹر جنرلز ملٹری آپریشنز (ڈی جی ایم اوز) کے درمیان آج پھر رابطہ ہوگا، دونوں ممالک سیز فائر پر متفق ہوچکے ہیں۔
تفصیلات کے مطابق نائب وزیراعظم اسحٰق ڈار نے پروگرام سوال یہ ہے میں گفتگو میں کہا کہ کشیدگی میں کمی کے لیے کوششیں جاری ہیں، اگلا مرحلہ مذاکرات کا ہوگا۔
نائب وزیراعظم اسحاق ڈار نے گفتگو میں کہا کہ ملٹری لیول پر ابھی بات جاری ہے، اگلا مرحلہ ڈائیلاگ کا ہوگا، انہوں نے کہا کہ ہرچیز دیکھ رہے ہیں، بھارت پانی روکنے کا بندوبست راتوں رات نہیں کرسکتا، سندھ طاس معاہدہ بھارت بالکل معطل نہیں کرسکتا۔
انھوں نے بتایا کہ ہم وفود مختلف ممالک بھیج رہے ہیں جو مسئلے پر بات کریں گے، ہم وفود مختلف ممالک بھیج رہے ہیں جو مسئلے پر بات کریں گے، ایک وفد یورپی ممالک اور ایک وفد امریکا اور ایک روس بھی جائیگا، وزیراعظم نے وفود عالمی سطح پر بھیجنےکی منظوری دے دی ہے۔
راولپنڈی: پاک فوج کے شعبہ تعلقات عامہ (آئی ایس پی آر) کے ڈائریکٹر جنرل لیفٹیننٹ جنرل احمد شریف کا کہنا ہے کہ بھارتی وزارت دفاع کے ترجمان نے جنگ بندی کی درخواست کی، ہم امن اور استحکام کے خواہاں ہیں لہٰذا ہم نے کہا کیوں نہیں؟
روسی سرکاری میڈیا آر ٹی عربیہ کو دیے گئے انٹرویو میں ڈی جی آئی ایس پی آر لیفٹیننٹ جنرل احمد شریف نے کہا کہ پاک بھارت تناؤ کو سمجھنے کیلیے اس کے پس منظر میں جانا ضروری ہے، بھارت خطے اور خاص طور پر پاکستان میں دہشتگردی کی سرپرستی کر رہا ہے، وہ دہشتگردی کا اصل سرپرست ہے چاہے خوارج ہوں یا بلوچستان میں سرگرم دہشتگرد۔
ترجمان پاک فوج نے کہا کہ پہلگام واقعے کے چند منٹ بعد ہی بھارتی میڈیا نے پاکستان کو مورد الزام ٹھہرانا شروع کر دیا، بھارتی ترجمان دفتر خارجہ نے 2 دن بعد تسلیم کیا کہ تفتیش ابھی جاری ہے، بغیر تفتیش اور شواہد کے الزامات لگانا کہاں کی دانشمندی ہے؟ پاکستان کا واضح مؤقف تھا ثبوت ہیں تو غیر جانبدار ادارے کو دیں ہم تعاون کیلیے تیار ہیں لیکن بھارت نے حکومت پاکستان کی منطقی پیشکش کو رد کر دیا۔
لیفٹیننٹ جنرل احمد شریف نے کہا کہ بھارت نے یکطرفہ کارروائی کرتے ہوئے ہماری مساجد پر میزائل داغے جس میں بچے، خواتین اور بزرگ شہری شہید ہوئے، افواج پاکستان کو ملک کی خود مختاری اور سرحدوں کے تحفظ کی مقدس ذمہ داری سونپی گئی ہے اور ہم نے یہ مقدس ذمہ داری پوری کی اور ہر قیمت پر کریں گے۔
’پاکستان نے نہایت بالغ نظری سے کام لیتے ہوئے فوری، سخت اور مؤثر جواب دیا۔ پاکستان کے جواب سے دشمن کو حقیقت کا سامنا کرنا پڑا۔ 6 اور 7 مئی کی رات کو بھارت نے حملے کرتے ہوئے میزائل فائر کیے جس کے بعد ہماری فضائیہ نے ان کے 5 جنگی طیارے مار گرائے، قوم اور افواج پاکستان ایک سیسہ پلائی ہوئی دیوار کی مانند کھڑی ہوگئیں۔‘
