دنیا بھر میں تین ایسے فنون ہیں، جن کو پرفارمنگ آرٹس کی بنیاد سمجھا جاتا ہے، وہ تھیٹر، موسیقی اور رقص ہیں۔ پاکستان میں موسیقی کو سب سے زیادہ عروج ملا۔رقص تو کسی طور اپنا نام ٹھیک طور سے درج ہی نہ کروا سکا۔ باقی رہ گیا تھیٹر، تو اس فن کے نام پر کچھ کام ہوا، مگر اس تناظر میں ہونے والی تمام کوششیں انفرادی تھیں۔ کسی ادارے کے تحت جو کام ہوا، اس میں صرف دو ادارے "نیشنل اکیڈمی آف پرفارمنگ آرٹس” اور "کراچی آرٹس کونسل” دکھائی دیتے ہیں، جن میں سے اوّل الذکر تو مغربی ڈراما نگاری کے اثر سے تاحال باہر نہیں آسکا، البتہ کراچی آرٹس کونسل نے دیر سے سہی، مگر مقامی تھیٹر پر اپنی توجہ مرکوز کی، جو قابلِ تحسین ہے۔ اس سلسلے میں "عوامی تھیٹر فیسٹیول” تازہ ترین پیشکش ہے، جس میں ہر طرز اور مزاج کے تھیٹر کو جگہ ملی۔ اس ناٹک میلے میں سے ہم نے جس کھیل کا انتخاب کیا، اس کاعنوان”مذاقِ خاص” ہے۔

مرکزی خیال/ مکالمے/ لفظیات

یہ انسانی فطرت ہے، ہم جذباتی طور پر جن مقامات سے جڑے ہوتے ہیں، اس کا موازنہ ضرور کرتے ہیں کہ وہ مقام ماضی میں کیسا تھا اور حال میں کیسا ہے۔ ایسے ہی جذبات کے مد و جزر پر مبنی کھیل "مذاقِ خاص” تھا، جس میں عہدِ حاضر کے کراچی کا ایک معروف مقام "آرام باغ” دکھایا گیا ہے، جو ماضی کی شان دار تہذیب کا نوحہ پیش کررہا ہے۔ وہ عہد جب کراچی تہذیب و تمدن کا مرکز ہوا کرتا تھا، اس وقت اس باغ کا نام "رام باغ” تھا، جو آرام باغ ہو گیا۔ تہذیبِ گم گشتہ کی ایک ان کہی داستان کو مرکزی خیال کے ذریعے تمثیلی تخلیق کر کے پیش کیا گیا۔ یہ ترکیب تو انتہائی عام ہے، مگر اس کو جس خاص انداز سے پیش کیا گیا، وہ متاثر کن ہے۔ اسے ڈراما نویس نے "شہرِ خراب کا رام باغ” پکارا ہے اور یہ بنیادی تصور دیا کہ "تہذیب روایات نہیں رویہ ہے۔”

اس تصور کو مزید بیان کرتے ہوئے جمال مجیب قریشی کہتے ہیں کہ "رام باغ عوام کے لیے کبھی ایک تفریح گاہ تھی، اب ایک اجاڑ ویران باغ ہے۔ شہر کے معیاری نفسیاتی اسپتال سے مریض بھاگ کر اکثر اس سرکاری باغ میں آکر چھپ جاتے ہیں۔ یہ سرکاری تحویل میں ایک ایسا مقام ہے جو ایک ایک گم گشتہ طبقاتی معاشرے کا کھنڈر بھی ہے۔ یہ ایک شکستہ مقام ہے۔ اس کے ہر ذرے پر ایک سوالیہ نشان کندہ ہے۔ اس باغ میں پھیلے سوکھے پتوں کی نیچے ایک آتش فشاں دہک رہا ہے۔ یہ ایک اجاڑ زنداں ہے۔ یہاں رات کے وقت بے چین ارواح کا گزر ہوتا ہے۔”

اس کھیل میں اداکاروں نے جو مکالمے ادا کیے، اور جو خود کلامی (مونو لاگ) تھے، وہ ذو معنی اور شعریت سے لبریز تھے، ادبیت سے بھرپور تھے اور صرف یہی نہیں بلکہ بین السطور بھی ایسے موضوعات تھے، جو آج کے حالاتِ حاضرہ کی منظر کشی کرتے ہیں، یعنی وہ باتیں بیان ہوئیں، جنہیں اب سماج میں کہنے کی کھلے بندوں اجازت نہیں ہے۔ اس باریک کام کو ڈراما نویس جمال مجیب قریشی نے بھرپور طور سے کر دکھایا۔ پھر اس کھیل کی ایک اور شان دار بات اس کی لفظیات ہیں، جس کو سماعت کر کے اور اسٹیج پر مکالموں کی صورت میں دیکھ کر لطف آگیا۔ اس کھیل میں وہ مذاق جو آپ کے ذوق کا عکاس ہوتا تھا، اس کو بھی بیان کیا گیا اور اس مذاق کو بھی، جس کو صرف ہم اڑانا مقصود سمجھتے ہیں۔ اس ناٹک کی کہانی کے بیان میں تہذیب کے زوال کے ساتھ ساتھ جس طرح فکشن کے دو کرداروں کو ملا کر کہانی بیان کی گئی ہے، وہ ترکیب بھی دل کو بھائی ہے۔ایک طرف امتیاز علی تاج کے ڈرامے کی "انار کلی” اور دوسری طرف مرزا ہادی رسوا کے ناول کی امراؤ جان ادا کا امتزاج دکھایا گیا ہے۔

کہانی و کردار

اس ڈرامے کا آغاز ایک صحافی کے کردار "شاہد میر” کے نمودار ہونے سے ہوتا ہے، ( جمال مجیب قریشی) جو صحافی ہے، آرام باغ نامی ایک پارک میں بینچ پر ماضی کی یادوں میں غرق ہے۔ پس منظر میں ایسی موسیقی ہے، جس سے ناسٹیلجیا بڑھ جاتا ہے، ماضی کی تصویریں ایک ایک کر کے ذہن کے پردے پر ابھرنے لگتی ہیں اور اسٹیج پر کرداروں کی صورت میں بھی عہدِ گم گشتہ کے یاد آنے کی شدت میں اضافہ ہونے لگتا ہے۔ اسی ترتیب میں اگلا دلکش کردار "امراؤ جان ادا” کا ہے (فاطمہ علی بھائی)، جو اپنی اسی سج دھج سے طلوع ہوتا ہے، جو اس کردار کی شان ہے۔ ان دونوں کرداروں کے مکالمات، تاریخی پس منظر، شان دار اور منظوم و غیر منظوم مکالمات کے ساتھ کہانی آگے بڑھتی ہے۔ یہ عہدِ حاضر ہے، جس کو ماضی اور حال کے کرداروں کے ساتھ ملا کر دکھایا گیا ہے۔

اسکرپٹ کے منظر نامے کی ایک جھلک

ڈرامے کا آغاز استاد بڑے غلام علی خان کی ٹھمری "آجابالم پردیسی”سے شروع ہوتا ہے۔ ایک صدا کار(جمال مجیب قریشی) کی صدا اسٹیج پر اور ہال میں گونجتی ہے کہ "یہ شہر خرابی کا رام باغ ہے، جو اب آرام باغ ہے۔ اور میں ایک جرنلسٹ ہوں۔ آدھا سچ اخبار میں چھپتا ہے اور پورا سچ میں اپنی ڈائری میں لکھتا ہوں۔ میں کہانیاں لکھتا ہوں، مظلوموں کی محرومیاں، زمانے کی ستم ظریفیاں، میرا قلم زخم قلم بند کرتا ہے۔ یہ رام باغ بھی زخموں سے چور ہے۔ کبھی یہاں گل ہی گل تھے اور اب خار ہی خار ہیں۔ کبھی یہاں پیڑوں کی چھاؤں تلے رومیو جولیٹ۔ شیریں فرہاد، لیلی مجنوں، ہیر رانجھا نظر آتے تھے۔ اب یہاں کچرے کا ڈھیر نظرآتا ہے۔ نشے کے عادی افراد اور گداگر نظر آتے ہیں۔ یہ باغ اب ایک باغ کم اور ایک کھنڈر زیادہ ہے۔

کبھی رام باغ کی ایک جھلک دیکھنے بہت سے لوگ آتے تھے، اب یہاں کوئی نہیں آتا۔ اس سیاہ رات میں یہ باغ سسکیاں لے رہا ہے۔ کھنڈر سے بے چین روحوں کی آوازیں میرے تعاقب میں ہیں۔ یہ رات ایک درد بھری رات ہے۔ میں سونا چاہتا ہوں پر مجھے نیند نہیں آتی۔ یادیں مجھے سونے نہیں دیتیں۔ رام باغ کی ایک سہانی یاد آج تک میرے خیالوں میں تازہ ہے۔ وہ رات میں کبھی بھول نہیں پایا۔ کاش وہ رات کبھی پھر سے بسر ہو۔ کاش میری محبت پھر سے میری نظروں کے سامنے آجائے۔ کاش میں پھر سے اظہار محبت کرسکوں۔ "صدا کاری کے ایسے کئی شاہکار تھے، جنہوں نے حاضرین کی سماعتوں کو معطر کیا۔

