ARYNews.tv | Urdu – Har Lamha Bakhabar

Category: حیرت انگیز

VIRAL STORIES FROM AROUND THE WORLD IN URDU BY ARY News Urdu وائرل حیرت انگیز خبریں اور معلومات

  • باکسنگ کی تاریخ کا طویل ترین اور حیرت انگیز مقابلہ، ایک کی ہڈیاں ٹوٹ گئیں دوسرا ہوش کھو بیٹھا

    باکسنگ کی تاریخ کا طویل ترین اور حیرت انگیز مقابلہ، ایک کی ہڈیاں ٹوٹ گئیں دوسرا ہوش کھو بیٹھا

    باکسنگ ایک ایسا کھیل ہے جس کا شمار انسانی فطرت کے قریب ترین کھیلوں میں کیا جاتا ہے وہ اس لیے کہ لوگ اکثر لڑائی کے دوران مکے بازی ہی کرتے ہیں۔

    یہ کھیل اولمپکس گیمز کا اہم ایونٹ اور دنیا کے مقبول ترین کھیلوں میں سے ایک ہے، اس میں تکنیک، توانائی، ذہانت اور قوت برداشت کا بھرپور استعمال ہوتا ہے۔

    ویسے تو دنیا میں نامور باکسرز کے درمیان بڑے سنسنی خیز مقابلے ہوئے لیکن آج سے تقریباً 130 سال پہلے دو باکسرز کے درمیان ہونے والی لڑائی یادگار بن گئی، مقابلے کی خاص بات یہ تھی کہ انہوں نے ایک دوسرے پر مسلسل 7 گھنٹے تک مکوں کی بارش جاری رکھی۔

    اس لڑائی کے دوران ان کی حالت قابل دید بلکہ قابل رحم تھی لیکن زخموں سے چُور باکسرز  کے عزم اور حوصلے کی بات کی جائے تو وہ کم ہونے کا نام ہی نہیں لے رہا تھا۔

    6اپریل 1893 کو نیو اورلینز میں باکسنگ کے شائقین نے ایک ایسا تاریخی اور تھکا دینے والا مقابلہ دیکھا جو ہمیشہ یاد رکھا جائے گا۔ یہ مقابلہ جیک برک اور اینڈی بووین کے درمیان ہوا جو تاریخ کا سب سے طویل گلوز باکسنگ میچ قرار پایا۔

    دونوں باکسرز کے درمیان یہ مقابلہ رات 9 بجے شروع ہوا اور اگلی صبح تقریباً 4 بجے تک جاری رہا، حیران کن طور پر یہ مقابلہ 110 راؤنڈز تک گیا جو 7 گھنٹے 19 منٹ پر محیط تھا۔ دونوں باکسرز نے ہمت نہ ہاری اور لگا تار ایک دوسرے پر تابڑ توڑ حملے کرتے رہے۔

    مقابلہ اس قدر سخت اور جان لیوا تھا کہ 110 راؤنڈز تک ایک دوسرے پر مکوں کی بارش کرنے کے بعد دونوں باکسر اتنے تھک گئے کہ کرسی سے اٹھنے کی بھی سکت نہ رہی۔

    مقابلے کے اختتام پر جیک برک کے دونوں ہاتھوں کی ہڈیاں ٹوٹ چکی تھیں جبکہ اینڈی بووین اتنے نڈھال ہوگئے کہ رنگ میں گر پڑے۔

    دونوں باکسرز کے مزید لڑنے کے قابل نہ رہنے پر ریفری نے مقابلے کو "نو کانٹیسٹ” قرار دے دیا، کیونکہ دونوں میں سے کوئی بھی ناک آؤٹ نہیں ہوا تھا لیکن بعد میں اسے ڈرا میں تبدیل کر دیا گیا اور انعامی رقم دونوں میں برابر تقسیم کی گئی۔

  • بیوی نے 7 سال سے لاپتا شوہر کو کیسے ڈھونڈا؟

    بیوی نے 7 سال سے لاپتا شوہر کو کیسے ڈھونڈا؟

    (2 ستمبر 2025): بھارتی ریاست اتر پردیش میں بیوی نے 7 سال سے لاپتا شوہر کو ڈھونڈ لیا مگر اس کہانی میں ایک ایسا موڑ ہے جس نے ہر کسی کو حیران کر دیا۔