انٹرویو میں انہوں نے مزید کہا کہ دشمن نے ہمیں ڈرانے کیلیے 9 اور 10 مئی کی شب مزید میزائل داغے لیکن وہ بھول گیا تھا کہ پاکستان کی قوم اور اس کی افواج نہ کبھی جھکتی ہیں اور نہ جھکائی جا سکتی ہیں، 10 مئی کی صبح ہم نے نہایت ذمہ داری اور احتیاط کے ساتھ جواب دیا جس میں صرف دشمن کے فوجی اہداف کو نشانہ بنایا، ہم نے ایک بھی شہری ہدف کو نقصان نہیں پہنچایا یہ ایک مناسب، منصفانہ اور متوازن جواب تھا۔
’سفارتی کور نے انتہائی فہم و فراست سے غیر معمولی انداز میں عالمی برادری کو انگیج کیا۔ ہم پُرتشدد قوم نہیں بلکہ ہم ایک سنجیدہ قوم ہیں اور ہماری پہلی ترجیح امن ہے۔ امریکا جیسی بڑی اور سمجھدار طاقتیں بہتر انداز میں سمجھتی ہیں کہ پاکستان کے عوام کا جذبہ کیا ہے۔‘
ڈی جی آئی ایس پی آر لیفٹیننٹ جنرل احمد شریف چوہدری نے بھارت کے خلاف شاندار کامیابی پر کہا ہے کہ پاکستان کی فتح دراصل امن کی فتح ہے۔
تفصیلات کے مطابق ڈی جی آئی ایس پی آر نے اسلام آباد کے طلبا اور اساتذہ کے ساتھ خصوصی نشست کی جس سے خطاب کرتے ہوئے احمد شریف چوہدری نے پاکستان کی فتح کو امن کی فتح قرار دیتے ہوئے کہا کہ پاکستان امن کا گہوارہ ہے۔
انھوں نے نوجوانوں کی ملک کیلئے کاوشوں کو نہایت اہم قرار دیا جبکہ احمد شریف نے دشمن کے ناپاک عزائم سے آگاہ کرتےہوئے طلبا کو متحد رہنے کی تلقین کی۔
ڈی جی آئی ایس پی آر لیفٹیننٹ جنرل احمدشریف چوہدری نے اس موقع پر پورے ملک کے اساتذہ کو پاک فوج کی جانب سے سلام پیش کیا۔
خیال رہے کہ آپریشن بنیان مرصوص میں پاک افواج کی شاندار فتح اور اختتام پر پاک فوج کے شعبے انٹر سروسز پبلک ریلیشنز (آئی ایس پی آر) نے راحت فتح علی خان کی آواز میں ملی نغمہ جاری کیا ہے۔
لہو کو گرما دینے والا نغمہ حفاظت تیری ہم کریں گے وطن تیری زمین کی قسم تیرے آسمان کی قسم، نغمے کے بول پاکستان کا مطلب کیا لَا الٰہ الالٰہ محمد رسول اللہ ریاست طیبہ کی ترجمانی کرتے ہیں۔
ملی نغمہ کے دل مو لینے والے سُر ہر پاکستانی کی آواز ہیں، نغمہ کے بول دشمنوں کے دل پر ہیبت طاری کر دیتے ہیں۔
اسلام آباد : پاکستان میں گاڑیوں کی قیمتوں میں کمی کے حوالے سے اہم خبر آگئی، جس سے عوام کو فائدہ ہوگا۔
تفصیلات کے مطابق مالی سال 2025-26 کے آئندہ بجٹ میں طویل وقفے کے بعد پاکستان میں کاروں کی قیمتوں میں کمی کا امکان ہے۔
توقع ہے کہ وفاقی حکومت بجٹ 2025-26 2 جون کو پیش کرے گی تاہم بین الاقوامی مالیاتی فنڈ (آئی ایم ایف) کے ساتھ بات چیت کے بعد حتمی تاریخ کا اعلان کیا جائے گا۔
