بنیاد یہ ہے کہ آپ خواہ جنگ کریں، امن قائم کریں، یا قانون سازی کریں __ یہ سب سیاسی سوچ کے تابع ہوتا ہے۔ اگر آپ دنیا میں کوئی حکومت یا ریاست قائم کرنا چاہتے ہیں، اگر پالیسی وضع کرنا اور طاقت کا توازن بنانا چاہتے ہیں تو آپ کو معلوم ہونا چاہیے کہ یہ اہداف سیاسی نظاموں کے ذریعے ہی حاصل ہو سکتے ہیں۔

اس لیے ایک شہری ہونے کے ناتے ہر شخص کی توجہ کا مرکز ملک میں اچھے اور بہتر سیاسی نظام کی تعمیر ہونا چاہیے۔ ایک شہری جو سیاسی طور پر ووٹر ہوتا ہے، کو سیاسی نظام پر شرح صدر ہونا چاہیے۔ اس پر کتنی ہی پابندیاں عائد کیوں نہ ہو جائیں، وہ یہ بات واضح کہتا رہے کہ شفاف سیاسی نظام کے علاوہ ہر دوسری صورت مسترد ہے۔

یہ جھگڑا کہ ’’دنیا کن عناصر پر چلی ہے‘‘ مقامی یا قومی سیاست کا سوال ہی نہیں ہے۔ ہزار قسم کے مسائل میں گھرا شہری _ عملاً جس کے ووٹ کی بھی کوئی حیثیت نہ ہو _ نہ اس سوال کا درست جواب فراہم کر سکتا ہے، نہ درست جواب کی نوعیت کو ٹھیک سے سمجھ سکتا ہے۔ پریشانیوں، محرومیوں میں گھرا شہری جذبات کی گرفت میں ہوتا ہے۔

آج کی حقیقی دنیا آئیڈیلزم اور لبرلزم کی گرفت میں ہے۔ جس نے ایک ایسا بین الاقوامی نظام تشکیل دے رکھا ہے، جس کے تحت اقوام متحدہ جیسے اداروں، اقتصادی مفادات کی بجائے بین الاقوامی تعاون، بین الاقوامی قوانین، انسانی حقوق اور اخلاقی اقدار کے دھارے بہہ رہے ہیں۔ اس کے لیے صرف طاقت اور معیشت کافی نہیں۔

دنیا جن عناصر پر چلتی ہے، اگر ہم نے اس کا یہاں تصور کرنا شروع کر دیا، تو اجتماعی سطح پر ہمارے سماجی شعور میں زبردست وسعت پیدا ہونا شروع ہو جائے گی۔ کیوں کہ آئیڈیلزم کی ماری اس دنیا کے نظام کی زیریں سطح پر ایک زبردست تنقیدی نظام کا دھارا بھی بہہ رہا ہے۔ ایک ایسا شہری جس نے اپنے خطے میں کبھی ’تعمیری نظام‘ نہ دیکھا ہو، اس کے لیے کسی تنقیدی نظام کا درست تصور کرنا سخت مشکل ہوتا ہے۔

طاقت، معیشت، فوج، سرحدیں _ یہ سب تلخ حقیقتیں ہیں۔ بد قسمت لوگ ان حقیقتوں کے ہاتھوں مارے جاتے رہتے ہیں اور ذلیل ہوتے رہتے ہیں۔ لیکن سماجی تعمیر کے نظریے کا جال بھی ان سب کے گرد پوری طرح کسا ہوا ہے۔ اس لیے قومی سطح ہی نہیں بین الاقوامی تعلقات کو بھی یہ مختلف نظریات، شناخت، ثقافت، اقدار، اور بیانیوں کا تناظر بھی فراہم کرتا ہے۔ ہماری اسی تلخ دنیا میں رئیلزم اور لبرلزم کے روایتی نظریات بھی چینلج ہوتے رہتے ہیں، یعنی: ’’دنیا جس طرح ہے، وہ اسی طرح ہو سکتی تھی — لیکن اس کا مطلب یہ نہیں کہ یہ اسی طرح ہونی ہی تھی۔‘‘

ریاستوں کا مفاد کیا ہے، یہ دیکھنا بہت ضروری ہے۔ لیکن ریاستوں کا رویہ کیا ہے؟ اس کی تشکیل اُس کے خیالات اور سماجی شناخت سے ہوتی ہے، مفادات سے نہیں۔ یہ نکتہ اب عام طور پر کوٹ کیا جاتا ہے کہ ’’قومی مفاد‘‘ بھی ایک تشکیل شدہ (constructed) تصور ہے، جو وقت اور حالات کے ساتھ بدلتا رہتا ہے۔

امریکا اس کی قریب ترین مثال ہے __ بین الاقوامی سیاست کا اسٹرکچر مادی حقائق سے نہیں بلکہ سماجی تعمیر سے بنتا ہے۔ امریکا کے پاس سب سے بڑی فوج، ایٹمی ہتھیار، اور بڑی معیشت ہے لیکن ایران اور شمالی کوریا سمیت چند ممالک کے علاوہ باقی دنیا امریکی طاقت کو خطرہ نہیں تحفظ کی علامت سمجھتی ہے۔ یعنی یہاں طاقت خود کوئی معنی نہیں رکھتی، بلکہ ایک بیانیہ ہے جو اس طاقت کے لیے معنی فراہم کر رہا ہے۔ اس لیے خطرے اور تحفظ کی تشریح سماجی تناظرات کے تحت ہوتی ہے۔ امریکا ہمیشہ سے ایسا نہیں تھا، 19 ویں صدی میں اس پر شناخت کے حوالے سے تفرُّد پسندی کا بھی دور گزر چکا ہے۔

اس خطے کے شہری کا عام خیال یہ ہے کہ امریکا کا کردار اس کی فوجی اور ٹیکنالوجی کی، اور معاشی طاقت طے کرتی ہے۔ لیکن حقیقت اس سے مختلف ہے۔ امریکا کا کردار اس کی ’’قومی شناخت‘‘ کی مدد سے تشکیل دیا گیا ہے۔ یہ بیانیاتی شناخت پر استوار ہے جو اسے عالمی نظام کا مربی بنا کر پیش کرتا ہے _ امریکا نے خود کو عالمی سیاست میں ’’جمہوریت کا محافظ‘‘ اور ’’آزادی کا علم بردار‘‘ کے طور پر پیش کیا۔ یہ سماجی تصور کی مدد سے ممکن ہو سکا، مادی قوت پر نہیں۔ اگر عالمی سلامتی کا بیانیہ (بیانیے ہمیشہ سوالیہ نشان کی زد پر اسی لیے ہوتے ہیں کہ یہ دھوکے پر مبنی ہوتے ہیں) تشکیل نہ دیا جاتا تو افغانستان یا عراق پر حملہ ممکن نہ تھا۔

سماجی تعامل اور تاریخی تجربات سے سیکھنے والے اگر سیاسی بیانیے طاقت ور نہ ہوتے تو برطانیہ، جاپان اور جرمنی آج اتحادی نہ ہوتے۔ روس، چین اور ایران گہرے رشتوں میں نہ بندھے ہوتے۔ ہمیں طاقت کی تعبیر سماجی سطح ہی پر کرنی پڑتی ہے، اور جب ہم دوستی اور دشمنی کی بات کرتے ہیں تو یہ ہمارا ایک اجتماعی تصور ہوتا ہے، اسی طرح قومی مفاد کوئی فطری چیز نہیں بلکہ سماجی بیانیہ ہے۔ اس لیے ہمیں ایسے سماجی بیانیے تشکیل دینے کی ضرورت ہے جو نہ صرف اندرونی سطح پر ہماری شناخت کے مسائل کو حل کر سکے، بلکہ عالمی سطح پر بھی ہماری شناخت کو بہتر بنا سکے۔