    انڈین میڈیا کے مطابق شیلو نامی خاتون نے جتیندر کمار نامی شخص سے شادی کی لیکن شوہر شادی کے ایک سال بعد پُراسرار طور پر لاپتا ہوگیا تھا۔

    شیلو اور جتیندر کمار کے درمیان شادی کے فوراً بعد تعلقات خراب ہونے لگے تھے کیونکہ سسرال میں خاتون سے اضافی جہیز اور سونے کی چین اور انگوٹھی کا مطالبہ کیا جانے لگا تھا۔

    مطالبہ پورا نہ ہونے پر بالآخر شیلو میکے چلی گئی کیونکہ اسے زبردستی گھر سے نکالا گیا تھا۔ شیلو کے اہل خانہ نے پولیس میں مقدمہ درج کروایا تھا۔

    کیس کی تحقیقات کے دوران خاتون کا شوہر جتیندر کمار اچانک لاپتا ہوگیا۔ 2018 میں اس کے لاپتا ہونے کی شکایر پولیس میں درج کروائی گئی لیکن کوئی سراغ نہ مل سکا۔

    حال ہی میں جتیندر کمار کی بیوی انسٹاگرام استعمال کر رہی تھیں جب انہوں نے ایک ریل میں شوہر کو نامعلوم خاتون کے ساتھ دیکھا۔

    بیوی نے فوراً پولیس کو اطلاع دی۔ تحقیقات میں یہ بات سامنے آئی کہ جتیندر کمار جان بوجھ کر غائب ہوا تھا اور اس نے دوسری شادی کر رکھی ہے۔

    پولیس نے کارروائی کرتے ہوئے شیلو کے شوہر کو گرفتار کر لیا جو اس وقت حراست میں ہے، پولیس معاملے کی تحقیقات کر رہی ہے۔

  • ہوٹل میں کھانے کے دوران سالن میں مرا ہوا چوہا نکل آیا، ویڈیو وائرل

    ہوٹل میں کھانے کے دوران سالن میں مرا ہوا چوہا نکل آیا، ویڈیو وائرل

    ہوٹل میں کھانے کے دوران سالن میں مردہ چوہا نکل آیا، واقعے کے کریہہ ویڈیو نے سوشل میڈیا صارفین میں غم و غصے کی لہر دوڑا دی۔

    بھارتی ریاست اتر پردیش میں سڑک کے کنارے ایک ڈھابے پر کھانا کھانے والے دو آدمیوں کے لیے ایک سادہ کھانا ڈراؤنے خواب میں تبدیل ہو گیا، جب ان کے پنیر کی ڈش میں ایک مردہ چوہا نکل آیا، یہ واقعہ پیر کو بلسی قصبے کے انمول نامی ڈھابہ میں پیش آیا۔

    چونکا دینے والے واقعے کی ویڈیو سوشل میڈیا پر تیزی سے وائرل ہورہی ہے جس میں دکھایا گیا ہے کہ کھانا کھانے والے ایک شخص نے ڈش میں سالن کو ہٹانے کے لیے چمچ کا استعمال کیا۔

    تاہم اس نے جیسے ہی جمچ چلایا تو سالن کے نیچے چھپے ہوا مرا ہوا چوہا سامنے ظاہر ہوگیا، جسے دیکھ کر وہ دونوں ششدر رہ گئے۔

    مہیشوری نامی شخص جو یہ کھانا کھا رہا تھا اس نے بتایا کہ’’میں نے فوری طور پر ڈھابہ کے منتظم سے شکایت کی اور اسے مطلع کیا کہ میں پولیس میں شکایت درج کرواؤں گا۔‘‘

    بلسی کے سب ڈویژنل مجسٹریٹ (ایس ڈی ایم) پریم پال سنگھ نے تصدیق کی کہ انھوں نے بھی ویڈیو دیکھی تھی، انھوں نے بتای کہ "ہمیں ابھی تک کوئی تحریری شکایت نہیں ملی ہے، لیکن ویڈیو کی جانچ کی جا رہی ہے، تفصیلی تحقیقات کی جائیں گی۔

  • خاتون نے بھتیجے کی فیس کے لیے اے ٹی ایم توڑ دی

    خاتون نے بھتیجے کی فیس کے لیے اے ٹی ایم توڑ دی

    بھارت میں خاتون نے مبینہ طور پر بھتیجے کی فیس ادا کرنے کے لیے اے ٹی ایم ہی توڑ دی۔