نئے مالی سال کے بجٹ میں متعدد شعبوں میں مجوزہ ٹیکسوں میں کمی کے ساتھ ساتھ 14305 ارب روپے کے ٹیکس ہدف پر غور کیا جا رہا ہے۔
رپورٹس میں کہا گیا ہے کہ آئندہ مالی سال کے لیے ٹیکس تجاویز کے حوالے سے آئی ایم ایف سے مشاورت جاری ہے۔ اس تناظر میں رپورٹس میں دعویٰ کیا گیا ہے کہ نئے بجٹ میں گاڑیوں اور آٹو پارٹس پر ٹیکس کم کرنے کی تجویز بھی شامل ہے۔
گاڑیوں پر کسٹم ڈیوٹی میں متوقع کمی
رپورٹس کے مطابق گاڑیوں پر 15 سے 90 فیصد تک ڈیوٹی میں 20 فیصد کمی کی تجویز ہے۔ اگر یہ منظور ہو جاتا ہے تو پاکستان میں کار کی قیمت میں نمایاں کمی دیکھی جائے گی۔
حالیہ اعدادوشمار کے مطابق مذکورہ گاڑیاں پاکستان میں سوزوکی ، ٹویوٹا وٹز ، ڈائی ہاٹسو میرا ، ٹویوٹا پرائس، ہونڈا ویزل اور ٹویوٹا ایکوا سرفہرست امپورٹڈ گاڑیوں میں شامل ہیں۔
مزید برآں، پرزوں پر موجودہ 2 فیصد اضافی کسٹم ڈیوٹی کو کم کر کے صفر کرنے کی تجویز ہے جبکہ 4 سے 7 فیصد سلیب میں بتدریج کمی پر بھی غور کیا جا رہا ہے۔
صنعتی خام مال اور نیم تیار شدہ اشیا پر ڈیوٹی کم کرنے کا منصوبہ بھی زیر غور ہے۔ ان شعبوں میں ٹیکسٹائل، کیمیکل، آٹو پارٹس، پلاسٹک، کیمیکل، آئرن اور اسٹیل انڈسٹری شامل ہیں۔
دریں اثنا، حکومت نے قوانین کے نفاذ کے ذریعے 600 ارب روپے اور نئے اقدامات کے ذریعے 400 ارب روپے حاصل کرنے کا منصوبہ بنایا ہے۔
لاہور : آسان کاروبار فنانس اسکیم کے تحت قرض حاصل کرنے کے خواہشمند افراد کے لیے اہم خبر آگئی، قرض کیلئے زیر غور درخواستوں کا پراسیس جلد مکمل کرنے کا حکم آگیا۔
تفصیلات کے مطابق وزیراعلیٰ پنجاب مریم نواز کی زیر صدارت آسان کاروبار فنانس اور آسان کاروبار کارڈ سے متعلق اجلاس ہوا ، جس میں مریم نواز نے ایکسپورٹ اور مینو فیکچرنگ سیکٹر لون کیلئے پلان طلب کر لیا۔
وزیراعلیٰ نے آسان کاروبار فنانس اور کارڈ لون کیلئے زیر غور درخواستوں کا پراسیس جلد مکمل کرنے کا حکم دیتے ہوئے کہا کہ آسان کاروبار فنانس اور آسان کاروبار کارڈ پروگرام کسی صورت نہیں رکنا چاہیے۔
خصوصی اجلاس میں آسان کاروبار فنانس اور آسان کاروبار کارڈ سے متعلق تفصیلی بریفنگ میں بتایا گیا کہ نئے کاروبار شروع کرنےکیلئے 23 ارب 91 کروڑ روپے کے قرض جاری کیےگئے، 6753 خواتین نے کاروبار چلانے کیلئے 3 ارب 42 کروڑ روپے کاقرضہ لیا، آسان کاروبار کارڈ اب واٹس ایپ کے ذریعے بھی ایکٹیو کیا جا سکے گا۔
چیف منسٹر آسان کاروبار فنانس اسکیم کے تحت 3010 افراد کو 18 ارب روپے کا قرضہ جاری کیا ہے جبکہ ایک لاکھ 4 ہزار افراد کو 43 ارب روپے کے قرض کا اجرا کیا۔
