Category: اہم ترین

پاکستان اور دنیا بھر سے اہم ترین خبریں جاننے کے لئے اے آر وائی نیوز کی اردو ویب سائٹ پر آئیں

Important Breaking News from Pakistan and World from ARY News Urdu

  • ’’اب تم خوش ہو جاؤ، تمہاری وجہ سے کیا ہوا ہے؟‘‘

    ’’اب تم خوش ہو جاؤ، تمہاری وجہ سے کیا ہوا ہے؟‘‘

    کراچی (16 اگست 2025): شہر قائد کے علاقے ڈیفنس خیابان مجاہد میں اپنے 2 معصوم بچوں کو قتل کرنے والی قاتل ماں ادیبہ نے سفاکانہ عمل کے بعد شوہر کو ایک ایسا وائس میسج کیا جسے پڑھ کر در مند دل دہل جاتا ہے۔

    تفصیلات کے مطابق کراچی کے علاقے ڈیفنس خیابانِ مجاہد میں 14 اگست کو ادیبہ نامی خاتون نے اپنے دو بچوں کو تیز دھار آلے کے ساتھ گلا کاٹ کر قتل کر دیا تھا، پولیس نے ملزمہ کو گرفتار کر کے مقدمہ درج کر لیا ہے، معلوم ہوا کہ ادیبہ اور اس کے شوہر غفران میں 2024 میں طلاق ہو گئی تھی، اور بچوں کی حوالگی کا مسئلہ چل رہا تھا۔

    اب تم خوش ہو جاؤ!


    اب پولیس تفتیش میں اس سفاکانہ قتل کے سلسلے میں ایک اور انکشاف ہوا ہے، بچوں کو گھر کے واش روم میں بے دردی سے مارنے والی قاتل ماں نے واردات کے بعد شوہر کو وائس میسج کیا، جس میں اس نے کہا کہ ’’اب تم خوش ہو جاؤ، تمہاری وجہ سے کیا ہوا ہے؟؟؟‘‘

    اے آر وائی نیوز نے ابتدائی تفتیش کی اہم معلومات حاصل کر لی ہیں، جس کے مطابق قتل ہونے والے معصوم بچے جشن آزادی بھرپور طریقے سے منانا چاہتے تھے، معصوم سمہیا نے ماں سے ہی ’ایسی زمیں اور آسماں‘ گانا بھی سیکھ لیا تھا، اور قتل سے پہلے ماں کی فرمائش ہی پر غفران نے دونوں کو یوم آزادی کے کپڑے بھی دلوا دیے تھے۔

    14 اگست کی تیاری کے لیے ادیبہ اور غفران میں ہونے والے واٹس ایپ میسجز


    ابتدائی تحقیقات کے مطابق ادیبہ اور غفران واٹس ایپ پر روزانہ میسج اور فون پر بات کرتے تھے، ادیبہ نے میسج پر غفران کو کہا ’کیا ضرار کے پاس کل کے لیے شلوار قمیض ہے؟ کیا سمیہا کو بتایا کہ اسے کل کیا پہننا ہے؟‘ پھر کہا ضرار کے ایک یا دو سائز بڑے جوتے لینا، کیوں کہ وہ بڑا ہو رہا ہے، پھر میسج کیا کہ مما سنگاپور سے واپس آ گئی ہیں اور سمیہا کے کپڑے لائی ہیں اور کہا سمیہا نے کل کے لیے تیاری کر لی ہے، اس کے پاس جھنڈیاں بھی ہیں، ضرار کا سبز کرتا لے لینا، اگر پہلے سے سفید شلوار یا پینٹ ہے تو مت لینا۔ڈیفنس کراچی قاتل ماں ادیبہ 14 اگست

    تمام سوالوں کے جواب میں غفران کا جواب آیا کہ ٹھیک ہے، پھر ادیبہ نے کہا کل دفتر سے جلدی آنے کی کوشش کرنا، اسی دوران والد غفران کی جانب سے بچوں کو تیار کر کے تصاویر بھیجی گئیں، تصاویر میں بچوں نے جشن آزادی کی تیاری کی ہوئی تھی، ادیبہ تصاویر دیکھ کر بولی ماشاء اللہ، یہ کب تیار ہوئے، ضرار کی ٹوپی کہاں ہے؟


    کراچی : اپنے بچوں کو قتل کرنے والی ماں کیخلاف مقدمہ درج


    غفران کا جواب آیا اسکول جاتے وقت تیار ہوئے، ضرار نے ٹوپی نہیں پہنی، اور کہا سمہیا بہت خوش تھی، ضرار 7 بجے سمہیا 8 بجے نکلی، ماں نے کہا ضرار ہینڈ بینڈ بھی پہننا بھول گیا، ضرار کا کرتا کہاں سے لیا؟

