Category: Uncategorized

اسلام آباد : پاکستان ٹیلی کمیونیکیشن اتھارٹی (پی ٹی اے) نے بڑی کارروائیاں کرتے ہوئے 15 ہزار 996 فعال سمز برآمد کرلیں۔

تفصیلات کے مطابق پاکستان ٹیلی کمیونیکیشن اتھارٹی زونل آفس لاہور نے پنجاب بھر میں غیر قانونی سموں کے خلاف کامیابی سے چھاپے مارے۔

ملتان میں غیرقانونی سیٹ اپ کا کا پردہ فاش ہوا اور بڑی تعداد میں فعال سمز برآمد کرلی گئیں تاہم بنیادی ملزم موقع سے فرار ہو گیا۔

ضبط کی گئی سموں کے تجزیے سے کوٹ مومن میں ایک فرنچائز کی نشاندہی ہوئی، جہاں ٹیلی کام نیٹ ورک کے فرنچائز کے مالک اور دو ساتھیوں کو گرفتار کیا گیا۔

موقع پر ہونے والی تفتیش میں حاصل پور میں غیر قانونی سموں کے اجراء اور ایکٹیویٹڈ سمز جمع کرنے کے لیے فنگر پرنٹس فراہم کرنے والے ایک فرد کے ملوث ہونے کا انکشاف ہوا۔

مرکزی ملزم و گرفتار کرلیا ہے ، ملزم وہاڑی، حاصل پور اور ملتان میں تین فرنچائز چلاتا تھا اور اس سے قبل لاہور میں ایک فرنچائز تھا۔

ریکوریز میں 15,996 سمز، 18 بائیو میٹرک ڈیوائسز اور متعدد پورٹ گیٹ ویز بھی ضبط کیے گئے تاہم این سی سی آئی اے نے ایف آئی آر درج کر لی ہے۔

ایک بیان میں، پی ٹی اے نے کہا کہ انفورسمنٹ مہم غیر قانونی سم کی سرگرمیوں کو روکنے اور پاکستان کے ڈیجیٹل ماحولیاتی نظام کے تحفظ کے لیے اس کے غیر متزلزل عزم کو واضح کرتی ہے۔

راولپنڈی : موسلادھار بارش کے باعث جڑواں شہروں میں الرٹ وارننگ جاری کرتے ہوئے رین ایمرجنسی نافذ کردی گئی۔

تفصیلات کے مطابق ملک کے مختلف شہروں میں بارش کا سلسلہ جاری ہے، اسلام آباد راولپنڈی میں تیزبارش سے جل تھل ایک ہوگیا۔

موسلا دھار بارش کے باعث واسا راولپنڈی نے الرٹ وارننگ جاری کرتے ہوئے رین ایمرجنسی نافذ کردی، نالہ لئی گوالمنڈی پر پانی کی سطح 12 فٹ تک پہنچ گئی ہے۔

ایم ڈی واسا محمد سلیم اشرف نے بتایا کہ عملہ ہیوی مشینری کے ساتھ فیلڈ میں ہے اور نالہ لئی کی مانیٹرنگ کی جارہی ہے، ابھی نالہ لئی میں پانی کا بہاؤ معمول پر ہے، نالہ لئی میں کٹاریاں کے مقام پر پانی کی سطح 5 فٹ اور گوالمنڈی پل پر 4فٹ ہے،ایم ڈی واسا

ڈی سی اسلام آباد نے تمام اسسٹنٹ کمشنر کو فیلڈ میں نکلنے کی ہدایت کرتے ہوئے کہا ہے کہ نشیبی علاقوں اور نالوں کی خصوصی طور پر مانیٹرنگ کی جائے۔

سلیم اشرف کا کہنا تھا کہ بارش اور اس سے پیدا ہونے والی صورتحال پر نظر رکھے ہوئے ہیں، حالیہ بارش سے راولپنڈی اسلام اباد کے لیے پانی کے ذخائر میں بہتری ائی ہے ان میں اضافہ ہوا ہے۔

انھوں نے بتایا کہ خانپور ڈیم اور راول ڈیم میں پانی کی سطح میں اضافہ ریکارڈ کیا گیا ہے، مسلسل بارشوں کے باعث امید ہے دونوں ڈیموں میں پانی کی سطح میں اضافہ بتدریج ہوتا جائے گا۔

دوسری جانب محکمہ موسمیات کی جانب سے مزید بارش کا امکان ظاہر کیا گیا ہے جڑواں شہروں میں مون سون سے متعلق پیشگی تیاریاں جاری ہیں۔

محکمہ موسمیات نے پانچ جولائی تک تیز بارشوں کی پیش گوئی کرتے ہوئے پنجاب، سندھ اورخیبرپختونخوا میں اربن فلڈنگ کا خدشہ ظاہر کیا ہے تاہم کراچی میں دوسرا اسپیل پانچ جولائی سے اثر انداز ہوگا۔