    بھارتی میڈیا رپورٹ کے مطابق پولیس کا کہنا ہے کہ 24 سالہ خاتون نے مبینہ طور بھتیجے کی فیس ادا کرنے کے لیے اے ٹی ایم میں توڑنے کی کوشش کی کیونکہ بھتیجے کو فیس کی وجہ سے اسکول سے نہ نکالا جائے۔

    پولیس اسٹیشن انچارج بی ڈی دویدی نے بتایا کہ سنجیوانی نگر علاقے میں اے ٹی ایم کو نقصان پہنچانے کی ناکام کوشش کے بارے میں پولیس کو موصول ہونے والی شکایت سے تحقیقات کا آغاز ہوا۔

    پولیس نے سی سی ٹی وی کیمرے کے ذریعے خاتون کا سراغ لگا کر گرفتار کر لیا۔

    یہ پڑھیں: لوڈشیڈنگ کے ستائے شہری اے ٹی ایم بوتھ میں سونے لگے، ویڈیو وائرل

    خاتون نے پولیس کو بتایا کہ وہ اپنے شوہر کے ساتھ متھرا میں رہتی ہیں، وہ سنجیوانی نگر میں اپنی بہن کے گھر آئی تھیں جہاں انہیں معلوم ہوا کہ ان کا بھتیجا جو 11 ویں جماعت کا طالب علم ہے، فیس کی عدم ادائیگی کی وجہ سے اسکول سے نکالنے کا خطرہ مول لے رہا ہے پھر وہ اسے چوری کی کوشش کرنے کے لیے اے ٹی ایم کے ساتھ لے گئی۔

    پولیس نے بتایا کہ پیر کو عدالت نے خاتون کو عدالتی تحویل میں دے دیا جب کہ نوعمر لڑکے کو اصلاحی گھر بھیج دیا گیا، پولیس نے خاتون کے قبضے سے ایک راڈ، ایک اسپینر اور دیگر اوزار برآمد کیے ہیں۔

  • چوہوں نے اسپتال میں نوزائیدہ بچوں کے بازو کاٹ لیے

    چوہوں نے اسپتال میں نوزائیدہ بچوں کے بازو کاٹ لیے

    بھارت میں چوہوں نے اسپتال میں نوزائیدہ بچوں کے بازو کاٹ لیے۔

    بھارتی میڈیا رپورٹ کے مطابق اندور کے مہاراجا یشونت راؤ اسپتال (ایم وائی ایچ) میں چوہوں نے مبینہ طور پر دو نوزائیدہ بچوں کے بازو کاٹ لیے۔

    بچوں کی پیدائش تین دن پہلے ہوئی تھی اور انہیں اسپتال کے انتہائی نگہداشت یونٹ (این آئی سی یو) میں داخل کرایا گیا تھا۔ اسپتال کی نرسنگ ٹیم نے جب نومولود کے زخمی بازو دیکھے تو اسپتال انتظامیہ کو اطلاع دی۔

    اس کے بعد یونٹ میں نصب سی سی ٹی وی کیمروں کو اسکین کیا گیا اور چوہے نومولود بچوں کے قریب جھولے میں کودتے ہوئے دیکھے گئے۔ اتوار کو پہلا واقعہ سامنے آنے کے بعد ڈاکٹروں نے فوری طور پر نومولود کا علاج شروع کر دیا جبکہ آج بھی ایسا ہی ایک واقعہ سامنے آیا۔

    یہ پڑھیں: ویڈیو: چوہے نے نومولود بچی کو چہرے پر کاٹ کر لہو لہان کر دیا

    اسپتال کے این آئی سی یو میں چوہا دیکھا گیا جس نے انتظامیہ کو حیران کردیا۔

    شعبہ اطفال کے سربراہ ڈاکٹر برجیش لاہوتی نے اسپتال کے سپرنٹنڈنٹ ڈاکٹر اشوک یادو کو اس معاملے سے آگاہ کیا۔ ڈاکٹر لاہوتی نے کہا کہ اسپتال چوہوں سے متاثر ہے اس معاملے سے فوری طور پر نمٹا جائے۔

    ڈاکٹر یادو نے کہا کہ اسپتال میں کیڑوں پر قابو پانے کا کام پانچ سال پہلے کیا گیا تھا لیکن چوہوں کی تعداد پھر بڑھ گئی ہے کیونکہ مریض کے رشتہ دار اسپتال میں کھانا لاتے ہیں۔