چیف منسٹرآسان کاروبار فنانس کے لئے 74579 درخواستیں آئیں ، جس میں سے 2505 منظور ہوئیں، جن کو قرضے مل گئے
چیف منسٹر آسان کاروبار فنانس ٹیر ٹو کیلئے12029 درخواستیں موصول ہوئیں ، جس میں سے 505 منظور ہوئیں اور قرضے مل گئے، اسی طرح چیف منسٹر آسان کاروبار کارڈ اسکیم کیلئے 1380838 درخواستیں موصول ہوئیں ، جس میں سے 104133 منظور ہوئیں۔
ٹرانسپورٹیشن کاروبار کیلئے 13 ہزار 12 روپے افراد نے 3ارب 91کروڑ روپے کے قرض اور ٹریڈنگ اینڈ ڈسٹری بیوشن کیلئے 175 افراد نے 3 ارب 94 کروڑ روپے کے قرض حاصل کیے۔
اس کے علاوہ آسان کاروبا کارڈ کے ذریعے سروسز مہیا کرنیوالے 61996 افراد نے 26 ارب 13 کروڑ روپے کے لون لیے جبکہ ٹریڈنگ کیلئے 24522 افراد نے 10 ارب 75کروڑ روپے اور ایگری سمال بزنس کیلئے 10699 افراد نے 3 ارب 69 کروڑ روپے کے قرض لیے۔
وزیراعظم شہباز شریف نے کہا ہے کہ ہم نے جنگ جیت لی ہے اور دشمن کو سبق سکھا دیا ہے پاکستان خطے میں امن چاہتا ہے۔
اے آر وائی نیوز کے مطابق بھارتی جارحیت کے جواب میں پاکستان کے معرکہ حق کی شاندار کامیابی پر آج ملک بھر میں یوم تشکر منایا گیا۔ یوم تشکر کی مرکزی تقریب اسلام آباد پاکستان مونومنٹ میں ہوئی تقریب کے مہمان خصوصی وزیراعظم شہباز شریف تھے۔
تقریب سے خطاب کرتے ہوئے وزیراعظم شہباز شریف نے کہا کہ ہم نے جنگ جیت لی ہے اور دشمن کو سبق سکھا دیا ہے۔ سبق یہی ہے کہ ہم مذاکرات کی میز پر بیٹھیں اور گفتگو سے مسائل حل کریں۔ ہم امن چاہتے ہیں۔ مسئلہ کشمیر کا حل ناگزیر ہے۔ مسائل کا حل نکالنا ہے تو مذاکرات کی میز پر بیٹھنا ہوگا۔
کم عمر بچوں کی شادیوں پر پابندی سے متعلق بل قومی اسمبلی سے منظور کر لیا گیا۔
بل میں 18سال سےکم عمر بچوں کے نکاح کا اندراج قانونی جرم قرار دیا گیا ہے اور نکاح رجسٹرار کم عمر بچوں کی شادی کا اندارج نہ کرنے کے پابند ہوں گے۔
نکاح یا رجسٹریشن سے قبل دونوں فریقین کے شناختی کارڈز کی موجودگی یقینی بنائےگا، کوائف کے بغیر نکاح پڑھانے اور رجسٹریشن پر ایک سال قید،1لاکھ جرمانہ یا دونوں سزائیں ہوں گی۔
بل کے مطابق 18سال سے کم عمر لڑکی سے شادی جرم ہو گا جس پر جرمانہ بھی عائد کیا جائےگا، 18 سال سے زائد عمر کے مرد کی کمسن لڑکی سےشادی پر سزا مقرر کی گئی ہے۔ کمسن لڑکی سےشادی پر کم سےکم 2 سال اور زیادہ سے زیادہ 3 سال قید بامشقت ہو گی۔
کم عمر بچوں کی شادی نابالغ سے زیادتی سمجھی جائےگی، نابالغ کو شادی کی ترغیب دینے اور زبردستی کرنےوالا بھی زیادتی کامرتکب ہو گا۔
نابالغ کی شادی کرانے پر 5 سے7سال قید، 10 لاکھ روپےجرمانہ یا دونوں سزائیں ہوں گی۔ شادی کی غرض سے کسی بچےکو ملازمت پر رکھنے یا پناہ دینے والےکو 3سال قید بمع جرمانہ سزا ہوگی۔