کسی نازک وقت کی آزمائش خود ایک کمزور بیانیے کا نتیجہ ہے۔ اگر یہ تسلسل کے ساتھ آتا رہے تو آخرکار ’’نازک وقت‘‘ کے بیانیے پر لوگوں کا اعتماد کم زور ہو جاتا ہے۔

تنقیدی نظام کا ایک دھارا فیمینزم بھی ہے۔ یہ تو ہمارے ہاں ایک گالی ہے۔ لیکن دنیا اس دھارے کو قبول کرتی ہے اس لیے یورپ اور امریکا میں عورت کی سماجی صورت حال باقی دنیا سے بہت مختلف ہے۔ یہ فکر تو اس اوپر کے سارے بیانیے پر کہے گی کہ یہ مردانہ (patriarchal) انداز فکر ہے۔ کیا ہم اس تنقید کو کھلے دل سے عزت دے سکتے ہیں!

تنقید کا ایک دھارا یہ کہتا ہے کہ بین الاقوامی نظام مغربی طاقتوں کا تشکیل کردہ ہے، اور وہ اپنے نوآبادیاتی مفادات، شناخت، اور بیانیے کو قائم رکھنا چاہتے ہیں۔ دنیا اس تنقید کو بھی قبول کرتی ہے اور اپنی تمام تر سفاکیت کے ساتھ ساتھ کسی نہ کسی سطح پر خود کو اس حوالے سے بہتر بناتی رہتی ہے۔

دراصل، دنیا کیسے چلتی ہے، اس حوالے سے طاقت کے نظام، سیاسی و اقتصادی ڈھانچے کو جوں کا توں مان لینا خود ایک مسئلہ ہے، اس لیے روایتی مفروضات کو چیلنج کرتے رہنا چاہیے۔ یعنی دنیا کی محض تشریح کافی نہیں، اسے بدلنے کی کوشش بھی ضروری ہے۔

دنیا کیسے چلتی ہے؟ یہ دیکھیں کہ اس وقت عالمی نظام میں اقدار اور ثقافتی معیارات اہم کردار ادا کرتے ہیں۔ غلامی، نوآبادیات اور ایٹمی ہتھیار ایک وقت میں جائز سمجھے جاتے تھے، مگر اب ناقابلِ قبول ہیں۔ تاریخی عمل کے ذریعے انسانی حقوق اور جمہوریت ہی نے نہیں بلکہ ماحولیاتی تحفظ جیسے اصول نے بھی ایک عام قدر کی صورت اختیار کر لی ہے۔

آج کی دنیا کو ٹھیک سے سمجھنے کے لیے فلسفیانہ تصورِ ‘‘ساخت’’ یا زیر سطح نظاموں (underlying structures) کا مطالعہ بھی ضروری ہے، بنیادی طور پر یہ لسانیات (سوئس ماہر لسانیات فرڈیننڈ سوسیور نے بیسویں صدی کی ابتدا میں میں یہ تصور پیش کیا) اور ثقافتی بشریات (Cultural anthropology__ کلاڈ لیوی اسٹراس نے اس کا بشریات پر اطلاق کیا) کے شعبے کا تصور تھا، لیکن اس میں اتنی فکری کشش تھی کہ یہ فلسفہ، نفسیات، سیاسیات، سماجیات، ادب اور بین الاقوامی تعلقات جیسے متنوع شعبوں تک پھیل گیا۔ اس تصور نے دراصل غیر مرئی ساختوں (invisible structures) کی دریافت کی، اور پتا چلا کہ کسی بھی نظام کا تجزیہ کرنے کے لیے یہ تصور ایک فریم ورک فراہم کرتا ہے۔ کوئی مظہر خواہ کسی بھی شعبے کا ہو، ساخت (structure) کے تصور میں یہ صلاحیت ہے کہ اُس مظہر کے اساسی پیٹرنز یا سسٹمز کو بے نقاب کر سکے، اور بتا سکے کہ دراصل معانی کیسے پیدا ہو رہے ہیں۔ آج ساختیات کا یہ تصور طاقت، شناخت، ثقافت، قانون اور بین الاقوامی نظام کو سمجھنے میں بنیادی حیثیت رکھتا ہے، جس کا بنیادی نکتہ یہ تھا کہ کسی شے کا مطلب اس کے مخالف سے طے ہوتا ہے، نہ کہ اس کی انفرادی حقیقت سے۔ ساختیات نے بتایا کہ نظریہ خود بہ خود پیدا نہیں ہوتا، نہ یہ کسی انسان کی سوچ ہوتی ہے، نہ کوئی آفاقی سچائی _ بلکہ یہ ثقافتی نظام کا نتیجہ ہوتا ہے۔ جیسا کہ ترقی کا نظریہ مغرب کے مخصوص تاریخی، لسانی، اور معاشی ساخت سے پیدا ہوا۔

اگر ہم عالمی نظام کی ساخت کو سمجھنا شروع کریں گے تو ہمارے راستے میں مارکسی نظریات بھی مدد کے لیے کھڑے ہوں گے، ان کے بغیر فہم کی ہماری کوشش علمی نہیں ہوگی، بلکہ تعصب کا شکار ہو جائے گی۔ یعنی زبان، ذہن، بیانیے، اور ثقافتی کوڈز کا تجزیہ ہی کافی نہیں، مادّی حقیقت سب سے اہم ہے، کیوں کہ سماجی شعور مادی حالات سے پیدا ہوتا ہے۔ لوئی التسر نے ساختیات اور مارکسزم کو ملا کر ایک امتزاجی نقطہ نظر پیش کیا۔ ساختیات اگرچہ غیر سیاسی ہے لیکن سیاست کے شعبے پر اس کا گہرا اثر مرتب ہوا۔ لیکن ساختیات تاریخ سے کٹی ہوئی ہے اس لیے مارکسی فہم اس گیپ کو بھرتی ہے۔

اسی طرح، ساختیات سے آگے کی فکر ہمیں بتاتی ہے کہ خود یہ تصور بھی کافی کرخت اور بے لوچ ہے، جس کی وجہ سے یہ محدود ہو گیا ہے۔ کیوں کہ جب معانی، ساخت، اور شناخت جیسے قضیوں کا مزید تجزیہ کیا گیا تو دریافت ہوا کہ ان میں استحکام نہیں ہے؛ معنی سیال ہے، سیاق بدلتے ہی معنیٰ بھی بدل جاتا ہے۔ ساختیات نے بتایا کہ ہر نظام میں ایک ساخت اور مستقل مرکز ہوتا ہے، پوسٹ اسٹرکچرلزم نے واضح کیا کہ مرکز کا وجود مستقل نہیں ہوتا۔ یہ فلسفیانہ تناظر ہمیں عالمی سیاست کے ’’مراکز‘‘ کو سمجھنے میں وسیع مدد فراہم کرتے ہیں۔ کہ کس طرح کوئی مرکز ہمیشہ قائم نہیں رہتا، یعنی، تاریخ بدلتی رہتی ہے، ارتقا کا عمل جاری رہتا ہے۔

