Category: اردو بلاگز

چند سال قبل آپریشنل ہونے والے اسفنکس ائیرپورٹ پر لینڈنگ ہوئی تو ویرانی دیکھ کر شدید حیرانی ہوئی۔ رات کے ڈیڑھ بجے لینڈ ہونے والی واحد فلائٹ، چار کاؤنٹرز اور چند افراد پر مشتمل عملہ ہی اس نئے ائیرپورٹ پر دکھائی دیا۔

امیگریشن کے بعد قاہرہ کا رخ کیا اور تقریبا چار بجے تک ہوٹل گرینڈ پیلس میں پڑاؤ ڈالا۔ وقت ضائع کئے بغیر فوری قاہرہ کی مشہور مسجد جامع الانور جو کہ مسجد حاکم کے نام سے معروف ہے وہاں پہنچے اور فجر کی نماز ادا کی۔ المعزیہ القاہرہ کو "سٹی آف تھاؤزنڈز مینرٹ” یعنی ہزاروں میناروں کا شہر کہا جاتا ہے۔ یہاں ایک زمانے میں اندازے کے مطابق چھتیس ہزار مساجد تھیں۔ اس وقت بھی قاہرہ میں مساجد کی تعداد ہزاروں میں ہی ہے ۔ اور ان میں سے بیشتر صدیوں قدیم ہیں ۔ سڑک ، محلے ، گلی میں ایک سے زائد مساجد سایہ کئے ہوئے ہے ۔ فاطمی سلطنت میں المعزیہ القاہرہ میں پانچ جامعہ تعمیر ہوئیں ، جبکہ دو جامعہ کو آباد کیا گیا ۔ ان پانچ مسجدوں میں الجامع الازہر، الجامع الانور ، الجامع لؤلؤہ، الجامع الجیوشی ، اور الجامع الاقمر شامل ہیں ، جبکہ الجامع العتیق اور الجامع احمد ابن طلون کو فاطمی دور کے دوران آباد کیا گیا ۔۔ دنیا کی قدیم آبادی کے ساتھ مساجد اس شہر کی پہچان ہے ۔ یہ تہذیب یافتہ معاشرے کی بھی عکاس ہے اور اس بات کی جانب اشارہ ہے کہ جہاں اتنی مساجد ہوں گی وہاں نمازی بھی ہوں گے ۔ ان مساجد نے مصر کی تاریخ بلخصوص قاہرہ کی تعمیر و ترقی میں ایک ثقافتی مرکز کا کردار ادا کیا ہے ۔۔

الجامع الازہر کا شمار آج بھی قدیم ترین درس گاہ میں ہوتا ہے ۔ جہاں حصول علم کے لئے دنیا بھر سے لوگ آتے تھے ۔ آج بھی اس مسجد کی رونق برقرار ہے ، طالبعلموں سے یہ مسجد آباد رہتی ہے۔

اوپن ائیر واکنگ میوزیم

قاہرہ میں دنیا کا سب سے بڑا اوپن ائیر واکنگ میوزیم بھی موجود ہے ۔ اس مقام کو یونیسکو نے ثقافتی ورثہ قرار دے رکھا ہے ۔ یہ تاریخی مقام بین الحرمین یعنی دو محلوں کے درمیان کا راستہ ہے ۔ جس کا آغاز جامع الانور کے داخلی دروازے باب الفتوح سے ہوتا ہے اور یہ شاہراہ باب الزویلہ تک جاتی ہے ۔۔ فاطمی دور سلطنت کےدو قصر اور کئی مساجد اس راستے کا حصہ ہیں ۔ فاطمی سلطنت کے بعد آنے والی ایوبی اور مملوک سلطنت نے ان بیش قیمتی آثار کو ملیا میٹ کردیا ۔ سلطنت عثمانیہ میں بین الحرمین میں مزید تبدیلیاں دیکھنے میں آئیں ۔ دور حاضر میں اس مقام پر بازار قائم ہے ۔ ایوبی ، مملوک اور سلطنت عثمانیہ کی مساجد بھی موجود ہیں ۔ جن کی شناخت انکے میناروں کی بناوٹ سے کی جاتی ہے۔

قاہرہ کی روشن راتیں

العمزالدین اسٹریٹ ثقافتی ورثہ اور اوپن ایئر میوزیم ہونے کے ساتھ ، قاہرہ کی رونقوں اور حسن کا منبع بھی ہے ۔ یہاں ہر رات میلہ لگتا ہے ۔ دکانوں سے سجی اس اسٹریٹ پر مصر کی سوغاتیں ہیں ۔۔ سیاح اس شاہراہ کا رخ کئے بغیر قاہرہ سے باہر نہیں جاسکتے ۔ کونے کونے پر یہاں ایک فیسٹیول سجا رہتا ہے ۔ کھانے پینے کے مشہور اسٹالز ہیں جہاں گھومنے پھرنے والوں کی بیٹھکیں لگی رہتی ہیں ۔ یہ قاہرہ کے اصل حسن و جمال کا ایک عکس ہے ۔ اس پرکشش اور دلفریب ماحول میں شاہراہ کی سیر کرتے ہوئے کئی بار بین الاحرمین کے قصر کی سیر کرنے کا گمان ہوا ۔ اور دل نے کئی بار اللہ کا شکر ادا کیا کہ یہ منظر محسوس کرنا نصیب ہوا ۔ بیشتر سیاحوں کے لئے یہ ایک تفریحی مقام ہے ، لیکن تاریخ سے واقفیت رکھنے والوں کو یہ شاہراہ شاہانہ ماضی کے دور میں لے جاتی ہے ۔ جس کے احساس کو لفظوں میں پرویا نہیں جاسکتا ۔

قاہرہ اور کراچی کی یاد

اولڈ سٹی کی عمارتیں دیکھ کر قاہرہ پر کراچی کا گمان ہوتا تھا ، لیکن پاکستانی سفیر نے ملاقات میں اس سوچ کو غلط ثابت کیا ۔ بتایا کہ ظاہری طور پر خستہ اور بوسیدہ لگنے والی عمارتیں اندر سے بے حد شاندار ہیں ، لوگوں کے گھر کشادہ اور عالی شان ہیں ۔ عمارتوں اور گھروں کی چھتوں پر لگے ہوئے ڈش انٹینا بہت نمایاں ہیں ۔ دن کی روشنی میں اینٹوں کی بوجھل اور افسردہ عمارتیں رات میں سنہری قمقموں سے روشن ہوتی تھیں ۔۔ ان عمارتوں ، مساجدوں کی تزئین کے لئے پیلی روشنی کے بلب کچھ اس انداز میں استعمال کئے گئے ہیں کہ دیکھنے والوں کو لائٹ شو لگتا ہے ۔ کراچی کی طرح قاہرہ میں بے ہنگم ٹریفک اور پارکنگ ایک بڑا مسئلہ ہے ، جگہ جگہ پل تعمیر کئے گئے ہیں ، لیکن پیدل چلنے والوں کے لئے اوور ہیڈ برج کا انتظام نہ ہونے کے برابر ہے ۔ یہاں موٹر سائیکلوں کا راج ہے اور رکشہ بھی چلتے دکھائی دیتے ہیں ۔ ان ملتی جلتی خصوصیات کے باوجود قاہرہ کراچی کو کچرے کے معاملے میں پیچھے چھوڑنے میں ناکام ہے ۔۔ اولڈ سٹی ہو یا نیو ، قاہرہ صاف ستھرا شہر ہے ۔ یہاں گندگی کے ڈھیر نہیں لگے، صفائی کا انتظام رہتا ہے ۔

