Category: Uncategorized

  • صدر آصف زرداری، وزیراعظم شہباز شریف کا 78ویں یوم آزادی پر قوم کے نام پیغام

    صدر آصف زرداری، وزیراعظم شہباز شریف کا 78ویں یوم آزادی پر قوم کے نام پیغام

    صدر اسلامی جمہوریہ پاکستان آصف علی زرداری اور وزیراعظم شہباز شریف نے آزادی کی 78ویں سالگرہ کے موقع پر قوم کے نام پیغام دیا ہے۔

    جشن آزادی 14 اگست 2025 کے موقع پر مادرِ وطن کی 78 ویں سالگرہ پر اپنے پیغام میں صدر مملکت آصف علی زرداری نے کہا کہ اس موقع پر پاکستان اور دنیا بھر میں بسنے والے تمام پاکستانیوں کو دل کی گہرائیوں سے مبارکباد پیش کرتا ہوں۔ یہ دن ہمیں اس جرات، اتحاد اور قربانیوں کی یاد دلاتا ہے جن کی بدولت ہمیں آزادی کی نعمت نصیب ہوئی۔

    انھوں نے کہا کہ آج ہم اپنے عظیم قائد، قائداعظم محمد علی جناحؒ اور تحریکِ پاکستان کے تمام کارکنان کو خراجِ عقیدت پیش کرتے ہیں، جن کی کاوشوں اور قربانیوں نے اس خواب کو حقیقت بنایا۔

    آصف زرداری نے کہا کہ اس سال ہم یومِ آزادی بڑے افتخار اور ایک تازہ اُمید کے ساتھ منا رہے ہیں۔ حال ہی میں ہماری قوم نے بیرونی جارحیت کے جواب میں اپنی طاقت، عزم اور اتحاد کا مظاہرہ کیا۔

    معرکہ حق اور آپریشن بنیان مرصوص میں ہماری فتح ہماری تاریخ کا ایک سنہری باب ہے۔ یہ کامیابی غیر متزلزل قومی عزم، بے مثال پیشہ ورانہ مہارت اور پوری قوم کے اتحاد کا ثبوت ہے۔

    صدر نے اپنے پیغام میں کہا کہ بھارت کی بلاجواز جارحیت کے جواب میں ہم نے تحمل، حکمت اور بھرپور قوت سے اپنے وطن کا دفاع کیا۔ دنیا نے دیکھا کہ پاکستان امن چاہتا ہے، مگر اپنی خودمختاری اور علاقائی سالمیت کے تحفظ کی مکمل صلاحیت رکھتا ہے۔

    انھوں نے کہا کہ اس دن ہم بھارتی زیرِ قبضہ جموں و کشمیر کے عوام کے ساتھ اظہارِ یکجہتی بھی کرتے ہیں، ان کی جرات، انصاف اور حقِ خودارادیت کی جدو جہد ہمارے دل کے قریب ہے۔ پاکستان ان کے حقِ خودارادیت کے حصول تک کشمیروں کو غیر متزلزل سفارتی، اخلاقی اور سیاسی حمایت فراہم کرتا رہے گا۔

    صدر زردار نے اپنے پیغام میں کہا کہ آئیے اس یومِ آزادی کو اپنی تاریخ کا ایک نیا باب بنا کر اور اپنے اختلافات سے بالاتر ہو کر ایک ایسے پاکستان کے لیے متحد ہوں جو انصاف، مساوات، ایمان اور خدمتِ خلق پر قائم ہو۔ اللہ تعالیٰ ہمارا حامی و ناصر ہو۔ آمین!

    وزیراعظم محمد شہبازشریف نے یوم آزادی پر اپنے پیغام میں کہا کہ پاکستان کے 78سال مکمل ہونے پر قوم کو تہہ دل سے مبارکباد پیش کرتا ہوں، قائداعظم، علامہ اقبال سمیت تحریک آزادی کے کارکنوں کوسلام پیش کرتا ہوں، تحریک آزادی کے قائدین نے بکھری ہوئی قوم کو ایک فکر، ایک مشن پرمتحد کیا۔

    شہباز شریف نے کہا کہ تحریک آزادی کے قائدین نے تاریخ کا دھارا موڑ کر ایک الگ نظریاتی ریاست کے قیام کو ممکن بنایا، گزرے 78سال آزمائش آمیز سفر، اللہ پر کامل یقین اور تابناک مستقبل کی امید کی کہانی ہے۔

    انھوں نے کہا کہ مشکلات کے باوجود پاکستان نے ہر شعبے میں کامیابیوں، کامرانیوں کے کئی سنگ میل عبور کیے، ہر شعبے میں پاکستانیوں نے اپنی بے مثال عزم وہمت اور علم وہنر کے باب رقم کیے ہیں