    پھر ماں کا میسج آیا، بچے کہہ رہے ہیں آج رات رکنے کی اجازت لی ہے تم سے؟؟ والد غفران نے مسکرا کر کہا ہاں، اور قاری صاحب کو بھی بتا دینا، ادیبہ نے کہا ان کو تم خود بتا دو، میں ان سے رابطے میں نہیں، والد غفران نے کہا سمیہا کو کہنا وہ ایسی زمیں اور آسماں گائے۔ ماں نے جواب دیا میں نے اسے سکھا دیا ہے۔

    والد نے کہا سمیہا اس پر رقص بھی کرتی ہے، ماں نے جواب دیا میں نے اس کو رقص نہیں سکھایا، کیا تم فیس بک والی تصاویر بھیج سکتے ہو۔

  • دہشت گردوں کو پناہ دینے والوں کو نتائج بھگتنا پڑیں گے، ڈی جی آئی ایس پی آر

    دہشت گردوں کو پناہ دینے والوں کو نتائج بھگتنا پڑیں گے، ڈی جی آئی ایس پی آر

    راولپنڈی: ڈی جی آئی ایس پی آر لیفٹیننٹ جنرل احمد شریف نے واضح کیا کہ جو بھی دہشت گردوں کو پناہ دے گا یا اپنے گھر میں بارودی مواد رکھے گا، اسے اس کے نتائج بھگتنا ہوں گے۔

    تفصیلات کے مطابق آئی ایس پی آر کے زیر اہتمام انٹرن شپ پروگرام کے دوران ڈی جی آئی ایس پی آر لیفٹیننٹ جنرل احمد شریف چوہدری نے طلبہ سے خصوصی نشست میں خطاب کیا، جس میں پاکستان بالخصوص بلوچستان سے متعلق تفصیلی گفتگو ہوئی اور بلوچستان کے طالب علموں کے سوالات کے جوابات دیے گئے۔

    بلوچستان میں دہشت گردی کے خلاف بڑے آپریشن کے مطالبے پر ڈی جی آئی ایس پی آر نے کہا کہ یہ تاثر دیا جاتا ہے کہ بلوچستان کے عوام اور نوجوان پاکستان سے دور ہیں، لیکن حقیقت یہ ہے کہ بلوچستان کے عوام پاکستان اور صوبے کے تعلق کو بخوبی سمجھتے ہیں۔

    انہوں نے کہا کہ بلوچستان کے عوام اب دہشت گردوں اور سہولت کاروں سے تنگ آچکے ہیں اور خود نشاندہی کر رہے ہیں کہ کہاں دہشت گرد اور کہاں ان کے سہولت کار موجود ہیں۔

    لیفٹیننٹ جنرل احمد شریف چوہدری کا کہنا تھا کہ کسی علاقے میں آپریشن اس وقت کامیاب ہوتا ہے جب عوام خود دہشت گردوں کی نشاندہی کریں۔ فوج علاقہ خالی کرا کے آپریشن کرے اور واپس چلی جائے تو دہشت گرد دوبارہ لوٹ آتے ہیں، اسی لیے انٹیلی جنس بیسڈ آپریشن کیے جاتے ہیں۔

    ترجمان پاک فوج نے واضح کیا کہ جو بھی دہشت گردوں کو پناہ دے گا یا اپنے گھر میں بارودی مواد رکھے گا، اسے اس کے نتائج بھگتنا ہوں گے، ایک شخص کی دہشت گردی کی سزا پورے علاقے کو نہیں دی جاسکتی۔

    انہوں نے مزید کہا کہ بلوچستان کے عوام نہایت سمجھدار اور دوراندیش ہیں، تعلیم حاصل کرنے والے نوجوان اپنی تقدیر کے مالک بن چکے ہیں جبکہ درجنوں بلوچ طلبہ اور طالبات اعلیٰ عہدوں پر خدمات انجام دے رہے ہیں، جن میں خواتین افسران بطور ڈپٹی کمشنر بھی شامل ہیں۔

    ڈی جی آئی ایس پی آر نے مثال دی کہ کیمبرج یونیورسٹی کے معروف سائنسدان صمد یار جنگ کا تعلق بلوچستان کے بلیدہ اسکول سے ہے جبکہ شاہ زیب رند بھی بلوچستان سے تعلق رکھتے ہیں اور اپنی کامیابی کی مثال ہیں۔