ساخت نظر نہیں آتی، لیکن ہمیں اپنے معنی کے ذریعے متاثر کرتی ہے۔ انسان، ادارے، نظریات — سب ان ہی ساختوں کے ’’زیر اثر‘‘ ہوتے ہیں۔ شناختیں، تصورات اور معانی ان ساختوں کی پیداوار ہیں، پہلے سے موجود structures of meaning ہماری انگلی پکڑ کر ہمیں بتاتی ہیں کہ دیکھو دنیا کی حقیقتیں بس یہی ہیں! ہم ہر پل ان ساختوں کی گرفت میں ہوتے ہیں۔ ان سے روگردانی پر یہ ساختیں ہم سے ناراض دکھائی دینے لگتی ہیں۔ یہ ساختیں سماجی قوتوں کو ہماری سرکوبی کے لیے متحرک کر دیتی ہیں۔ طے شدہ معنی والی ان ساختوں پر سوال اٹھانا آگے بڑھنے کے لیے ضروری ہے۔

کیوں کہ، ایک اور حقیقت بھی ہے، جسے ہم آسانی سے فراموش کرتے رہتے ہیں __ یہ کہ ریاستیں اور انسان اپنے بیانیے، شناخت اور اقدار وقت کے ساتھ تبدیل کر سکتے ہیں، اور کرتے رہتے ہیں۔

حال ہی میں نیٹ فلیکس نے ویب سیریز ”ایڈولیسنس“ نشر کی ہے، جو فی الحال چار اقساط پر مشتمل ہے اور اسے دنیا بھر میں دیکھا جارہا ہے۔ اس ویب سیریز میں دو باتیں بہت کمال ہیں، جن میں سے ایک کا تعلق انسان کے اندر موجود جوہر اور اس کی صلاحیتوں‌ سے ہے اور دوسری تیکنیکی ہے۔

پہلی بات اس کا ”ون ٹیک فارمیٹ“ پر بنایا جانا ہے۔ یعنی ہر قسط بغیر کوئی سین کاٹے یا ایڈٹ کیے، ایک ہی بار میں شوٹ کی گئی ہے۔ اس کا مطلب یہ ہے کہ ہر ایک گھنٹے کی قسط کو ایک ہی مرتبہ پکچرائز کیا گیا ہے، جو ویب سازی کی دنیا میں ایک انقلابی نوعیت کا کام ہے۔

اس ویب سیریز کی دوسری کمال بات مرکزی کردار نبھانے والے وہ بچہ ہے، جس نے اپنی زندگی میں پہلی بار اداکاری کی اور اس کی پرفارمنس دیکھ کر سب دنگ رہ گئے۔ بلکہ یہ کہنا چاہیے کہ بڑے بڑے اداکاروں نے دانتوں تلے انگلیاں دبا لی ہیں۔

دوستو! ویب سیریز ”ایڈولیسنس“ کا تفصیلی تجزیہ پیشِ خدمت ہے۔

کہانی/ اسکرپٹ

یہ کہانی ایک نفسیاتی جرم کے ارتکاب پر مبنی ہے، جس میں ملزم، جو بعد میں مجرم ثابت ہو جاتا ہے، ایک 13 سالہ بچہ ہے۔ اس ویب سیریز کی آفیشل ٹیم نے اس کہانی اور ویب سیریز کے لیے لفظ ”ڈراما“ استعمال کیا ہے، جو کسی بھی طورپر درست نہیں ہے، کیونکہ یہ کہانی ایک حقیقی واقعہ پر مبنی ہے، جس کا تذکرہ آگے آئے گا، لیکن اس کے ایک خالق جیک تھرون اس بات کا انکار کرتے ہیں۔

اس ویب سیریز کا مرکزی خیال جیک تھرون اور اسٹفین گراہم نے تشکیل دیا اور اس کو لکھا بھی ہے۔ اس تیرہ سالہ بچے کو جس کا نام جیم ملر ہے۔ پوری کہانی اسی کے گرد گھومتی ہے۔کہانی کے کرداروں کی ترتیب، کہانی آگے بڑھانے کا طریقہ اور اس میں مسلسل تجسس برقرار رکھنے کا ہنر کام یابی سے برتا گیا ہے۔

یہ ایک ایسے کمسن بچے کی کہانی ہے، جو ایک برطانوی قصبے میں رہائش پذیر ہے۔ وہ اسکول میں پڑھتا ہے اور سوشل میڈیا پر متحرک ہے۔ مغرب میں اکثر اسکولوں میں جس طرح بچوں میں آپس میں تعصب پر مبنی خیالات پائے جاتے ہیں، وہی اس کہانی میں بھی شامل ہیں۔یہ بچہ (جو تیزی سے بلوغت کی طرف بڑھ رہا ہے) کیسے اپنی ایک ہم جماعت کے قتل میں ملوث ہو جاتا ہے، اس کے پیچھے کیا محرکات ہوتے ہیں اور پھر برطانوی نظامِ قانون کیسے اسے اپنے دائرے میں لیتا ہے، ان سب پہلوؤں کو بہت خوبی سے کہانی میں پیش کیا گیا ہے۔

ویب سازی

اس ویب سیریز کی سب سے کمال بات اس کا ون ٹیک فارمیٹ پر بنایا جانا ہے۔ اس کی کل چار اقساط ہیں اور ہر قسط ایک گھنٹے کی ہے جسے مسلسل ایک ہی ٹیک میں مکمل کیا گیا ہے۔ اس ویب سیریز کو دیکھتے ہوئے بظاہر کوئی تکنیکی غلطی بھی نظر نہیں آتی بلکہ کئی جگہوں پر بغیر کیمرہ بند کیے جس طرح کردار سے کردار کو بدلا گیا ہے، وہ لاجواب ہے۔ اس ویب سیریز میں کاسٹنگ کا انتخاب بھی قابل داد ہے۔ اس میں جس طرح ایک نئے بچے کو موقع دیا گیا، اور اس نے اس موقع سے اپنی زندگی بدل دی، یہ قابلِ تعریف ہے۔ یہ کہنے میں کوئی جھجھک محسوس نہیں‌ ہوتی کہ یہ بچہ آنے والے وقت کا ایک بڑا اداکار ہے۔

ایک ہی وقت میں پوری قسط کو شوٹ کرنے کی غرض سے ایک رن تھرو بنایا گیا اور ہر قسط دس بار شوٹ کی گئی اور اس میں سے جو سب سے بہتر شوٹ ہوا، اس کو حتمی شکل دے دی گئی۔ ایک قسط شوٹ کرنے میں تین ہفتے لگے اور چار مہینوں میں اس کا مکمل کام ختم کر لیا گیا۔ یہ ویب سیریز 93 ممالک میں ٹاپ 10 کے چارٹ پر نمبر ون رہی ہے اور یہ بھی اس کا ایک کمال ہی ہے۔ ایڈولیسنس“ کے پروڈیوسروں میں کئی بڑے نام شامل ہیں، جن میں سے ایک امریکی اداکار بریڈ پٹ ہیں۔

ہدایت کاری اور فن کاروں کا انتخاب

برطانیہ کے معروف ہدایت کار فلپ بارنٹینی جنہوں نے اپنے کیریئر کا آغاز اداکاری سے کیا تھا، اب بطور ہدایت کار اپنی صلاحیتوں کا اظہار کر کے فلم بینوں‌ کو حیران کر دیا ہے۔ اس ویب سیریز میں سنیماٹوگرافی کے پہلو کو نظر انداز نہیں کیا جاسکتا اور اس پر تمام کیمرہ مین اور ٹیم بھی قابل داد ہے، جنہوں نے اپنی پیشہ ورانہ مہارت کو بروئے کار لا کر اس ویب سیریز کو یادگار بنا دیا۔