    وزیراعظم نے کہا کہ معرکہ حق میں پاکستان کی عظیم فتح نے 78ویں یوم آزادی کی اہمیت میں اضافہ کردیا ہے، معرکہ حق میں عظیم فتح نے پاکستانیوں کے دل میں ایک نئی امنگ اور جذبہ بھی بیدار کردیا، معرکہ حق میں عظیم فتح سے جشن آزادی کی خوشیاں دوبالا ہوگئی ہیں، ہماری بہادر مسلح افواج نے بنیان مرصوص بن کر دشمن کے غرور کا بُت پاش پاش کردیا

    انھوں نے کہا کہ ہمارے شیروں اور شاہینوں کی بہادری نے دشمن کو چند گھنٹوں میں ہی گھٹنے ٹیکنے پر مجبور کردیا۔

    شہباز شریف نے کہا کہ آزادی کی ٹھنڈی چھاؤں فراہم کرنے والے شہدا کو خراج عقیدت پیش کرتے ہیں، معرکہ حق صرف عسکری فتح نہیں تھی بلکہ دوقومی نظریے کی صداقت کی بھی جیت تھی۔

    ہم اپنے دفاع، آبی وسائل سمیت قومی مفادات کے تحفظ کیلئے اسی جذبے سے آگے بڑھیں گے، ہم خطے، دنیا میں پرامن بقائے باہمی، بات چیت کے سفارتی ذرائع سے مسائل کے حل پر یقین رکھتے ہیں۔

    وزیراعظم نے کہا کہ بھارت کو بھی اسی جذبے سے جموں وکشمیر سمیت تمام تنازعات کے حل کی طرف آنا ہوگا، حکومت ملک کوعصرحاضر کے نئے معاشی وصنعتی تقاضوں سے ہم آہنگ کرنے کیلئے کوشاں ہے۔

    شہباز شریف نے کہا کہ تمام پالیسیوں اور پروگراموں سے قطع نظر پاکستان کے عروج کے پیچھے اصل قوت ہمارا اتحاد ہے، دفاع کی طرح معاشی طور پر ناقابل تسخیر ہونا قومی دفاع اور سالمیت کےلیے بڑی ضرورت ہے۔

  • یورپ شدید گرمی کی لپیٹ میں! درجہ حرارت 100 ڈگری سے تجاوز

    یورپ شدید گرمی کی لپیٹ میں! درجہ حرارت 100 ڈگری سے تجاوز

    یورپ ان دنوں شدید گرمی کی لپیٹ میں ہے، درجہ حرارت 100 ڈگری سے تجاوز کرچکا ہے، تاہم جنگلات کی بدترین آگ کا خطرہ بھی بڑھ چکا ہے۔

    غیر ملکی ذرائع ابلاغ کے مطابق یورپ ان دنوں شدید ہیٹ ویو کی لپیٹ میں ہے، جہاں جان لیوا حد تک بڑھتا ہوا درجہ حرارت اور تباہ کن جنگلاتی آگ براعظم کے کئی ممالک میں تباہی مچا رہی ہے، جبکہ درجہ حرارت 100 ڈگری فارن ہائیٹ سے اوپر جاچکا ہے۔

    رپورٹس کے مطابق جنوبی فرانس سے لے کر بالکان تک ریکارڈ توڑ گرمی سے شہر متاثر ہورہے ہیں، جنوبی فرانس میں درجہ حرارت 43 ڈگری سینٹی گریڈ (109.4 فارن ہائیٹ) تک پہنچ گیا ہے۔

    اسپین کے محکمہ موسمیات کے مطابق اس ہفتے درجہ حرارت بعض علاقوں میں 110 ڈگری فارن ہائیٹ تک جا سکتا ہے۔

    بولونیا اور فلورنس سمیت بڑے شہروں کے لیے اٹلی کی وزارت صحت نے ریڈ الرٹ جاری کیا ہے، 16 شہروں میں ہائی الرٹ نافذ کیا گیا ہے، جنوبی فرانس اور بالکان کے کچھ حصے بھی بڑھتے درجہ حرارت کے باعث ریڈ الرٹ پر ہیں۔

    جاپان میں شدید گرمی، ایک ہی دن میں 2 نئے ریکارڈ قائم

    برطانیہ کے ادارے کاربن بریف کا کہنا ہے کہ 2025ء دنیا کا دوسرا یا تیسرا سب سے زیادہ گرم سال ہو سکتا ہے، یورپ کے زمینی درجہ حرارت صنعتی دور سے پہلے کے مقابلے میں تقریباً 2.3 ڈگری سینٹی گریڈ بڑھ چکے ہیں، جو عالمی اوسط سے تقریباً دو گنا ہے اور یہی اضافہ ہیٹ ویوز اور جنگلاتی آگ کا خطرہ بڑھ رہا ہے۔

    یورپی فاریسٹ فائر انفارمیشن سسٹم کے اعداد و شمار کے مطابق اس سال اب تک تقریباً 24 لاکھ ایکڑ زمین جل چکی ہے۔