قاہرہ کی اہمیت اور سنہری تاریخ کے باعث یہاں قدم قدم پر گوہرنایاب ملتا ہے ، لیکن چار روز کے قلیل عرصے میں ان جواہرات کو جمع کرنا ممکن نہ تھا۔ دریائے نیل ، میوزیم ، اور اہرام مصر کے دیدار کئے بغیر قاہرہ سے واپسی ممکن نہیں لہذا یہ بھی کام انجام دیا گیا ۔ شاپنگ کا فریضہ بھی ادا کیا ۔ یہاں کا پیپر جسے پیپرس کہتے ہیں اور کاٹن مشہور ہیں ۔ مٹھائی اور چاکلیٹ کی مٹھاس کا دنیا میں مقابلہ نہیں ۔ قاہرہ میں کئی مالز اور شاپنگ سینٹر قائم ہیں، ان میں زیادہ مشہور سٹی اسٹارز ہے، جو دنیا کا دوسرا سب سے بڑا مال سمجھا جاتا ہے ۔۔ قاہرہ مصر کا دارالحکومت ہی نہیں بلکہ اس کا اہم ثقافتی مرکز ہے ۔۔ اور مصر کی کل آبادی کا پچیس فی صد اس شہر میں آباد ہے ۔۔

طلعت حسین پاکستان کے ان فن کاروں میں سے ایک ہیں جو ریڈیو، ٹیلی ویژن اور پاکستانی فلم انڈسٹری پر اپنی گہری چھاپ چھوڑ گئے۔

طلعت صاحب کی پہچان ان کی آواز اور وہ انداز تھا جس نے سبھی کو اپنا اسیر کر لیا۔ ایسا نہیں ہے کہ ان کی ادکاری کم درجے کی تھی۔ وہ اداکاری میں بھی کمال مہارت رکھتے تھے مگر قدرت کی ودیعت کردہ آواز نے انھیں کمال درجے کا آرٹسٹ بنا دیا جب کہ ان کے دور عروج میں پی ٹی وی ریڈیو پاکستان یا اسٹیج پر ان کی طرح صدا کاری کے فن میں یکتا آرٹسٹ ڈھونڈنے سے نہیں ملتا تھا۔

اکثر اشتہارات میں پس پردہ ان کی آواز گونجتی تھی تو نہ چاہتے ہوئے بھی لوگوں اس اشتہار کی طرف متوجہ ہو جاتے تھے۔ ہمیں بچپن کے ادوار میں تو پتا ہی نہ چلا کہ یہ اس شخص کی آواز ہے جسے ہم اکثر اسکرین پر دیکھتے آئے ہیں بعد میں جب آرٹس کونسل کے چکر لگائے اور وہاں کچھ کورسز کیے تو ہم پر عقدہ کھلا کہ آواز کے یہ جادوگر تو مشہور اداکار طلعت حسین ہیں۔

آج بھی یاد ہے ریڈیو آر جے بننے کے لیے ہم نے آرٹس کونسل میں ایک کورس جوائن کیا تو ہمارے ٹرینر ہمیں طلعت حسین کی آواز سنایا کرتے تھے کہ یہ شخص جس طرح الفاظ کو پیراہن عطا کرتا ہے، وہ کمال ہے۔

ایک وقت تھا کہ طلعت حسین پس پردہ آواز کے لیے سب سے زیادہ معاوضہ لینے والے آرٹسٹ شمار ہوتے تھے، اشتہار ساز ادارے انھیں منہ مانگے معاوضے پر سائن کرتے اور ایسا کیوں نہ ہوتا کہ نہ صرف طلعت صاحب کی اداکاری کمال تھی بلکہ جب وہ اپنی آواز کی گمبھیرتا اور طلسماتی اثر کے ساتھ مکالمے ادا کرتے تو سننے والے ورطۂ حیرت میں پڑ جاتے تھے۔

اگر اداکاری کی بات کی جائے تو طلعت حسین کا الفاظ کی ادائیگی کا سلیقہ، قرینہ اور برجستہ ڈائیلاگ ڈلیوری کے سبب انھیں پی ٹی وی کا دلیپ کمارکہا جاتا تھا، ’ڈھونڈو گے اگر ملکوں ملکوں ملنے کے نہیں نایاب ہیں ہم!‘ اس مصرعے کی جیتی جاگتی تصویر تھے طلعت حسین! کیوں کہ اب ان کے پائے کا کوئی اداکار انڈسٹری میں نظر نہیں آتا۔

لیجنڈ اداکار کی ڈائیلاگ ڈیلوری کمال تھی، کہاں لفظ پر زور دینا ہے کہاں آہستگی سے بات کرنا ہے اور فن کارانہ بدن بولی انھیں وہ معنویت عطا کرتی تھی جس نے ناظرین کے دلوں کو چھو لیا۔ اسی بنا پر انھیں پاکستان ٹیلی ویژن کا ’دلیپ کمار‘ کہا گیا۔

دلیپ کمار نے اداکاری میں جسمانی حرکات اور بدن بولی کو جس نہایت اچھوتے اور منفرد انداز میں کیمرے کے سامنے پیش کیا، وہ اپنی مثال آپ تھا۔ وہ سین کے دوران چلتے ہوئے، رک کر اور خاص انداز سے ڈائیلاگ بولتے تھے اور دیکھنے والے دیوانے ہوجاتے تھے، یہی ادا طلعت نے بھی اپنائی اور پاکستان میں بالخصوص ٹی وی انڈسٹری پر چھا گئے۔

یہ بات بھی قابل ذکر ہے کہ طلعت حسین اچھی طرح سمجھتے تھے کہ ٹی وی، فلم اور ریڈیو کے میڈیم میں اداکاری کی مختلف ڈیمانڈز ہوتی ہیں۔ طلعت حسین کے مطابق ریڈیو میں صرف ڈائیلاگ سے کام چل جائے گا لیکن ٹی وی یا فلم میں جذبات کے اظہار کے لیے باڈی لینگویج یا بدن بولی کافی اہمیت کی حامل ہے۔

طلعت حسین اداکاری اور تھیٹر کی تعلیم حاصل کرنے انگلینڈ بھی گئے۔ انھوں نے لالی ووڈ اور بالی ووڈ سمیت برطانوی ٹی وی کیلئے بھی کام کیا، لیجنڈ اداکار کو ستارہ امتیاز، پرائیڈ آف پرفارمنس سمیت متعدد ایوارڈز سے نوازاگیا، پرچھائیاں، بندش، طارق بن زیاد، دیس پردیس، مہرالنسا، ہوائیں، دی کاسل، ایک امید، ٹائپسٹ، انسان اورآدمی اور کشکول ان کے مشہور ڈرامے تھے۔

لیجنڈ اداکار کی مشہور فلموں میں گمنام، ایک سے بڑھ کر ایک، اشارہ، چراغ جلتا رہا، محبت مر نہیں سکتی، لاج، قربانی، کامیابی، بندش، پروجیکٹ غازی، بانی پاکستان کی زندگی پر بنائی گئی فلم جناح شامل ہیں۔

اداکار طلعت حسین کے پاس کتابوں کا خزانہ تھا وہ کتابیں پڑھنے کے کافی شوقین تھے۔ انگریزی ادب اور اردو ادب سے خاص لگاؤ تھا، انھیں ایسے افراد میں شمار کیا جاسکتا تھا جن کے ہاتھ میں ہمیشہ کتاب رہتی تھی۔