    میجر محمد انور کاکڑ شہید کو خراجِ عقیدت پیش کرتے ہوئے انہوں نے کہا کہ وہ نہایت شاندار افسر اور اس دھرتی کے عظیم بیٹے تھے، جنہوں نے پی سی ہوٹل گوادر حملے میں کئی دہشت گردوں کو جہنم واصل کیا۔ انہوں نے کہا کہ پاکستان کو آزاد رکھنے کے لیے فوجی افسران، جوان اور شہری ہر روز قربانیاں دے رہے ہیں۔

    ڈی جی آئی ایس پی آر نے کہا کہ پاکستان تمام لسانی و علاقائی بنیادوں سے ہٹ کر کلمہ طیبہ کی بنیاد پر قائم ہوا ہے۔

    انہوں نے نبی کریم ﷺ کا فرمان دہرایا کہ کسی عربی کو عجمی پر، عجمی کو عربی پر اور کسی گورے کو کالے پر کوئی فضیلت نہیں۔

    ترجمان کا مزید کہنا تھا کہ بلوچستان کی آبادی تقریباً ڈیڑھ کروڑ ہے، جن میں سے 50 فیصد لوگ ملک کے دیگر حصوں میں رہائش پذیر ہیں۔ صوبے میں صرف بلوچ ہی نہیں بلکہ 30 فیصد سے زائد پشتون بھی آباد ہیں، جبکہ سندھ اور جنوبی پنجاب میں بھی بڑی تعداد میں بلوچ آباد ہیں۔

    ڈی جی آئی ایس پی آر نے کہا کہ پاکستان کا مطلب لا الہ الا اللہ عوام کے دلوں میں رچ بس چکا ہے اور یہی ہماری اصل قوت ہے۔

  • خیبرپختونخوا میں قدرتی آفت سے تاریخ کی سب سے بڑی تباہی، 307 افراد جاں بحق

    خیبرپختونخوا میں قدرتی آفت سے تاریخ کی سب سے بڑی تباہی، 307 افراد جاں بحق

    پشاور : خیبر پختونخوا میں بارش اور سیلابی صورتحال نے قیامت ڈھا دی، 300 سے زائد افرادجاں بحق اور سیکڑوں زخمی ہوگئے۔

    تفصیلات کے مطابق خیبرپختونخوا میں گزشتہ 48 گھنٹوں کے دوران طوفانی بارشوں اور سیلابی ریلوں نے تباہی مچا دی۔

    پی ڈی ایم اے کی جانب سے بتایا گیا ہے کہ مختلف حادثات میں 307 افراد جاں بحق اور 23 زخمی ہوئے۔ جاں بحق ہونے والوں میں 279 مرد، 15 خواتین اور 13 بچے شامل ہیں، جبکہ زخمیوں میں 17 مرد، 4 خواتین اور 2 بچے شامل ہیں۔

    رپورٹ میں کہنا ہے کہ حادثات زیادہ تر سوات، بونیر، باجوڑ، تورغر، مانسہرہ، شانگلہ اور بٹگرام میں پیش آئے۔ بارشوں اور سیلاب کے باعث مجموعی طور پر 74 گھروں کو نقصان پہنچا، جن میں 63 جزوی طور پر اور 11 مکمل طور پر منہدم ہوئے۔

    مزید پڑھیں : کلاؤڈ برسٹ : کیا بادل پھٹنے کی پیش گوئی کی جاسکتی ہے؟

    شدید بارشوں اور فلش فلڈ سے سب سے زیادہ متاثرہ اضلاع باجوڑ اور بٹگرام ہیں، جبکہ بونیر میں اب تک 184 افراد کے جاں بحق ہونے کی تصدیق ہو چکی ہے۔

    محکمہ موسمیات کے مطابق شدید بارشوں کا موجودہ سلسلہ 21 اگست تک وقفے وقفے سے جاری رہنے کا امکان ہے۔

    وزیراعلیٰ خیبرپختونخوا نے متاثرہ اضلاع کے لیے امدادی فنڈز جاری کرنے اور تمام اداروں کو امدادی سرگرمیاں تیز کرنے کی ہدایت کر دی ہے۔

  • ٹرمپ پیوٹن ملاقات ختم، جنگ بندی کا اعلان نہ ہوسکا

    ٹرمپ پیوٹن ملاقات ختم، جنگ بندی کا اعلان نہ ہوسکا

    الاسکا : امریکی صدر ٹرمپ اور روسی صدر پیوٹن کے درمیان اہم ملاقات ختم ہوگئی ملاقات میں جنگ بندی کا اعلان نہ ہوسکا، بعد ازاں دونوں شخصیات نے مشترکہ پریس کانفرنس کی۔