بل میں 18سال سےکم عمر بچوں کی شادی پر والدین اور سرپرست کےلیے بھی سزائیں مقرر کی گئی ہیں۔ کمسن بچوں کی شادی پر والدین کو 3 سال قید بامشقت اور جرمانے کی سزا ہو گی۔
شادی کےلیے کمسن بچوں کوعلاقہ چھوڑنے پر مجبور یا زبردستی کرنا بچوں کی اسمگلنگ قرار دیا گیا ہے۔ بچوں کی اسمگلنگ کے مرتکب شخص کو 5 سے 7 سال قید اور جرمانے کی سزائیں ہوں گی۔
18سال سےکم عمر بچوں کی شادی رکوانے کےلیے عدالت کو حکم امتناع دینےکا اختیار ہو گا۔ عدالت کم عمر بچوں کی شادی سے متعلق مقدمات 90 روز میں نمٹانے کی پابند ہوگی۔
معرکہ حق میں تاریخی فتح پر ملک بھر میں آج یوم تشکر منایا جارہا ہے، افواج پاکستان اور پاکستانی عوام کو خراج تحسین پیش کیا جارہا ہے۔
تفصیلات کے مطابق وفاقی دارالحکومت میں 31، صوبائی دارالحکومتوں میں 21 توپوں کی سلامی دی گئی، دن کا آغاز ملکی سلامتی اور امن واستحکام کیلئے خصوصی دعاؤں سے کیا گیا، اس موقع پر پاک فوج کے چاق و چوبند دستے کی جانب سے نعرہ تکبیر بلند کیا گیا اور جوانوں نے پاکستان زندہ باد کے نعرے بھی لگائے۔
خیبرپختونخوا بشمول ضم اضلاع میں تعینات پاک فوج کے جوانوں نے یوم تشکر کے موقع پر تقریب کا انعقاد کیا، تقریبات میں عوام، عمائدین، سول اور عسکری شخصیات نے شرکت کی اور شرکا نے وطن عزیز کی سالمیت اور خوشحالی کیلئے دعائیں کیں۔
ننکانہ صاحب میں یوم تشکر کا آغاز خصوصی عبادات اور دعاؤں سے ہوا، ننکانہ صاحب کی تمام مساجد میں نماز فجر کے بعد خصوصی دعاؤں کا اہتمام کیا گیا جبکہ علما کرام نے پاکستان کی سلامتی، تعمیروترقی اور شہدا کے بلندی درجات کیلئے خصوصی دعائیں کیں۔
یوم تشکر کے موقع پر ہیڈ کوارٹر ایف سی این اے میں قرآن خوانی کی پروقار تقریب کا انعقاد کیا گیا، تقریب کا مقصد پاکستان کی ترقی، سلامتی اور خوشحالی کیلئے اجتماعی دعا کرنا تھا۔
تقریب میں شہدا کے بلندی درجات، ملکی سلامتی اور افواج پاکستان کی کامیابی کیلئے دعائیں مانگی گئیں، آزاد کشمیر میں آپریشن بنیان مرصوص کی شاندار کامیابی پر یوم تشکر بھرپور ملی جذبے کیساتھ منایا جارہا ہے۔
اس کے علاوہ مقبوضہ کشمیر کی آزادی کے لئے خصوصی دعائیں مانگی گئیں، معرکہ حق میں تاریخی فتح پر سجدہ شکر، نماز فجر کے بعد مساجد میں ملک کی سلامتی کیلئے خصوصی دعائیں۔
وزیراعظم شہباز شریف کا کہنا ہے کہ رافیل کے گرنے کو مودی تا قیامت یاد رکھے گا۔
معرکہ حق کے شاہینوں سے خطاب کرتے ہوئے وزیراعظم شہباز شریف نے کہا کہ پاک فضائیہ کے شاہینوں نے دشمنوں کے دانت توڑے، غرور خاک میں ملا دیا، آج قوم کو بلا خوف و تردید بتا سکتا ہوں کہ پاکستان نے 5 نہیں 6 بھارتی طیارے گرائے ہیں۔