لیجنڈ اداکار کے انتقال پر اداکارہ بشریٰ انصاری کا کہنا تھا کہ طلعت حسین باکمال اداکار اور بڑی شخصیت تھے۔ میرے لکھے ڈرامے انھوں نے پڑھے جس پر مجھے فخر ہے۔ وہ انتہائی مہذب شخصیت تھے جنھوں نے کبھی اپنے منہ سے کوئی بے جا لفظ نہیں نکالا۔

فلم اور ٹی وی کے معروف اداکار جاوید شیخ نے طلعت حسین کے انتقال کو شوبز انڈسٹری کا بڑا نقصان قرار دیتے ہوئے کہا کہ وہ بہت نفیس آدمی تھے، جن سے بہت کچھ سیکھا۔ ان کی بیماری کے دوران ان سے ملنے کے لیے جانے کا ارادہ تھا لیکن افسوسناک اب یہ حسرت ہی رہے گی۔

عثمان پیرزادہ کا کہنا تھا کہ طلعت حسین میرے خاندان کا حصہ تھے جن کے انتقال پر بہت افسوس ہے لیکن وہ ہمیشہ ہمارے ساتھ رہیں گے۔ بہروز سبزواری نے کہا کہ طلعت حسین کی پہچان ان کی آواز تھی۔ طلعت حسین اس پائے کے فنکار تھے کہ اب ان کی جگہ کوئی اور نہیں لے سکتا۔

اداکار سہیل احمد نے کہا کہ طلعت حسین کی وفات سے ہونے والا نقصان کبھی پورا نہیں ہوگا۔ انھوں نے اپنی پوری زندگی کبھی اپنے اصولوں پر سمجھوتہ نہیں کیا۔ ان جیسا فنکار آئندہ کبھی ملتا نظر نہیں آ رہا۔

پی ٹی وی کے جنرل منیجر امجد حسین شاہ کا کہنا تھا کہ طلعت حسین نے ٹی وی، ریڈیو اور تھیٹر پر بہت کام کیا۔ میں خوش قسمت ہوں کہ ان کے ساتھ کام کا موقع ملا۔ وہ اس مزاج کے تھے کہ چاہے جتنی طبیعت خراب ہو، کام سے منع نہیں کرتے تھے۔

تقسیم ہند سے قبل 1940 میں بھارت میں پیدا ہونے والے طلعت حسین کی عمر 80 سال سے زائد تھی، وہ کافی عرصے سے علیل تھے انھیں ڈیمنشیا کا مرض لاحق تھا۔ وہ طویل عرصہ علالت کے بعد 26 مئی کو کراچی میں انتقال کرگئے۔ انھیں ڈی ایچ اے فیز 8 کے قبرستان سپرد خاک کیا گیا۔

دنیا کا کوئی بھی شخص یہ دعویٰ نہیں کرسکتا کہ وہ خوش گوار اور پُرسکون زندگی گزار رہا ہے یا اسے کسی سے کوئی شکایت نہیں ہے۔ امیر ہو یا غریب سب زندگی کے چیلنجوں کا سامنا کرتے ہیں اور انھیں مختلف قسم کی مشکلات اور پریشانیاں لاحق ہوتی ہیں۔ جب ہم اپنے آپ سے ہی بیزار اور شکوہ کناں رہتے ہوں تو یہ کیسے ممکن ہے کہ دوسروں کی کچھ عادات اور بعض رویوں سے ہمیں کوئی شکایت نہ ہو۔

حقیقت یہ ہے کہ زندگی کو راحت افزا اور پُرسکون بنانے کے لیے ہمیں جتن کرنا پڑتے ہیں اور ہماری کئی مشکلات اور پریشانیاں ایسی ہوتی ہیں جو وقت گزرنے کے ساتھ ساتھ بھی کم نہیں ہوتیں بلکہ ہم ان سے نمٹنے کا طریقہ سیکھ لیتے ہیں اور اپنے آپ کو یہ سب برداشت کرنے کے قابل بنا لیتے ہیں۔ ہماری تکالیف، مصائب اور دوسروں سے شکایات مختلف نوعیت کی ہوسکتی ہیں، اور بعض صورتوں میں یہ ہمیں مسلسل اضطراب اور بے چینی کیفیت میں مبتلا کرسکتی ہیں۔ اس حوالے سے چند تدابیر اختیار کر کے ہم اپنی زندگی کو قدرے پُرسکون اور خوش گوار بنا سکتے ہیں۔

رویوں میں لچک

جیسے جیسے ہماری عمر بڑھتی ہے ہمارے خیالات اور نظریات پختہ ہونے لگتے ہیں۔ ہم اپنی باتوں پر ڈٹ جاتے ہیں اور بہت کم کسی دوسرے کی سنتے ہیں۔ اکثر یہ ہوتا ہے کہ ہم دوسروں کو تو تبدیل ہوتا دیکھنا چاہتے ہیں، لیکن خود اپنی سوچ اور رائے بدلنے پر آمادہ نہیں ہوتے۔ ہم دوسروں‌ کو اپنے خیالات کے زیرِ‌ اثر اور اپنی مرضی کا تابع دیکھنا چاہتے ہیں۔ اس رویے سے ہمارے وقار میں کمی آتی ہے۔ زندگی بدلتی رہتی ہے، حالات کبھی ایک جیسے نہیں رہتے۔ اس لیے ضروری ہے کہ ہم وقت کے ساتھ ساتھ نئی چیزیں اور نئی مہارتیں سیکھیں اور ساتھ ہی اپنے رویوں میں لچک پیدا کریں۔

اچھا سامع ہونا

ہم ہمیشہ یہ سمجھتے ہیں کہ ہمیں سب کچھ معلوم ہے اور لوگوں کو ہماری قابلیت کا لازمی علم ہونا چاہیے جب کہ ایسا نہیں ہوتا۔ کیونکہ علم اور مہارت مختلف نوعیت کی ہوتی ہے اور ہمیں اس حقیققت کو قبول کرنا چاہیے۔ ہمیں دوسروں کے علم، ان کے تجربات سے بھی فائدہ اٹھانا چاہیے، ایسا صرف اسی صورت میں ہوسکتا ہے جب ہم اچھے سامع ہوں، لوگوں کی باتوں کو توجہ سے سنیں۔ ہم بہت سی باتیں محض جواب دینے کے لیے سنتے ہیں، ان کو سمجھنے کے لیے نہیں سنتے۔ ہم اکثر دوسروں کی بات کا فوری جواب دینے کی کوشش کرتے ہیں یا اس پر اپنا ردعمل ظاہر کرنے میں عجلت سے کام لیتے ہیں جس سے دوسروں پر ہمارا کوئی اچھا اثر نہیں پڑتا۔