دیگر کردار اور کہانی کا کلائمکس

ان دو مرکزی کرداروں کے بعد تین مزید کردار اسٹیج پر وارد ہوتے ہیں، جو ہیں حافظ (منان حمید)، ایک پولیس افسر (صابر قریشی) اور ایک دانشور ڈاکٹر عرفان اللہ (شاہد نظامی)۔ ڈاکٹر عرفان اپنی اردو شاعری کی بابت، گفتگو کے دوران معاشرے میں موجود طبقاتی فرق کے بارے میں بات کرتے ہیں۔ وہ پاگلوں کے ڈاکٹر کے طور پر اس کردار میں جلوہ گر ہوئے ہیں۔ اگلے منظر میں ایک اور تاریخی کردار، انار کلی (کومل ناز) سلیم (جمال مجیب) کے ساتھ محو گفتگو دکھایا گیا ہے۔ اس کہانی کا کلائمکس اس بات پر ہوتا ہے کہ کون سمجھ دار اور کون پاگل اور عہدِ حاضر کی حالت زار بگڑتے ہوئے کہاں تک آپہنچی ہے اور تہذیب کے نام پر کیا کچھ ہے، جو ہم کھو چکے ہیں۔ کہانی کا دورانیہ مختصر تھا، کردار میں جامعیت تھی اور مکالمے چست تھے، جن میں چومکھی پہلو تھے۔ ایک عرصے بعد اتنی اچھی کہانی کسی منچ پر دیکھنے کو ملی۔

اداکاروں کی اداکاری

اس کھیل میں تمام اداکاروں نے اپنی بساط میں اچھی اداکاری کی، مگر "امراؤ جان ادا” کے کردار میں فاطمہ علی بھائی نے اپنے فن سے حاضرین کو مبہوت کر دیا اور حیرت کی بات یہ ہے کہ یہ ان کا پہلا اسٹیج ڈراما تھا، جس میں انہوں نے اپنی اداکاری کے جوہر دکھائے۔ اس کا کریڈٹ، کھیل کے ہدایت کار نعمان خان کو جاتا ہے، جنہوں نے ان سے اس قدر عمدگی سے کام لیا۔ جمال مجیب قریشی اور کومل ناز نے بھی اپنی اداکاری سے متاثر کیا جب کہ دیگر فن کاروں نے بھی اس رنگین مگر اداس ناٹک میں اپنے اپنے حصے کے رنگ بخوبی بھرے، مگر مزید نکھار پیدا کیا جا سکتا تھا۔

ہدایت کار کی ہدایت کاری

نعمان خان کراچی آرٹس کونسل سے وابستہ اور تھیٹر کے عاشق ہیں۔ انہوں نے اس فن کی باقاعدہ تعلیم حاصل کی ہے۔ ان کی تازہ ترین پیشکش نے عوامی تھیٹر فیسٹیول میں ایسے حاضرین کو چونکا دیا ہے، جنہیں تہذیب و تمدن اور شعر و ادب جیسے موضوعات میں دلچسپی ہے۔ چالیس منٹس کے مختصر دورانیے میں، منچ پر دو ادوار کو پیش کرنا، دو تہذیبوں کا موازنہ اور تجزیہ کرنا ایک باریک اور مشکل کام ہے، جس کو بہت عمدگی سے نعمان خان نے جمال مجیب قریشی کے شان دار اسکرپٹ و صدا کاری کی بدولت نبھایا۔ امید ہے وہ مستقبل میں بھی ایسے کھیل باذوق افراد اور مداحوں کے لیے پیش کرتے رہیں گے۔

آخری بات

یہ ناٹک، کہانی اور لفظیات کے اعتبار سے سب شعبہ جات میں نمایاں رہا۔ اداکاری اور اسٹیج مینجمنٹ میں بھی مزید کام ہو سکتا تھا۔ پورے کھیل میں موسیقی کی صورت میں فلمی رنگ غالب رہا، جو نہیں ہونا چاہیے تھا۔ مجموعی طور پر ہدایت کاری عمدہ اور کہانی نویسی شان دار تھی۔ جمال مجیب قریشی، نعمان خان اور ان کی پوری ٹیم مبارکباد کی مستحق ہے۔ تھیٹر سے وابستہ اداروں کو چاہیے، اس طرز کے کھیلوں کی حوصلہ افزائی کرتے ہوئے ان جیسے فن کاروں کو مزید مواقع دیں تاکہ ہم مقامی اور حقیقی تھیٹر کو فروغ دے سکیں۔

آج عہدِ حاضر میں، اگر اردو ادب کے دس بڑے اور اہم ناولوں کی فہرست مرتب کی جائے تو اس میں جمیلہ ہاشمی کا ناول ”دشتِ سوس“ سرِ فہرست ہوگا۔ تصوف پر مبنی، حسین بن منصور حلاج کی شخصیت کی عکاسی کرتا ہوا یہ ناول تاریخی طور پر جو اہمیت رکھتا ہے، اس کی اپنی حیثیت ہے، لیکن اردو زبان، شان دار نثر اور کہانی کی بُنت میں یہ ناول اپنے وقت کے کئی بڑے ناولوں سے آگے ہے۔ اس ناول میں اردو زبان، نثر کے پیرائے میں شاعرانہ بلندی کو چھوتی ہوئی محسوس ہوتی ہے۔ یہ ناول اس وقت لکھا گیا، جب اردو ادب کے منظر نامے پر قرۃ العین حیدر، عبداللہ حسین، بانو قدسیہ، ممتاز مفتی اور انتظار حسین جیسے منجھے ہوئے ادیب ناول نگاری کررہے تھے۔ ایسے بہت سارے مہان ادیبوں کے درمیان جمیلہ ہاشمی نے ”دشتِ سوس“ اور ”تلاشِ بہاراں“ جیسے ناول لکھ کر نمایاں مقام حاصل کیا۔ اس ناول کو سنگِ میل پبلی کیشنز، لاہور نے شائع کیا ہے۔ تھیٹر کے لیے یہ ناٹک اسی ناول ”دشتِ سوس“ سے ماخوذ ہے، جس پر تبصرہ پیشِ خدمت ہے۔

مرکزی خیال/ کہانی

مرکزی خیال اسلامی تاریخ کی مشہور صوفی شخصیت ”حسین بن منصور حلّاج“ کی سوانح کو بیان کرتا ہے۔ تصوف سے وابستہ منصور حلّاج نے اناالحق کا نعرہ لگایا اور معتوب ٹھہرےاور اس کی پاداش میں انہیں سوئے دار جانا پڑا۔ اسلامی تاریخ میں بالخصوص تصوف کے تناظر میں ان کی روداد کو تفصیل سے بیان کیا گیا ہے۔ جمیلہ ہاشمی کے لکھے ہوئے ناول کی خوبی یہ ہے کہ انہوں نے دل کو چُھو جانے والی نثر میں اس ناول کو لکھا اور ان کی نثر کا انداز بھی شاعرانہ ہے، جیسے صوفیوں کی شاعری کو نثر میں پرو دیا گیا ہو۔ یہی وجہ ہے تصوف پر مبنی ادب کی پوری تاریخ میں اس ناول کا مقام جداگانہ رہا، کیونکہ اس ناول کا پلاٹ، کردار، زبان و بیان اور اسلوب سب سے مختلف تھا۔ آج بھی قارئین کو یہ ناول مستغرق رکھے ہوئے ہے۔

مذکورہ تھیٹر کا کھیل، جس کا عنوان ناول کے نام پر ہی ہے، اس کی ڈرامائی تشکیل شاہنواز بھٹی کی کاوش ہے۔ ایک ضخیم ناول سے تھیٹر کے منچ کے لیے ان کی ماخوذ کہانی تقریباً ڈیڑھ گھنٹے کے دورانیے پر محیط ہے۔ سب سے پہلے تو وہ داد کے مستحق ہیں کہ انہوں نے اس چیلنج کو قبول کیا اور دشتِ سُوس جیسے ناول کو ناٹک کی کہانی میں بدلا۔ ان کی کوشش بہت متاثر کن ہے، مگر جو ناول پڑھ چکے ہیں، وہ ظاہر ہے اس ڈرامائی تشکیل سے متاثر نہیں ہو پائیں گے، کیونکہ اس ناول کی سب سے نادر بات اس میں برتی گئی زبان تھی، جس کو ہدایت کار اور اخذ کنندہ نے ہلکی پھلکی زبان میں منتقل کر دیا، جس کی وجہ سے ناول کا مجموعی تاثر زائل ہو گیا۔

ہدایت کاری

اس کھیل کی ہدایت کاری کے فرائض بھی شاہنواز بھٹی نے انجام دیے، جو طویل عرصے سے تھیٹر اور فلم کے شعبے سے وابستہ ہیں۔ اس کھیل میں انہوں نے ایک خاص سیاہ پس منظر میں پوری کہانی پیش کی۔ کھیل کی طوالت زیادہ ہونے کی وجہ سے ان کو محسوس ہوا کہ حاضرین اکتاہٹ کا شکار ہوسکتے ہیں، تو انہوں نے ایک گھنٹے کے دورانیے کے بعد دس منٹ کا وقفہ دے دیا، میرے خیال میں یہ ڈرامائی موڑ اس ناٹک کی موت تھی۔ اگر یہ تھیٹر کے عام طور پر معین اصولوں کے مطابق بغیر کسی وقفے کے کہانی کو جاری رہنے دیتے تو دھیرے دھیرے کہانی کا جو تاثر دیکھنے والوں پر طاری ہوا تھا، وہ دم نہ توڑتا۔ اب عالم یہ تھا کہ وقفے کے بعد حسین بن منصور حلّاج کا کردار جب اپنا مونولوگ بول رہا تھا تو حاضرین میں ایک ہلچل تھی، جیسے کہ ابھی تک وقفہ ختم نہ ہوا ہو۔ جمے جمائے تاثر کو وقفہ دے کر ضائع کر دینا ایک تکنیکی غلطی تھی، جو اس کھیل میں کی گئی۔