  • قلوپطرہ:‌ قدیم مصر کا وہ نام جسے صدیاں فراموش نہیں کرسکیں گی

    قلوپطرہ:‌ قدیم مصر کا وہ نام جسے صدیاں فراموش نہیں کرسکیں گی

    دنیا کی تاریخ میں قلوپطرہ کو ایک حسین و جمیل ملکہ کے طور پر یاد کیا جاتا ہے جس نے اپنی ذہانت اور سیاسی سوجھ بوجھ سے سلطنتِ روم کے نام ور جرنیلوں کو شکست دی۔ کہتے ہیں کہ وہ بالطّبع سیاست داں تھی جس کا جہاں گیری اور جہاں کشائی کا جذبہ بعض اوقات جنون کی حد کو پہنچ جاتا تھا۔ مگر وہ ہوش مندی سے کام لیتی اور اپنے منصوبوں کو عملی جامہ پہنانے کے لیے اس کی اولوالعزمی مشہور تھی۔ 

    شہرۂ آفاق قلوپطرہ ایک ایسا نام ہے جس سے کئی قصّے اور کہانیاں منسوب ہیں۔ اسے حسن و عشق کی داستانوں کا موضوع بنایا گیا اور اپنے عہد کی ایک نہایت بااثر اور مضبوط عورت کے طور پر پیش کیا گیا۔ مؤرخین نے قلوپطرہ کی آواز کو بہت دل نشیں بتایا ہے جس کی تقریر دلوں پر اثر کرتی تھی۔ کچھ نے اسے بد دماغ اور ایک بدکار عورت بھی لکھا ہے جو اپنے مفاد کی تکمیل کے لیے کسی بھی حد تک جاسکتی تھی۔ اس تاریخی شخصیت کے بارے میں اس قدر تواتر سے اور بے جا لکھا گیا ہے کہ اس سے متعلق دست یاب حقائق بھی مشکوک ہوگئے ہیں۔ یہاں تک کہ قلوپطرہ کی موت کو بھی افسانہ بنا دیا، مگر حقیقت یہ ہے کہ رہتی دنیا تک قلوپطرہ کا نام ‘زندہ’ رہے گا۔ محققین کی اکثریت کا خیال ہے کہ 10 اگست کو قلوپطرہ اس دنیا سے رخصت ہوگئی تھی۔

    سینہ بہ سینہ منتقل ہوتی روایات اور قدیم دور کے مؤرخین کی بعض تحریروں سے اندازہ ہوتا ہے کہ قلوپطرہ کئی لحاظ سے خوش ذوق اور ایک ذی علم عورت تھی۔ وہ علوم و فنون کی دلدادہ رہی اور ہفت زبان بھی تھی۔ کہتے ہیں کہ وہ سائنس، قانون اور صحت کے اپنے دور کے ماہر اور قابل لوگوں کی قدر داں تھی۔

    قلوپطرہ نے مصر کی ملکہ بن کر اپنے خاندان کی عظمت اور اپنی آزادی کے لیے سر توڑ کوشش کی اور اس راستے میں چاپلوسی، خوشامد کے علاوہ سازشوں کا ایسا جال پھیلایا جس نے وہاں خوں ریز واقعات کو جنم دیا۔

    قبلِ مسیح کا یہ کردار دنیا بھر کے افسانوی ادب کا حصّہ ہے اور جدید دور میں اس پر فلمیں بھی بنائی گئی ہیں۔ اردو زبان کے ممتاز افسانہ نگار سعادت حسن منٹو نے اپنے ایک ڈرامے میں قلوپطرہ کے بارے میں‌ لکھا تھا؛

    "قلو پطرہ دنیا کی حسین ترین عورت تھی۔ اس کا حُسن کئی انقلابوں، اور خونریزیوں کا باعث ہوا۔ اس ساحرہ کے حُسن و عشق کے قصّے جہاں دریائے نیل کے ملاحوں کو ازبر یاد ہیں، وہاں تمام دنیا کو معلوم ہیں۔”

    "قلو پطرہ مصر کے نالائق بادشاہ بطلیموس اولیت کی بیٹی تھی۔ یہ بادشاہ 80 قبل مسیح تک حکمران رہا۔ اپنی سترہ برس کی بیٹی قلوپطرہ کے سر پر اپنا زنگ خوردہ تاج رکھ کر اُس نے دنیا کو خیر باد کہہ دیا۔”

    "ملکۂ مصر قلوپطرہ فاتحوں کی فاتح تھی۔ اس نے جولیس سیزر کو، اس کی موت کے بعد مارک انطونی کو جس کے ہاتھ میں ان دنوں دنیا کی باگ ڈور تھی، اپنے حُسن و جمال سے مسحور کیا۔”