دوسروں کو جانچنے سے گریز

یہ ایک بہت بڑی خوبی ہے۔ ہم دنیا میں طرح طرح کے لوگوں سے ملتے ہیں جن کی عادات مختلف ہوتی ہیں اور وہ الگ ماحول کے پروردہ ہوتے ہیں، تعلیم و تربیت کا فرق بھی دیکھنے کو ملتا ہے۔ کسی کی اچھی بات سے متاثر ہو کر اس پر رشک کرنا یا کسی کی صرف ایک غلطی پر اسے ہمیشہ نالائق یا غلط سمجھتے رہنا دانش مندی نہیں۔ جو لوگ دوسروں کو ان کی کچھ باتوں اور فیصلوں کی وجہ سے پرکھنے کے بعد ان سے تعلق استوار کرتے ہیں، کوئی بھی ان کا قدر دان نہیں ہوتا۔ لوگوں کا اعتماد جیتنے کے لیے ضروری ہے کہ آپ انھیں عزت دیں، زندگی میں سمجھوتے کریں۔ کسی فرد کی کسی معاملے میں اچھی رائے، یا ایک اچھے فیصلے کی وجہ سے عقل کُل نہ مان لیں۔ اسی طرح دوسرے کو اس کی کسی ایک غلطی کی وجہ سے یکسر غلط اور احمق تصور کرلینا بھی درست نہیں‌ ہے۔ اچھی طرح سوچ سمجھ کر اپنے تجربات اور مشاہدات کی بنا پر لوگوں سے ان کی فطرت اور عادت کے مطابق تعلقات قائم کریں۔

دل میں میل نہ رکھنا

ہمیں اپنے ملنے جلنے والوں کے بعض رویے تکلیف پہنچا سکتے ہیں۔ جانے انجانے میں ہم سے برا سلوک، یا ہمارے لیے کی گئی کوئی غلط بات جذبات کو مجروح کر سکتی ہے، لیکن ایسی صورت میں بہت زیادہ حساسیت کا مظاہرہ کرنا اور اسے اپنے لیے روگ بنا لینا ہم پر منفی اثرات مرتب کرسکتا ہے۔ زندگی گزارنے کے لیے بہت سی تکلیف دہ باتوں کو نظر انداز کرنا اور تلخ یادوں کو فراموش کرنا پڑتا ہے تاکہ لوگوں سے میل جول برقرار رہیں اور تعلقات آگے بڑھائے جا سکیں۔دوسروں کو معاف کرنا زندگی کو پُرسکون بنانے کے لیے بہت ضروری ہے۔

دوسروں پر بے جا تنقید

یہ ایک ایسی خوبی ہے جو آپ کو دوسروں کے درمیان بہت جلد نمایاں کردیتی ہے۔ دنیا کا ہر فرد اپنی یا اپنے کسی کام کی تعریف اور ستائش سننا چاہتا ہے اور تنقید سے ہر کوئی گھبراتا ہے۔ خاص طور پر بے جا تنقید کرنے والے کو کوئی پسند نہیں کرتا لیکن اچھے انداز سے اور دوسرے کی عزّت اور مرتبے کا خیال رکھتے ہوئے تعمیری تنقید ہمیشہ بہت کام آتی ہے اور لوگ اس کا خیر مقدم بھی کرتے ہیں۔

اپنی غلطی تسلیم کرنا

دوسروں کو معاف کرنا تو اہم ہے ہی، اس کے ساتھ ساتھ اپنی کسی غلطی پر دوسرے سے معذرت کرنا ثابت کرتا ہے کہ آپ ایک اچھے انسان ہیں۔ تاہم یہ خیال رہے کہ آپ ہر موقع پر دوسروں کے سامنے معذرت خواہانہ انداز نہ اپنائیں اور معافی صرف اپنی غلطی پر ہی مانگیں۔

دوسروں پر توجہ دینا

انسان کا ہر رشتہ توجہ اور وقت مانگتا ہے۔ اگر رشتوں کو وقت نہ دیا جائے اور اہمیت کا احساس نہ دلایا جائے تو اچھے تعلقات کبھی قائم نہیں رہ سکتے۔ جو لوگ خود سے وابستہ رشتوں کی قدر کرتے انھیں اہمیت دیتے اور ان کا خیال کرتے ہیں وہ پرسکون زندگی گزارتے ہیں۔

اپنی صحت کا خیال رکھنا

آخر میں سب سے اہم بات یہ ہے کہ پرسکون زندگی اور صحت مند جسم کا گہرا تعلق ہے جو شخص اپنی صحت کا خیال نہیں رکھ سکتا وہ کسی دوسرے شخص کا خیال بھی نہیں رکھ سکتا۔ تندرستی ہزار نعمت ہے لہٰذا اپنی صحت کا ہر ممکن خیال رکھیں۔

راحت افزا اور پُرسکون زندگی کا تصور ہر کسی کے لیے مختلف ہو سکتا ہے لیکن یہ وہ بنیادی باتیں ہیں جو ایک نسبتاً مطمئن اور خوش گوار زندگی گزارنے کے لیے بہت ضروری ہیں۔

‘‘جسٹ فارملیٹی ۔۔ کچھ نہیں ہوگا’’

تین بار موت کی سزا پانے والے مجرم کے منہ سے نکلے ان الفاظ نے کمرۂ عدالت میں موجود تمام افراد کو ششدر کردیا تھا، قریب کھڑے پولیس اہلکار نے توخوف کی ایک لہر اپنی ہڈیوں میں محسوس بھی کرلی۔

قلم ٹوٹ چکا تھا صولت مرزا نہیں ٹوٹا تھا، سر جھکائے گہری سوچ میں ڈوبا، صولت علی خان جیل کی گاڑی میں بیٹھا اور جیل روانہ ہو گیا، کرم فرمائوں کی طاقت سے مطمئن صولت شاید یہ بھول گیا تھا کہ ہرعروج کا زوال ہے۔

یہ کراچی کی سیاست کے بدلتے دن تھے جب80 کی دہائی میں ملک بھرکی طرح کراچی میں بھی مذہبی اور نظریاتی ووٹ بینک ختم ہوکرقوم پرستی کی جانب مبذول ہورہا تھا اوراس کی کوکھ سے فاروق دادا، ریحان کانا، ذکی اللہ اورصولت مرزا جیسے باغی نوجوانوں نے بھی جنم لیا جو حقوق لڑ کر لینے اوراپنی شناخت کے لئے کسی حد تک بھی جانے کے لئے تیار تھے۔ وقت گزرتا گیا لیکن کراچی کی سیاسی تاریخ میں جوتشدد داخل ہوا تو اسے واپسی کا دروازہ نہیں ملا۔ اداروں نے گولیوں اورطاقت کے ذریعے اپنی رٹ کا مظاہرہ کرنے کی کوشش کی جس کے نتیجے میں نجانے کتنے ہی صولت جعلی یا حقیقی پولیس مقابلوں میں مارے گئے اورکتنے ہی صولت پابندِ سلال ہوئے کچھ تو ایسے ہیں جن کا کسی کومعلوم ہی نہیں کہ کہاں ہیں؟۔

اوراسی دوران صولت علی خان المعروف صولت مرزا جو کہ جیل میں اپنی اپیلوں کے سبب تختہ دارکی رسی کواپنی گردن سے اتارنے کے لئے بھر پور کوشش کر رہاتھا، کراچی کی سیاست میں موضوعِ بحث بن گیا ہرکوئی اس کی طاقت کے گُن گانے لگا۔ واقفانِ حال تو یہ بھی جانتے ہیں کہ کئی مسائل کے فوری حل کے لئے لوگ اس سے رجوع بھی کرنے لگے تھے۔

اس قدرطاقتورکہ جب سانحہ آرمی پبلک اسکول کے بعد پھانسیاں لگنا شروع ہوئیں توکراچی کے شہری یہ سو چتے تھے کہ اگرصولت مرزا کوپھانسی ہوگئی تو کیا ہوگا لیکن ان تمام خدشات کا خاتمہ اس وقت ہوا جب 11 مارچ کی صبح ایم کیوایم کے مرکزنائن زیرو پرچھاپہ پڑا اوراسی دن جب وقاص شاہ کے پراسرارقتل کی باز گشت فضا میں بلند ہورہی تھی تو ٹی وی چینلزصولت مرزا کے بلیک وارنٹ جاری ہونے کی بریکنگ چلا رہے تھے۔