کھیل پر ڈیزائن کیے گئے کرداروں کی اداکاری کو ایک ہی فریم میں ڈیڑھ گھنٹے تک رکھ کر دکھایا گیا، جس سے اکتاہٹ ہونا فطری عمل تھا۔ اس کھیل کو ایک گھنٹے سے زیادہ کا نہیں ہونا چاہیے تھا اور چند فریم ضرور بدلنے چاہیے تھے۔لائٹنگ کا استعمال بھی کم رکھا گیا۔ لائیو موسیقی کا اہتمام عمدہ تھا، مگر اس کا استعمال بھی انتہائی محدود کیا، جب کہ اس کی بدولت ناٹک میں مزید جان پڑ سکتی تھی۔ ملبوسات کو ارم بشیر نے ڈیزائن کیا، جو کہانی کی کیفیت سے مطابقت رکھتے تھے۔ مجموعی طور پر ایک اچھی کوشش تھی، جس کو سراہا جانا چاہیے۔

اداکاری

اس کھیل میں مرکزی کردار حسین بن منصور حلاج کا تھا، جس کو تھیٹر سے وابستہ نوجوان اداکار ارشد شیخ نے عمدگی سے نبھایا۔ افسانوی شہرت کے حامل اس صوفی کردار کو اس کے والد یعنی منصور حلاج کی نسبت سے یاد کیا جاتا ہے۔ یہ کردار پارس مسرور نے نبھایا اور ہمیشہ کی طرح اپنی اداکاری سے متاثر کیا۔ دیگر اداکاروں میں بھی سب نے اپنے اپنے حصّے کے کرداروں کو خوب نبھایا، بالخصوص جنید بغدادی کے کردار میں سرفراز علی، ابو عمر قاضی کے کردار میں زبیر بلوچ، آقائے رازی کے کردار میں مجتبیٰ زیدی، اغول کے کردار میں طوبیٰ نعیم، محمی کے کردار میں عامر نقوی اور ہندی سوداگر کے کردار میں نادر حسین قابل تعریف ہیں۔ باقی سب اداکاروں نے بھی اچھا کام کیا، لیکن مذکورہ ناموں نے اپنے کرداروں سے کہانی میں ایک کیفیت پیدا کر دی جس کا سہرا ہدایت کار کو بھی جاتا ہے۔

آخری بات

یہ کھیل چونکہ آشکارہ آرٹ پروڈکشن کا تھا، جب کہ اس کو نیشنل اکادمی آف پرفارمنگ آرٹس کے ضیا محی الدین تھیٹر ہال میں پیش کیاگیا۔ اب ناپا کو یہ بات سمجھنی چاہیے کہ مغربی اثر سے نکل کر مقامی رنگ کو اپنی کہانیوں میں جگہ دیں۔ اردو ادب اور دیگر پاکستانی زبانوں کے اندر کہانیوں کے خزانے موجود ہیں، انہیں کوشش کرنا ہو گی، ایسی کوشش جو شاہنواز بھٹی صاحب نے کی۔ اب جنہوں نے جمیلہ ہاشمی کا ناول نہیں پڑھا ہوا، وہ اس کھیل سے لطف اندوز ہو سکتے ہیں، لیکن جو اس ناول کے قاری ہیں، ان کے سامنے ناٹک کے کرداروں سے ناول کا بیانیہ اور کردار بار بار ٹکرائیں گے، جو کہ فطری بات ہے۔ ایسے ناول بہت کم لکھے جاتے ہیں، اس پر ایک سے زائد تھیٹر کے ڈرامے بننے چاہییں۔ پہلی کوشش پر شاہنواز بھٹی اور ان کی پوری ٹیم مبارک باد کی مستحق ہے۔

اس ناول کی ابتدا جس منظر سے ہوتی ہے اور قاری اسے پڑھنا شروع کرتا ہے تو ناول کے پہلے باب صدائے ساز میں، دوسرے صفحہ پر ایک کردار کچھ یوں گویا ہے کہ ہم سنتے ہوئے مبہوت ہو جائیں۔ تھیٹر کے لیے ناٹک کی شروعات بھی اسی سے ہوئیں۔ وہ کلام ملاحظہ کیجیے، انہیں پڑھ کر اور سن کر ایسا محسوس ہوتا ہے کہ یہ الفاظ نہیں ہیں بلکہ پھول ہیں، جن کو ایک صوفی پر نچھاور کیا جا رہا ہے اور کبھی محسوس ہوتا ہے کہ یہ کل زندگی کا فلسفہ ہے اور اس ناول اور کہانی کا خلاصہ بھی، جس کو یہاں نظم کیا گیا ہے۔ جمیلہ ہاشمی کی اس شان دار نثر کے ساتھ ساتھ یہ نظم، جس میں کردار کچھ یوں گویا ہے

عشق ایک مزرعِ گلاب ہے
اس کی پگڈنڈیاں ان کے لیے ہیں
جو عاشقوں کے قبیلے سے تعلق رکھتے ہیں
عشق کی نشانیاں توفیق اور مہربانیاں
ان کی منزل ہیں
اور مہجوریاں غم خاموش اور برداشت
کبھی نہ ختم ہونے والا سوز ہمیشگی اور اذیت ناکی
اس کی شان ہے
اس کے سوا باقی سب گم کردہ منزل
جہالت اور وحشت تنہائی
اور بے جادہ گردش ہے
عشق مزرعِ زندگی ہے
(دشتِ سُوس)

ایک اور کمسن پھول کو کھلنے سے پہلے ہی مسل دیا گیا۔ انسانی لبادے میں وحشی درندے نے حیوانیت کی انتہا کرتے ہوئے 7 سالہ صارم پر جو وحشیانہ تشدد کیا، اس نے سب کو لرزا کر رکھ دیا ہے اور اب اس کے غمزدہ والدین انصاف کے منتظر ہیں۔

اس درد ناک کہانی کا آغاز 7 جنوری کو نارتھ کراچی کے علاقے میں واقع بیوت الانعم اپارٹمنٹ میں ہوا۔ منگل 7 جنوری کا سورج ننھے صارم کے گھر والوں کے لیے ایک اذیت ناک دن لے کر طلوع ہوا۔ اس دن صارم گھر سے مدرسے کے لیے بھائی کے ہمراہ نکلا ضرور لیکن پھر کبھی واپس نہ آ سکا۔ شام مدرسے سے واپسی پر جب بڑا بھائی صارم کے بغیر گھر پہنچا تو اس کی ڈھونڈ مچی۔ اڑوس پڑوس اور رشتہ داروں میں پتہ کیا گیا، لیکن کسی کو بچے کے بارے میں کچھ معلوم نہ تھا۔
تھک ہار کر والدین تھانے پہنچے اور صارم کی گمشدگی کی رپورٹ درج کرائی۔ بلال ٹاؤن پولیس حرکت میں آئی۔ بچے کی تلاش میں فلیٹوں کی تلاشی لینے کے ساتھ ساتھ پانی کے زیر زمین ٹینکوں، سیوریج لائنوں، چھت سمیت دیگر مقامات کی مکمل تلاشی لی گئی جبکہ شک کی بنیاد پر متعدد مقامات پر چھاپے بھی مارے لیکن ننھے بچے کا کوئی سراغ نہیں مل سکا۔ مدرسے کی چھٹی کے وقت لائٹ گئی ہوئی تھی، اس لیے سی سی ٹی وی فوٹیج بھی نہ مل سکی۔

اسی دوران گمشدہ صارم کے والد کو کچھ مشتبہ میسجز اور مس کالز آئیں جن میں تاوان کے لیے آن لائن پیسوں کا تقاضہ کیا گیا تاہم جب ان نمبروں کی تفتیش کی گئی تو یہ میسجز اور کالز پنجاب اور بلوچستان سے آئیں اور پولیس نے اس کو غیر متعلقہ قرار دے دیا۔

صارم کے والدین اور اہلخانہ کی بچے کے مل جانے کی امید اس کے لاپتہ ہونے کے 11 دن بعد اس وقت دم توڑ گئی جب 18 جنوری کو عمارت کے زیر زمین پانی کے ٹینک سے ہی اس کی تشدد زدہ لاش برآمد ہوئی۔ لاش کے ساتھ اس کی مدرسہ کی ٹوپی اور گیند بھی ملی۔

عباسی شہید اسپتال میں بچے کے پوسٹمارٹم میں اس سے زیادتی کی تصدیق تو ہوئی، ساتھ ہی صارم کو ہوس کا نشانہ بنانے کے بعد کس بے دردی سے قتل کیا گیا۔ یہ پتہ بھی اسی پوسٹمارٹم رپورٹ سے چلا جس نے سب کے دل دہلا دیے۔ اس رپورٹ کے مطابق صارم کی لاش چار دن پرانی تھی۔ معصوم بچے کی گردن کی ہڈی ٹوٹی ہوئی تھی اور اس کا گلا دبا کر قتل کیا گیا تھا۔ جسم پر ایک دو نہیں بلکہ زخموں کے 13 نشانات پائے گئے۔ جلد مختلف مقامات سے چھلی ہوئی تھی۔ اس کے پھیپھڑے بھی سکڑ گئے تھے جب کہ پیشانی کے علاوہ تمام زخم مرنے سے پہلے کے تھے۔