    روسی اور امریکی وفود کےدرمیان ملاقات ڈھائی گھنٹے سے زائد وقت تک جاری رہی اس موقع پر امریکا کی جانب سے وزیرخارجہ مارکو روبیو اور خصوصی مندوب وٹکوف جبکہ روسی وفد میں وزیرخارجہ لارؤف اور ایلچی یوری اوشاکوف بھی موجود تھے۔

    پریس کانفرنس سے خطاب کرتے ہوئے روسی صدرپیوٹن کاکہنا تھا کہ ملاقات مثبت اور تعمیری رہی، میرے اور صدرٹرمپ کے درمیان اچھے براہ راست رابطے ہیں، مذاکرات کی دعوت دینے پرامریکی صدر کے شکر گزار ہیں۔ صدر پیوٹن نے کہا کہ ہم دونوں تنازع کو ختم کرنا چاہتے ہیں۔

    صدر پیوٹن کا کہنا تھا کہ پائیدار اور دیرپا امن کیلئے جنگ کی بنیادی وجوہات کو ختم کرنا ہوگا، یورپ سمیت دنیا بھر میں سلامتی کے توازن کو بحال ہونا چاہیے، صدر پیوٹن نے کہا کہ میں پہلے بھی کئی بار کہہ چکا ہوں کہ روس کے تمام جائز خدشات کو زیرغور لانا ہوگا۔

    روسی صدر نے بتایا کہ 2022میں ڈونلڈ ٹرمپ صدر ہوتے تو یوکرین میں جنگ کی نوبت ہی نہ آتی، سابق امریکی صدر جوبائیڈن کو قائل کرنے کی کوشش کی کہ صورتحال کو تصادم کی سطح پر نہ لائیں۔

    ان کا کہنا تھا کہ رو س کی یوکرین جنگ کے خاتمے اور دیرپا حل میں خاص دلچسپی ہے، امید ہے ڈونلڈ ٹرمپ کے ساتھ اتفاق رائے سے یوکرین میں امن کی راہ ہموار ہوگی۔

    صدرٹرمپ نے اپنے خطاب میں کہا کہ روسی صدر سے ملاقات کے بعد یوکرین کے صدر زیلنسکی اور نیٹو حکام سے ٹیلی فون پر بات کروں گا۔

    ٹرمپ نے کہا کہ روسی صدر سے سربراہی ملاقات میں بڑی پیشرفت ہوئی ہے لیکن یوکرین جنگ کے حوالے سے کوئی معاہدہ طے نہیں پایا کیونکہ جب تک معاہدہ نہ ہو، تب تک کوئی معاہدہ نہیں ہوتا۔

    امریکی صدر ٹرمپ نے بتایا کہ اپنے روسی ہم منصب پیوٹن سے تعمیری ملاقات رہی، اس موقع پر کئی نکات پر اتفاق رائے پایا گیا۔

    علاوہ ازیں پریس کانفرنس کے دوران روسی صدر پیوٹن نے صدرٹرمپ کو ماسکو میں اگلی ملاقات کی دعوت دی،
    جس کے جواب میں صدر ٹرمپ کا کہنا تھا کہ ماسکو میں اگلی ملاقات سے متعلق دیکھیں گے کہ کیا یہ ممکن ہے؟۔

    مزید پڑھیں : روسی وزیرخارجہ کی شرٹ نے سب کو چونکا دیا

    قبل ازیں الاسکا آمد پر روسی صدر پیوٹن کا صدر ٹرمپ نے ریڈ کارپٹ پر استقبال کیا، صدرٹرمپ روسی مہمان کو اپنی گاڑی میں بٹھا کر ایئربیس سے ملاقات کے مقام پر لے کرگئے

  • حکومت نے پیٹرولیم مصنوعات کی قیمتوں کا اعلان کردیا

    حکومت نے پیٹرولیم مصنوعات کی قیمتوں کا اعلان کردیا

    حکومت کی جانب سے پیٹرولیم مصنوعات کی قیمتوں کا اعلان کردیا گیا ہے۔

    حکومت کی جانب سے جاری کردہ نوٹیفکیشن کے مطابق پیٹرول کی موجودہ قیمت برقرار رکھی گئی ہے۔

    ڈیزل کی قیمت میں 12 روپے 84 پیسے فی لیٹر کمی کی گئی ہے جس کے بعد ڈیزل کی نئی قیمت 272 روپے 99 پیسے فی لیٹر مقرر کی گئی ہے۔