19مارچ کا بلیک وارنٹ جاری تو ہوا لیکن کچھ نامعلوم افراد کےذریعےصولت کی ایک تہلکہ خیز ویڈیو سامنے آگئی اورپاؤں تلے زمین کھینچے جانے کی مہلت میں اضافہ ہوگیا۔ ویڈٰیو کیا تھی ایک پنڈورا باکس تھا جس میں ناصرف اس نے اپنے گناہوں کا اعتراف کیا بلکہ بہت سےاہم سیاسی شخصیات اورایم کیوایم کوبھی نشانہ بنایا گیا نتیجتاً پھانسی ایک دفعہ نہیں دوددفعہ مؤخرہوئی اس دوران ملزم کی جے آئی ٹی بھی بنی اس کی سفارشات بھی سامنے آئیں اوراس نے کچھ ایسے سوال جنم لئے جن کا جواب ملنا چاہئیے۔

صولت مرزا نے بغیرکسی ذاتی دشمنی کے قتل کیوں کیےاورکیا ان تمام قتل کا ذمہ داروہ تنہا تھا؟

وہ کون لوگ تھے جن کی مدد سے صولت کو جیل میں فون سمیت دیگر آسائش حاصل تھیں اورکیا ان کے خلاف کوئی کارروائی ہوئی؟

صرف صولت کوپھانسی دینامقصود تھی اوردیگرملزمان نہیں پکڑنا تھا توکیا ویڈیوبیان اورجے آئی ٹی کا مقصد صرف کسی کی سیاسی تذلیل تھا؟۔

یہ یقینا ایک تلخ حقیقت ہوگی کہ آج کے بعد کوئی دہشت گرد اورسیا سی کارکن مرتا مرجائے گا لیکن اسٹیبلشمنٹ اورریاست پراعتبارنہیں کرے گا کیوں کے آگے کھائی پیچھے کنواں۔ صولت ایک ٹیسٹ کیس تھا اوراس مقدمے نے ثابت کردیا کہ مرجاؤ لیکن کبھی اعتبارنہ کرنا۔

کال کوٹھری میں قید صولت یقینا یہ سوچ رہا ہوگا کہ اس کوبڑا دھوکہ کس نے دیا 17 سال قدم بقدم ساتھ چل کہ چھوڑنے والوں نے یا انھوں نے جو اسے آسرا دے کراس کواوراس کے خاندان کواپنوں اوران افراد سے جو اس سے ہمدردی رکھتے تھے ان میں اجنبی کرگئے؟، اورکیا ریاست اس کے خاندان کو اس غصے سے بچا پائے گی جوا س کے ویڈیو بیان کے بعد جنم لے رہا ہے؟۔

اب جبکہ صولت ریاست کی طے کردہ سزا سود سمیت بھگت چکا ہے تو مقتولین کے بین اور زخموں کو محسوس کرتے ہوئے بھی یہ سوچنے پرمجبور ہوں کہ ریاست کی وہ کون سی غلطیاں ہیں کہ صولت کومجرم جاننے کے باوجود بھی ایک بڑا طبقہ اس کا گرویدہ تھا، وہ ان کا ہیروتھا۔ دوران طالبِ علمی میں بھی میں ایسے کئی نوجوانوں کوجانتا تھا جواسے چی گواویرا سے کم اہمیت نہیں دیتے تھے۔

سیاسی، سماجی اورنفسیات کے علوم پرعبوررکھنے والوں کا کہنا ہے کہ صولت ریاست پاکستان کا نہ پہلا نوجوان تھا اورنہ آخری ہوگا کیوں کہ ہم سوگ منانے والی قوم بن گئے ہیں روگ کا خاتمہ کرنے کی ہم کوشش ہی نہیں کرتے اوروہ جنہیں محبت کے زریعے سدھارا جا سکتا ہے ہم انھیں نفرت سے سدھارنا چاہتے ہیں، اوررکھئیے نفرت مزید نفرت کوجنم دیتی ہے۔

اے آروائی نیوز کی انتظامیہ اور ادارتی پالیسی کا اس بلاگر کے خیالات سے متفق ہونا ضروری نہیں ہے

دنیا بھر میں آن لائن تفریحی شوز دیکھنے اور فلم بینی کے شوقین اُن مختلف اسٹریمنگ پورٹلز پر نظر آرہے ہیں، جن کی معیاری پروڈکشن نے ان کو اپنی طرف متوجہ کیا ہے۔ "زی فائیو” کا معاملہ بھی کچھ ایسا ہی ہے۔

ہندوستان میں یہ اسٹریمنگ پورٹل بہت مقبول ہے۔ حال ہی میں اس پر مغل دور بالخصوص اکبر بادشاہ کی ذاتی زندگی اور شاہی خاندان کے تناظر میں ویب سیریز "تاج” کے نام سے پیش کی گئی ہے جسے بھارت اور پاکستان سمیت دنیا بھر میں موجود اس خطّے سے تعلق رکھنے والے لوگ بہت شوق سے دیکھ رہے ہیں۔

اس ویب سیریز میں برصغیر میں مغلیہ دور کی تاریخ کو خاصی حد تک متوازن اور غیر جانب دار رہ کر دکھایا گیا ہے۔ پروڈکشن ڈیزائن بہت عمدہ ہے، اور دو سیزن پر مشتمل یہ ویب سیریز کچھ کمزوریوں کے باوجود دیکھنے سے تعلق رکھتی ہے۔

کہانی/ پلاٹ

دو حصوں میں‌ پیش کی گئی اس ویب سیریز کی کہانی کے پہلے حصّے کا نام "خون کے ذریعے تقسیم” ہے، جب کہ دوسرے کا عنوان "انتقام کا دور” رکھا گیا ہے۔ اس میں سولہویں صدی کا زمانہ دکھایا گیا ہے، جب اکبرِ اعظم پورے ہندوستان کا بادشاہ تھا۔ کہانی کا مرکزی خیال باپ بیٹوں کے مابین تاج و تخت کی کشمکش ہے۔

اکبر بحیثیت باپ اپنے تینوں بیٹوں میں سے کسی ایک کو بادشاہت سونپنا چاہتا ہے۔ اس کی چار بیویاں، اپنی اپنی اولاد کو مغل سلطنت کا بادشاہ دیکھنا چاہتی ہیں اور ان کی تاج پوشی کی آرزو دل میں دبائے بیٹھی ہیں۔ بادشاہ کے وزرا اور خاص درباری اپنے مفاد میں اور اپنی خواہش کے مطابق ان میں سے کسی ایک شہزادے کو شہنشاہِ ہند دیکھنا چاہتے ہیں۔