    "اس حسین قاتلہ نے انطونی کو تو ہمیشہ کے لیے تباہی کے سیلاب میں بہا دیا۔ تاریخی واقعات بتاتے ہیں کہ انطونی نے اپنی بیوی کے ناپسندیدہ رویّہ سے مجبور ہو کر اس کے بھائی اوکتے ویانوس کی سخت توہین کی جس کا نتیجہ یہ ہوا کہ ان کے درمیان ایک وسیع خلیج حائل ہو گئی۔ پارتھنیوں پر فتح حاصل کر کے اوکتے ویانوس نے انطونی کے روم کو مکمل طور پر تاراج کرنے کی کوشش کی اور اسکندیہ کی پرانی عظمت کو زبردست دھکا لگایا۔ اس نے صاف طور پر اعلان کر دیا کہ روم کی سلطنت کا اصل حق دار قلوپطرہ اور اس کا بیٹا سیرزین ہے۔ ان حالات کے پیشِ نظر اوکتے ویانوس اور انطونی کی جماعتوں میں جنگ ناگزیر تھی۔ چنانچہ اکتی ایم کے مقام پر ایک معرکہ خیز جنگ ہوئی۔ اس جنگ میں قلوپطرہ بھی شریک تھی مگر اپنی جان بچا کر بھاگ نکلی اور اسکندریہ میں پناہ لی۔ انطونی شکست کھا کر واپس چلا آیا جہاں اس نے اپنی وفادار فوجوں کو دوبارہ جمع کرنے کی کوشش کی۔”

    "انطونی اور قلوپطرہ اب محسوس کرنے لگے تھے کہ انہوں نے ایک دوسرے کو سمجھنے میں غلطی کی ہے۔ چنانچہ دونوں کے دلوں پر غم و الم کی گھٹائیں چھا گئیں لیکن ایک آرزو ابھی تک ان کے دلوں میں باقی تھی کہ انجام کار ان کا ملاپ ہو جائے۔”

    "انطونی لیبیا سے ناامید ہو کر اسکندریہ آیا۔ اس اثنا میں اوکتے ویانوس کی فوجیں اسکندریہ کے دروازوں تک پہنچ گئیں۔ انطونی نے ایک بار پھر اپنی کھوئی طاقت اور دلیری سے کام لے کر دشمن کا مقابلہ کیا لیکن فوج نے اس کا ساتھ چھوڑ دیا۔بالکل تنہا دل میں ہزارو ں حسرتو ں کا خون لیے محل میں آیا تو قاصد نے خبر دی کہ قلوپطرہ نے خو دکشی کر لی۔ یہ دراصل قلوپطرہ کی ایک چال تھی۔ اسے ڈر تھا کہ انطونی اس کی غداری پر خشمگیں ہو گا لیکن قلوپطرہ کو معلوم نہ تھا کہ اس کی یہ چال اس کے عاشق پر بہت مہلک اثر کرے گی۔ انطونی دل میں بہت شرمندہ ہوا کہ ایک عورت کی محبت اس سے بڑھ گئی۔ چنانچہ جوش میں آکر اس نے اپنے سینے میں تلوار بھونک لی۔”

    "جب قلوپطرہ کو اطلاع ہوئی تو اس نے بڑی منتوں سے اپنے عاشق کو کہلا بھیجا کہ جس طرح ممکن ہو وہ اس کے پاس چلا آئے۔ چنانچہ انطونی کے ملازم اپنے زخمی آقا کو اُٹھا کر اس عمارت کے دروازے تک آئے جہاں قلو پطرہ نے خود کو چُھپا رکھا تھا۔ قلوپطرہ نے خوف سے دروازہ نہ کھولا۔ ایک کھڑکی سے رسیاں نیچے پھینکی گئیں جن کی مدد سے زخمی انطونی کو کمرے کے اندر لایا گیا۔”

    اس افسانوی روداد سے آگے ڈرامہ کے طرز پر مکالمے ہیں جس کے اختتام پر ملکۂ مصر قلوپطرہ کو سانپ ڈس لیتا ہے اور وہ زمین پر گر جاتی ہے۔

    زیرِ نظر اقتباسات سعادت حسن کی کتاب بعنوان "جنازے” میں شامل ہیں جو ریڈیو کے لیے تحریر کردہ فیچرز پر مشتمل ہے۔

    بعض مصنفین نے لکھا ہے کہ ملکہ نے خودکشی کی تھی اور جب اسے معلوم ہوا کہ انطونی نے اپنی زندگی کا خاتمہ کرلیا ہے تو اس نے بھی مرنے کا فیصلہ کیا اور خود کو زہریلے سانپ سے ڈسوا کر ابدی نیند سوگئی۔ قلوپطرہ کے عہد اور اس کی شخصیت سے متعلق جتنا کچھ لکھا گیا ہے، وہ سینہ بہ سینہ منتقل ہوتی داستانوں کا نچوڑ ہے جن کی صداقت مشکوک ہے۔ ملکۂ مصر قلوپطرہ 30 ویں صدی قبلِ مسیح میں چل بسی تھی۔