ویب سیریز کی خاص بات اس بچے کی دریافت ہے، جس نے اس میں مرکزی کردار نبھایا ہے۔ اس کا نام اون کوپر ہے۔ یہ ایک کاسٹنگ ڈائریکٹر شاہین بیگ کی دریافت ہے۔ وہ ایسے اداکاروں اور کمیونٹی کے لیے کام کرتی ہیں، جنہیں کم توجہ ملتی ہے یا جن کے پاس شوبز کی چکا چوند میں نووارد ہونے کی وجہ سے آگے بڑھنے کے راستے کم ہوں۔ شاہین بیگ کی خدمات کا دائرہ وسیع ہے۔ وہ پاکستانی نژاد ہیں اور چوں کہ اون کوپر شاہین بیگ کی دریافت ہے تو یہ بات پاکستانی کمیونٹی کے لیے بھی باعثِ فخر ہے۔ انہوں نے ویب سیریز ایڈولیسنس“ کے اس مرکزی کردار کے لیے پانچ سو بچوں کے آڈیشن لیے تھے۔

اداکاری

”ایڈولیسنس“ کے شریک خالق اور معروف اداکار اسٹیفین گراہم نے اس ویب سیریز کی تشکیل سے فلم بینوں‌ کو تو حیران کیا ہی مگر بطور اداکار بھی انہوں نے ویب سیریز دیکھنے والوں کے دل موہ لیے۔ اس بات میں کوئی شک نہیں کہ ان کی اداکاری نے ہر لمحہ ناظرین کو کہانی سے جوڑے رکھا اور اس ویب سیریز کے جتنے کلائمکس ہیں ان کا بوجھ بھی اسٹیفین گراہم‌ نے ہی اٹھایا ہے۔ ان کے ساتھ نو وارد اور کمسن اون کاپر نے بھی اپنی فطری اداکاری سے ویب سیریز کو چار چاند لگا دیے ہیں۔ اس ویب سیریز میں دوسرے کم عمر بچے بھی دکھائی دیے ہیں، جنہوں نے اپنا کام بہت اچھے انداز میں کیا ہے، البتہ متذکرہ بالا دو مرکزی کرداروں کے علاوہ اگر کسی نے اپنی اداکاری سے دیکھنے والوں کو ششدر کیا ہے تو وہ ماہر نفسیات کا کردار نبھانے والی اداکارہ ایرن ڈوہرٹی ہیں۔ انہوں نے لاجواب اداکاری کی ہے۔ اس ویب سیریز میں ہمیں کئی پاکستانی اور انڈین نژاد اداکار بھی دکھائی دیتے ہیں۔ 

کہانی کا تنازع

برطانیہ میں اس کہانی کی طرز پر ایک واقعہ کچھ برس پہلے رونما ہوا تھا۔ کہا جا رہا ہے کہ یہ ویب سیریز اسی کہانی کے اردگرد گھومتی ہے، جب کہ ویب سیریز کے آفیشلز نے اس سے انکار کیا ہے۔ صرف یہی نہیں بلکہ اصل واقعے میں ملوث کمسن بچہ سیاہ فام تھا جب کہ اس ویب سیریز میں سفید فام بچہ دکھایا گیا ہے، جس پر امریکی صدر ڈونلڈ ٹرمپ کے مشیر ایلون مسک نے نسلی تعصب کا الزام بھی عائد کیا ہے۔

کہانی کے پس منظر میں ایسا محسوس بھی ہوتا ہے کہ کہیں نہ کہیں اس معاشرے میں نسلی امتیاز موجود تو ہے اور اسے ویب سیریز ”ایڈولیسنس“ کی کہانی میں بھی ڈھکے چھپے انداز میں دکھایا گیا ہے۔ خاص طور پر جب ایک سیاہ فام تفتیشی افسر اتفاقاً اپنے بیٹے کے اسکول جاتا ہے، جہاں وہ خوف ناک واقعہ پیش آیا ہے، تو دکھایا گیا ہے کہ اس کا بیٹا کس طرح سے نسلی تعصب کا سامنا کرتا ہے۔ دوسری طرف ایک بڑی بات یہ بھی ہے کہ برطانوی وزیراعظم کو بھی اس ویب سیریز نے بہت متاثر کیا ہے۔ انہوں نے اس کے بنانے والوں کی حوصلہ افزائی کے لیے ان سے ملاقات کی اور ویب سیریز کی تشہیر میں بھی اپنا حصّہ ڈالا ہے۔

اختتامیہ

مذکورہ ویب سیریز موجودہ دور میں بچوں کے زیادہ سوشل میڈیا استعمال کرنے کے نقصانات کا احاطہ کر رہی ہے اور اسے بچوں کو ضرور دکھانا چاہیے۔ ایسے موضوعات کو ان کے حقیقی پہلوؤں کے ساتھ پیش کیا جانا بھی ضروری ہے، یعنی اگر کوئی کہانی کسی سچے واقعہ پر مبنی ہے تو اس میں حقائق کا خیال رکھا جانا چاہیے۔

قارئین! اگر آپ ایک اچھی کہانی کو اسکرین پر دیکھنے کے خواہش مند ہیں تو یہ ویب سیریز آپ کے لیے ہی ہے۔ اردو اور ہندی زبان سمجھنے والوں کے لیے اچھی خبر ہے کہ یہ ویب سیریز ہندی ڈبنگ میں بھی دیکھنے کے لیے موجود ہے۔

مصنّف:‌ سدرہ ایاز

رابعہ کا ‘جرم’ پسند کی شادی کرنا تھا۔ اور اسے اپنے کیے کا خمیازہ بھگتنا پڑا۔ رابعہ کو مانسہرہ کے علاقے جابہ میں اس کے گھر میں قتل کردیا گیا۔ 4 اپریل کے اس درد ناک واقعے میں ‘قصور وار’ رابعہ کو ہی نہیں اس کی ڈیڑھ سالہ معصوم بیٹی کو بھی گولیاں‌ مار دی گئیں۔ معصوم بچی کو اس کا باپ اپنے کنبے کی کفالت کی خاطر اُس وقت پنگوڑے میں‌ چھوڑ گیا تھا جب وہ صرف دو ماہ کی تھی۔

دہرے قتل کے اس واقعے کا مقدمہ درج کر کے دو ملزمان بھی دھر لیے گئے ہیں۔ مقتولہ کی ساس نے پولیس کو بتایا ہے کہ ان کی بہو سفاک اور بے رحم قاتلوں کو کہتی رہی کہ اس کی بیٹی کو کچھ نہ کہو، مگر انھیں اس معصوم پر ترس نہیں آیا اور ننھی کلی کو بھی روند کر چلے گئے۔ وہ ‘غیرت مند ‘جو تھے!

