Category: حیرت انگیز

جنوبی کوریا نے اپنے ملک میں جرائم کی روک تھام کیلئے انوکھا قدم اٹھایا ہے اور ہولوگرافک پولیس افسر کو تعینات کرنے کا دلچسپ اقدام کیا ہے۔

غیر ملکی میڈیا کے مطابق ملک کی عوام میں تحفظ کا احساس بڑھانے اور جرائم کم کرنے کے لیے دارالحکومت سیؤل کی پولیس نے انسانی قد کے ہولوگرافک پولیس افسران کو تعینا کرنے کی آزمائش کی ہے، جس کا مقصد چوروں اور جرائم پیشہ عناصر کے دل میں ڈر پیدا کرنا ہے۔

سیؤل میں شام 7 سے رات 10 بجے کے درمیان 170 سینٹی میٹر قد کا حامل وردی میں ملبوس پولیس اہلکار جوڈونگ نمبر 3 پارک میں نمودار ہوتا ہے۔

پولیس افسر کی یہ ہولوگرافک شبیہ عوام کو یاد دلاتی ہے کہ ہنگامی صورتِ حال میں پولیس فوری طور پر جواب دے گی، پولیس افسر یہ بھی بتاتا ہے کہ ہر جگہ کیمرے لگے ہوئے ہیں جس سے لوگوں کی نگرانی کی جارہی ہے۔

View this post on Instagram

A post shared by Bananas Podcast (@thebananaspodcast)

ٹیکنالوجی کمپنی ہولوگرامیکا کا بنایا ہوا یہ غیرحقیقی ہولوگرافک پولیس افسر گزشتہ سال اکتوبر میں آزمائشی بنیادوں پر نصب کیا گیا تھا۔

حالیہ اعداد و شمار اس بات کو واضح طور پر ظاہر کرتے ہیں کہ اس پولیس افسر کی موجودگی نے جوڈونگ نمبر 3 پارک میں جرائم میں کمی پر نمایاں اثر ڈالا ہے، 3 ڈی ہولوگرام آفیسر نے شہریوں کو نفسیاتی استحکام فراہم کرنے اور بدنظمی کو روکنے کے لیے عمدہ کام کیا ہے۔

جنگبو پولیس اسٹیشن کے چیف آن ڈونگ ہیون نے بتایا کہ ہولوگرام سائن ایک اسمارٹ سیکیورٹی ڈیوائس کے طور پر ہے جو شہریوں کے تحفظ کے احساس کو بڑھاتا ہے۔

آن ڈونگ ہیون نے مزید کہا کہ ہم اے آئی ٹیکنالوجی کو شامل کرتے ہوئے جرائم کی روک تھام کو وسعت دیتے رہیں گے تاکہ ایک ایسا پارک کا ماحول بنایا جا سکے جہاں شہری خود کو محفوظ محسوس کر سکیں۔

قابل ذکر بات یہ ہے کہ ہولوگرافک پولیس افسر کی تعیناتی کے بعد جرائم میں تقریباً 22 فیصد کمی واقع ہوئی جسے اہم کامیابی سے تشبیح دی جارہی ہے۔

میٹروپولیٹن پولیس ایجنسی کے مطابق پولیس افسر کی تنصیب سے پہلے اور بعد کے اسی عرصے کا موازنہ کرنے سے پتہ چلا کہ پارک کے دائرے میں ہونے والے جرائم کی تعداد میں 22 فیصد کے قریب کمی واقع ہوئی ہے۔

پولیس کی جانب سے مثبت تاثرات کے باوجود اس ہولوگرام نے عام عوام پر کوئی خاص تاثر نہیں چھوڑا، آن لائن صارفین نے اس پر تنقید بھی کی ہے، ایک شخص نے لکھا کہ یہ لوگ کیا سوچتے ہیں؟ یہ بکواس ہے، یہاں ایک پولیس کا بھوت گشت کررہا ہے۔

(13 اگست 2025): بعض اوقات ناقابل یقین واقعات سامنے آتے ہیں جیسا کہ ایک شخص موبائل فون نگل گیا جو اس کے معدے میں جا پہنچا۔

موبائل فون آج انسانی زندگی کا لازمی جزو بن گیا ہے، لیکن مصر میں اس سے جڑا ایک انوکھا اور خطرناک واقعہ سامنے آیا جس میں ایک شخص کے معدے میں موبائل فون چلا گیا۔