    محققین کے مطابق قلوپطرہ ساری زندگی سلطنتِ روم میں اقتدار کے جھگڑے میں الجھی رہی۔اس نے اقتدار اور دولت کے لیے سازشیں رچائیں اور ہر جائز اور ناجائز کام کیا۔ قلوپطرہ اپنے حسن و جمال کے دام میں لاکر طاقت ور اور بااثر شخصیات سے اپنا مطلب نکالتی رہی۔اس کے عشق کا پہلا شکار روم کا شہرۂ آفاق حکم راں جولیس سیزر تھا، جو اس عورت کے خاوند سے اس کا ایک جھگڑا نمٹانے کے لیے بطور ثالث مصر آیا تھا، مگر قلوپطرہ نے اسے اپنی زلفوں کا اسیر بنا لیا اور اس کی قربت حاصل کر کے اپنے عزائم کی تکمیل کے لیے روم چلی گئی۔

    تاریخی شہرت کے حامل جولیس سیزر کے قتل کے بعد قلوپطرہ نے اس کے نائب جنرل انطونی سے تعلقات استوار کیے، مگر اسے بھی دھوکا دیا مگر جب انطونی نے خودکشی کی تو ملکہ کو اچانک پچھتاوے نے گھیر لیا اور اس نے بھی اپنی زندگی ختم کر لی۔

  • ہائی ویز اور موٹر وے ای ٹکٹنگ سسٹم ہیک کرنیوالا ملزم پکڑا گیا

    ہائی ویز اور موٹر وے ای ٹکٹنگ سسٹم ہیک کرنیوالا ملزم پکڑا گیا

    فیصل آباد(10 اگست 2025): این سی سی آئی اے نے ہائی ویز اور موٹروے ای ٹکٹنگ سسٹم ہیک کرنیوالا ملزم کو علی پور سےگرفتار کرلیا۔

    نیشنل سائبر کرائم انویسٹی گیشن ایجنسی (این سی سی آئی اے) کے مطابق ملزم زاہد نے سسٹم کی  غیر قانونی رسائی حاصل کرکے مجرمانہ استعمال کیا۔

    این سی سی آئی اے ترجمان نے بتایا کہ گرفتار ملزم سے حساس ڈیٹا برآمد کرکے پیکا ایکٹ کیخلاف مقدمہ درج کرلیا گیا ہے، ملزم کو عدالت میں پیش کر کے جسمانی ریمانڈ بھی حاصل کر لیا۔

    اس سے قبل نیشنل سائبر کرائم انویسٹی گیشن ایجنسی (این سی سی آئی اے) نے بتایا تھا کہ اسلام آباد میں ایک غیر قانونی کال سینٹر پر گزشتہ رات کامیاب چھاپہ مارا اور 5 غیر ملکی باشندوں کو گرفتار کیا۔

    این سی سی آئی اے کے مطابق اس کال سینٹر میں 60 سے زائد افراد کام کر رہے تھے، جن میں سے 5 غیر ملکی باشندے چھاپے کے دوران گرفتار ہوئے، بیان میں کہا گیا تھا کہ ان گرفتاریوں کے علاوہ این سی سی آئی اے ان افراد کو سہولیات اور سیکیورٹی فراہم کرنے والوں کے خلاف مزید قانونی کارروائی کرے گی۔

    ایک ترجمان نے اس عزم کا اعادہ کیا کہ ایجنسی ایسے تمام غیر قانونی اقدامات کے خلاف کارروائی جاری رکھے گی جو ملک کے قوانین کی خلاف ورزی کے مترادف ہیں۔

  • اسرائیل اور مصر کے درمیان 35 ارب ڈالر مالیت کا بڑا معاہدہ

    اسرائیل اور مصر کے درمیان 35 ارب ڈالر مالیت کا بڑا معاہدہ

    اسرائیل اور مصر کے درمیان 35 ارب ڈالر مالیت کا تاریخی گیس معاہدہ طے پا گیا۔

    بین الاقوامی خبر رساں ادارے کی رپورٹ کے مطابق اسرائیل اور مصر کے درمیان ہونے والے معاہدے کے تحت مصر کو 2040ء تک تقریباً 130 ارب مکعب میٹر قدرتی گیس فراہم کی جائے گی۔

    رپورٹس کے مطابق پہلے مرحلے میں مصر کو 20 ارب مکعب میٹر گیس کی فراہمی جبکہ اضافی پائپ لائنز کی تنصیب کے بعد 2026ء کے آغاز میں شروع کردی جائے گی۔

    خبر رساں ایجنسی کے مطابق گیس فراہم کرنے والی اسرائیلی کمپنی نیومڈ (NewMed) نے اس معاہدے کو اسرائیل کے گیس ذخائر کی دریافت کے بعد سب سے بڑی پیش رفت قرار دیا ہے۔

    رپورٹس کے مطابق یہ نیا معاہدہ اسرائیل اور مصر کے درمیان موجودہ گیس معاہدے کی توسیع اور خطے میں توانائی کے شعبے میں تعاون مزید مضبوط بنانے کی کوشش ہے۔

    غیر ملکی خبر رساں ایجنسی کے مطابق مصر کی وزارتِ پیٹرولیم نے فوری طور پر اس معاہدے پر تبصرے کی درخواست کا جواب نہیں دیا ہے۔