    پیٹرول کی موجودہ قیمت 264 روپے 61 پیسے فی لیٹر پر برقرار رہے۔

    مٹی کے تیل کی قیمت میں 7 روپے 19 پیسے کمی کی گئی ہے جس کے بعد نئی قیمت 178 روپے 27 پیسے فی لیٹر مقرر ہوگئی۔

    لائٹ دیزل کی قیمت 8 روپے 20 پیسے فی لیٹر کمی کے بعد 162 روپے 37 پیسے ہوگئی۔

    واضح رہے کہ حکومت کی جانب سے ہر پندرہ روز میں پیٹرولیم مصنوعات کی قیمتوں میں ردوبدل کیا جاتا ہے۔

  • خیبرپختونخو احکومت کا لاپتہ ہونے والا  ہیلی کاپٹر کریش گرگیا ،  5 افراد شہید

    خیبرپختونخو احکومت کا لاپتہ ہونے والا ہیلی کاپٹر کریش گرگیا ، 5 افراد شہید

    پشاور : خیبرپختونخو احکومت کا لاپتہ ہونے والا ہیلی کاپٹر کریش کرگیا ، جس کے نتیجے میں 5 افراد شہید ہوگئے۔

    تفصیلات کے مطابق خیبرپختونخو احکومت کے لاپتہ ہونے والے ہیلی کاپٹر کے کریش ہونے کی تصدیق کردی گئی۔

    سرکاری حکام نے بتایا کہ چینگئ بانڈہ کے قریب سوکئی میں سرکاری ہیلی کاپٹر کریش ہوگیا، جس کے نتیجے میں 5 افراد شہید ہوگئے۔

    حکام کا کہنا تھا کہ سرکاری ہیلی کاپٹر  ایم آئی17 ریسکیوٹیم اور امدادی سامان لیکر باجوڑ جا رہا تھا۔

    یاد رہے خیبرپختونخوا حکومت کا سرکاری ہیلی کاپٹر مہمند کے علاقے میں ریسکیو آپریشن میں مصروف تھا کہ جب خراب موسم کے باعث اس کا رابطہ منقطع ہو گیا تھا ، جس کے بعد لاپتہ ہیلی کاپٹر کی تلاش کے لیے فوری اقدامات شروع کئے گئے تھے۔

    مزید پڑھیں : خراب موسم:خیبرپختونخوا حکومت کا سرکاری ہیلی کاپٹر لاپتہ ہو گیا

    دوسری جانب ترجمان کے پی حکومت فراز مغل کی جانب سے کہا گیا کہ خیبرپختونخوا میں ایمرجنسی نافذ کردی گئی ہے اور وزیراعلیٰ کی ہدایت پر سرکاری عمارتوں میں شیلٹر قائم کئے جارہےہیں.

    فراز مغل کا کہنا تھا کہ متاثرہ افراد کو محفوظ سرکاری عمارتوں میں منتقل کیاجارہاہے اور اسپتالوں ،ڈاکٹرز اور عملے کی نفری کو ہائی الرٹ کردیاگیا ہے۔

    خیال رہے وزیراعلیٰ نے امدادی سرگرمیوں کے لئے ہیلی کاپٹر مختص کیا تھا اور ہیلی کاپٹر کے ذریعے عوام کو محفوظ مقامات پر منتقل کیا جا رہا ہے، دوائیں اور دیگر ضروری سامان بھی پہنچایاجا رہا ہے۔

    وزیراعلیٰ کی ہدایت پر متاثرہ اضلاع میں امدادی کارروائیاں جاری ہیں، وہ خود امدادی سرگرمیوں کی نگرانی کر رہے ہیں۔

    پی ڈی ایم اے، ریسکیو ودیگر متعلقہ ادارے امدادی کارروائیوں میں مصروف ہیں تاہم ناخوشگوار واقعے پرپی ڈی ایم اے کنٹرول روم 1700 پر اطلاع دی جا سکتی ہے۔

  • بونیر میں طوفانی بارشوں  اور سیلابی ریلوں سے  75 افراد جاں بحق، ایمرجنسی نافذ

    بونیر میں طوفانی بارشوں اور سیلابی ریلوں سے 75 افراد جاں بحق، ایمرجنسی نافذ

    بونیر : بونیر میں طوفانی بارشوں اور سیلابی ریلوں سے 75 افراد جاں بحق ہوگئے ، جس کے بعد ضلع بھر پر ایمرجنسی نافذ کردی گئی۔