لاش ملنے کے بعد پولیس کی سست رفتار تحقیق میں پھرتیاں آ گئیں۔ ملزمان کی گرفتاری کے لیے سراغ رساں کتوں کی مدد لی گئی اور راتوں رات آپریشن کر کے فلیٹ سے دو مشکوک افراد گرفتار کیے گئے۔ پولیس نے شک کی بنا پر قریبی عزیز، مدرسے کے معلم، والو مین سمیت کئی افراد کو حراست میں لیا۔ بچے کے اعضا کے ساتھ گرفتار ملزمان کے خون کے نمونے اور کئی دیگر اہم شواہد بھی لے کر ڈی این اے کے لیے لیبارٹری بھیج دیے گئے جن کی رپورٹس اب تک موصول نہیں ہوچکی ہیں جب کہ اسی دوران اس کیس کی تحقیقات والی ٹیم نے یہ بھی امکان ظاہر کیا کہ صارم گمشدگی کے بعد سے موت تک اپارٹمنٹ سے باہر نہیں لے جایا گیا۔

اس واقعہ کی تحقیقات چار رکنی کمیٹی تشکیل دی گئی، جس کا کہنا تھا کہ وقوعہ کے روز جب پولیس وہاں پہنچی تو کرائم سین کافی حد تک خراب ہو چکا تھا۔ اسلیے ڈی ایس پی فرید احمد خان کی سربراہی میں خصوصی انویسٹی گیشن ٹیم نے ایک بار پھر جائے وقوعہ کا دورہ کیا اور کرائم سین ری ایکٹ کر کے واقعہ کے سراغ تک پہنچنے کی کوشش کی۔

تاہم اس سے اگلے روز ہی 25 جنوری کو تحقیقاتی ٹیم نے صارم کی ابتدائی پوسٹمارٹم رپورٹ پر غیر تسلی بخش ہونے کا شبہ ظاہر کیا جس کی وجہ اس کیس کے واقعاتی شواہد اور ابتدائی پوسٹمارٹم رپورٹ میں بہت کم مماثلت بتائی گئی ہے۔ اس کے ساتھ ہی تحقیقاتی ٹیم نے میڈیکولیگل آفیسر کو سوالنامہ بھیجنے کا فیصلہ کیا ہے جو ڈی این اے، کیمیکل ایگزامن رپورٹ آنے کے بعد بھیجا جائے گا جب کہ تحقیقاتی ٹیم نے اس کیس میں اعلیٰ حکام کو ڈاکٹروں کا خصوصی میڈیکل بورڈ بنانے کی تجویز بھی دی ہے۔ یوں اس معصوم صارم کے قاتل کا سراغ لگانے کے لیے پوری تفتیش کا دار و مدار اب صرف ڈی این اے اور فارنزک رپورٹ پر ہے۔

صارم 7 جنوری کو لاپتہ ہوا اور 18 کو اس کی چار دن پرانی لاش ملی۔ تحقیقات کے مطابق وہ 7 سے 13 تاریخ تک اسی اپارٹمنٹ کے کمپلیکس میں رہا، تو اس کو بروقت کیوں تلاش نہ کیا جا سکا؟ جو سراغرساں کتے بچے کی لاش ملنے کے بعد لائے گئے وہ لاش ملنے سے قبل کیوں نہ لائے گئے؟ ہر تھانے میں ویمن اینڈ چائلڈ ہراسمنٹ سیل بنا ہوا ہے، وہ سیل کیا اس موقع پر سو رہا تھا؟ اس کے علاوہ ہمارے پاس باڈی سینسر کی ٹیکنالوجی موجود ہے۔ اس کے ذریعے ان جگہوں کو بھی چیک کیا جا سکتا ہے، جہاں انسانی آنکھ کام نہیں کرسکتی تو پھر اس کی مدد کیوں حاصل نہیں کی گئی؟ یہ اور ایسے کئی سوالات ہیں جو عوام کے ذہنوں میں کلبلا رہے ہیں اور وہ اس کا جواب بھی چاہتے ہیں۔

صارم کی گمشدگی کے دوران 11 روز تک والدین بچے کی بازیابی دہائیاں دیتے رہے، مگر پولیس نے ابتدا میں روایتی ٹال مٹول والی تحقیقات کیں اور جب لاش ملی تو بھاگ دوڑ شروع ہوئی، لیکن اب یہ بھاگ دوڑ کیا غمزدہ والدین کو ان کا صارم واپس دلا سکے گی؟

آپ سب کو یاد ہوگا کہ جب 2018 میں قصور میں سات سالہ زینب کا اسی نوعیت کا زیادتی کے بعد قتل کا واقعہ ہوا تھا، جس کے مجرم کو پھانسی دے کر کیفر کردار تک بھی پہنچا دیا گیا تھا۔ ملک بھر کو ہلا دینے والے اس واقعہ کے بعد پاکستان کی پارلیمنٹ نے اس کی دوسری برسی پر زینب الرٹ بل پاس کیا تھا۔ اس بل کے مطابق بچوں کے خلاف جرائم کے مرتکب افراد کی کم سے کم سزا 10 سال سے بڑھا کر 14 سال قید کر دی گئی تھی جب کہ اسی بل میں یہ بھی طے کیا گیا تھا کہ ایسے افسر کو بھی سزا دی جائے گی جو بچے کے خلاف جرم پر دو گھنٹے کے اندر ایکشن نہیں لے گا۔

یہ واحد کیس نہیں بلکہ گزشتہ سال کی خبروں میں تلاش کریں تو ہمیں ایسے کئی صارم، زینب اور دیگر معصوم بچے مل جائیں گے، جو ان وحشیانہ جرائم کے عادی افراد کی غلیظ سوچ کی نذر ہوگئے، لیکن ان میں کتنی زینب تھیں جن کو انصاف مل سکا اور کیا صارم کو بھی انصاف مل سکے گا؟ کیا آئندہ ایسے قبیح جرائم کی روک تھام کے لیے کوئی موثر اقدامات کیے جائیں۔ اگر ہم نہ کہیں تو درست ہوگا کیونکہ صارم کے اغوا اور قتل کیس کے بعد سے ہی ملک کے اعداد وشمار تو کیا صرف کراچی میں کئی بچوں کو اغوا کر لیا گیا ہے۔ ان میں سے دو کو بازیاب کرا لیا گیا لیکن گارڈن سے اغوا دو بچوں کو دیکھنے کے لیے ان کے والدین اب تک ترس رہے ہیں۔

معاشرے میں جرم کا ارتکاب ہونا کوئی انہونی بات نہیں ہوتی، لیکن قانون بننے اور نفاذ کے باوجود تواتر سے بچوں کے اغوا، زیادتی اور قتل کے واقعات ہونا اس بات کی غمازی کرتے ہیں کہ ہمارا معاشرہ جنگل سے بدتر اور انسان جانور کے مرتبے سے بھی گر چکا ہے، کیونکہ جانور بھی اپنی ہوس پوری کرنے کے لیے بچے اور بڑے میں فرق کر لیتے ہیں۔ ہر سال اس نوعیت کے ہزاروں کیسز کا رپورٹ ہونا ہمارے نظام قانون پر بھی سوالیہ نشان اٹھاتا ہے کہ ہمارے قانون میں کچھ سقم ہے، یا پھر متعلقہ ادارے اپنی ذمہ داری ادا نہیں کرتے، جس کی وجہ سے اس مجرمانہ عمل کی روک تھام نہیں ہوسکی ہے۔

صارم واقعہ کے بعد کراچی پولیس اور غیر سرکاری سماجی تنظیم کا بچوں کے تحفظ کا بیڑا اٹھاتے ہوئے شہری سطح پر عوامی شعور اجاگر کرنے کی مہم چلانے کا فیصلہ خوش آئند اقدام ہے، لیکن یہ واقعات والدین کے لیے بھی الارمنگ ہیں کہ وہ اپنے بچوں کو حتی الامکان تنہا نہ چھوڑیں اور ان کی ایسی تربیت کریں کہ کوئی انہیں ورغلا اور نقصان نہ پہنچا سکے۔ ایسے واقعات میں دیکھا گیا ہے کہ زیادہ تر رشتے دار، پڑوسی یا جاننے والے بھی ملوث ہوتے ہیں۔ ایسی صورتحال سے بچنے کے لیے والدین اپنے بچوں کو چچا، ماموں اور دور کے رشتے داروں کے درمیان فرق سے آگاہ کریں اور انہیں بتائیں کہ کس رشتے دار کے ساتھ کتنے فرق سے ملنا ہے۔ انہیں یہ بھی بتائیں کہ صرف انکل کہنے سے کوئی سگا رشتہ نہیں بن جاتا تو کوئی دور کا رشتہ دار یا پڑوسی کی ان سے چھیڑ چھاڑ کی کوئی غیر معمولی حرکت ہو تو فوری والدین کو آگاہ کریں۔ اور ساتھ ہی انہیں ایسی صورتحال سے نمٹنے کے لیے بولنا اور آواز اٹھانا سکھائیں، جیسا کہ گزشتہ روز کراچی کے علاقے کورنگی میں ایک بچی نے شور مچا کر اپنے اغوا کی کوشش کو ناکام بنا دیا۔

مصنّف: محمد زبیر

شاگرد نے گرو سے عرض کی، ”مجھے کام یابی کا راستہ دکھا دیں۔“ گرو نے سامنے اشارہ کیا،”یہاں سے سیدھے چلے جاؤ، یہی راستہ ہے۔“