    دوسری جانب برطانوی وزیراعظم اور آسٹریلیا نے اسرائیل کے غزہ پر کنٹرول سے متعلق فوری نظر ثانی کی اپیل کی ہے۔

    برطانوی وزیر اعظم کیئر اسٹارمر نے ایک بیان میں کہا کہ اسرائیل کا غزہ شہر کا کنٹرول سنبھالنے کا فیصلہ غلط تھا اور اسرائیلی حکومت پر دوبارہ غور کرنے کی اپیل کی ہے۔

    امریکا نے 2023 کے بعد اسرائیل کو کتنی مالیت کا ہتھیار فراہم کیا؟ رپورٹ میں اہم انکشاف

    انہوں نے ایک بیان میں کہا کہ اسرائیلی حکومت کا غزہ میں جارحیت کو مزید تیز کرنے کا فیصلہ غلط ہے، اور ہم اس پر فوری طور پر نظر ثانی کرنے کی اپیل کرتے ہیں، غزہ میں ہر روز انسانی بحران سنگین ہوتا جا رہا ہے فوری جنگ بند کی جائے۔

  • آرچر کی گیند نے رشبھ پنت کو چکرا کررکھ دیا، بیٹ سامنے لانے کا بھی موقع نہ ملا، ویڈیو

    آرچر کی گیند نے رشبھ پنت کو چکرا کررکھ دیا، بیٹ سامنے لانے کا بھی موقع نہ ملا، ویڈیو

    جوفرا آرچر کی تیز اور گھومتی ہوئی گیند نے رشبھ پنت کو چکرا کر رکھ دیا، بھارتی کرکٹر کو بیٹ سامنے لانے کا بھی موقع نہ ملا۔

    بھارت اور انگلینڈ کے خلاف چوتھے ٹیسٹ میچ میں رشبھ پنت انجری کا شکار ہوگئے تھے، تاہم اس کے باجود وہ بیٹنگ کرنے کےلیے آئے اور 54 رنز بنائے، ان کی اننگز کا خاتمہ جوفرا آرچر کی ایک ایسی ڈیلوری نے کیا جسے کھیلنا تقریباً ہر بیٹر کےلیے ناممکن ہوتا۔

    انگلش کرکٹ بورڈ نے رشبھ پنت کے کلین بولڈ ہونے کی ویڈیو اپنے آفیشل پیج پر شیئر کی اور کیپشن میں لکھا کہ آرچر نے رشبھ کی وکٹوں کو اڑنے پر مجبور کردیا۔

    رشبھ پنت بھارت کی جانب سے آئوٹ ہونے والے نویں کھلاڑی تھے اور ان کے آئوٹ ہوتے ہی مزید 9 رنز بعد بھارت کی آخری وکٹ بھی گر گئی۔

    جوفرا آچر نے مانچسٹر میں ہونے والے سیریز کے چوتھے ٹیسٹ کی پہلی اننگز میں 73 رنز دیکر 3 بھارتی بیٹرز کو پویلین کی راہ دکھائی۔

    https://urdu.arynews.tv/rishabh-pant-equals-virender-sehwags-long-standing-test-record/

  • طلاق یافتہ خاتون کو شادی کا جھانسہ دیکر زیادتی کرنیوالا ملزم گرفتار

    طلاق یافتہ خاتون کو شادی کا جھانسہ دیکر زیادتی کرنیوالا ملزم گرفتار

    کوئٹہ : طلاق یافتہ خاتون کو شادی کا جھانسہ دیکر زیادتی کرنے والے ملزم کو گرفتار کرلیا گیا۔

    تفصیلات کے مطابق طلاق یافتہ خاتون کو شادی کا جھانسہ دے کر زیادتی کرنے والے ملزم کو پولیس نےگرفتار کر لیا۔

    پولیس نے بتایا کہ ائیر پورٹ روڈ کی رہائشی خاتون نے 18جولائی کو ائیر پورٹ تھانے میں مقدمہ درج کرایا۔

    متاثرہ خاتون کا کہنا تھا کہ کمیری 2022میں طلاق ہوئی میرے دو بچے ہیں ، میں اپنے بچوں کے ہمراہ اکیلی رہائش پذیر ہو، میرے جانے والے کے ذریعے اختر محمد روڈ کے رہائشی وارث سے جان پہچان ہوئی اور ہمارا فون پر رابطہ شروع ہو گیا۔

    خاتون کا بتانا تھا کہ ایک روز وہ مجھے گاڑی میں کوئٹہ چمن شاہراہ پر واقعہ سروس اسٹیشن لےگیا، جہاں ایک کمرے میں ہم بیٹھے تھے، اس نے کولڈرنگ میں کوئی نشہ آور چیز ملا دی جس کے پینے کے بعد میں بے ہوش ہو گئی اور بے ہوشی میں اس نے میرے ساتھ زیادتی کی۔

