Category: Uncategorized

ہالی وڈ کی نئی اسپورٹس اور کامیڈی سے بھر پور فلم "ڈرافٹ ڈے " کا پہلا ٹریلر ریلیز کردیا گیا۔

ہالی وڈ کی نئی اسپورٹس اور کامیڈی سے بھر پور فلم  "ڈرافٹ ڈے " کا پہلا ٹریلر شائقین کیلئے ریلیز کردیا گیا، ہالی وڈ کے معروف ہدایتکار آئیون ریٹمین نے فلم کی ہدایت کاری کی ہے۔

فلم کی کہانی ایک فٹ بال لیگ ٹیم کلیولینڈ براؤنز کے جنرل منیجر کے گرد گھومتی ہے، جسے اپنی ٹیم کے لیے نمبر ون ڈرافٹ حاصل کرنے کے لیے مشکل راستوں سے گزرنا پڑتا ہے۔

فلم ڈرافٹ ڈے میں معروف اداکار کیون کوسٹنراورجینیفر مرکزی کرداروں میں جلوے بکھرتے نظر آئینگے، اسپورٹس اور کامیڈی سے بھرپورفلم ڈرافٹ ڈے اگلے سال گیارہ اپریل کو سینما گھروں میں ریلیز کی جائیگی۔

شرارتوں سے بھرپور کارٹون فلم آئس ایج فائیو کے لئے بچوں کو بہت انتظار کرنا پڑے گا، فلم دوہزار سولہ میں ریلیز ہوگی۔

آئس ایج سیریز کے چار مزیدار پارٹس سامنے آنے کے بعد اب فلم آئس ایج فائیو آنے والی ہے، جب بھی آئس ایج کا کوئی بھی پارٹ سامنے آیا اس نے خوب ریکارڈ بنایا ہے، کارٹون فلم میں ڈائیلاگ ایسے کہ ہنسی رکے نہیں اور فلم دیکھتے ہی رہ جائیں۔

خوبصورت اینی میشن کے ساتھ آئس ایج فائیو کے بارے میں بھی یہی خیال کیا جائے گا کہ یہ بھی مزاح سے بھرپور ہوگی، مگر ان سب کے باوجود بچوں کو فلم دیکھنے کے لئے طویل انتظار کرنا پڑے گا، کیونکہ فلم جولائی دوہزار سولہ میں ریلیز ہوگی۔

سال کا اختتام ہورہا ہے، دنیا بھر کی اہم شخصیات میں سال دوہزار تیرہ میں کس شخصیت کو سب سے زیادہ انٹرنیٹ پر سرچ کیا گیا۔

سال دوہزارتیرہ میں گلوکار جسٹن بیبر کو سب سے زیادہ انٹرنیٹ پر سرچ کیا گیا، بیبر کی شہرت کا عالم یہ ہے کہ ٹوئیٹر پرسال کے شروع میں نمبر ون رہے، دوسرے نمبر پر سب سے زیادہ سرچ کی جانے والی شخصیت کا اعزاز پوپ سنگر ریحنا کو ملا، جن کو متنازعہ خبروں کی وجہ سے بھی شہرت ملی۔

ہالی ووڈ کی دنیا سے تعلق رکھنے والی سیلیبرٹی کم کرڈیشین نے میدان مار  کر تیسری پوزیشن حاصل کی، اس سال کیٹی پیری نے بھی کمال کیا اور مداحوں کی توجہ حاصل کئے رکھی، شہرت اور مقبولیت میں کیٹی کا چوتھا نمبر ہے۔

ان سب کے بعد شکیرا، بیونسے اور لیڈی گاگا ایڈیلی اور میڈونا ٹاپ ٹین موسٹ سرچڈ سیلیبرٹیز میں شامل ہوئیں جبکہ انٹرنیٹ پر پانچویں نمبر پر ہالی ووڈ ایکشن گرل انجلینا جولی مقبول رہیں۔
   

امریکا نے اسنوڈن کو معاف کرنے کے امکانات کو مسترد کر دیا، قومی سلامتی کی مشیر سوزن رائس کہتی ہیں ایڈورڈ سنوڈن عدالتوں کا سامنا کرنا پڑے گا۔