اکبر بادشاہ کے ان تینوں بیٹوں کے نام سلیم، مراد اور دانیال ہیں، جن میں سے کوئی ایک اپنے باپ کا جانشین ہو گا۔ یہ کہانی اقتدار کے حصول کے لیے کوشاں شہزادوں کی زندگی کے گرد گھومتی ہے، جن کے جذبات مد و جزر کا شکار ہیں اور جہاں کہانی میں جمالیات، سیاست، رومان، غداری اور خوں ریزی موجود ہے، وہیں مدھم اور سلگتی ہوئی محبتّوں کو بھی پیش کیا گیا ہے۔ رشتوں میں‌ دراڑ، ٹوٹ پھوٹ، معاشرتی مسائل، سماجی مصائب اور بے بسی کی مختلف کیفیات کے ساتھ ساتھ اس کہانی میں‌ انتقامی رنگ بھی شامل ہے۔ یہ ایک طرف تو طاقت ور بادشاہ اور اس کے تین بیٹوں کی کہانی ہے، اور دوسری طرف یہ ایک لاچار باپ اور اس کے تین فسادی اور نافرمان بیٹوں کو بھی ہمارے سامنے لاتی ہے۔ یہ مغلیہ سلطنت کے زوال کا وہ پہلو ہے، جسے بلاشبہ اس کہانی میں عمدگی سے برتا گیا ہے۔ فلم کی ضرورت اور کہانی کو نبھانے کے لیے اس میں‌ تاریخی اور حقیقی واقعات کے ساتھ کئی قصّے اور فرضی کردار بھی شامل کیے گئے ہیں۔

پروڈکشن/ ہدایت کاری

اس ویب سیریز کے لیے کہانی "کرسٹوفر بوٹیرا” نے لکھی ہے، جب کہ معاون "ولیم بورتھیک” اور "سائمن فانٹاوز” ہیں۔ اس کے مکالمے "اجے سنگھ” نے لکھے ہیں، جو فلم کے ہدایت کاروں میں بھی شامل ہیں، ان کے علاوہ اس ویب سیریز کے تین مزید ہدایت کار ہیں، جن میں مرکزی ہدایت کار کا نام "رون اسکال پیلو” ہے اور دیگر دو ہدایت کاروں‌ کے نام "وبو پوری” اور”پرشانت سنگھ” ہیں۔ دو سیزن کے تحت یہ ویب سیریز کُل 14 اقساط پر مشتمل ہے۔

پروڈکشن کا معیار بہت اعلیٰ ہے۔ اسے انڈیا کی معروف پروڈکشن کمپنی "کونٹیلو پکچرز” نے تخلیق کیا ہے۔ دو پروڈیوسرز، دوسینماٹوگرافرز اور تین ایڈیٹروں کے علاوہ کئی تکنیکی مہارت رکھنے والوں اور تخلیقی ذہن کے حامل آرٹسٹوں نے اس شان دار ویب سیریز میں اپنے اپنے حصّے کا کام بخوبی انجام دیا ہے۔

ملبوسات، تدوین، روشنی، برقی تأثرات سمیت وہ مقامات جہاں اس ویب سیریز کو عکس بند کیا گیا، ان سب کا انتخاب بھی دیگر لوازمات کی طرح بہترین ہے۔ ہاں، موسیقی کی کمی اس میں محسوس ہوئی ہے، سنجے لیلا بھنسالی سے مشاورت کر لیتے اور اسماعیل دربار سے بھی تجاویز لے لی جاتیں تو یہ ویب سیریز اپنی منفرد کہانی کی بدولت مزید قیامت ڈھاتی۔ پروڈکشن ڈیزائن کے شاہانہ انداز سے پتہ چلتا ہے کہ واقعی مغلیہ خاندان کی شاہانہ کہانی بیان کی جارہی ہے۔ مارچ میں اس کا پہلا سیزن پیش کیا گیا تھا اور مئی میں دوسرے سیزن کو ہر گزرتے دن کے ساتھ مقبولیت مل رہی ہے۔

اداکاری

بہت حیرت کی بات ہے، لیکن کہنا پڑے گا کہ اس ویب سیریز میں اکبر بادشاہ کے روپ میں‌ ہندوستانی فلم انڈسٹری کے شان دار اداکار نصیرالدّین شاہ کی اداکاری بہت کمزور اور بے کیف محسوس ہوئی، اور جس قدر یہ کردار بڑا تھا، وہ اسے سنبھال نہیں پائے۔

اس وجہ سے کئی جگہ ویب سیریز کے ناظرین کو ان کے کردار سے اکتاہٹ محسوس ہوسکتی ہے۔ نصیر الدّین شاہ نے اپنا کردار بہت بوجھل اور تھکے تھکے انداز میں نبھایا ہے، جس کی ان سے توقع نہ تھی۔ بہرحال دیگر فن کاروں کی عمدہ اداکاری سے ویب سیریز مجموعی طور پر اپنا رنگ جما گئی۔

اکبر کے تین بیٹوں میں سے سلیم کا کردار اداکار "آشم گولاٹی” نے نبھایا ہے اور اپنی فطری اور بے ساختہ اداکاری سے دل موہ لیا ہے۔ اکبر کی ایک کنیز جو کہ انارکلی تھی، وہ بھی متاثر کرنے میں زیادہ کام یاب نہیں ہو سکی، البتہ اکبر کی تینوں بیویوں میں سے جودھا اکبر کا کردار نبھانے والی اداکارہ "ساندھیا مریدول” نے بہت زبردست اداکاری کی بلکہ کئی مناظر میں وہ تمام اداکاروں پر حاوی نظر آتی ہیں۔

اکبر کے بھائی مرزا محمد حکیم کے کردار میں راہول بوس نے بھی مایوس کیا البتہ دیگر مرکزی کرداروں میں ایام مہتا (بدایونی)، پنکج سرسوت (ابوالفضل) دیگمبر پرساد (مان سنگھ)، سبودھ بھاوے (بیربل)، دیبراج رانا (مہا رانا پرتاب)، پون چوپڑا (غیاث بیگ) نے اپنی اداکاری سے ویب سیریز کو چار چاند لگا دیے ہیں۔

دھرمیندر بھی (شیخ سلیم چشتی) کے کردار میں بہت بھائے اور متاثر کن اداکاری سے ثابت کیا کہ وہ اب تک اداکاری سے مضبوطی سے جڑے ہوئے ہیں۔ یہاں ہم نے جن سات فن کاروں کا تذکرہ کیا ہے، اگر یہ اچھا کام نہ کرتے تو شاید یہ ویب سیریز پروڈکشن کا سفید ہاتھی ثابت ہوتی اور اس کی لاش پر نصیر الدّین شاہ بیٹھے دکھائی دیتے۔

حرفِ آخر

اپنی کچھ کم زوریوں کے باوجود اس ویب سیریز کی مقبولیت کا سفر بہرحال جاری ہے۔ فلموں اور ویب سیریز کی مقبول ویب سائٹ "آئی ایم ڈی بی” پر اس کی مقبولیت کا اوسط 10 سے میں 7 فی صد ہے۔ ہندوستانی میڈیا نے اس پر ملا جلا ردعمل دیا ہے جب کہ مغربی ریٹنگ میڈیا نے اس ویب سیریز کو زیادہ توجہ نہیں دی۔ اس کے باوجود مجھ سے پوچھیں تو میری نظر میں 10 سے 6 اسٹارز کے ساتھ یہ ویب سیریز آپ کو کہیں لطف اندوز ہونے کا موقع بھی دے گی اور کہیں مایوس بھی کرے گی۔ اس ویب سیریز کی ناکامی کی دو وجوہ ہوں گی، ایک نصیر الدّین شاہ کی بوجھل اداکاری اور دوسری وجہ موسیقی کا عنقا ہونا۔ اس لیے زیادہ امید وابستہ کیے بغیر اس ویب سیریز کو دیکھیں گے تو محظوظ ہوسکیں گے، مگر اس کی ضمانت بہرحال نہیں دی جاسکتی۔