    واضح رہے کہ جنوری 2023 میں ساگر ضلع اسپتال کے مردہ خانے میں رکھی دو لاشوں سے چوہوں نے ایک ایک آنکھ کاٹ لی تھی۔

    سول سرجن اور اسپتال کے تین ڈاکٹروں کو شوکاز نوٹس جاری کر دیا گیا تھا جون 2023 میں چوہوں نے ودیشہ کے ضلع اسپتال کے مردہ خانے میں رکھے ہوئے ایک بزرگ شخص کی ناک اور آنکھوں کو کاٹ لیا تھا۔

  • ویڈیو: موٹر سائیکل سوار ملزمان لڑکی سے موبائل فون چھین کر فرار

    ویڈیو: موٹر سائیکل سوار ملزمان لڑکی سے موبائل فون چھین کر فرار

    بھارت میں موٹر سائیکل پر سوار دو ملزمان لڑکی سے موبائل فون چھین کر فرار ہوگئے۔

    آگرہ میں موبال فون چھیننے کا واقعہ پیش آیا جس نے شہر میں بڑھتے اسٹریٹ کرائمز نے لوگوں کو پریشان کردیا ہے۔

    کیمرے میں قید ہونے والے ویڈیو میں نوجوان لڑکی کو گھر جاتے ہوئے دکھایا گیا جب موٹر سائیکل پر سوار دو آدمی اچانک پیچھے سے آئے اور اس کا فون چھین لیا، اس سے پہلے کہ وہ کوئی ردعمل ظاہر کر پاتی فرار ہو گئے۔

    ویڈیو اب سوشل میڈیا پر وائرل ہو گئی ہے جس پر عوام کی جانب سے شدید ردعمل سامنے آ رہا ہے۔ بہت سے لوگوں نے غصے اور تشویش کا اظہار کرتے ہوئے کہا کہ اس طرح کے واقعات خواتین اور نوجوان لڑکیوں کے لیے دن کے وقت بھی اکیلے چلنا غیر محفوظ بنا دیتے ہیں۔

    فوٹیج میں واضح طور پر دکھایا گیا ہے کہ ملزمان نے کتنی تیزی سے واردات کی جس سے متاثرہ لڑکی حیران اور بے بس ہوگئی۔

    ایک صارف نے لکھا کہ لوگوں میں سڑک پر چلتے ہوئے یا سواری کے دوران فون پر بات کرنے کا جنون۔ یا تو فون چھین لیتے ہیں یا پھر حادثہ پیش آتا ہے۔

    دوسرے صارف نے لکھا کہ ان دنوں چور اتنے تیز ہیں کہ ایک لڑکی کا فون پلک جھپکتے ہی چلا گیا! اور ایک فون اب صرف کالز کے لیے نہیں ہے، یہ آپ کی پوری زندگی کو اپنے اندر رکھتا ہے۔

  • کبوتر کیمرہ : پیغام رسانی سے خفیہ جاسوسی کی حیران کن داستان

    کبوتر کیمرہ : پیغام رسانی سے خفیہ جاسوسی کی حیران کن داستان

    ماضی میں اپنے پیغامات، خطوط بھیجنے اور جاسوسی کے لیے کبوتر کو باقاعدہ خصوصی تربیت دے کر استعمال کیا جاتا تھا جو کافی حد تک کامیاب طریقہ کار بھی تھا۔

    ایسے کبوتر دور دراز علاقوں تک اڑان بھر کر پیغام پہنچانے کا کام کرتے تھے، انہیں صرف گھروں میں پیغام پہنچانے کے لیے ہی نہیں بلکہ میدان جنگ میں پیغام رسانی کے لیے بھی استعمال کیا جاتا تھا۔

    عام پرندوں کو گھر کا پتہ سمجھ میں نہیں آتا لیکن کبوتروں میں ایک قدرتی صلاحیت ہوتی ہے جسے گھر واپسی کی جبلت اور انگریزی میں ہومنگ انسٹنکٹ کہا جاتا ہے۔

    جس کے ذریعے وہ اپنی آبائی جگہ کو پہچاننے اور وہاں واپس پہنچنے میں مہارت رکھتے ہیں، چاہے انہیں کتنی ہی دور کیوں نہ لے جایا جائے۔