غیر ملکی خبر رساں ادارے کے مطابق امریکی قومی سلامتی کی مشیر سوزن رائس نے اپنے ایک بیان میں کہا ہے کہ ایڈورڈ سنوڈن کو کسی صورت معافی نہیں دی جاسکتی۔

سنوڈن کی جانب سے امریکہ کے قومی سلامتی سے متعلق راز افشا ں کئے گئے جن سے امریکہ کو ناقابل تلافی نقصان پہنچا ہے، سوزن رائس کا مزید کہنا تھا کہ سنوڈن کو واپس آکر عدالتوں میں اپنے اوپر لگے الزامات کا دفاع کرنا چاہیے۔

امریکا میں موسم کی سختیاں جاری ہیں۔۔ شدید برف باری سے سینکڑوں پروازیں منسوخ ہو گئیں جبکہ کئی ریاستوں میں بجلی کی فراہمی بھی منقطع ہے۔۔۔کینیڈا میں بھی شدید برفانی طوفان سے نظام زندگی معطل ہو کر رہ گیا ہے۔

امریکہ کی کئی ریاستوں میں تیز ہواؤں اور برفانی طوفان سے زندگی مفلوج ہو کر رہ گئی ہے سڑکوں پر کئی کئی انچ برف پڑنے کی وجہ سے شہریوں کو آمدورفت میں بھی شدید مشکلات کا سامنا ہے۔

شدید برف باری کی وجہ سے پروازوں کا شیڈول بھی بری طرح متاثرہوا ہے، شدید برفباری سے کئی علاقوں میں بجلی بھی منقطع ہوگئی ہے۔

جبکہ کینیڈا میں شدید برفانی طوفان سے لوگوں کو شدید مشکلات کا سامنا ہے، ٹورنٹو میں ڈھائی لاکھ اور اونٹاریو میں ساڑھے تین لاکھ گھروں کو بجلی کی فراہمی منقطع ہے، برفباری کے باعث ٹورنٹو کی سڑکیں بند ہیں جبکہ متعدد پروازیں تاخیرکاشکارہوئیں یامنسوخ کردی گئیں۔

فن قوالی میں منفرد مقام رکھنے والے امجد صابری آج اپنا یوم پیدائش منا رہے ہیں۔ یوں توفن قوالی میں کئی معروف قوالوں نے اپنا نام پیدا کیا ۔لیکن تاریخ جن کو یاد کرتی ہےعظیم قوال کے حوالے سے ۔۔وہ ہیں قوال میاں فرید صابری۔۔فرید صابری کی قوالی نے فن قوالی میں وہ مقام پایا جوبہت کم لوگوں کو عطا ہوا۔

فرید صابری کی جدائی کے بعد ان کا نام زندہ رکھنے والے ان کے بیٹے امجد صابری نے والد کی وراثت کا حق ادا کیا،اور قوالی میں نام کمایا۔ امجد صابری نے بچپن سے ہی گھر میں تصوف کو پروان چڑھتے دیکھا ۔فن قوالی میں اپنے والد سے تربیت حاصل کرتے ہوئے محض آٹھ سال کی عمر سے ہی گائیکی کا آغاز کردیا تھا۔

اللہ اور اس کے اولیا سے محبت نے امجد صابری کی آواز میں ایسی مٹھاس اور سرور بھر دیا کہ سننے والے آواز کے سحر میں کھو جاتے ہیں۔ امجد صابری نے پاکستان اور بھارت میں کئی کلام پڑھے۔انہیں اب تک کئی ایوارڈز کے ساتھ بہترین پرفامنس کا ایوارڈ پرائڈ آف پرفارمنس بھی ملا۔

امجد صابری کہتے ہیں کہ  تاجدار حرم۔ جب بھی پڑھی آنکھوں میں آنسو آئے۔یہ پڑھتے ہوئے انہیں شدت سے والد کی یاد آئی۔فن قوالی میں اپنا منفرد مقام رکھنے والے امجد صابری اپنی آواز سے دلوں میں خاص مقام رکھتے ہییں۔