شاگرد نے اس راستے پر چلنا شروع کیا ہی تھا کہ زور دار بجلی کڑکی۔ شاگر تیزی سے پلٹا اور کہا،”یہ آپ مجھے کہاں بھیج رہے ہیں، یہاں تو بجلیاں کڑک رہی ہیں۔“

گرو نے کہا،”یہی راستہ ہے۔“ شاگرد نے پھر چلنا شروع کیا، اب طوفانی ہوائیں چلنے لگیں۔شاگرد پھر پلٹا اور ناراضی سے کہا،”آپ تو سب جانتے ہیں، پھر مجھے درست راستہ کیوں نہیں دکھا رہے ہیں؟“

گرو نے کہا، ”کام یابی بجلیوں، بارشوں اور طوفانوں کا سامنا کرنے کے بعد ہی ملتی ہے۔“

یہ گرو کا تجزیہ تھا۔ پرانے زمانے میں اسی قسم کے جنرالائزڈ تجزیے ہوا کرتے تھے۔ یہ سائنس اور تحقیق کا زمانہ ہے۔ اب ہم سوال اٹھاتے ہیں کہ زور دار بجلی کی کڑک سے کیا مراد ہے، طوفانی ہواؤں کو کیا نام دیا جائے، بارشوں سے متاثرہ راستہ کسے کہتے ہیں اور ان کا مقابلہ کس طرح کیا جائے۔

اگر آپ اپنی زندگی کام یابی اور کامرانی سے ہمکنار کرنا چاہتے ہیں تو پانچ سوالات کے جوابات پوری ایمان داری سے دیجیے۔ ہر سوال بیس نمبر کا ہے۔ آپ جس حد تک عمل کر رہے ہیں، اس حساب سے خود کو نمبر دیں۔

مثال کے طور پر پوچھے گئے سوال پر اگر آپ سو فیصد عمل کرتے ہیں تو بیس میں بیس نمبر دیں، اگر پچاس فیصد کرتے ہیں تو دس نمبر دیں۔ یعنی جس تناسب سے یا جتنا آپ بہتر سمجھتے ہیں، نمبر دیں۔ یہ جوابات آپ کے علاوہ کوئی اور نہیں دیکھے گا، لہٰذا پوری دیانت داری سے دیں، اگر ایسا نہ کیا تو یہ تحریر آپ کے کسی کام کی نہیں۔ یہ جوابات آپ کو بتائیں گے کہ آپ کن طوفانوں، کن بجلیوں اور کن بارشوں سے بچ بچ کر نکل رہے ہیں۔ اور جوں ہی ان کا سامنا کریں گے، کام یابی کا تناسب بڑھنا شروع ہو جائے گا۔

1۔ آپ کتنی دیر اور کیا مطالعہ کرتے ہیں؟

آپ کی کام یابی کا خاصی حد تک دار و مدار اس بات پر ہے کہ آپ دن بھر میں کتنی دیر اور کیا مطالعہ کرتے ہیں۔ میرا جن کام یاب لوگوں سے ملنا جلنا ہوتا ہے ان میں وہ لوگ بھی ہیں جو مطالعہ کرتے ہیں اور وہ بھی جو بالکل مطالعہ نہیں کرتے۔ مطالعہ کرنے والوں کی گفتگو سے اعتماد جھلکتا ہے۔ میرے ایک دوست پاکستان کی بڑی ٹریننگ کمپنی کے سی ای او ہیں، کہتے ہیں، ”بعض اوقات مصروفیات کی وجہ سے مطالعہ کا وقت نہیں مل پاتا، اس دوران زندگی ادھوری اور کھوکھلی محسوس ہوتی ہے۔“ جو لوگ کتابیں پڑھتے ہیں، وہ زیادہ پرسکون اور مستقبل کی طرف سے زیادہ پریقین ہوتے ہیں۔ اس کے برعکس جو افراد مطالعہ نہیں کرتے، وہ اس خوف کا شکار رہتے ہیں کہ اگر ٹیکنالوجی یا حالات تبدیل ہوگئے تو ان کا کیا بنے گا۔ اس کے ساتھ ہی مطالعہ نہ کرنے والے ایک مقام پر پہنچ کر رک جاتے ہیں جب کہ مطالعہ کرنے والے مختلف جہتوں میں ترقی کرتے چلے جاتے ہیں۔ یہی صورتِ حال کاروبار کرنے والوں کے ساتھ ہوتی ہے۔ ہمیں حیرت ہوتی ہے کہ بیرونِ ممالک میں کاروباری حضرات اپنی جڑیں تیزی کے ساتھ دیگر ممالک میں پھیلا دیتے ہیں جب کہ ہم شان دار مصنوعات رکھنے کے باوجود دوسری برانچ تک کھولنے سے ڈرتے ہیں۔

وارن بفے دنیا کا سب سے بڑا سرمایہ کار مانا جاتا ہے۔ تقریباً ڈیڑھ سو ارب ڈالر کا مالک ہے۔دنیا کا مشہور اور پُر اثر ترین انسان، فیس بک کا بانی مارک زکربرگ بھی وارن بفے سے مشورے لیتا ہے۔ بفے سے جب اس کی کام یابی کا راز معلوم کیا گیا تو اس نے کتابوں کی طرف اشارہ کرتے ہوئے کہا، ”روزانہ پانچ سو صفحات پڑھو، علم اپنا اثر دکھانا شروع کر دے گا۔ اور تم میں سے ہر کوئی یہ کام کر سکتا ہے، لیکن میں ضمانت دے سکتا ہوں کہ تمہاری اکثریت ایسا نہیں کرے گی۔“

بل گیٹس نوّے ارب ڈالر سے زیادہ کا مالک ہے، سال بھر میں پچاس سے زائد کتابیں پڑھتا ہے۔ یعنی ہر ہفتے ایک کتاب۔ وہ اپنی دولت پر اتنا فخر نہیں کرتا جتنا کتابیں پرھنے کی عادت پر کرتا ہے۔ یہ اس کی کام یابی کی بڑی وجہ ہے۔

بل گیٹس کی طرح شاہ رخ خان بھی کتابیں پڑھتا اور کتابوں کے ساتھ تصاویر اپلوڈ کر کے اپنی ترجیحات بتاتا ہے۔

آپ کتنا وقت کتابیں پڑھنے میں صرف کرتے ہیں اور کس قسم کی کتابیں پڑھتے ہیں؟

اگر آپ اپنے شعبہ سے متعلق کتابیں نہیں پڑھ رہے ہیں تو اپنے شعبہ میں کام یابی کے امکانات وقت کے ساتھ محدود ہوتے چلے جائیں گے۔ آج آپ کو متعدد کمپنیز کے سی ای اوز نوجوان نظر آئیں گے، اور یہ تناسب بڑھتا جا رہا ہے۔ یہ وہ نوجوان ہیں جنہیں بچپن سے کتابیں پڑھنے کی عادت ڈالی گئی۔ کتابیں بھی وہ، جو ان کی پروفیشنل لائف میں کارآمد ثابت ہوں۔ فرض کریں آپ امیر ہونا چاہتے ہیں جب کہ کتابیں دنیا کی مذمت کے موضوع پر یا ترقی پسند ادب سے متعلق پڑھ رہے ہیں تو یہ مطالعہ آپ کو آپ کے شعبے میں ترقی نہیں دے گا۔

ان تمام باتوں کو مدنظر رکھ کر اپنا جائزہ لیں اور سوچیں آپ خود کو بیس میں سے کتنے نمبر دیں گے۔

2-آپ اپنی زندگی میں کتنے فیصد کام یاب ہیں؟

فرض کریں ایک مداری کرتب دکھانے آئے۔ اس کے پاس چار گیندیں ہوں جنہیں وہ ایک ساتھ اچھالنے کا مظاہرہ کرے۔ اگر وہ چاروں گیندوں کو بیک وقت اچھال لے گا تو کام یاب مداری کہلائے گا۔ لوگ تالیاں بجائیں گے، انعام دیں گے۔ اگر کبھی ایک گیند گرے کبھی دوسری تو کوئی بھی اسے نہیں سراہے گا۔ یہی کچھ ہماری زندگی کے ساتھ بھی ہوتا ہے۔ ہماری زندگی عام طور پر ان چار چیزوں سے مل کر بنتی ہے:
مذہب
صحت (ذہنی اور جسمانی)
عزیزواقارب
پیشہ
ان چاروں چیزوں میں توازن نہیں ہوگا تو ہماری زندگی ایک ناکام انسان کی زندگی ہوگی، دنیاوی اعتبار سے بھی اور اخروی اعتبار سے بھی۔ سوال کا جواب دینے سے پہلے اہم ترین بات سمجھ لیں۔ ہماری ناکامیوں، ہماری کام یابیوں، ہماری خوشیوں، ہمارے غموں، ہماری صحت، ہماری بیماریوں، ہمارے اچھے اور برے تعلقات کے ذمہ دار ہم خود ہیں۔ اگر آپ کی صحت اچھی نہیں ہے، لوگوں سے تعلقات اچھے نہیں ہیں، اخلاقی بیماریوں کا شکار ہیں، کاروبار یا پیشہ میں کام یاب نہیں ہیں تو اس کا کوئی اور ذمہ دار نہیں ہے۔ اگر یہ بات سمجھ میں نہیں آتی تو جان لیں، کام یابی نہیں مل سکتی۔ کہتے ہیں Be the winner or whiner یعنی یا تو شکوہ شکایت کر لیں یا کام یاب ہوجائیں۔ جتنا زیادہ شکوہ شکایت کریں گے، اپنی ناکامیوں کی وجہ کسی اور کو سمجھتے رہیں گے، حالات بد سے بدتر ہوتے چلے جائیں گے۔