    اس صلاحیت کا تعلق ان کے اندر موجود مخصوص مقناطیسی حس سے ہے، جس کی بدولت وہ زمین کے مقناطیسی میدان کو محسوس کرکے سمت کا اندازہ لگا سکتے ہیں۔

    واشنگٹن ڈی سی کے انٹرنیشنل اسپائی میوزیم میں دنیا بھر کے جاسوسی آلات کا سب سے بڑا عوامی ذخیرہ موجود ہے۔

    اس میوزیم میں قلم کی شکل کے خفیہ آلات سے لے کر خصوصی گاڑیاں تک شامل ہیں، جو کئی ممالک اور دہائیوں پر محیط ہیں۔ مگر بالکل فلمی طرز پر، جیسا کہ ایم آئی سکس کی "کیو” لیبارٹری میں نظر آتا ہے، ان میں سے بعض چیزیں حیران کن اور کسی حد تک خوف پیدا کرنے والی بھی ہیں۔ ان ہی میں ایک کبوتر کیمرہ بھی ہے۔

    کبوتر سے پیغام رسانی کا آغاز تقریباَ تین ہزار سال قبل فراعین مصر کے دور میں ہوا، جس میں سلیمان بادشاہ نے 1010 قبل مسیح میں اس کا استعمال کیا۔

    مسلمانوں نے 567 ہجری میں نور الدین زنگی کے دور میں شام اور مصر میں کبوتروں کو تربیت دے کر پیغام رسانی کا باقاعدہ نظام بنایا اور 1150ء میں بغداد میں سلطان نے اس نظام کو مزید منظم کیا۔ یہ طریقہ کار ایشیا اور یورپ میں چنگیز خان کے ذریعے پھیلایا گیا اور فرانسیسی انقلاب میں بھی اس کا استعمال جاری رہا۔

    انسان نے جنگوں میں اکثر جانوروں کو اپنے مقصد کے لیے استعمال کیا۔ مثال کے طور پر ڈولفن اور سی لائینز کو بارودی سرنگیں ڈھونڈنے پر لگایا گیا، چمگادڑوں پر چھوٹے بم باندھے گئے اور ہاتھیوں کو ایک طرح کے "زندہ ٹینک” کے طور پر استعمال کیا گیا لیکن جاسوسی اور پیغام رسانی کے لیے پرندے سب سے زیادہ موزوں ثابت ہوئے، جن میں سب سے نمایاں نام کبوتر کا ہے جس کی خدمات کو فراموش نہیں کیا جاسکتا۔

    کبوتر اپنی "ہومنگ انسٹنکٹ” یعنی گھر واپسی کی جبلّت کی وجہ سے قیمتی سمجھے جاتے ہیں۔ اسی لیے پہلی اور دوسری جنگِ عظیم میں ان کا استعمال پیغام رسانی کے لیے عام تھا، اور ان خدمات کے بدلے کئی کبوتروں کو میڈلز بھی دیے گئے (یقیناً یہ کہانیاں انہوں نے اپنے بچوں اور پوتوں کو سنائی ہوں گی)۔ اس جبلّت کی بدولت کبوتروں کو اس طرح چھوڑا جا سکتا تھا کہ وہ واپسی پر کسی اہم علاقے کے اوپر سے گزریں اور مطلوبہ معلومات حاصل ہوسکے۔

    سرد جنگ کے دوران سی آئی اے نے اس قدرتی صلاحیت کو مزید آگے بڑھانے کی کوشش کی۔ کبوتروں کے ساتھ ننھے کیمرے باندھے گئے تاکہ وہ قریبی فاصلے سے خفیہ تصاویر کھینچ سکیں۔

    چونکہ جہاز یا سیٹلائٹ زیادہ بلندی سے تصویریں لیتے تھے، اس لیے کبوتروں کے نیچے نصب کیمرے کی تصاویر زیادہ واضح اور کارآمد ہو سکتی تھیں۔ ان کیمروں میں یہ سہولت بھی تھی کہ یا تو فوری طور پر تصویر کشی شروع کر دیں یا یہ کام کسی طے شدہ وقت کے بعد کریں۔

    اسپائی میوزیم میں موجود کبوتر کیمرہ اصل نہیں بلکہ اس کی نقل ہے۔ اصل نمونہ سی آئی اے کے نجی میوزیم ورجینیا میں رکھا ہوا ہے۔ یہ کیمرہ پانچ سینٹی میٹر سے بھی کم چوڑا اور تقریباً 35 گرام وزنی تھا، جو اس دور کی ٹیکنالوجی کے لحاظ سے نہایت جدید سمجھا جاتا تھا۔