    تفصیلات کے مطابق خیبر پختونخوا کے اضلاع بونیر اور سوات میں طوفانی بارشوں اور سیلابی ریلوں نے تباہی مچا دی، جس کے نتیجے میں بونیر میں 75 اور سوات میں 5 افراد جاں بحق ہوگئے، جاں بحق ہونے والوں میں اسکول کے 8 بچے بھی شامل ہیں۔

    ڈپٹی کمشنر بونیر کاشف قیوم نے بتایا کہ ضلع میں ایمرجنسی نافذ کردی گئی ہے جبکہ متاثرہ علاقوں میں امدادی کارروائیاں جاری ہیں، ہیلی کاپٹر کے ذریعے دشوار گزار علاقوں میں ریسکیو آپریشن کیا جا رہا ہے۔

    پیربابا بازار اور اس سے متصل محلہ مکمل طور پر ڈوب چکا ہے، گوکند میں ایک مسجد شہید ہوگئی جبکہ بڑی تعداد میں مویشی بھی ہلاک ہوئے۔

    مختلف مقامات پر راستے بند ہیں اور لاپتہ افراد کی حتمی تعداد کی تصدیق نہیں ہو سکی، سیلابی پانی کم ہونے کے بعد ہی لاپتہ افراد کی صحیح تعداد کا پتہ چل سکے گا۔

    دوسری جانب سوات میں بھی سیلابی ریلوں نے تباہی پھیلائی، مینگورہ شہر زیرِ آب آگیا، ملا بابا، حاجی بابا، خوازہ خیلہ اور مرغزار کا زمینی رابطہ منقطع ہوگیا، متعدد گھر بہہ گئے اور 3 افراد لاپتہ ہیں۔ پانی گھروں میں داخل ہونے کے باعث کئی افراد نے چھتوں پر پناہ لے رکھی ہے۔

    دریائے سوات اور قریبی ندی نالوں میں طغیانی کے باعث سیکڑوں افراد پھنس گئے ہیں اور حکومتی امداد کے منتظر ہیں۔.

    پی ڈی ایم اے کے مطابق سیلاب سے مجموعی طور پر 30 گھروں کو نقصان پہنچا ہے جبکہ شدید بارشوں کا سلسلہ وقفے وقفے سے 21 اگست تک جاری رہنے کا امکان ہے۔

    خیبرپختونخو احکومت کا لاپتہ ہونے والا ہیلی کاپٹر کریش گرگیا ، 3 افراد شہید

  • ملک بھر میں چہلم امام حسینؓ عقیدت و احترام سے منایا جا رہا ہے

    ملک بھر میں چہلم امام حسینؓ عقیدت و احترام سے منایا جا رہا ہے

    (15 اگست 2025): ملک بھر میں میں حضرت محمد ﷺ کے نواسے حضرت امام حسینؓ اور شہدائے کربلا کو خراج عقیدت پیش کرنے کے لیے ان کا چہلم روایتی عقیدت و احترام کے ساتھ منایا جا رہا ہے۔

    تفصیلات کے مطابق ملک بھر سے علم اور ذوالجناح کے جلوس برآمد ہوں گے، نوحہ خوانی اور ماتم برپا کرکے شہداء کو خراج عقیدت پیش کیا جائے گا۔

    ادھر، کراچی میں چہلم  شہدائے کربلا کا مرکزی جلوس آج نشتر پارک سے برآمد ہوگا، چہلم کے لیے کراچی میں سیکیورٹی کے لیے انتظامات مکمل کر لیے گئے ہیں، ایم اے جناح روڈ جلوس کے راستوں کے اطراف کی سڑکیں اور گلیاں کنٹینرز رکھ کر بند کردی گئی ہیں۔

    کراچی میں جلوس کے روٹ پر مارکیٹوں کو بم ڈسپوزل یونٹ نے سرچنگ کے بعد سیل کردیا، چہلم  شہدائے کربلا کا مرکزی جلوس دوپہر ایک بجے نشتر پارک سے برآمد ہوگا۔

    پولیس حکام کا اس حوالے سے کہنا ہے کہ جلوس کی سیکیورٹی کیلئے 4 ہزار سے زائد پولیس اہلکار تعینات کیےگئے ہیں، شہر میں دفعہ 144 نافذ ہے جبکہ جلوس کے روٹ پر موبائل فون سروس جزوی معطل ہوگی۔

    لاہور میں چہلم امام حسینؑ کا مرکزی جلوس حویلی الف شاہ دہلی دروازہ سے برآمد ہوگا جبکہ جلوس روایتی راستوں سے ہو کر کربلا گامے شاہ پر اختتام پزیر ہو گا۔

