Category: یو اے ای

متحدہ عرب امارات نے آئندہ سال حج 2025 کی ادائیگی کے لیے 70 سال اور اس سے زائد عمر کے تمام افراد کی درخواستیں منظور کر لی ہیں۔

امارات کی سرکاری خبر رساں ایجنسی وام کے مطابق یو اے ای کی جنرل اتھارٹی آف اسلامک افیئرز، انڈومنٹس اینڈ زکوۃ نے آئندہ سال فریضہ حج کی ادائیگی کے لیے 70 سال اور اس سے زائد عمر کے تمام افراد کی حج درخواستیں قبول کرلی ہیں۔ درخواستیں منظور کردہ معیار اور شرائط کے مطابق قبول کی گئی ہیں۔

اتھارٹی کے مطابق سعودی عرب میں حکام کی جانب سے متحدہ عرب امارات کا مختص کردہ حج کوٹہ 6228 عازمین کا ہے جو حج امور کے لیے منظم ریفرنس سسٹم کے مطابق شہریوں میں تقسیم کیا گیا ہے۔

ان میں 3051 اجازت نامے بزرگ عازمین کے منظور کیے گئے جو کل کوٹے کا 49 فیصد ہے اس میں 70 سال اور اس سے زیادہ عمر کے افراد کو شامل کیا گیا ہے۔ جب کہ 3177 پرمٹ دیگر عمر کے گروپوں اوران کے ساتھیوں کو الاٹ کے گئے ہیں جو کل کوٹے کا 51 فیصد بنتا ہے۔ تمام درخواستیں طے شدہ معیار اور شرائط کے مطابق منظور کی گئی ہیں۔

اتھارٹی کا کہنا ہے کہ اس کے سرکاری چینل کے ذریعے حج کے لیے رجسٹریشن کرانے والوں کی تعداد 60248 رہی جس میں سے 51732 نے پہلے کبھی حج ادا نہیں کیا تھا۔

متحدہ عرب امارات کے حکام نے بتایا کہ الیکٹرانک حج اور عمرہ سسٹم نے ابتدائی چھانٹی کے عمل کو ہموار، لچکدار اور شفاف طریقے سے مکمل کیا ہے۔

https://urdu.arynews.tv/performance-of-prayers-in-riaz-al-jinnah/

متحدہ عرب امارات میں نئے ٹریفک قانون کے نفاذ کا فیصلہ کیا گیا ہے اور سڑک پیدل عبور کرنے والوں پر بھی جرمانے عائد کیے جائیں گے۔

امارات الیوم کےمطابق یو اے ای میں نئے ٹریک قوانین کے نفاذ کا فیصلہ کیا گیا ہے جو آئندہ سال 29 مارچ 2025 سے نافذ کیے جانے کا امکان ہے اور اس ٹریفک قوانین میں سڑک پر گاڑی چلانے والے اور پیدل چلنے والے سب کو شامل کیا گیا ہے۔

رپورٹ کے مطابق ان قوانین کی خلاف ورزی پر بھاری جرمانے عائد کیے جائیں گے اور 8 سنگین خلاف ورزیوں پر 2 لاکھ درہم تک جرمانہ بھرنا پڑ سکتا ہے۔

نئے قوانین میں جو 8 سنگین خلاف ورزیاں قرار دی گئی ہیں۔ ان میں نشے کے زیر اثر گاڑی چلانا، لائسنس کی معطلی کے باوجود گاڑی چلانا، جائے حادثہ سے فرار، حادثے میں کسی کی موت کا سبب بننا، مختص مقامات کے علاوہ سڑک کراس کرتے ہوئے ٹریفک حادثہ، سیلاب کے دوران وادی میں گاڑی چلانا جیسے اقدامات شامل ہیں۔

الکوحل یا کسی نشے کے زیر اثر گاڑی چلانے یا گاڑی چلانے کی کوشش کرنے پر کم ازکم 30 ہزار درہم سے دو لاکھ درہم تک جرمانہ اور قید یا دونوں میں سے ایک سزا دی جائے گی۔

نئے قانون میں ڈرائیونگ کی کم از کم عمر17 سال مقرر کی گئی ہے جو اس سے قبل 18 برس تھی جب کہ اس قانون میں 80 کلومیٹر فی گھنٹہ سے زائد رفتار کی حد سڑکوں کو عبور کرنے پر بھی پابندی عائد کر دی گئی ہے اور مخصوص مقامات کے علاوہ سڑک کراس کرنا خلاف ورزی میں شامل ہے۔

ٹریفک حادثہ پیش آنے کی صورت میں پیدل چلنے والے افراد کو تین ماہ قید اور پانچ سے دس ہزار درہم جرمانے کی سزا کا سامنا ہو سکتا ہے۔