رابعہ نے محمد عمر نامی شخص سے کورٹ میرج کی تھی کیوں کہ اس کا خاندان اس شادی پر رضا مند نہیں تھا۔ 2022 میں کورٹ میرج کے بعد یہ کنبہ کراچی میں قیام پذیر تھا اور وہیں رابعہ کے شوہر نے بہتر مستقبل کی خاطر سعودی عرب جانے کا فیصلہ کیا۔ اس کی بیوی مانسہرہ میں اپنے سسرال منتقل ہو گئی اور وہیں رابعہ اور اس کی بیٹی کو رشتے داروں‌ نے قتل کردیا۔

سوچتی ہوں کہ یہ غیرت ہمیشہ اسی وقت کیوں جاگ اٹھتی ہے جب لڑکی پسند کی شادی کے لیے گھر والوں‌ کے انکار پر مجبوراً کورٹ میرج کرتی ہے۔ عزت و آبرو اور خاندانی وقار پر دھبہ کیوں لگتا ہے جب لڑکی سنت کے مطابق نکاح کر کے زندگی کا نیا سفر شروع کرتی ہے۔ کوئی خونی رشتہ دار یا خاندان کا کوئی ‘غیرت مند’ ایسی لڑکی کو قتل کیوں کردیتا ہے۔ اس میں بنیادی وجہِ عداوت کورٹ میرج اور سببِ شقاوت وہ غیرت ہوتی ہے جس کی تعریف اور تفہیم بھی ایسے ‘آبرو مند’ مرد من چاہی اور حسبِ خواہش ہی کرتے رہے ہیں۔

والدین، بھائیوں، چچا ماموں یا دوسرے خونی رشتوں کو کبھی اس بات پر بھی شدید تکلیف ہوتی ہے جب خاندان میں کسی لڑکی کا جائیداد میں حق مارا جاتا ہے یا اس کے ساتھ کوئی بڑی ناانصافی کی جاتی ہے۔ کسی لڑکی کو جب ماں باپ کے انتقال کے بعد اس کے ظالم بھائی، چچا یا ماموں وغیرہ گھر سے نکال دیں اور زمین یا مال ہتھیا لیں تو کیا خاندان کا کوئی ‘غیرت مند’ اس کا مقدمہ لڑنا چاہتا ہے اور جوش میں آکر قتل جیسا انتہائی قدم بھی اٹھا سکتا ہے؟ ایسا کوئی واقعہ یا خبر میں‌ نے تو نہیں سنی۔

اسلام عورت کو پسند کی شادی کا حق دیتا اور یہ وہ بات ہے جسے کوئی معمولی سوجھ بوجھ رکھنے والا اور نیم خواندہ شخص بھی سمجھ سکتا ہے۔ لیکن مردوں کے اس معاشرے میں چوں کہ غیرت کی تعریف، اور اس کی تفہیم کرتے ہوئے صرف مرد ہی بوقتِ ضرورت خود کو غیرت مند ثابت کر سکتا ہے، اس لیے اسلامی تعلیمات پر غور کرنے اور قانون کو سمجھنے کی شاید ضرورت ہی نہیں ہے۔

عربی زبان کا یہ لفظ ہمیں لغت میں ملتا ہے جس کا ایک معنی احساس عزت، عزت نفس کا لحاظ ، مقدس اور محبوب شے کا خیال رکھنا ہو سکتا ہے۔ اس کے علاوہ جلن حسد اور رقابت کا احساس بھی اسی لفظ سے جڑا ہوا ہے۔ لیکن ظاہر ہے کہ معاشرہ میں کوئی انسان ان اوصاف کی بنا پر خود کو مثبت اور تعمیری سوچ کا حامل ثابت نہیں کرسکتا، اس لیے من چاہی تفہیم کی جاتی رہی ہے۔ یہ لفظ اور اس سے جڑا ہوا مخصوص تصور ہمارے خطے میں صدیوں سے عورت کو کچلتا، پامال کرتا اور اس کی جان لیتا رہا ہے اور آج کے جدید دور میں بھی یہ سلسلہ جاری ہے۔

اس پدر سری معاشرے میں عورت پر آج بھی اپنی حاکمیت کی دھونس جمانے اور برتری قائم رکھنے کے لیے غیرت کے روایتی تصور کو برقرار رکھا گیا ہے۔ عورت طلاق کا مطالبہ کرے تو بھی مرد کی غیرت پر حملہ ہوتا ہے اور مرضی کی شادی کرنا چاہے تو باپ اور بھائی کی عزت اور آبرو پر حرف آتا ہے جس سے بچنے کے لیے وہ اپنی ہی بیٹی اور بہن کو قتل کر سکتے ہیں۔

ملک میں‌ غیرت کے قانون سے متعلق دستیاب معلومات کے مطابق 2004 میں ‌حکومت نے ایسے جرائم کو حکومت کے خلاف جرم قرار دیا تھا۔ بدقسمتی سے پسند کی شادی اور دوسرے معاملات میں‌ عورت کا غیرت کے نام پر قتل بھی معافی اور خوں بہا سے منسلک رہا ہے جس کا فائدہ اسی کو ہوتا ہے جس نے خاندان کی آبرو کے نام پر عورت کا قتل کیا ہو۔ ایسی کئی مثالیں ہمارے سامنے ہیں۔ اس قاتل کو مقتولہ کے دوسرے رشتے دار معاف کر دیتے ہیں اور وہ عدالت سے بری ہو جاتا ہے۔ 2016 میں اس قانون میں مزید ترامیم کی گئیں مگر اس وقت تک ترامیم میں معافی اور ازالے کی شقیں واپس نہیں لی گئی تھیں البتہ جج کی صوابدید بڑھا دی گئی تھی۔

ہم دیکھتے ہیں‌ کہ پسند کی شادی کرنے پر قتل ہونے والی لڑکیوں کی اکثریت کا تعلق دیہی علاقوں، ناخواندہ یا قبیلہ اور برادری نظام کے تحت چلنے والے خاندانوں سے ہوتا ہے۔ شہری علاقوں‌ میں بھی ایسے واقعات ہوئے ہیں مگر ان کی شرح کم ہوسکتی ہے۔ بہرحال، اس حوالے سے سخت قوانین اور ان پر عمل درآمد یقینی بنانے کے علاوہ حکومتی سطح پر خاندانی نظام یا برادری سسٹم کی قیادت کے توسط سے لوگوں کو اس ظلم کے خلاف شعور دینے کی ضرورت ہے۔ یہ سب کو سمجھانا ہوگا کہ کوئی بھی عاقل و بالغ لڑکی اپنے شریک حیات کا انتخاب خود کر سکتی ہے اور اسے پسند کی شادی کرنے کا حق اسلام نے دیا ہے۔ حکومتی وفد ایسے علاقوں میں بھیجے جائیں جہاں ان واقعات کی شرح زیادہ ہے۔ اس حوالے سے کوئی جامع پروگرام ترتیب دیا جا سکتا ہے۔ اس کے علاوہ حکومتی اراکین کی جانب سے مذمت کی جانی چاہیے اور اس کی میڈیا پر تشہیر بھی لوگوں کی سوچ میں تبدیلی لاسکتی ہے۔

شادی جیسا اہم فیصلہ کرتے ہوئے اولاد کو چاہیے کہ اپنے والدین اور خاندان کے بزرگوں کی دعاؤں اور نیک تمناؤں کے سائے میں نئی زندگی کا آغاز کریں لیکن جب صورت حال مختلف ہو اور لڑکی پسند کی شادی کرنا چاہتی ہو اور ایسی کوئی وجہ نظر نہ آتی ہو جس سے اس کا مستقبل خراب ہوسکتا ہے تو خاندان کو بھی اس کی خوشی کا احترام کرنا چاہیے۔ آخر پسند کی شادی کے بعد والدین اور گھر والے کسی لڑکی کو اپنا رشتہ نبھانے اور ازدواجی زندگی کو پائیدار بنانے میں اس کا ساتھ کیوں نہیں دے سکتے۔ کیا ایسی لڑکی سے جینے کا حق چھین لینا ہی غیرت ہے؟