    پنجاب میں 382 جلوسوں اور مجالس کے لیے 30 ہزار پولیس افسران و اہلکار تعینات ہوں گے جبکہ چہلم امام حسین کے لیے لاہور پولیس نے سیکیورٹی انتظامات مکمل کرلیے۔

    چہلم حضرت امام حسین چہلم امام حسین کے موقع پر لاہور پولیس کے 5 ہزار سے زائد اہلکار تعینات ہیں، 40 مجالس اور 12 عزاداری جلوسوں کو بھرپور سکیورٹی فراہم کر رہے ہیں جبکہ 12ایس پیز کی نگرانی میں 400 سے زائد اپر سب آرڈینیٹس بھی ڈیوٹی پر تعینات ہیں۔

    پشاور میں چہلم امام حسین کے سلسلے میں آج 2 جلوس ذوالجناح برآمد ہوں گے، جلوسوں کے لیے سخت سیکیورٹی کے انتظامات کئے گئے ہیں۔

    پہلا جلوس امام بارگاہ آخوندآباد سے سہ پہر 3 بجے برآمد ہوگا جبکہ دوسرا جلوس جامع مسجد کوچہ رسالدار سے 3 بجے برآمد ہوگا اور امام بارگاہ علمدار کربلا میں مجلس 12 بجے برپا کی جائے گی۔ جلوس اپنے مقررہ راستوں سے ہوتے ہوئے اپنی امام بارگاہ پر اختتام پذیر ہوگا۔

  • معرکہ حق میں فتح: فیلڈ مارشل، ائیر چیف اور بلاول سمیت وفاقی وزراء اعلیٰ کو اعزازات سے نواز دیا گیا

    معرکہ حق میں فتح: فیلڈ مارشل، ائیر چیف اور بلاول سمیت وفاقی وزراء اعلیٰ کو اعزازات سے نواز دیا گیا

    اسلام آباد(14 اگست 2025): معرکہ حق میں بھارت کو ذلت آمیز شکست دینے پر فیلڈ مارشل عاصم منیر اور ائیر چیف مارشل ظہیر احمد بابر سدھو کو ہلال جرات سے نوازا گیا۔

    تفصیلات کے مطابق ایوان صدر میں سول و عسکری شخصیات کو اعلیٰ اعزازات دینے کی پُروقار تقریب کا انعقاد کیا گیا، اس دوران صدر مملکت آصف علی زرداری نے وزیراعظم کے تشکیل کردہ سفارتی وفد کے ارکان کو بھی ہلال امتیاز کے اعزاز سے نوازا ہے۔

    معرکہ حق میں نمایاں خدمات پر صدر مملکت کی جانب سے وزیر خارجہ اسحاق ڈار،  وزیر اعظم کی جانب سے بنائی گئی پارلیمانی کمیٹی کے سربراہ بلاول بھٹو زرداری، وزیر قانون اعظم نذیر تارڑ، وزیر دفاع خواجہ آصف اور وزیراعظم کے مشیر رانا ثنا اللہ کو نشان امتیاز سے نوازا گیا۔

    اس کے علاوہ وزیر اطلاعات عطا تارڑ کو بھی نشان امتیاز سے نوازا گیا، صدر مملکت نے نمایاں خدمات پر وزیر داخلہ سید محسن رضا نقوی اور وفاقی وزیراحسن اقبال، شیری رحمان، فیصل سبزواری، مصدق ملک اور حنا ربانی کھر کو بھی سول اعزازات سے نوازا گیا۔

    صدر مملکت آصف علی زرداری نے فیلڈ مارشل سید عاصم منیر کو ہلال جرات کے اعزاز سے نوازا، فیلڈ مارشل سید عاصم منیر کو معرکہ حق میں لازوال جرأت اور جنگی مہارت کا اعتراف میں ہلال جرأت دیا گیا۔

    ایئر چیف مارشل ظہیر احمد بابر سدھو کو بھی ہلال جرات سے نوازا گیا ہے، صدر مملکت نے ایئرچیف مارشل ظہیر احمد بابر سدھو کو معرکہ حق کے دوران لازوال جرات، جنگی مہارت اور غیر متزلزل حب الوطنی کے اعتراف میں ہلال جرات دیا۔