    میڈیا رپورٹس کے مطابق سی آئی اے کا منصوبہ یہ تھا کہ ایسے کبوتروں کو ماسکو بھیجا جائے اور خفیہ طریقے سے انہیں چھوڑا جائے مثلاً کسی گاڑی کے فرش میں بنے سوراخ سے۔ تاہم، یہ بات آج تک معلوم نہیں ہو سکی کہ کبوتروں کو حقیقت میں کتنی بار اور کہاں کہاں استعمال کیا گیا۔

  • ٹرمپ کے بچپن جوانی اور بڑھاپے کی ویڈیو وائرل : دیکھنے والوں کو خوشگوار حیرت

    ٹرمپ کے بچپن جوانی اور بڑھاپے کی ویڈیو وائرل : دیکھنے والوں کو خوشگوار حیرت

    امریکا کے صدر ڈونلڈ ٹرمپ کی ان کی زندگی کے 78 سال پر محیط ایک ویڈیو سوشل میڈیا پر وائرل ہوگئی ہے جسے دیکھ کر لوگ خوشگوار حیرت کا اظہار کر رہے ہیں۔

    ویڈیو میں دیکھا جاسکتا ہے وہ اپنے بچپن اور جوانی کے ایام میں کیسے دکھتے تھے۔ اس اے آئی ویڈیو کو دیکھ کر خود امریکی صدر نے بھی پسندیدگی کا اظہار کیا۔

    donald

    صدر ڈونلڈ ٹرمپ نے اے آئی سے تیار کردہ یہ ویڈیو دوبارہ پوسٹ کی ہے جس میں وہ بچپن سے لے کر آج تک اپنی زندگی کے مختلف مراحل میں دکھائے گئے ہیں۔

    یہ ویڈیو جو پہلی بار "ٹرمپ کا ارتقاء” کے عنوان سے ایکس پر پوسٹ کی گئی تھی، اسے آرٹیفشل انٹیلی جینس (اے آئی) کی مدد سے تیار کیا گیا ہے۔

    مذکورہ ویڈیو صدر ٹرمپ کی ایک سے 78 سال کی عمر تک کی زندگی کے مختلف مراحل کی دلچسپ منظر کشی کرتی ہے۔ یہ ویڈیو 1946 سے 2025 تک کی ان کی زندگی کے مختلف مراحل پیش کر رہی ہے۔

    Trump VDO

    امریکی صدر کی پسندیدگی کا اندازہ اس بات سے بخوبی لگایا جاسکتا ہے کہ انہوں نے اس ویڈیو کو سماجی رابطے کی ویب سائٹ ٹروتھ سوشل پر دوبارہ پوسٹ کیا اور اس کے کیپشن میں لکھا کہ "یہ ناقابل یقین ہے۔ یہ کس نے کیا؟ صدر DJT

  • شادی میں بن بلائے مہمانوں کو دعوت دے کر بلایا جانے لگا

    شادی میں بن بلائے مہمانوں کو دعوت دے کر بلایا جانے لگا

    شادی میں بن بلائے مہمانوں کی آمد پر اکثر لوگ حیران ہوجاتے ہیں اور اس پر تنقید بھی کی جاتی ہے لیکن اب شادی میں بن بلائے مہمانوں کو دعوت دے کر بلایا جارہا ہے۔

    یورپ میں حال ہی میں شادی شدہ جوڑے اپنی شادی کے اخراجات پورا کرنے کے لیے اجنبیوں کو شادی کے ٹکٹ فروخت کرتے ہیں۔

    کیٹیی لیکارسکی کے ذہن میں یہ خیال اس وقت آیا جب وہ جنوبی مشرقی فرانس میں اپنا گھر کچھ لوگوں کو کرائے پر دے رہی تھیں جو ایک شادی میں شرکت کے لیے آئے تھے۔