مرزا غالب نے اپنا شعر اس مصرعِ ثانی ’’بہت بے آبرو ہو کر ترے کوچے سے ہم نکلے‘‘ کے ساتھ باندھا تھا، مگر پاکستانی کرکٹ ٹیم نے اپنی ہی میزبانی میں آئی سی سی چیمپئنز ٹرافی کے ایک میچ میں جس بدترین کارکردگی کا مظاہرہ کیا، اس نے ہمیں مرزا غالب کے اس مشہور شعر کے مصرع میں تحریف کرنے پر مجبور کر دیا۔

پاکستان کو 29 سال بعد کسی آئی سی سی ایونٹ کی میزبانی کا شرف حاصل ہوا۔ روایتی دشمنی میں کھیل کے میدان میں‌ بھارت نے ہمیں اس سے محروم کرنے کے لیے کئی ہتھکنڈے آزمائے جس میں ہمارا روایتی حریف تو ناکام ہوا لیکن ہمارے اپنوں نے جس بدترین کارکردگی کا مظاہرہ کیا، اس کے بعد ہمارے ذہن میں ایک بہت ہی عامیانہ شعر کا یہ مصرع ابھرا کہ ’’ہمیں تو اپنوں نے لوٹا غیروں میں کہاں دَم تھا۔‘‘

چیمپئنز ٹرافی کا شور کئی ماہ سے ہو رہا تھا جس کے میچز اب بھی جاری ہیں لیکن میزبان اور دفاعی چیمپئن صرف پانچ روز ہی میں ہی اس میگا ایونٹ سے ایسے باہر ہوا ہے جیسے مکھن سے بال یا دودھ سے مکھی نکال دی جائے۔

پہلے نیوزی لینڈ اور پھر بھارت سے شرم ناک اور یک طرفہ شکستوں کے بعد قومی ٹیم خالی ہاتھ خاموشی سے وطن واپس لوٹ چکی ہے۔ میگا ایونٹ سے قبل ٹیم اور بورڈ میں جتنا شور بپا تھا اب اتنا ہی سکوت طاری ہے۔ شور مچ رہا ہے تو شائقین کرکٹ اور تجزیہ کارروں کے بحث ومباحثے میں، لیکن پاکستان کرکٹ بورڈ میں یہ خاموشی کسی آنے والے طوفان کا پیش خیمہ ہوتی ہے۔ یہ خاموشی کیا طوفان اٹھاتی ہے یا سیدھے سادے الفاظ میں اس شکست کا ملبہ یا نزلہ کس پر گرایا جاتا ہے وہ وقت دور نہیں جب یہ سب آشکار ہو جائے گا۔

چیمپئنز ٹرافی سے قبل باصلاحیت نوجوان اوپنر صائم ایوب اور پھر فخر زمان کا زخمی ہوکر میگا ایونٹ سے باہر ہونا یقینی طور پر پاکستان کے لیے سب سے بڑا شاک تھا لیکن انجریز کھیل کا حصہ ہیں۔ صائم ایوب کے بعد فخر زمان کے زخمی ہونا گرین شرٹس کے ذلت آمیز طریقے سے ٹورنامنٹ سے باہر ہونے کا جواز نہیں بنتا کیونکہ دیگر ٹیموں کے اہم کھلاڑی بھی زخمی ہوئے بلکہ آسٹریلیا کے تو ایک دو نہیں کپتان سمیت چار کھلاڑی میگا ایونٹ سے باہر ہوگئے لیکن ان کی جگہ آنے والوں نے انگلینڈ کے خلاف جیسی کارکردگی کا مظاہرہ کیا اس سے یہ کمی ظاہر نہ ہوئی۔ یہاں نااہلی ثابت ہوتی ہے ہماری ٹیم منیجمنٹ کی جنہوں نے اپنی پوری بینچ نہیں بنائی اور کسی کھلاڑی کا متبادل تک تیار نہیں کر سکے۔

چیمپئنز ٹرافی کے لیے تمام ٹیموں نے کئی ہفتے قبل اپنے اسکواڈز کا اعلان کر دیا تھا، لیکن میزبان پاکستان نے آئی سی سی کی ڈیڈ لائن سے کچھ وقت قبل ہی 15 رکنی اسکواڈ کا اعلان کیا۔ اسکواڈ کے اعلان میں اتنی تاخیر کے باعث سب کو توقع تھی کہ سلیکشن کمیٹی میگا ایونٹ کے لیے گوہر نایاب کھلاڑی سامنے لائے گی، لیکن جب اسکواڈ کا اعلان کیا گیا وہ بھی صرف ایک پریس ریلیز کے ذریعہ۔ یہ اعلان کھودا پہاڑ نکلا چوہا کے مترادف تھا اور ایسے ایسے نام سامنے آئے، جو وہم وگمان میں بھی نہ تھے۔ سابق کرکٹرز تو اس کو سفارش اور پیراشوٹ سلیکشن بھی کہنے سے نہ کترائے۔

جدت جہاں تمام شعبوں کو تبدیل کر رہی ہے، وہیں کرکٹ کو بھی تبدیل کر رہی ہے۔ اب کرکٹ تیز رفتار ہونے کے ساتھ کیلکولیٹڈ گیم بن چکا ہے۔ آدھے تیتر اور آدھے بٹیر والا زمانہ گیا، اب ہر پوزیشن کے لیے اسپیشلسٹ درکار ہوتے ہیں۔ سب کو توقع تھی کہ چیمپئنز ٹرافی پاکستان کی سر زمین پر ہو رہی ہے اور تمام ٹیمیں اپنے اسکواڈ میں دو، تین اور چار اسپنرز ساتھ لا رہی ہیں تو ہماری ٹیم جو ہوم گراؤنڈ پر کھیل رہی ہے اور حال ہی میں انگلینڈ اور ویسٹ انڈیز کو اسپن اسکواڈ سے زیر کیا تو لازمی اس میں یہ اسپنرز شامل ہوں گے لیکن جب اعلان ہوا تو صرف ایک اسپیشلسٹ اسپنر اور ایک ہی اوپنر دیکھ کر سب حیران رہ گئے۔
حقیقت تو یہ ہے کہ پاکستان چیمپئنز ٹرافی سے اسی وقت باہر ہو گیا تھا جب ان نادر اور نایاب کھلاڑیوں پر مشتمل اسکواڈ کا اعلان کیا گیا، جس میں صرف ایک اسپنر اور ایک اسپیشلسٹ اوپنر کے ساتھ اعلان کیا گیا۔ شائقین کرکٹ تو ٹھہرے جذباتی لیکن برسوں اس میدان میں کھیلنے والے سابق کرکٹرز بھی اس اعلان پر انگشت بدنداں ہوتے ہوئے بار بار اسکواڈ کو متوازن کرنے کے لیے مزید ایک اور اسپیشلسٹ اوپنر اور اسپنر کو شامل کرنے کا مشورہ دیتے رہے لیکن ہماری سلیکشن کمیٹی نہ جانے جاگتی آنکھوں کیا خواب دیکھ رہی تھی کہ اسپنرز کی مدد سے ہوم گراؤنڈ پر حالیہ کامیابیاں سمیٹنے کے باوجود ان فاسٹ بولرز پر تکیہ کیا جن کی وجہ سے ہم گزشتہ سوا سال میں ایشیا کپ، ون ڈے ورلڈ کپ اور ٹی ٹوئنٹی ورلڈ کپ کے پہلے مرحلے میں اسی انداز سے ذلت آمیز طریقے سے باہر ہوئے تھے۔