آج آپ اپنی زندگی میں کتنے فیصد کام یاب ہیں؟ اس سوال کے لیے بھی خود کو بیس میں سے نمبر دیں۔

3۔ آپ کن لوگوں کے درمیان وقت گزارتے ہیں؟

جم رون نے بہت خوب صورت بات کہی تھی کہ آپ ان پانچ لوگوں کا مجموعہ ہیں جن کے ساتھ بیشتر وقت گزارتے ہیں۔ یہاں بھی وہی بات کہی جائے گی کہ اگر آپ اچھی صحت چاہتے ہیں تو ان لوگوں کے ساتھ رہیں جن کی صحت اچھی ہے۔ اگر دولت مند بننا چاہتے ہیں تو ان لوگوں کے درمیان رہیں، ان سے تعلقات استوار کریں جو دولت مند ہیں۔ اگر اپنا اخلاق بہتر کرنا چاہتے ہیں تو ان لوگوں کے درمیان رہیں جن کے تعلقات دوسروں کے ساتھ بہتر ہیں۔ ہمارے ساتھ مسئلہ یہ ہے کہ اگر شریکِ حیات یا گھر والوں سے تعلقات خراب ہو جائیں تو اس شخص سے مشورہ مانگیں گے جس کے اپنے تعلقات خراب ہیں۔ وہ بتائے گا، ”میں کسی کی پروا نہیں کرتا، چاہے کسی کو برا لگے یا اچھا، میں منافقت نہیں کرتا۔ مجھ سے نہیں ہوتی یہ چاپلوسی۔“ وہ خود تو ناپسندیدہ انسان ہے، اس کے نقشِ قدم پر چل کر آپ بھی لوگوں کی نظروں میں حقیر ہو جائیں گے۔ اپنی بدزبانی اور اخلاقی کمتری کو جھوٹی انا سے چھپانا بڑے لوگوں کا کام نہیں ہے۔ اس لیے پہلے تو یہ سوچیں کہ زندگی کے کس شعبہ میں کام یاب ہونا چاہتے ہیں اور پھر سوچیں کہ کن لوگوں سے تعلقات استوار کرنے ہیں۔ ان سب باتوں سے پہلے اپنا تجزیہ کریں کہ اس وقت آپ کس مقام پر کھڑے ہیں۔

جن دوستوں کے ساتھ آپ بیشتر وقت گزارتے ہیں وہ آپ کی کام یابی میں کتنا فیصد کردار ادا کر رہے ہیں۔ نمبر دیں۔

4۔ کیا آپ نے اہداف لکھ رہے ہیں؟

کیا آپ نے اپنے اہداف لکھ رکھے ہیں۔ یہاں اتنا سمجھ لیں کہ کوئی بھی بڑی کام یابی منزل کی واضح تصویر ذہن میں ترتیب دیے بغیر ممکن نہیں۔ آپ اپنے بچّے کو کس طرح کا انسان بنانا چاہتے ہیں، گھر کا ماحول کس طرح کا چاہتے ہیں، کس طرح کی ملازمت یا کاروبار کرنا چاہتے ہیں، یہ چیزیں جتنی زیادہ واضح ہوں گی، منزل پر پہنچنے کے امکانات اسی قدر بڑھ جائیں گے۔

اب بتائیں کہ کیا آپ کو معلوم ہے کہ گول کس طرح سیٹ کرتے ہیں اور آپ اپنے گول سیٹ کر چکے ہیں؟

5۔ آپ خرچ کرتے ہیں، بچت کرتے ہیں یا سرمایہ کاری کرتے ہیں؟

ناکام ترین لوگ جو کماتے ہیں، سب خرچ کر دیتے ہیں۔ ان سے بہتر لوگ پیسہ بچا کر رکھتے ہیں۔ ان دونوں سے بہتر لوگ سرمایہ کاری کرتے ہیں۔ یہ کام یاب لوگ ہوتے ہیں۔ دنیا کا کوئی بھی امیر ترین انسان بچت کر کے امیر نہیں ہوا، سرمایہ کاری کر کے ہوا ہے۔ اگر آپ سرمایہ کاری کر رہے ہیں اور اس سرمایہ کاری کی بدولت آپ کے سرمائے میں مسلسل اضافہ ہو رہا ہے تو آپ کی کام یابی کے امکانات بڑھ رہے ہیں اور اگر ایسا نہیں ہے تو آپ خود سمجھ سکتے ہیں کہ آپ کا مستقبل کس حد تک محفوظ ہے۔

جو لوگ متعلقہ مواد زیرِ مطالعہ رکھتے ہیں، اپنی کام یابی اور ناکامی کا ذمہ دار خود کو سمجھتے ہیں۔ ان دوستوں میں وقت گزارتے ہیں جو انہیں منزل کے قریب کر رہے ہوں، جن کے مقاصد بالکل واضح ہوتے ہیں اور جو سرمایہ کاری کرتے ہیں، زندگی میں بھرپور کام یابی حاصل کر لیتے ہیں۔

اب آپ پانچوں سوالات کے حاصل کردہ نمبر لکھیں۔ دیکھیں کہ سو میں سے کتنے نمبر حاصل کیے ہیں۔ اگر جواب تسلی بخش ہیں تو آپ کو بہت بہت مبارک ہو۔ اگر ایسا نہیں ہے تو کوئی بات نہیں۔ زندگی ابھی ختم نہیں ہوئی ہے۔

جب جاگو تب سویرا۔ جب احساس ہوگا، زندگی بدلنا شروع ہوجائے گی۔

(محمد زبیر شکریہ، پرورش اور تربیت کے مصنّف، لائف کوچ اور نامور یوٹیوبر ہیں جن کی یہ تحریر مقصدِ حیات اور اس کا حصول کے عنوان سے ان کے مضامین کے ایک مجموعے میں شامل ہے)

تحریر:‌ عارف عزیز

”کیوں“ ہمارے ہاتھوں میں ہے۔ جون ایلیا کا یہ تازہ شعری مجموعہ اُن کی شاعری کی آخری کتاب بھی ہے۔ مؤلف خالد احمد انصاری ہیں جنھیں اردو ادب، بالخصوص جون ایلیائی لہر میں بہنے والے نوجوانوں کا محسن کہا جا سکتا ہے۔

یہ جون ایلیا کی وہ پہلی کتاب بھی ہے جس کی تقریبِ رونمائی منعقد کی گئی۔ بطور میزبان خالد انصاری نے چیدہ و چنیدہ شخصیات کو کراچی کے ایک ہوٹل میں مدعو کیا تھا۔ ”ایک شام جون ایلیا کے نام“ سے تقریب میں خالد انصاری نے کہا کہ اس مجموعے کی اشاعت کے ساتھ ہی میرا کام اب ختم ہوا۔ اور شاید ایسا ہی ہے، لیکن خالد انصاری کو اردو دنیا ضرور یاد رکھے گی۔

آج اردو کے مقبول ترین شاعر کی بات کی جائے تو ہم جون ایلیا کا نام سنتے ہیں۔ دنیا بھر میں مداح بالخصوص نوجوان بڑی تعداد فیس بک اور واٹس ایپ پر جون ایلیا کا کلام پڑھتی ہے، ان کے اشعار شیئر کیے جاتے ہیں اور مشاعرہ پڑھتے ہوئے جون ایلیا کی ویڈیوز دیکھی جاتی ہیں۔ جون ایلیا کی مقبولیت کی ایک وجہ محبوب کے لیے اُن کا طرزِ تخاطب اور جذبات کا برملا اظہار بھی ہے۔ وہ اشاروں کنایوں میں بات نہیں کرتے۔ معروف شاعر اور گیت نگار مجروح سلطان پوری انھیں شاعروں کا شاعر کہہ گئے تھے اور آج جون ایلیا سوشل میڈیا پر چھائے ہوئے ہیں۔ مگر جون صاحب کے لیے یہ دیوانگی تو پہلے بھی تھی۔ اور یہ اس دور کی بات ہے جب، آج کی طرح شعر اور شاعر تک رسائی ایک ”کلک“ کی بدولت ممکن نہ تھی۔ اس وقت بھی کوئی جون ایلیا کو پاتا تو انہی کا ہو رہتا۔ جون ایلیا کی ہیئت کذائی، ان کا انداز اور عالمانہ گفتگو لوگوں کو مرعوب اور سماعت کو اسیر کرلیتی تھی۔ دورانِ گفتگو کسی شعر سے بات نکلتی اور شاعر تک پہنچتی تو کیا کیا باتیں کرتے، کائنات یا دل کی واردات کو موضوع بنایا جاتا تو فکر کے نئے زوایے سامنے لاتے۔

خالد انصاری 1992ء میں پہلی مرتبہ جون ایلیا سے ملے۔ ان کی لکھائی جون ایلیا کو اچھی لگی تو اپنی بیاض لکھنے کا کام سونپ دیا۔ اور پھر خالد انصاری چند سال تک ان سے ملاقات نہ کرسکے۔ اس عرصہ میں شہر کے کئی خوش باش بل کھاتی سڑکوں سے گزرتے ہوئے، چورنگیاں گھوم کر شام ہوئے جون ایلیا کے پاس پہنچتے رہے۔ کئی کو گمان ہوا کہ بھائی جون نے انھیں اپنے دل محلّے میں جگہ دے دی ہے اور کوئی یوں‌ خوش رہا کہ