    کیٹی کی پانچ برس کی بیٹی نے اس وقت اپنی ماں سے سوال کیا کہ ہمیں شادیاں دیکھنے کیوں نہیں ملتی؟ اسی لمحے ان کے ذہن میں خیال آیا کہ بہت سے لوگ ایسے ہیں جنہیں شادیاں دیکھنے کا موقع نہیں ملتا، تو کیوں ناں اسے ایک سروس کے طور پر پیش کیا جائے، اس طرح وہ شادی شدہ جوڑوں کے اخراجات پورے کرنے میں مدد دے کر اپنے ذرائع آمدنی میں بھی اضافہ کر سکتی ہیں۔

    کیٹی نے پھر انویٹن نامی پلیٹ فارم بنایا جو کہ کافی مقبولیت حاصل کر رہا ہے، اس پلیٹ فارم کا استعمال کرتے ہوئے کئی جوڑے اپنی شادی میں شرکت کے لیے ٹکٹس فروخت کر رہیں ہیں جبکہ دوسری جانب بہت سے لوگ سینکڑوں یورو ادا کرنے پر آمادہ ہیں تاکہ وہ ان شادیوں میں شرکت کر سکیں۔

    شادی کا ٹکٹ لینے والی ایک صارف نے کہا کہ اجنبیوں کو شادی کے ٹکٹ بیچنا ایک دلچسپ خیال ہے۔ میری فیملی بڑی نہیں ہے، اس لیے مجھے زیادہ شادیاں دیکھنے کو نہیں ملتیں، اور یہ موقع ہے کہ میں مختلف رسم و رواج کو دیکھ سکوں، چاہے وہ اجنبیوں کی شادی ہی کیوں نہ ہو۔ میں سجاوٹ، موسیقی دیکھنے کی شوقین ہوں، اور ہم ڈانس فلور پر خوب انجوائے کریں گے۔

    اکثر جوڑے انویٹن ایپ پر اجنبیوں کی پروفائلز دیکھ کر فیصلہ کرتے ہیں کہ کس کی شادی کا ٹکٹ خریدنا ہے۔

  • ’’ریکھا‘‘ کے ہاں 17ویں بچے کی پیدائش!

    ’’ریکھا‘‘ کے ہاں 17ویں بچے کی پیدائش!

    بھارت (28 اگست 2025): ریکھا نے 17 ویں بچے کو جنم دیا ہے 11 بیٹوں اور 6 بیٹیوں میں سے پانچ بچے پیدائش کے فوری بعد انتقال کر گئے تھے۔

    بھارتی میڈیا کے مطابق راجھستان کے ضلع ادے پور میں ایک 55 سالہ خاتون ریکھا کلبیلیا نے 17 ویں بچے کو جنم دیا ہے۔ خاتون پہلے ہی نانی اور دادی کے درجے پر فائز ہو چکی ہے۔

    رپورٹ کے مطابق خاتون کے شوہر کا نام کوارا رام کلبیلیا ہے۔ دونوں کے ہاں 11 بیٹوں اور 6 بیٹوں نے جنم لیا، تاہم ان میں سے چار بیٹے اور ایک بیٹی پیدائش کے فوری بعد انتقال کر گئے تھے۔ اب ان کے 12 بچے حیات ہیں، جن میں سات بیٹے اور پانچ بیٹیاں شامل ہیں۔

    خاتون کے شوہر نے بتایا کہ ان کے دو بیٹے اور تین بیٹیاں شادی شدہ ہیں اور سب صاحب اولاد ہیں۔ یوں وہ 17 ویں بار ماں بننے سے قبل کئی بار نانی اور دادی بن چکی ہیں۔

    کاوارا رام کباڑ کا کام کرتا ہے اور ان کی مالی حالت انتہائی خراب ہے۔ مالی استطاعت نہ ہونے کی وجہ سے ان کے کسی بچے نے اسکول کی شکل تک نہیں دیکھی۔ بچوں کی شادیاں بھی سود پر قرض لے کر کیں۔

    ریکھا کے ہاں 17 ویں بچے کی پیدائش کا سن کر ان کے رشتہ اور گاؤں کے افراد سمیت ان کے اپنے نواسے، نواسیاں اور پوتے، پوتیاں انہیں مبارکباد دینے گھر آ رہے ہیں۔

    دوسری جانب ڈاکٹر روشن درنگی نے بتایا کہ جب ریکھا ڈیلیوری کے لیے آئی تو پہلے اس نے ظاہر کیا کہ یہ اس کی چوتھی ڈیلیوری ہے۔ بعد میں معلوم ہوا کہ وہ اس سے قبل 16 بچوں کو جنم دے چکی ہے۔