    رپورٹ میں بتایا گیا کہ صبح مجھے ہوش آیا تو مجھ سے وہ معافی مانگتے ہوئے شادی کا وعدہ کیا، میں اس کو بار بار شادی کا کہتی تو وہ ٹالٹا اور پھر اس نے مجھے جان سے مارنے کی دھکیاں دینا شروع کی۔

    اس اطلاع پر پولیس نے مقدمہ درج کرکے کیس سریس کرائم انوسٹی گیشن ونگ منتقل کیا، جس پر پولیس ٹیم نے فوری کارروائی کرتے ہوئے ملزم وارث کو گرفتار کرلیا۔

    پولیس نے بتایا کہ ملزم کے موبائل فون سے ویڈیو بھی برآمد ہوئی، جس سے مزید تفتیش کی جاری ہے۔

  • خیبرپختونخوا میں سینیٹ کی 11 نشستوں پر انتخاب کے لئے پولنگ جاری، 25 امیدوار میدان میں

    خیبرپختونخوا میں سینیٹ کی 11 نشستوں پر انتخاب کے لئے پولنگ جاری، 25 امیدوار میدان میں

    پشاور : خیبرپختونخوا اسمبلی میں سینیٹ انتخابات کے سلسلے میں پولنگ جاری ہے ، کے پی اسمبلی میں اب تک 10ارکان ووٹ کاسٹ کرچکے ہیں۔

    تفصیلات کے مطابق خیبرپختونخوامیں سینیٹ کی گیارہ نشستوں پر انتخاب کےلئے پولنگ جاری ہے، پچیس امیدوار میدان میں ہیں۔

    سینیٹ کی گیارہ نشستوں کے لیے ایک سو پنتالیس ارکان ووٹ دیں گے، کے پی اسمبلی کےجرگہ ہال کو الیکشن روم بنایا گیا ہے۔

    کے پی اسمبلی میں اب تک 10 ارکان ووٹ کاسٹ کرچکے ہیں ، جے یو آئی ف کے سجاد اللہ نے پہلا ووٹ کاسٹ کیا، پی ٹی آئی پی کے اقبال وزیر ،پی ٹی آئی چیف وہپ اکبر ایوب خان ، جے یو آئی ف کے عدنان خان ،پی ٹی آئی کے پیر مصور ملک لیاقت ، اراکین احمدکریم کنڈی ،علی ہادی ، محمد رشاد خان، مخدوم آفتاب حیدر نے بھی ووٹ کاسٹ کیا۔

    وزیراعلیٰ خیبرپختونخواعلی امین گنڈاپور،اپوزیشن لیڈر ڈاکٹر عباد اور ڈپٹی اسپیکر ثریا بی بی اسمبلی پہنچ چکے ہیں جبکہ اراکین اسمبلی کی آمد جاری ہے۔

    جنرل نشستوں پر مراد سعید، فیصل جاوید، مرزا آفریدی اور پیرنورالحق قادری پی ٹی آئی کے امیدوار ہیں جبکہ خواتین کی نشست پر روبینہ ناز اور ٹیکنوکریٹ کی نشست پر اعظم سواتی امیدوار ہیں۔

    جنرل نشستوں پر مسلم لیگ ن کے نیاز احمد، پی پی پی کے طلحہٰ محمود اپوزیشن کے امیدوار ہیں جبکہ جے یو آئی ایف کے عطاء الحق بھی اپوزیشن کے امیدوار ہیں۔

    خواتین کی نشست پر پیپلزپارٹی کی روبینہ خالد اپوزیشن کی امیدوار ہیں جبکہ ٹیکنوکریٹ کی نشست پر جے یو آئی کے دلاور خان امیدوار ہیں۔

    کے پی اسمبلی میں حکومتی ارکان کی تعداد بانوے جبکہ اپوزیشن کی تعداد 53 ہے، جنرل، ٹیکنوکریٹ اور خواتین کی نشستوں پر 12 آزاد امیدوار بھی میدان میں ہیں جبکہ جنرل نشست پر ایک سینیٹر منتخب کرنے کے لیے انیس ووٹ درکار ہیں۔

    خیبر پختونخوا میں سینیٹ الیکشن کے دوران ہارس ٹریڈنگ سے بچنے کے لیے حکومت اور اپوزیشن نے چھے اور پانچ نشستوں کا فارمولا طے کیا ہے۔فارمولے کے مطابق حکومت کے حصے میں چھے جبکہ اپوزیشن کے حصے میں پانچ نشستیں آئیں گی۔

    گذشہ پی ٹی آئی پانچ میں سے چار ناراض کورنگ امیدواروں کو منانے میں کامیاب ہوگئی تھی تاہم خرم ذیشان تمام امیدوار بلامقابلہ منتخب کرانے کی راہ میں بددستورحائل ہیں۔

    رات گئے مذاکرات کے نتیجہ میں وزیر اعلیٰ علی امین گنڈا پور نے ٹینکوکریٹ کی نشست کے امیدوار سید ارشاد حسین اور وقاص اورکزئی کو دستبردار ہونے پر راضی کرلیا جبکہ صوبائی وزیر مینا خان آفریدی اور شاہد خٹک، عرفان سلیم اورعائشہ بانو کو دستبردار کرانے میں کامیاب رہے۔

