Category: یو اے ای

متحدہ عرب امارات میں دو طرح کے ٹرانزٹ ویزے جاری کیے جاتے ہیں تاہم 96 گھنٹے کا ٹرانزٹ ویزا حاصل کرنے کی ایک شرط ہے۔

الامارات الیوم  کے مطابق یو اے ای کی ڈیجیٹل گورنمنٹ کی رپورٹ میں بتایا گیا ہے کہ دو طرح کے ٹرانزٹ ویزے جاری کیے جاتے ہیں جس میں سے ایک 48 جب کہ دوسرا 96 گھنٹے کا ہے۔

رپورٹ کے مطابق 48 گھنٹے کا ویزا تو بالکل مفت ہے تاہم اس کو 96 گھنٹے کی کٹیگری میں تبدیل نہیں کیا جا سکتا، لیکن 96 گھنٹے کا ٹرانزٹ ویزا حاصل کرنے کی شرط ہے اور وہ شرط 50 درہم فیس کی ادائیگی ہے جس کے بعد یہ کوئی شخص یہ ویزا حاصل کر سکتا ہے۔

اس حوالے سے ذرائع کا کہنا ہے کہ 96 گھنٹے کا ٹرانزٹ ویزا امارات کی کسی بھی ایئر لائن کے ذریعے حاصل کیا جاسکتا ہے۔ اس کے لیے یو اے ای آنے والے کو آمد سے قبل ویزے کے لیے ایئر لائن کو درخواست دینا ہوتی ہے۔ ویزا فیس ایئر لائن کے دفتر میں ہی وصول کی جاتی ہے۔

امارات کی قومی ایئر لائنز کے ذریعے ہی ٹرانزٹ ویزا کی درخواست اسمارٹ چینلز فار ریزیڈنسی اور سٹیزن شپ (ای چینل)، فیڈرل اتھارٹی برائے شناخت و شہریت، کسٹمز اور پورٹ سیکیورٹی یا اسمارٹ ایپلی کیشن کے ذریعہ جمع کرائی جا سکتی ہے تاہم اس مدت کے دوران وزیٹر کو یو اے ای چھوڑنا ہوگا۔

ویزا حاصل کرنے کے لیے پاسپورٹ یا سفری شناختی دستاویز کی میعاد امارات میں داخل ہونے سے پہلے ماہ سے کم نہیں ہونی چاہیے۔ اس کے علاوہ سفید بیک گراؤنڈ والی تصویر، ٹکٹ اور اپنے اگلی منزل کا ویزا ہونا بھی ضروری ہے۔

متحدہ عرب امارات دبئی میں 20 سال سے خدمات انجام دینے والے آئمہ مساجد اور مذہبی شخصیات کو گولڈن ویزے دیے جا رہے ہیں۔

غیر ملکی میڈیا کے مطابق متحدہ عرب امارات دبئی کے ولی عہد اور ایگزیکٹیو کونسل کے چیئرمین شیخ حمدان بن محمد بن راشد آل مکتوم نے 20 سال سے خدمات انجام دینے والے مساجد کے آئمہ اور مذہبی شخصیات کو گولڈن ویزا دینے کا حکم جاری کیا ہے۔

دبئی کے ولی عہد نے مذہبی شخصیات کی دیرینہ لگن اور ان کے اہم سماجی کردار کو سراہتے ہوئے گولڈن ویزا دینے کی ہدایت کی اور کہا کہ آئمہ مساجد، موذن، مفتیوں اور مذہبی ریسرچرز کو گولڈن ویزا اور عیدالفطر پر مالی امداد دی جائے گی۔

واضح رہے کہ دبئی میں گولڈن ویزے کا اجرا 2018 میں ہوا تھا جس کے تحت سرمایہ کاروں، سائنسدانوں اور دیگر شعبوں سے وابستہ ماہرین کو  پانچ سے دس سال تک قیام کے طویل مدتی ویزے دیے جاتے ہیں اور اب فلاحی کام کرنے والے افراد کو بھی گولڈن ویزے دیے جاتے ہیں۔