سروں کی ملکہ۔ملکہ ترنم نورجہاں کو ہم سے بچھڑے تیرہ برس بیت گئے مگر اُن کی آواز اور انداز آج بھی زندہ ہیں۔  چھ برس کی عمر سے ہی گائیکی کا شوق رکھنے والی اللہ وسائی نے جب موسیقی کی دنیامیں قدم رکھا تو انہیں نورجہاں کا نام دیاگیا۔ فن موسیقی میں ایسا انمول ہیرا پاکستان کی دھرتی کو ملا جو اپنی مثال آپ تھا۔

نورجہاں کی آوازنے سات دہائیوں تک لوگوں کو اپنے سحر میں جکڑے رکھا۔فیض کا کلام ہو، غزل ہو یا شوخ گانا۔ ہرسر نورجہاں کے سامنے سر جھکاتا۔ ملکہ ترنم نے جو بھی گایا، سننے والوں کو مسحور کیا۔ بے شمار کامیاب فنکاروں کو پس پردہ آواز کے ذریعے کامیاب بنانے میں اہم کردار ادا کرنے والی عظیم گلوکارہ نے اپنا فلمی کیریئرمیں کئی بھارتی فلموں نادان، نوکر، لال حویلی، دل، ہمجولی اور جگنو وغیرہ جبکہ پاکستان میں فلم دوپٹہ، گلنار، انتظار، لخت جگر، کوئل اور انار کلی میں کام کیا۔

ہزار سے زائد پنجابی اور اردو فلموں میں نورجہاں نے دس ہزار گانے گائے۔ حب الوطنی کےجذبے سے سرشار نورجہاں نےانیس سو پینسٹھ کی جنگ میں اپنی آواز سے پاکستانیوں کا حوصلہ بڑھایا۔ فلمی، غیر فلمی غزل گائیکی میں یکتا ملکہ ترنم، نورجہاں کو دنیا سے گزرے جتنا وقت بڑھتا جارہاہے،ان کی آواز کی کمی اتنی ہی زیادہ محسوس ہوتی ہے۔
    

پولیس اوررینجرز نے ٹارگٹڈ آپریشن کے دوران اناسی سے زائد افراد کو حراست میں لے لیا۔ کراچی میں ایک جانب تو ٹارگٹڈ آپریشن کا سلسلہ جاری ہے تو دوسری جانب قتل و غارت گری کے واقعات بھی تھمنے کا نام نہیں لے رہے ۔

پولیس حکام کے مطابق صبح سویرے سپر ہائی وے انصاری پل کے قریب سےتین افراد کی لاشیں ملیں جنہیں تشدد کے بعد فائرنگ کرکے قتل کیا گیا تھا مقتولین کی لاشوں کو ضابطے کی کاروائی کیلئے عباسی شہید اسپتال منتقل کردیا گیا ۔جہاں تاحال مقتولین کی شناخت نہیں ہو سکی۔

لیاری کے علاقے سلاٹر ہاوس کے قریب فائرنگ سے ایک شخص زخمی ہو گیا، گزشتہ روز دو گروپوں میں مسلح تصادم کے بعد لیاری کےمختلف علاقوں میں کشیدگی برقرارہے ۔رات گئے نیوکراچی میں ڈکیتی کے دوران مزاحمت پر فائرنگ سے ایک شخص زخمی ہوگیا۔

موقع پرموجود شہریوں نے فائرنگ کرنے والے ڈاکو کو پکڑکرتشدد کے بعد پولیس کے حوالے کردیا۔تھانہ اورنگی اور تھانہ بوٹ بیسن کے علاقوں میں بھی ڈکیتی کے دوران مزاحمت پردو افراد زخمی ہوئے جنہیں طبی امداد کیلئے اسپتال منتقل کیا گیا۔ادھر رینجرز نے مختلف علاقوں میں ٹارگٹڈ کارروائیوں میں بارہ ملزمان کو گرفتار کرکے اسلحہ برآمد کرلیا۔

ایسٹ زون پولیس نے چوبیس گھنٹوں کے دوران انیس ملزمان کو حراست میں لے لیا ۔ملزمان سے اسلحہ اور منشیات بھی بر آمد کر لی گئی ۔ بنارس میں خفیہ اطلاع پرچھاپہ مار کارروائی کے دوران پچیس مشتبہ افراد کو حراست میں لے لیا گیا ۔زیر حراست مشتبہ افراد سے پوچھ گچھ جاری ہے۔