    ایک ناراض امیدوار خرم ذیشان نے دستبردار ہونے سے انکار کرتے ہوئے کہا تھا کہ میرے خلاف ایکشن لینا ہے تولیں، سینیٹ الیکشن سےدستبردارنہیں ہوں گا۔

  • جہلم :  شہریوں کو ریسکیو کرنے کے دوران سیلابی ریلے میں بہہ جانے والے پولیس اہلکار کی لاش مل گئی

    جہلم : شہریوں کو ریسکیو کرنے کے دوران سیلابی ریلے میں بہہ جانے والے پولیس اہلکار کی لاش مل گئی

    جہلم : شہریوں کو ریسکیو کرنے کے دوران سیلابی ریلے میں بہہ جانے والے پولیس اہلکار حیدرعلی کی لاش مل گئی۔

    تفصیلات کے مطابق ترجمان پنجاب پولیس کی جانب سے بیان میں کہا گیا ہے کہ جہلم میں امدادی سرگرمیوں میں شامل پولیس اہلکار حیدر علی شہید ہوگیا ، گزشتہ روز شہریوں کو ریسکیو کرنے کے دوران سیلابی ریلے میں بہہ جانے والے کانسٹیبل کی لاش مل گئی۔

    آئی جی پنجاب ڈاکٹر عثمان انور نے شہید کانسٹیبل حیدر علی کی قربانی کو خراج عقیدت پیش کرتے ہوئے کہا شہید کے اہل خانہ کو تنہا نہیں چھوڑیں گے،فلاح و بہبود کاخیال رکھا جائے گا ، پولیس کےجوان جانوں کی پرواہ کیے بغیر متاثرین کو ریسکیو کر رہے ہیں۔

    دوسری جانب سیلاب متاثرین کو ریسکیو کرتے ہوئے پولیس اہلکار کے ریلے میں بہہ جانے کے واقعے میں وفاقی وزیر داخلہ محسن نقوی نے شہید پولیس کانسٹیبل حیدر علی کی قربانی کو خراج عقیدت پیش کیا۔

    محسن نقوی کا کہنا تھا کہ حیدرعلی نے زندگیاں بچاتے ہوئےجان نچھاور کرکے فرض شناسی کی اعلیٰ مثال قائم کی، شہید کانسٹیبل کی عظیم قربانی کو سلام پیش کرتے ہیں ، انھوں نے اپنی جان کی بازی لگا کر کئی لوگوں کی زندگیاں بچائیں۔

    شہید کانسٹیبل قوم کا ہیرو ہے جس نے فرض پر آنچ نہیں آنے دی اور انھوں نے بہادری کی شاندار نظیر قائم کی ،ان کی لازوال قربانی کو قوم ہمیشہ یاد رکھے گی۔

    محسن نقوی کا شہید کانسٹیبل کے لواحقین سے دلی ہمدردی و اظہار تعزیت کرتے ہوئے کہا کہ ان کے خاندان کے ساتھ کھڑے ہیں۔

  • بانی پی ٹی آئی اپنی مرضی سے جیل میں ہیں، وہ چاہیں تو باہر آسکتے ہیں، رہنما پیپلز پارٹی

    بانی پی ٹی آئی اپنی مرضی سے جیل میں ہیں، وہ چاہیں تو باہر آسکتے ہیں، رہنما پیپلز پارٹی

    اسلام آباد : پاکستان پیپلز پارٹی کے رہنما نبیل گبول کا کہنا ہے کہ بانی پی ٹی آئی اپنی مرضی سے جیل میں ہیں، وہ چاہیں تو باہر آسکتے ہیں۔

    تفصیلات کے مطابق پاکستان پیپلز پارٹی کے رہنما نبیل گبول نے اے آر وائی نیوز کو دیئے گئے خصوصی انٹرویو میں بانی پی ٹی آئی سے متعلق سوال پر کہا
    بانی پی ٹی آئی اپنی مرضی سے جیل میں ہیں، وہ چاہیں تو باہر آسکتے ہیں۔

    انھوں نے کہا کہ عمران خان سمجھتے ہیں کہ جیل سے باہر آکر مقبولیت کم ہوجائےگی، وہ جیل سےسیدھا وزیراعظم ہاؤس آنا چاہتےہیں۔

    نواز شریف کے حوالے سے رہنما پی پی کا کہنا تھا کہ نوازشریف جب اپنی سیٹ ہارگئےتوانہوں نےکہان لیگ حکومت نہیں بنائےگی، شہبازشریف نےکردارادا کیا اور وہ اچھے انسان ہیں۔

    انھوں نے مزید کہا بجٹ میں وفاقی حکومت نے سندھ کیساتھ جو کیا ہم نےاس پر احتجاج کیا ، ن لیگ اپنے وعدے پر کبھی بھی نہیں ٹھہرتی ہے۔