ٹی 20 ورلڈ کپ میں امریکا سے غیر متوقع شکست اور میگا ایونٹ سے اخراج کے بعد چیئرمین پی سی بی محسن نقوی نے دھواں دھار پریس کانفرنس کرکے ٹیم میں بڑی سرجری کرنے کا اعلان کیا تھا۔ لیکن سرجری کیا ہوتی، اس کی جگہ پاکستان ٹیم قوم کو ایک اور نیا زخم دے گئی ہے۔

ورلڈ کپ 2023 کی شرمناک شکست کے بعد ٹیم میں بڑی تبدیلیاں ہوئیں۔ کئی بڑے نام والے کھلاڑیوں کو ڈراپ کر کے دورہ آسٹریلیا کے لیے ون ڈے میں نئے کھلاڑیوں کو اسکواڈ میں شامل کیا گیا اور ان میں سے کئی نے کارکردگی دکھائی اور 22 سال بعد ان کی سر زمین پر ون ڈے سیریز جیتی۔ اس کے بعد جنوبی افریقہ کو اسی کے میدانوں میں وائٹ واش کیا لیکن جب اپنے ہوم گراؤنڈ پر چیمپئنز ٹرافی کا موقع آیا تو نہ جانے کس بقراط نے مشورہ دیا یا کہیں سے فون آیا کہ آسٹریلیا اور جنوبی افریقہ کو ان کی سر زمین پر ناکوں چنے چبوانے والے ان کھلاڑیوں میں سے بیشتر کو باہر کر کے اور وننگ کمبی نیشن توڑ کر اچانک کئی سال سے ٹیم سے باہر فہیم اشرف اور خوشدل شاہ کو لایا گیا اور پھر نتیجہ سب نے ہی دیکھ لیا۔

اس ذلت آمیز انداز سے ہوم گراؤنڈ پر ہی ایونٹ سے باہر ہونے پر کوئی ذمہ دار شرم تک محسوس نہیں کر رہا۔ لگتا ہے کہ سب کو تو سانپ سونگھ گیا ہے لیکن ہیڈ کوچ جو میگا ایونٹ کے دوران بھی نام نہاد فاسٹ ٹرائیکا سے جیت کی آس لگائے بیٹھے تھے اب پریس کانفرنس میں بھی ڈھٹائی سے ان ناکام کھلاڑیوں کا دفاع کر رہے ہیں۔

پاکستان کرکٹ ٹیم کا تسلسل کے ساتھ آئی سی سی ایونٹ سے اس طرح ذلت آمیز اخراج میں کھلاڑیوں سے زیادہ پاکستان کرکٹ بورڈ سمیت ٹیم منیجمنٹ، سلیکشن کمیٹی کی قابلیت اور پالیسیوں پر سوال اٹھاتا ہے۔ ملک میں سیاسی تبدیلیوں کے ساتھ چیئرمین بورڈ کی تبدیلی، ان کے بدلتے ہی ٹیم منیجمنٹ کی تبدیلیاں، پالیسیوں میں عدم تسلسل۔ قومی مفاد سے زیادہ ذاتی مفادات اور انا نے آج قومی ٹیم کو اس جگہ پہنچا دیا ہے جہاں دنیائے کرکٹ کے بڑے کھلاڑی سابقہ عالمی چیمپئن کی حالت زار پر افسوس کرنے کے ساتھ اب پاکستان ٹیم کا شمار بنگلہ دیش اور زمبابوے سے بھی گئی گزری ٹیموں میں کر رہے ہیں۔

اس وقت سوال یہ ہے کہ کیا پاکستان ٹیم میں اب بھی سدھار کی گنجائش ہے؟ تو اس کا جواب ہے بہتری کی گنجائش ہمیشہ رہتی ہے، اگر اخلاص اور قومی جذبے کے ساتھ کوششیں کی جائیں تو اندھیرے اب بھی روشنی میں بدل سکتے ہیں۔ غلطیوں سے سیکھنا باشعور قوموں کا شعار ہے۔ ہم بہت غلطیاں کرچکے، اگر اب بھی غلطیاں نہ سدھاریں تو کرکٹ کا حال بھی عنقریب قومی کھیل ہاکی جیسا ہوگا اور اگر ایسا ہوا تو شاید اچھا نہ ہو کیونکہ فرقہ واریت، لسانیت، صوبائیت اور سیاسی تفریق میں تقسیم اس قوم کو صرف ایک چیز ہی جوڑتی ہے اور وہ ہے کرکٹ۔ تو کرکٹ کو بچائیں ملک کے اتحاد کو بچائیں، پھر چاہے اس کے لیے بے رحمانہ اور سخت فیصلے کیوں نہ کرنے پڑیں۔ کاغذی ہیروز سے دامن چھڑا کر ایسے باصلاحیت لوگوں کو آگے لائیں جو پاکستان ٹیم کا مستقبل روشن کر سکیں کیونکہ پاکستان کرکٹ ہے تو کرکٹ میں بڑے نام بھی ہیں۔

تحریر: سائرہ فاروق

پاکستانی سماج میں شادی کسی بھی لڑکے یا لڑکی کی زندگی میں انتہائی اہم موڑ سمجھی جاتی ہے، جو نہ صرف دو افراد کو بلکہ دو خاندانوں کو بھی جوڑتا ہے۔ تاہم، بدلتے ہوئے وقت کے ساتھ ساتھ زندگی کے تقاضے اور ہماری ضروریات بھی بدل چکی ہیں۔

ماضی میں روایتی طور پر لڑکیوں‌ کی شادی والدین اور خاندان کی اوّلین ترجیح ہوتی تھی جب کہ یہ خیال بھی عام تھا کہ لڑکے کی شادی کر دی جائے تو وہ معاشی طور پر جلد مستحکم ہوسکتا ہے۔ لیکن آج صورتِ حال مختلف نظر آتی ہے۔ موجودہ دور میں شادی کا نام لیتے ہی لڑکے اور لڑکیاں گویا بدکنے لگتے ہیں۔ نئی نسل کا خیال ہے کہ کیریئر پر فوکس کرنا ضروری ہے۔ وہ ایسا کیوں سوچتے ہیں؟

اس سوال کا جواب سماجی، معاشی اور نفسیاتی پہلوؤں کو مدنظر رکھتے ہوئے دیا جاسکتا ہے۔

سب سے پہلی بات کہ معاشی استحکام یا مالی آسودگی آج کے دور کی ایک بڑی ضرورت ہے۔ پاکستان جیسے ملک میں جہاں مہنگائی میں روز بروز اضافہ ہو رہا ہے، وہاں شادی کے بعد یک دم اخراجات میں اضافہ اور مالی طور پر ذمہ داریاں اٹھانا مرد کے لیے ایک بڑا چیلنج بن سکتا ہے۔ شادی کے بعد صرف اسے ایک فرد کی نہیں بلکہ جلد ہی ایک کنبے کی ضروریات کو پورا کرنا پڑتا ہے۔ اگر شادی سے پہلے مرد یا عورت دونوں میں سے کوئی ایک بھی معاش کی کسی بھی شکل میں اپنا کیریئر بنا لیتا ہے، تو بعد کی زندگی کافی حد تک آسان ہو سکتی ہے۔ وہ جوڑے جو کسی شعبے میں‌ قدم جما لینے اور قدرے مستحکم ہو جانے کے بعد شادی کرتے ہیں، عام طور پر مالی مسائل میں کم الجھتے ہیں اور زیادہ خوشحال زندگی گزار سکتے ہیں۔