؎ وہ مجھے دیکھ کے پہچان لیا کرتے تھے

جون ایلیا، سب کے بھائی جون بنے رہے، لیکن انھیں کسی سے کوئی مطلب نہیں تھا۔ اُن کو تو ایک نہ آنے والے سے مطلب تھا اور وہ تھے خالد احمد انصاری۔

اور ایک روز خالد احمد انصاری ان کے سامنے کھڑے تھے۔ وہی خالد جس سے جون ایلیا کو مطلب تھا۔ وہ علی کرار نقوی کے گھر سے، جہاں جون ایلیا اقامت پذیر تھے، چند قدم کی مسافت پر ہی رہتے تھے اور اس روز بس ایک گلی سے اٹھ کر جون ایلیا کے گھر آگئے۔ بقول خالد انصاری، مجھے اچانک اپنے سامنے پا کر انھوں نے کہا، خالد! تم آئے نہیں ہو، تمھیں بھیجا گیا ہے! اور پھر وہ رونے لگے۔

جون ایلیا کا یہ گمان، گویا ان کا وجدان تھا۔ خالد انصاری بڑے کام کے آدمی نکلے۔ جون ایلیا سے مخلص، اور بے غرض انسان۔

وہ اب روز ہی جون ایلیا کے پاس جانے لگے۔ انہی دنوں جون ایلیا کو خیال گزرا کہ ان کے اوراقِ پریشاں غائب ہورہے ہیں، ان کی تحریریں کوئی لے جاتا ہے۔ تب، جون ایلیا نے اپنی شاعری (مسوّدے) خالد انصاری کے سپرد کرتے ہوئے کہا کہ اسے اپنے گھر میں‌ رکھیں، جب ضرورت ہوگی تو منگوا لوں گا۔ مگر کچھ عرصہ بعد جون ایلیا کا انتقال ہو گیا۔ بعد میں خالد انصاری نے جون ایلیا کے اہلِ خانہ کی اجازت سے یہ کلام کتابی شکل میں ہم تک پہنچایا۔

جون ایلیا کے دوسرے شعری مجموعہ ”یعنی“ کو مرتب کرنے کے بعد خالد انصاری نے بہت محنت اور لگن سے کام کر کے گمان، گویا، لیکن، فرنود اور راموز جیسی کتابیں اردو ادب کو سونپ دیں۔ ”کیوں“ وہ آخری کتاب ہے جو بیک وقت پاکستان اور ہندوستان سے شایع ہوئی ہے۔ اور قابلِ‌‌ ذکر امر یہ ہے کہ بھارت میں یہ مجموعہ اردو کے ساتھ ساتھ ہندی میں بھی شایع کیا گیا ہے۔

جون ایلیا کی تخلیقات ہم تک پہنچانے والے خالد انصاری نے اس سے پہلے کسی کتاب کی تقریبِ رونمائی کا اہتمام نہیں کیا تھا۔ اسی طرح جون ایلیا کی کتابیں تو وقفے وقفے سے سامنے آتی رہیں، مگر خالد انصاری کم ہی سامنے آئے۔ اس تقریب میں بھی شرمیلے خالد انصاری نے مختصر گفتگو کی۔

”کیوں“ میں جون ایلیا کی غزلیات اور نظمیں ہی نہیں قوالیاں بھی شامل ہیں۔ چند منظوم خطوط اور قطعات بھی ہیں۔ خالد انصاری نے بتایا کہ آخری شعری مجموعہ کے بعد ان کی خواہش ہے کہ ”کُن“ کے نام سے جون ایلیا کا کلیات مرتب کریں جس میں تمام مجموعہ ہائے کلام ہی یکجا نہیں ہوں گے بلکہ اس کی انفرادیت جون ایلیا کے اوّلین شعری مجموعے ”شاید“ کی غزلوں کے وہ اشعار ہوں گے جو اُس وقت کتاب میں شامل نہیں کیے گئے تھے۔ بقول خالد انصاری یہ بھائی جون کی خواہش تھی کہ وہ سب اشعار بھی شایع کیے جائیں۔ اس کے علاوہ فردیاتِ جون ایلیا اور دیگر اصنافِ سخن میں ان کی شعری باقیات ”کُن“ میں جگہ پائیں گی۔

سولہ سال بعد شایع ہونے والے شعری مجموعے ”کیوں“ کو مؤلف نے علی کرار نقوی اور جاوید معنی کے نام کیا ہے۔ اس کتاب کا بیک وقت اجرا پاکستان اور بھارت میں ممکن بنایا گیا۔ خالد انصاری نے بتایا کہ یہ عدیل زیدی کی خصوصی کوشش کے سبب ہوا اور اس کے لیے ”ریختہ“ نے بھی تعاون کیا۔ جون ایلیا کے عاشق عدیل زیدی کا ذکر ہم اگلی سطور میں کرتے ہیں۔

بھائی جون کے بکھرے ہوئے کلام کو سمیٹننے، اور کتابوں کی اشاعت تک اپنے سفر میں خالد انصاری نے اوّلین سنگِ میل گمان کی شکل میں طے کیا تھا۔ اس کا نقشہ انھوں نے اپنی ایک تحریر میں یوں‌ کھینچا ہے، ”2004ء کی ایک سرد شام، ہاتھ میں گمان کا مسودہ تھامے لمبے لمبے قدم اٹھاتا کوریئر کمپنی کے دفتر کی جانب رواں دواں ہوں، مجھے یہ مسوّدہ لاہور ارسال کرنا ہے۔ میں اس خواب کی تعبیر پانے کی تگ و دو میں ہوں جو میں نے برسوں پہلے اپنے دوستوں کے ہم راہ دیکھا تھا۔ خواب، یعنی جون بھائی کا کلام مجموعوں کی صورت اختیار کرے اور دنیا دیکھے کہ جون ایلیا کی شاعری سے متعلق باتیں محض افسانہ نہیں تھیں۔“ خالد انصاری شاعر یا ادیب نہیں، لیکن جون ایلیا کی کتابوں کے مؤلف کی حیثیت سے انھیں ادبی حلقوں میں بڑا احترام حاصل ہے۔

”کیوں“ کی تقریبِ اجرا میں اردو زبان و ادب کی معتبر شخصیت، پاکستان کے مقبول اور کثیر الاشاعت ڈائجسٹ سب رنگ کے مدیر، ناول نگار، اور معروف صحافی شکیل عادہ زادہ نے جون ایلیا سے متعلق اپنی یادیں تازہ کیں۔ شکیل صاحب جون ایلیا کے ایک ہم کار ہی نہیں‌ دیرینہ رفیق رہے ہیں۔ شکیل عادل زادہ نے انھیں بے مثل شاعر قرار دیا۔ ان کا خیال ہے کہ جون صاحب بحیثیت شاعر تو بہت مقبول اور معروف ہیں، لیکن وہ اپنی نثر میں جھلکتے تھے۔ ایک عالم اور فلسفی آدمی کی شاعری کا بہت ذکر ہوتا ہے لیکن وہ ایک بڑے نثر نگار بھی تھے اور ہمیں ان کی نثر بھی ضرور پڑھنا چاہیے۔

عدیل زیدی کا نام بطور میزبان بھی لیا گیا ہے، لیکن انھیں اس تقریب کا ایک مہمانِ خاص جاننا چاہیے۔ امریکا میں مقیم عدیل زیدی کا ایک حوالہ اور تعارف بطور شاعر تو اردو دنیا سے ہے ہی، لیکن وہ ایک ادب نواز شخصیت بھی ہیں۔ اپنے مخصوص انداز اور دل نواز لہجے میں عدیل زیدی نے کہا کہ جون ایلیا افقِ لحد سے پوری آب و تاب کے ساتھ طلوع ہو چکے ہیں اور کیوں کے اجرا کے بعد جون ایلیا کی آب و تاب میں قابلِ ذکر اضافہ ہو گا۔ عدیل زیدی نے تقریب میں اظہارِ خیال کرتے ہوئے کہا کہ جون ایلیا ایک شخص کا نہیں ایک شخصیت کا نام ہے۔ ان کا منفرد لہجہ، ان کی شاعری میں گفتگو اور گفتگو میں شاعری، ان کی اپنے آپ کو تباہ کرنے کی ہمّت، اپنے پیاروں سے اور اپنی زمین سے عشق کا والہانہ جذبہ، اپنے تمام احساسات و جذبات کو آسان اور عام فہم میں بیان کرنا، یہ سارے عناصر اگر کبھی دوبارہ یکجا ہوسکے تو شاید جون ایلیا جیسی شخصیت کا ظہورِ ثانی ممکن ہو جائے۔

اس تقریب میں اظہارِ‌ خیال کرنے والوں میں میزبان شخصیات اور صدرِ محفل کے علاوہ عقیل عباس جعفری، وسعت اللہ خان، مومن خان مومن، خرّم سہیل، مسرور پیرزادو، غلام علی (جون) شامل تھے۔

جون ایلیا سے متعلق مضامین کا مجموعہ ”مَیں یا مَیں: جون ایلیا پر تحریریں اور ملاقاتیں“ بھی شاید آپ نے پڑھا ہو۔ آخری شعری مجموعے کے ساتھ بھی ایسی ہی مختصر کتاب بعنوان ”کیوں عام کیا سخن کو“ شایع کی گئی ہے۔ یہ جون ایلیا کی شخصیت پر احباب کی یادوں اور تأثرات پر مشتمل مضامین ہیں۔