انہوں نے کہا کہ پاک فضائیہ کے شاہینوں نے اپنی مہارت سے دنیا کو حیرت میں ڈال دیا، ہمارے بہادر سپوتوں نے مختصر جنگ میں دشمن کے دانت، گھمنڈ اور غرور کو توڑ دیا جس کے بعد انہیں پیغام مل گیا کہ دوبارہ میلی آنکھ سے دیکھا تو پاؤں تلے زمین کھینچ لیں گے۔
شہباز شریف نے کہا کہ پاک فضائیہ کے شاہینوں نے دوستوں کے اعتماد کو آسمان تک پہنچادیا، اللہ تعالیٰ نے ہمیں تاریخ کی عظیم ترین فتح سے ہمکنار کیا ہے۔
وزیراعظم کا کہنا تھا کہ خطے اور پوری دنیا میں پاکستان سے متعلق خیالات تبدیل ہوگئے، افواج پاکستان کی شاندار کارکردگی پر قوم کے سر فخر سے بلند ہیں۔
انہوں نے کہا کہ اس جنگ میں دشمن اور ہم میں یہ فرق تھا کہ ہم نے صبر اور تحمل اور برداشت کا دامن نہیں چھوڑا اور فیصلہ کیا کہ دشمن نے ہماری امن کی پیش کش کو جس گھمنڈ میں ٹھکرایا ہے اس کا جواب بہت سوچ سمجھ کر دیں گے۔
شہباز شریف نے کہا کہ سپہ سالار جنرل عاصم منیر نے فرنٹ سے لیڈ کیا، ائر چیف اور نیول چیف کو بھی مبارکباد پیش کرتا ہوں، 10 مئی کا دن رہتی دنیا تک پاکستان کی کامیابی کے طور پر یاد رکھا جائے گا۔
ان کا کہنا تھا کہ قوم ایئر چیف کے کردار کو سنہری حروف میں یاد رکھے گی، پوری قوم آج ایک ہے، 24 کرور عوام افواج کی کامیابی کے لیے دعائیں کررہے تھے، قوم اپنی بہادر افواج کے شانہ بشانہ ہے۔
وزیراعظم نے مزید کہا کہ آئیں خطے سے دہشت گردی ختم کرنے کے لیے بیٹھ کر بات کرتے ہیں، آئیں مسئلہ کشمیر کے لیے بیٹھ کر بات کریں، گفتگو کریں کہ کون دہشت گردی کررہا ہے اور کون نشانہ بنا ہے۔
پاکستان نے امریکا کو بغیر کسی تجارتی ٹیرف کے دو طرفہ تجارتی معاہدے کی پیشکش کردی۔
اے آر وائی نیوز کے مطابق پاکستان نے امریکا کو تجویز دی ہے کہ دونوں ممالک باہمی دلچسپی کے تجارتی شعبوں پر زیرو ٹیرف کے تحت معاہدہ کریں۔
ذرائع کا کہنا ہے کہ معاہدے کا مقصد دو طرفہ تجارت کو وسعت دینا ہے جبکہ تجویز امریکی صدر کے پاکستان کے ساتھ تجارت بڑھانے کے جواب میں دی گئی ہے۔
وزیراعظم شہباز شریف نے امریکی صدر کی پیشکش کو خوش آمدید کہا ہے، جنگ بندی کے بعد ٹرمپ نے کہا تھا کہ وہ دونوں ملکوں کے ساتھ بہت سی تجارت کریں گے۔
پاکستان کا کہنا ہے کہ امریکا کے ساتھ متعدد شعبوں میں دو طرفہ تجارت کو توسیع دینا چاہتا ہے۔
یاد رہے کہ امریکی صدر ڈونلڈ ٹرمپ نے گزشتہ ماہ متعدد ممالک پر بھاری جوابی ٹیرف عائد کیا تھا۔ بعد ازاں صدر ٹرمپ نے جوابی ٹیرف میں 90 روز کے وقفے اعلان کرتے ہوئے کہا تھا کہ کئی ممالک امریکا کے ساتھ مذاکرات پر راضی ہیں۔