دوسرا اہم پہلو خود مختاری ہے۔ شادی سے پہلے کیریئر بنانا اور معاشی طور پر مستحکم ہونا مرد اور عورت دونوں کو یہ موقع دیتا ہے کہ وہ اپنی زندگی کے فیصلے خود کرسکیں۔پاکستانی سماج میں، خاص طور پر لڑکیوں کو شادی کے بعد اکثر اوقات مالی اور سماجی طور پر دوسروں پر انحصار کرنا پڑتا ہے، جس کی وجہ سے وہ اپنی زندگی کے کئی اہم فیصلے خود نہیں کر پاتیں۔ شادی سے پہلے اگر ملازمت پیشہ یا کاروباری فرد کسی قدر بہتر مالی پوزیشن میں ہو اور مستحکم ہو رہا ہو، تو وہ اپنی زندگی کے فیصلے زیادہ آزادی اور خود مختاری کے ساتھ کر سکتا ہے۔ اس سے نہ صرف اس کی ذاتی زندگی بہتر ہوتی ہے بلکہ وہ ازدواجی زندگی میں بھی اعتماد اور عزت پاتا ہے۔

تعلیم یا کوئی ہنر سیکھنے کے بعد ایک اچھی نوکری یا کاروبار شروع کرنا صرف مالی فوائد ہی نہیں دیتا بلکہ کسی فرد کی خود اعتمادی میں بھی اضافہ کرتا ہے۔ شادی کے بعد کی زندگی میں کئی طرح کے چیلنج سامنے آ سکتے ہیں، جن کا مقابلہ کرنے کے لیے مضبوط اعصاب اور ذہنی پختگی درکار ہوتی ہے۔ ایک کامیاب کیریئر ان دونوں چیزوں کو بڑھاتا ہے۔ جب کوئی فرد ہر لحاظ سے خود مختار ہوتا ہے تو وہ زیادہ بہتر انداز میں اپنے ازدواجی اور خاندانی تعلقات کو بھی چلا سکتا ہے۔

پاکستانی معاشرت میں ایک بڑا مسئلہ یہ بھی ہے کہ شادی کو زیادہ تر عورتوں کے لیے "زندگی کی سب سے بڑی کام یابی” سمجھا جاتا ہے، جب کہ مردوں سے یہ توقع کی جاتی ہے کہ وہ شادی کے فوراً بعد ایک مضبوط کفیل بن کر سامنے آئیں۔ اس روایتی سوچ کی وجہ سے بہت سے نوجوان جذباتی اور ذہنی دباؤ کا شکار ہوجاتے ہیں۔ خاص طور پر وہ افراد جو کسی پیشہ کا تعین اور یافت و معاش کی بنیاد رکھے بغیر شادی کرتے ہیں، بعد میں مختلف قسم کے مسائل کا سامنا کرتے ہیں۔ لڑکی کے لیے بھی شادی کے بعد کیریئر بنانا مشکل ہوجاتا ہے کیونکہ زیادہ تر لڑکیوں کو سسرال میں اس حوالے سے سپورٹ نہیں ملتی اور دوسری طرف وہ خود بھی گھریلو کاموں میں الجھ کر رہ جاتی ہیں۔ اگر شادی سے پہلے پیشہ ورانہ سفر کا آغاز کیا جائے اور مالی استحکام یا کیریئر بنانے پر توجہ دی جائے تو بعد میں زندگی کو زیادہ متوازن رکھا جا سکتا ہے۔

ایک اور پہلو یہ بھی ہے کہ بہترین کیریئر بنانے والے اور مالی طور پر مضبوط کسی بھی مرد کو زیادہ بہتر جیون ساتھی چننے کا موقع مل سکتا ہے۔ پاکستانی معاشرت میں شادی کے فیصلے اکثر والدین اور خاندان کے دباؤ میں کیے جاتے ہیں، اور نوجوانوں کو اپنے فیصلے کرنے کی زیادہ آزادی نہیں دی جاتی۔ جب کوئی فرد خود مختار ہو جاتا ہے، تو وہ اپنے لیے زیادہ بہتر فیصلے کر سکتا ہے۔ ایک بہتر یا مستحکم کیریئر رکھنے والا شخص شادی کے بعد جذباتی، سماجی اور مالی دباؤ کا کم شکار ہوتا ہے، جس سے ازدواجی تعلقات بھی زیادہ مضبوط ہوتے ہیں۔

پاکستانی سماج میں طلاق اور ازدواجی مسائل کی شرح میں بھی اضافہ ہو رہا ہے۔ اس کی بڑی وجہ مالی مشکلات، ذہنی دباؤ، اور غلط توقعات ہیں۔ اگر شادی سے پہلے کیریئر پر توجہ دی جائے تو ازدواجی زندگی کے عمومی مسائل کا حل آسانی سے نکالا جا سکتا ہے۔ یہاں ہم شادی کرنے والے لڑکے اور لڑکی دونوں کی بات کریں تو ایک ایسا جوڑا جو مالی طور پر آسودہ اور خود مختار ہو، وہ زیادہ بہتر انداز میں اپنی شادی شدہ زندگی کو سنبھال سکتا ہے اور ایک دوسرے کا ساتھ زیادہ بہتر طریقے سے نبھا سکتا ہے۔

کیریئر پر توجہ دینے کا ایک اور فائدہ یہ بھی ہے کہ اگر ازدواجی زندگی میں کسی بھی قسم کے مسائل پیدا ہوں، تو ایک فرد کے پاس خود کو سنبھالنے کا راستہ موجود ہوتا ہے۔ بدقسمتی سے پاکستان میں خواتین کو اکثر اوقات شادی کے بعد شوہر یا سسرال کے رحم و کرم پر چھوڑ دیا جاتا ہے۔ اگر کوئی لڑکی شادی سے پہلے مالی طور پر مستحکم نہ سہی مگر اپنے پیروں پر کھڑی ہوگی تو وہ کسی بھی ناخوش گوار صورتِ حال میں اپنی زندگی کو بہتر طریقے سے سنبھال سکتی ہے۔

دیکھا جائے تو شادی سے پہلے کیریئر بنانا صرف ایک خواہش نہیں بلکہ آج کے دور میں ایک ضرورت بن چکا ہے۔ مضبوط کیریئر اور بہتر مالی پوزیشن رکھنے والا شخص شادی کے بعد زندگی کے نشیب و فراز کا بہتر طریقے سے سامنا کر سکتا ہے اوراپنے مستقبل کے حوالے سے بھی مثبت اور دیرپا فیصلے کرسکتا ہے۔ شادی کرنے میں جذبات سے زیادہ حقیقت پسندی سے کام لینا چاہیے۔ ایک کام یاب اور خوش حال ازدواجی زندگی میں مضبوط کیریئر اور استحکام بہت اہمیت رکھتا ہے جس کے بغیر شادی تو ممکن ہے، مگر ایسے جوڑے کو زندگی کے کسی بھی موڑ پرغیر یقینی صورت حال کا سامنا کرنا پڑسکتا ہے جس سے نمٹنا اکثر مشکل ہوجاتا ہے۔