ہٹ اینڈ رن کیس میں حکام سے عدم تعاون، معلومات چھپانے پر ایک سال قید اور 50 ہزار سے ایک لاکھ درہم تک جرمانہ یا دونوں میں سے ایک سزا ہوگی۔ لاپروائی سے ڈرائیونگ پر کسی کی موت کی صورت میں قید اور کم از کم 50 ہزار درہم جرمانے کا سامنا ہوگا۔

کسی عدالت یا ٹریفک کنٹرول اتھارٹی کے حکم پر لائسنس کی معطل کیے جانے کے باوجود گاڑی چلانے پر تین ماہ قید اور دس ہزار درہم جرمانہ ہوگا یا دونوں میں سے کوئی ایک سزا دی جا سکتی ہے۔

دبئی میں قائم برج خلیفہ کو اب تک دنیا کی سب سے بلند عمارت کا اعزاز حاصل ہے اس کی انتظامیہ نے بڑا اعلان کر دیا ہے۔

دبئی میں قائم برج خلیفہ گزشتہ 14 سال سے بلاشرکت غیرے دنیا کی سب سے بلند عمارت کا اعزاز حاصل کیے ہوئے ہے۔ عالمی توجہ کا مرکز اس عمارت کو مختلف ممالک کے قومی ایام، تہواروں اور نئے سال پر رنگا رنگ روشنیوں سے سجایا جاتا ہے۔

سال نو پر بھی ہر سال دنیا کی اس سب سے بلند عمارت پر خوبصورت آتشبازی کی جاتی ہے تاہم 2025 کی آمد کے استقبال کے حوالے سے برج خلیفہ کی انتظامیہ نے بڑا فیصلہ کرتے ہوئے اس حوالے سے اہم اعلان کر دیا ہے۔

اس سال اگر لوگوں کو برج خلیفہ پر آتشبازی کا لطف اٹھانا ہے تو یہ مفت نہیں ہوگا بلکہ اس کے لیے ٹکٹ لینا پڑے گا۔ سال نو کے آتشبازی فنکشن کے ٹکٹوں کی فروخت 24 اکتوبر سے شروع ہو گی۔

بالغ افراد کے لیے ٹکٹ کی قیمت 580 درہم اور بچوں کے لیے 370 درہم رکھی گئی ہے جب کہ پانچ سال سے کم عمر بچوں کی انٹری مفت ہوگی۔

اعلامیے کے مطابق ٹکٹ لینے والے افراد برج پارک کی فرنٹ لائن پر بیٹھ کر آتشبازی کے ساتھ فاؤنٹین شو کے مزے بھی لے سکیں گے۔

https://urdu.arynews.tv/saudi-arabia-worlds-tallest-jeddah-tower-construction/

متحدہ عرب امارات کی تاریخ کا سب سے بڑا بجٹ منظور کر لیا گیا ہے جس میں آمدنی اور اخراجات میں توازن رکھا گیا ہے۔

یو اے ای کی سرکاری خبر رساں ایجنسی وام کے مطابق متحدہ عرب امارات کے نائب صدر، وزیراعظم اور دبئی کے حکمراں شیخ محمد بن راشد آل مکتوم کی سربراہی میں امارات کی کابینہ نے منگل کو مالی سال 2025 کے وفاقی بجٹ کی منظوری دے دی ہے۔

نئے بجٹ میں آمدنی اور اخراجات میں توازن رکھا گیا ہے اور دونوں کا تخمینہ یکساں 71.5 ارب درہم لگایا گیا ہے۔

بجٹ 2025 میں سماجی ترقی، پنشن امور، اقصادی امور، انفراسٹرکچر اور مالیاتی سرمایہ کاری کے ساتھ دیگر وفاقی اخراجات شامل ہیں۔

بجٹ میں سب سے بڑا حصہ سماجی ترقی اور پنشن کے شعبے کے لیے رکھا گیا ہے جس کا تخمیمہ 27.859 ارب درہم لگایا گیا ہے اور یہ مجموعی بجٹ کا 39 فیصد ہے جب کہ اس کے بعد حکومتی امور کے شعبے کے لیے 25.570 ارب درہم رکھے گئے ہیں جو کُل بجٹ کا 35.7 فیصد ہے۔

سالانہ بجٹ میں پبلک اور یونیورسٹی ایجوکیشن پروگرام کے لیے 10.914 ارب درہم، صحت، خدمات اور کمیونٹی کے تحفظ کے لیے 5.745 ارب درہم، سماجی امور کے لیے 3.744 ارب درہم (5.2 فیصد)، عوامی خدمات کے لیے 1.746 ارب درہم مختص کیے گئے ہیں۔

اس کے علاوہ انفراسٹرکچر اور اقتصادی شعبے کے لیے 2.581 ارب درہم، مالیاتی سرمایہ کاری کے شعبے کے لیے 2.864 ارب درہم اور دیگر وفاقی اخراجات کے لیے 12.624 ارب درہم رکھے گئے ہیں۔