مصری اخبار الیوم کے مطابق الغردقہ جنرل اسپتال میں ایک مریض تشویشناک حالت میں لایا گیا۔ اس کے پیٹ میں شدید درد ہو رہا تھا اور مسلسل الٹیوں کے باعث نقاہت طاری تھی۔

رپورٹ کے مطابق مریض کے ضروری ٹیسٹ اور سی ٹی سکین کیا گیا۔ جس سے پتہ چلا معدے کو کوئی چیز بلاک کر رہی ہے جو ایک کمپیکٹ موبائل فون نکلا جسے مریض نے غلطی سے نگل لیا تھا۔

صورتحال دیکھتے ہوئے ڈاکٹروں کی خصوصی ٹیم نے ہنگامی بنیادوں پر آپریشن کیا اور اس کے معدے سے ایک چھوٹا موبائل فون نکال لیا۔ اسپتال ذرائع کے مطابق مریض کی حالت اب بہتر ہے۔

واضح رہے کہ 2021 میں بھی مصر میں موبائل فون نگلنے کا ایک کیس سامنے آیا تھا جو مریض کی غذائی نالی میں پھنس گیا تھا۔

رواں برس ہی بھارت میں موبائل فون نگلنے کے دو واقعات سامنے آئے۔ ایک قیدی نے موبائل فون نگل لیا تھا جس کو سرجری کے بعد نکال لیا تھا۔ تاہم دوسرے واقعہ میں موبائل فون نگلنے والی خاتون اپنی جان سے ہاتھ دھو بیٹھی تھی۔

https://urdu.arynews.tv/woman-swallows-mobile-phone-andhra-pradesh/

(11 اگست 2025): آج کل ہر دوسرا شخص سوشل میڈیا پر مشہور ہونے کے لیے سیلفی کا شوقین ہے ایسے ہی ایک شخص پر ہاتھی نے حملہ کر دیا۔

بھارتی میڈیا کے مطابق یہ واقعہ کرناٹک کے بندی پور جنگلاتی علاقے میں اس وقت پیش آیا جب جنگل کے درمیان سے گزرنے والی نیشنل ہائی وے پر ایک شخص نے اپنی گاڑی سے اتر کر ہاتھی کے ہمراہ سیلفی لینے کی کوشش کی۔

سیلفی کا شوقین مذکورہ شخص جو کیرالہ کا رہائشی بتایا جاتا ہے۔ اس کی یہ حرکت شاید جنگلی ہاتھی کو پسند نہ آئی اور وہ مذکورہ شخص پر حملہ کرنے کے لیے چڑھ دوڑا۔

یہ ویڈیو جو سوشل میڈیا پر بھی تیزی سے وائرل ہورہی ہے۔ اس میں دیکھا جا سکتا ہے کہ آگے مذکورہ شخص ہاتھی کے حملے سے بچنے کے لیے دوڑ رہا ہے جب کہ ہاتھی اس کا پیچھا کر رہا ہے۔

ویڈیو میں دیکھا جا سکتا ہے کہ مذکورہ شخص پہلے سڑک کے کنارے گھاس والے میدان کی جانب بھاگا اور ہاتھی کو اپنے پیچھے آتا دیکھ کر گھبرا کر واپس سڑک کی طرف رخ موڑا لیکن اس کوشش میں وہ لڑکھڑا کر گر گیا۔

ہاتھی نے وہاں پہنچ کر مذکورہ شخص کو کچلنے کی کوشش کی۔ تاہم یہ اس شخص کی خوش قسمتی تھی کہ وہ اس کے پیروں کو روندتا ہوا آگے گزر گیا۔

مذکورہ شخص کی جان تو بچ گئی مگر وہ شدید زخمی ہوگیا جس کو مقامی افراد نے اسپتال منتقل کیا۔

واضح رہے کہ جس سڑک پر یہ واقعہ ہوا، وہاں گاڑیوں کا روکنا منع ہے۔ تاہم اس کے باوجود اس شخص نے خلاف ورزی کرتے ہوئے گاڑی روک کر اپنی جان خطرے میں ڈالی، جب کہ ہاتھی اور نوجوان کا تماشا دیکھنے کے لیے کئی گاڑیاں بھی وہاں رک گئیں۔