    چیئرمین جوائنٹ چیفس آف اسٹاف کمیٹی جنرل ساحر شمشاد مرزا اور نیول چیف ایڈمرل نوید اشرف کو نشان امیتاز سے نوازا گیا،  ڈی جی آئی ایس آئی لیفٹیننٹ جنرل عاصم ملک کو ستارہ بسالت جبکہ ڈی جی ملٹری آپریشنز میجر جنرل کاشف عبداللہ، ائیر وائس مارشل محمد اورنگزیب اور رئیر ایڈمرل شہزاد حامد کو تمغہ بسالت سے نوازا گیا۔

    معرکہ حق میں دشمن کے طیارے گرانے والے پاک فضائیہ کے پائلٹس کو ستارہ جرأت سے نوازا گیا، صدر مملکت نے ونگ کمانڈر بلال رضا کو دلیرانہ فضائی مہارت پر ستارہ جرات سے نوازا، ونگ کمانڈر بلال رضا نے دشمن کا ایئر ڈیفنس کمانڈ اینڈ کنٹرول سسٹم تباہ کیا تھا۔

    ونگ کمانڈر حماد بن مسعود کو بھی ستارہ جرات سے نوازا گیا، صدر مملکت نے اسکواڈرن لیڈر محمد یوسف خان، اسکواڈرن لیڈر محمد اسامہ اشفاق، اسکواڈرن لیڈر محمد حسن انیس اور اسکواڈرن لیڈر طلال حسن کو بھی ستارہ جرات سے نوازا۔

  • ملک بھر میں آج 78 واں یوم آزادی ملی جوش و جذبے کیساتھ منایا جا رہا ہے

    ملک بھر میں آج 78 واں یوم آزادی ملی جوش و جذبے کیساتھ منایا جا رہا ہے

    اسلام آباد(14 اگست 2025): پاکستان کا اٹہتر واں یوم آزادی اور معرکہ حق میں فتح کا جشن ملک بھر میں ملی جوشِ و جذبے سے منایا جارہا ہے۔

    تفصیلات کے مطابق آج دن کا آغاز توپوں کی سلامی سے ہوا، شہریوں نے نماز فجر میں ملک کی ترقی، خوشحالی اور یکجہتی کی خصوصی دعائیں مانگیں، وفاقی دارالحکومت اسلام آباد میں اکتیس جبکہ صوبائی دارالحکومتوں میں 21، کیس توپوں کی سلامی دی گئی۔

    پرچم کشائی کی تقریب

    پرچم کشائی کی مرکزی تقریب اسلام آباد میں پاکستان مونومنٹ میں منعقد ہوئی، جس میں وزیراعظم شہباز شریف اور وفاقی وزرا شریک ہوئے۔

    پرچم کشائی کی تقریب میں اسکولوں کے بچوں کی بڑی تعداد بھی موجود تھی۔ علاقائی لباس میں ملبوس بچوں نے وزیراعظم کو پاکستان مونومنٹ آمد پر پھول پیش کیے۔

    وزیر اعظم شہباز شریف نے پرچم کشائی کی، یادگار پاکستان پر پھول رکھے اور ملک کی سلامتی، ترقی اور خوشحالی کے لیے خصوصی دعا کی، پرچم کشائی کی تقریب کے موقع پر ملی جوش و جذبے سے قومی ترانہ پڑھا گیا۔

    مزار قائد پر گارڈز کی تبدیلی

    کراچی میں بانی پاکستان قائداعظم محمد علی جناحؒ کے مزار پر گارڈز کی تبدیلی کی مرکزی تقریب منعقد ہوئی، جہاں پاکستان نیول اکیڈمی کے کیڈٹس نے اعزازی گارڈز کے فرائض سنبھال لیے۔

    تقریب کے مہمان خصوصی کمانڈنٹ پاکستان نیول اکیڈمی کموڈور تصور اقبال تھے، جبکہ پریڈ کمانڈر کے فرائض لیفٹیننٹ سمیع اللہ نے سر انجام دیے، کیڈٹس کی جانب سے شاندار مارچ پاسٹ اور پریڈ کا مظاہرہ کیا گیا۔

    واضح رہے کہ رواں سال یوم آزادی کو معرکہ حق کی عظیم فتح سے منسوب کیا گیا ہے، پاکستان میں رات 12 بجتے ہی ملک کے چھوٹے، بڑے شہروں میں یوم آزادی کا بھرپور طریقے سے استقبال کیا گیا۔

    شہری سڑکوں پر اُمڈ آئے، فضا ’پاکستان زندہ باد‘ کے نعروں سے گونج اٹھی، چھوٹی بڑی ریلیوں اور مختلف ثقافتی شوز کا انعقاد کیا گیا، شہریوں نے ملی نغموں اور ڈھول کی تھاپ پر بھنگڑے ڈالے۔