کتاب کے سرورق پر اور اندرونی صفحات پر جون ایلیا کی جو تصویریں شایع کی گئی ہیں، وہ اے آئی (artificial intelligence) کا کمال ہیں۔

وزیراعظم شہباز شریف نے حال ہی میں نئے سال کے آغاز پر اڑان پاکستان لانچنگ پروگرام میں قوم کو اُڑنے کا نیا گُر سکھاتے ہوئے ’’اوووو، اوووو‘‘ کی آواز میں احتجاج کرنے کا پیغام دیا اور یہ پیغام اب اتنا پھیل رہا ہے کہ پوری قوم ہی اووو، اووو کر کے اس کو قومی بیانیہ بنانے میں مصروف ہو چکی ہے۔

شہباز شریف جنہوں نے خوش قسمتی سے دوسری بار وزارت عظمیٰ کا منصب سنبھالا ہے۔ وہ اس سے قبل تین بار پنجاب کے وزیر اعلیٰ رہ چکے ہیں اور بلاشبہ اپنے صوبے کے عوام کی ’’اتنی خدمت‘‘ کی، کہ خود ہی خود کو ’’خادم اعلیٰ‘‘ کا خطاب دے ڈالا۔ اب جب سے یہ خیر سے وزارت عظمیٰ کے منصب پر فائز ہوئے ہیں، تو انہوں نے خادم اعلیٰ کے ساتھ شاید خود کو ’’استاد قوم‘‘ سمجھنا شروع کر دیا ہے اور آئے دن پاکستانی قوم کو ترقی کرنے کے ایسے ایسے گُر سکھاتے ہیں، جس سے یہ بے چاری قوم پہلے نابلد تھی۔

وزیراعظم نے اڑان پاکستان پروگرام کی تقریب میں خطاب کرتے ہوئے قوم کو ترقی کا راز بتاتے ہوئے کہا کہ ’’وہ جب جاپان گئے تو انہوں نے اووو، اووو کی آوازیں سنیں اور جب انہوں نے پوچھا تو پتہ چلا کہ فیکٹری کے لوگ احتجاج کر رہے ہیں، وہ کام نہیں روک رہے کیونکہ یہ ملک و قوم کا نقصان ہے، اس لیے وہ کام جاری رکھتے ہوئے اپنے مطالبات کے لیے احتجاج کر رہے ہیں۔ اس کے ساتھ ہی انہوں نے زور دے کر کہا کہ قومیں ایسے ہی ترقی کرتی ہیں جب کہ ہمارے ہاں احتجاج کے نام اسلام آباد پر لشکر کشی کی جاتی ہے۔

شہباز شریف کا یہ بیان بظاہر ایک سیاسی بیانیہ لیے ہوئے تھا جنہوں نے اپنی بات کو دوسرے پیرائے میں بیان کرنے کی کوشش کی، لیکن ان کا یہ مشورہ سننے کے بعد تقریب میں بیٹھے لوگوں کے لیے اپنی ہنسی روکنا مشکل ہوگیا۔
خادم پاکستان کے سونے کے ترازو میں تولے جانے والے اس بیش قیمت لیکن مفت مشورے پر تو سمجھو قوم نے اسی دن سے عمل کرنا شروع کر دیا ہے۔ تاجروں نے تو کراچی میں گزشتہ روز اس کا ڈیمو بھی پیش کر دیا۔ ایک ٹرک ڈرائیور نے غیر قانونی چالان پر احتجاج کرتے ہوئے اووو، اووو کیا، بچے بڑے سب ہی اووو، اووو کر رہے ہیں، لیکن ترقی کا عمل کب شروع ہوتا ہے، یہ ہنوز سوالیہ نشان ہے؟

شہباز شریف جنہیں قوم کا درد، رات میں سکون کی نیند سونے نہیں دیتا۔ وہ علی الصبح اٹھ جاتے ہیں اور دن کے 24 میں سے ’’25‘‘ گھنٹے قوم کے لیے کام کرتے ہیں۔ انہوں نے اگر قوم کو کامیابی کا گُر اور دنیا میں ترقی کرنے کا راز بتا دیا ہے تو اس میں ایسی کیا مضحکہ خیز بات ہوگئی کہ یار لوگوں نے سوشل میڈیا پر اس کا مذاق اڑانا اور میمز بنانا شروع کر دیں۔ سوشل میڈیا پر اگر میمز بن رہی ہیں تو ہمارا خیال ہے کہ یہ دشمنوں (پی ٹی آئی) کی سازش ہے۔ مگر یہ ہمارے جید صحافیوں حامد میر، نصرت جاوید، جاوید چوہدری، سابق قومی کپتان محمد حفیظ اور مختلف سیاسی شخصیات کو کیا ہو گیا کہ وہ بھی اس پر ہنسی ٹھٹا اڑانے لگے، آخر کوئی شرم ہوتی ہے، کوئی حیا ہوتی ہے۔

یہ تو مخالف سیاستدان ہیں یا عوام اور صحافی، جن کی غیر جانبداری پر سوالیہ نشان اٹھایا جا سکتا ہے۔ لیکن ہمیں گلہ تو ن لیگیوں سے ہے کہ وہ کیوں اس پر ہانسا نکال کر لوگوں کو ہنسنے کو موقع فراہم کر رہے ہیں۔ رانا ثنا اللہ تو آن اسکرین اس بیان سے جڑے سوال پر ہنستے ہیں جب کہ اندرون خانہ ن لیگ کی بیٹھکوں میں تو اس پر کان پھاڑ قہقہے تک لگائے جانے کی اطلاعات سامنے آ رہی ہیں۔ اس بیان سے شہباز شریف کو ملکی نہیں بین الاقوامی ایک اور شہرت مل گئی ہے اور بیرونی دنیا سے بھی اس پر میمز بن رہی ہیں۔

سوچیں پارلیمنٹ میں حکومتی تقریر کے دوران اچانک اووو، اووو کی آوازیں آنے لگیں تو ’’منتخب عوامی نمائندوں‘‘ کا یہ ایوان ہر شاخ پر الو بیٹھا ہے جیسا منظر پیش کرنے لگے۔ ویسے ناچیز کی جانب سے ایک تجویز ہے کہ جس طرح اس ایوان سے تھوک کے بھاؤ سے بل پاس کرائے جاتے ہیں۔ ایسا ہی ایک بل قومی اسمبلی اور سینیٹ سے یہ بھی پاس کرا دیا جائے کہ آئندہ احتجاج کے لیے کوئی اور نعرہ نہیں لگے گا، سب صرف ’’اووو، اووو‘‘ ہی کریں گے۔ اگر اپوزیشن رخنہ ڈالے تو ایوان صدر کس کام آئے گا، وہاں سے بزور آرڈیننس ملک و قوم کو ترقی کے اوج ثریا پر پہنچانے والے اس فارمولے کو قانون بنایا جا سکتا ہے، بلکہ اس پر 100 فیصد عملدرآمد کے لیے حکومت کی جانب سے خلاف ورزی پر بھاری سزا یا جرمانہ بھی عائد کیا جا سکتا ہے۔

دنیا بھر میں تقریروں میں سیاستدانوں کی زبان پھسلتی رہتی ہے لیکن وہ اس کا فوری تدارک کر لیتے ہیں لیکن شہباز شریف وہ شعلہ بیان سیاستدان ہیں، جن کی زبان اتنی طویل اور باقاعدہ پلاننگ کے تحت پھسلتی ہے کہ پھر چکنا گھڑا بن جاتی ہے اور اتنی زبان زد عام ہو جاتی ہے جیسا کہ ماضی میں ’’میں بھیک مانگنے نہیں آیا مگر پھر بھی‘‘ والا ایک تقریب میں کیا گیا خطاب اب تک قوم کیا، دنیا کو نہیں بھولا ہے۔

ذرا تصور کریں کہ نواز شریف اچانک ٹی وی اسکرین پر آئیں اور دوران گفتگو حسب سابق ماضی میں پہنچ کر اپنے خلاف روا رکھے گئے رویے پر ’’مجھے کیوں نکالا‘‘ کہہ کر احتجاج کرنے کے بجائے صرف ’’اووو، اوووو، اووو‘‘ کریں تو کیسا لگے گا۔ یا پھر اتحادی جماعتیں ن لیگ، پی پی پی، ایم کیو ایم اختلاف رائے ہونے پر میٹنگ میں صرف اووو، اووو کریں اور اٹھ جائیں تو اس بیٹھک کا کیا نتیجہ نکلے گا۔

وزیراعظم نے تو قوم کو ترقی کا راز بتا دیا۔ اب اگر اس پر بھی قوم ترقی نہ کرے تو قصور ہمارے پیارے وزیراعظم کا نہیں بلکہ نا اہل قوم کا ہوگا۔ ہوسکتا ہے کہ جس سُر تال اور لے کے ساتھ جاپانی قوم اووو کرتے ہوں پاکستانی وہ انداز نہ اپنا سکیں اور یوں ترقی کی راہ میں رکاوٹیں آئیں۔ اس لیے ہمارا بھی ایک مفت مشورہ ہے کہ ملک میں ایسے تربیتی مراکز قائم کیے جائیں جہاں قوم کو صحیح طریقے سے اووو کی آواز نکالنے کی تربیت کی جائے، تاکہ ملک وقوم کی ترقی کا 77 سالہ خواب جلد از جلد شرمندہ تعبیر ہو سکے۔