فلم دی کوینینٹ امریکا میں سینما تھیٹرز میں نمائش کے لیے پیش کی گئی تھی جسے بعد میں معروف اسٹریمنگ پورٹل "ایمازون پرائم ویڈیو” پرریلیز کیا گیا اور اس امریکی اسٹریمنگ پورٹل کے ذریعے یہ فلم دنیا کے ہر خطّے میں‌ بسنے والے فلم بینوں تک پہنچی۔

یہ اسٹریمنگ پورٹل چند معروف اور مقبول پلیٹ فارمز میں سے ایک ہے، جس پر دنیا بھر سے فلمیں ریلیز کی جاتی ہیں۔ پاکستان میں فلم بینی کا شوق رکھنے والوں کی بڑی تعداد نیٹ فلیکس پر اپنی پسند کی فلمیں دیکھتی ہے اور ایمازون پرائم ویڈیو اسی کی ٹکر کا اسٹریمنگ پورٹل ہے جو اب پاکستان میں بھی مقبول ہورہا ہے۔

فلم دی کوینینٹ، ایک عہد کی وہ کہانی ہے جو افغانستان میں اتحادی فوجیوں، اور اُن افغانوں کے گرد گھومتی ہے جو بطور مترجم ان فوجیوں کے ساتھ کام کر رہے ہیں۔ ہر چند کہ یہ کہانی اور واقعات فرضی ہیں، مگر یہ حقیقت ہے کہ افغانستان سے امریکا کے انخلا کے بعد، امریکی افواج کے لیے کام کرنے والے سیکڑوں افغان مترجمین کو موت کے گھاٹ اتارا جا چکا ہے۔ دی کوینینٹ اسی پس منظر میں بنائی گئی فلم ہے۔

کہانی/ اسکرین پلے

اس فلم کی کہانی کچھ یوں ہے کہ افغانستان میں جنگ کے دوران، امریکی فوج کے ماسٹر سارجنٹ جان کنلے اور اس کی یونٹ لشکر گاہ میں معمول کے مطابق گاڑیوں کی چیکنگ میں مصروف ہوتے ہیں کہ طالبان کے حملے میں ان کے ایک مترجم کی جان چلی جاتی ہے۔ اس مترجم کے متبادل کے طور پر جان کنلے کا تعارف احمد عبداللہ سے کرایا جاتا ہے، جو ثابت قدم لیکن ایک ناپسندیدہ ترجمان ہے، اور جس کا دعویٰ ہے کہ وہ صرف اور صرف پیسوں کے لیے کام کرتا ہے۔ ایک خفیہ مشن کے دوران سارجنٹ کنلے کو معلوم ہوا کہ احمد پہلے طالبان سے وابستہ تھا، لیکن تنظیم کے ہاتھوں‌ جب اس کا بیٹا قتل ہوا تو وہ منحرف ہو گیا۔ احمد ایک موقع پر کنلے کی ٹیم کو گھات لگائے ہوئے طالبان سے بھی بچاتا ہے۔

بگرام ایئر بیس کے شمال میں تقریباً 100 کلومیٹر (62 میل) شمال میں باغیوں کے ممکنہ ہتھیاروں کے بڑے ذخیرے کی تلاش کے لیے ایک اور چھاپے کے دوران، کنلے کے یونٹ پر طالبان کا حملہ ہوتا ہے، جو اس کے اور احمد کے علاوہ سب کو مار ڈالتے ہیں۔ یہ دونوں پیدل فرار ہونے میں کامیاب ہوجاتے ہیں۔ اس حملے میں کئی طالبان جنگجو بھی مارے جاتے ہیں۔ افغان پہاڑی علاقے سے گزرتے ہوئے ایئربیس پر واپس جانے کی کوشش کرتے ہوئے، وہ ایک بار پھر باغیوں کے حملے کی زد میں آتے ہیں اس بار کنلے زخمی ہوجاتا ہے، حملہ کرنے والے مار پیٹ کے دوران اسے رائفل کے بٹ سے معذور کر دیتے ہیں۔ احمد اس حملے میں ملوث طالبان کو مارنے کے بعد کنلے کو واپس ایئر بیس پر لے جانے کا عزم کرتا ہے۔ کچھ ہمدرد افغانوں کی مدد حاصل کر کے، احمد وہاں سے آگے بڑھتا رہتا ہے۔ کئی دن بعد احمد اور کنلے بگرام کے قریب پہنچ جاتے ہیں، لیکن یہاں طالبان جنگجو ان پر حملہ کر دیتے ہیں۔ احمد جنگجوؤں کو مار ڈالتا ہے، لیکن اس کے فوراً بعد اسے امریکی فوجی پکڑ لیتے ہیں۔

چار ہفتے بعد کنلے، سانتا کلیریٹا، اپنے گھر کیلیفورنیا میں واپس بھیج دیے جاتے ہیں، لیکن کنلے اس بات سے مکمل طور پر بے خبر ہے کہ اسے کیسے بچایا گیا، وہ سمجھتا ہے کہ اس میں احمد نے کردار ادا کیا ہے۔ بعد میں یہ جان کر کہ احمد اور اس کے خاندان کو ان دونوں کی وجہ سے انڈر گراؤنڈ ہونے پر مجبور کیا گیا تھا، کنلے ان کے لیے امریکی ویزا حاصل کرنے کی کوشش کرتا ہے، لیکن اس کی یہ کوشش بے سود ثابت ہوتی ہے۔ وہ جذباتی اور ایک اذیت میں مبتلا ہوجاتا ہے اور سمجھتا ہے کہ وہ احمد کا مقروض ہے اور اس کی وفاداری اور اپنی ٹیم کے لیے خدمات پر اس کا حق ادا نہیں کرسکا اور یہی سوچ اسے بے چین و مضطرب رکھتی ہے اور وہ بے خوابی کا شکار ہو جاتا ہے۔ آخر کار کنلے احمد کو اور خود کو بچانے کا عزم کر کے اپنے ایک افسرِ اعلیٰ، لیفٹیننٹ کرنل ووکس کی مدد لیتا ہے تاکہ خفیہ طور پر افغانستان جاسکے اور کسی طرح‌ احمد اور اس کے خاندان کو تلاش کر کے ان کے لیے کچھ کرسکے۔

اپنے افسرِ اعلیٰ کی مدد سے کنلے افغانستان جانے میں‌ کامیاب ہوجاتا ہے۔ اس کے لیے وہ "رون کی” کا نام اپناتا ہے۔ افغانستان واپس جاتے ہوئے، کنلے کی ملاقات پارکر سے ہوتی ہے، جو ایک پرائیویٹ ملٹری کنٹریکٹر ہے، اور پھر کِنلے احمد کے بھائی علی تک پہنچ جاتا ہے جو اسے طالبان کے زیرِ کنٹرول علاقے تک لے جانے کا انتظام کرتا ہے۔ اس عمل میں، اس کے ہاتھوں‌ سڑک پر قائم ایک چوکی پر دو باغی مارے جاتے ہیں، جس سے طالبان خبردار ہو جاتے ہیں۔ ادھر ووکس، کنلے کو مطلع کرتا کہ ویزا پر کارروائی ہو چکی ہے اور وہ پارکر کے پاس ہیں۔ اور پھر کنلے، احمد کے ٹھکانے پر پہنچ جاتا ہے جہاں وہ اسے خاندان سمیت امریکہ جانے کے لیے قائل کرتا ہے۔

اس دوران، پارکر یہ اندازہ کر لیتا ہے کہ کنلے کی حقیقیت کچھ اور ہے اور اسے احساس ہو جاتا ہے کہ اب طالبان کے لیے وہ دونوں‌ بڑا خطرہ ہیں، اور اِن کا مقابلہ کرنے کے لیے وہ گن شپ اور اپاچی ہیلی کاپٹر کا بندوبست کرتا ہے اور حملہ آوروں کا صفایا ہوجاتا ہے۔ پارکر کہتا ہے کہ اگر وہ اپنی شناخت نہ چھپاتا تو وہ دل سے کنلے کے مشن کی حمایت کرتا۔ پھر وہ واپس بگرام لے جائے جاتے ہیں اور پھر اس ہوائی جہاز میں سوار ہو جاتے ہیں جو افغانستان کی فضائی حدود سے پرواز کرنے کے لیے تیار ہوتا ہے۔

اس فلم کا مرکزی کردار یعنی کنلے افغانستان میں دو مشن مکمل کرتا ہے۔ پہلے مشن پر وہ اتحادی فوج کے افسر کی حیثیت سے افغانستان بھیجا گیا تھا اور دوسرا اس کا خود ساختہ مشن تھا جس میں وہ جذبات سے مغلوب ہو کر افغانستان پہنچا تھا، یعنی احمد اور اس کے خاندان کو افغانستان سے بحفاظت نکال کر امریکہ لے جانے کا مشن۔ جہاز میں‌ سوار ہونے کے بعد وہ ایک دوسرے کو دیکھ کر سَر ہلاتے ہیں، جو اس بات کی علامت ہے کہ عہد برقرار رکھا گیا ہے۔یہ اس فلم کے اختتامی لمحات ہیں، لیکن اتحادی افواج، ان کا ساتھ دینے والے افغان باشندوں اور طالبان یا باغیوں‌ کے واقعات کو کیمرے کی آنکھ سے دیکھنے میں‌ آپ کی دل چسپی ہر بدلتے منظر کے ساتھ بڑھ جائے گی۔ اگر فلم کو امریکی فوجی کِنلے کے دو مشن کی صورت میں‌ دیکھا جائے تو یہ فلم گولہ بارود برسانے اور لاشیں‌ گرانے کے دل دوز واقعات کے ساتھ اُس مشن کی طرف لے جاتی ہے جس کی بنیاد دلی جذبات پر رکھی گئی ہے۔ فلم میں آپ کی دل چسپی کی ایک وجہ یہ بھی ہوسکتی ہے کہ یہ اُس ملک کی کہانی ہے جس کے سیاسی اور سماجی حالات سے ہم بھی واقف ہیں۔

فلم سازی و ہدایت کاری

اس فلم کے چار مرکزی پروڈیوسرز ہیں، جن میں فلم کے ہدایت کار بھی شامل ہیں۔ایم جی ایم جیسا عہد ساز ادارہ اس فلم کا تقسیم کار ہے، جس نے اسے امریکی سینما تھیٹرز میں نمائش کے لیے پیش کیا، جب کہ اسے اسٹریم کرنے کے لیے ایمازون پرائم ویڈیو کی خدمات حاصل کی گئیں۔ اس فلم کا نام پہلے "دی انٹرپریٹر” تھا، جسے "دی کوینینٹ” سے تبدیل کردیا گیا۔ فلم کے نام کے ساتھ ہدایت کار "گائے رچی” کا نام بھی پیوست ہے، جس کی وجہ یہ ہے کہ ایک پرانی فلم بھی اسی نام سے موجود ہے جس میں تمیز کرنے کے لیے ایسا کیا گیا ہے۔

اس فلم کی عکس بندی اسپین کے مختلف علاقوں میں کی گئی ہے۔ اس فلم کے ہدایت کار "گائے رچی” کا تعلق برطانیہ سے ہے جو مشہور‌ گلوکارہ میڈونا کے سابق شوہر بھی ہیں۔ باکس آفس کی بات کی جائے تو اس فلم کو بہت زیادہ پسند نہیں کیا گیا اور یہ اپنی لاگت پوری نہیں کر سکی، لیکن پروڈکشن، کہانی اور عنوان کے لحاظ سے یہ ایک بہتر اور معیاری فلم ہے جسے فلمی ناقدین اور فلم بینوں دونوں نے پسند کیا ہے۔

ایمازون پرائم ویڈیو کے پورٹل پر پسند کیے جانے کے علاوہ فلم کو مختلف پلیٹ فارمز پر سراہا گیا ہے۔ فلم ویب سائٹ "روٹن ٹماٹوز” پر اسے 84 فیصد کی شرح سے پسندیدگی ملی، جب کہ آئی ایم ڈی بی پر یہ فلم دس میں سے 7.5 فیصد اور ایک اور ویب سائٹ "وودو” پر پانچ میں سے 4.7 فیصد کی پسندیدگی حاصل کر پائی ہے۔ گوگل پر اس فلم کے لیے پسندیدگی کا تناسب پانچ میں سے 4.7 فیصد رہا ہے۔

دی کوینینٹ پر تبصرے مثبت رہے اور مجموعی طور پر فلم کے تمام شعبوں میں فن کاروں‌ اور آرٹسٹوں کی کارکردگی کو تسلی بخش اور اسے ایک معیاری فلم گردانا گیا ہے۔

اداکاری

اس فلم کے مرکزی کرداروں میں معروف امریکی اداکار "جیک جیلن ہو” اور "عراقی اداکار "دار سلیم” شامل ہیں۔ ان دونوں کی اداکاری نے فلم کا معیار بلند کیا ہے، خاص طور پر دار سلیم نے اپنے شان دار اداکاری سے فلم بینوں کے دل موہ لیے اور اپنی صلاحیتوں کے اظہار سے ناقدین کو بھی متأثر کیا ہے۔ ان کی پیدائش عراق کے شہر بغداد کی ہے، مگر وہ اپنی والدین کے ہمراہ، چھے سال کی عمر میں‌ ہجرت کر کے ڈنمارک آگئے تھے۔ بنیادی تعلیم حاصل کرنے کے بعد ان کا رجحان فلم سازی اور اداکاری کی طرف ہوا، انہوں نے ٹیلی وژن اور فلموں کے لیے کام شروع کیا اور بطور خاص ہالی وڈ کی فلموں میں شامل کیے گئے۔ دار سلیم کو فلم بینوں‌ نے پسند کیا اور انہیں زیادہ کام ملنے لگا۔ فلم میں ان کے ساتھی فن کاروں نے بھی خوب کام کیا۔ مجموعی طور پر ان سب کی کارکردگی متأثر کن رہی، اور یہی وجہ ہے کہ فلم بینوں نے بھی اسے پسند کیا ہے۔

حرفِ آخر

امریکہ نے دنیا کے مختلف حصّوں میں کئی جنگیں لڑی ہیں جن پر بنائی گئی فلمیں‌ دیکھ کر اُن جنگوں کے اسباب اور اُن حالات کو سمجھنے میں مدد ملتی ہے جو کسی ملک کی تباہی اور بربادی کا باعث بنتے ہیں۔ افغانستان سے اںخلا کے وقت، وہاں‌ کا ماحول کیا تھا، امریکی فوج اور اتحادیوں کو کن حالات کا سامنا تھا اور ان کے لیے کام کرنے والے افغان باشندوں کی زندگی کس طرح داؤ پر لگ گئی اور کیسے وہ ان حالات میں خود کو اپنے کنبے کو بچا پائے، یہ فلم اِس عکاسی کرتی ہے۔