اسلام آباد (13 اگست 2025): چیئرمین پاکستان ٹیلی کمیونیکیشن اتھارٹی (پی ٹی اے) میجر جنرل (ریٹائرڈ) حفیظ الرحمان نے محفوظ ڈیجیٹل پاکستان کیلیے تعاون اور جدت کے فروغ کا سفر جاری رکھنے کے عزم کا اظہار کیا ہے۔
پی ٹی اے نے ہواوے کے تعاون سے نیکسٹ جنریشن سائبر ریزیلینس ورکشاپ اور ٹیلی کام سائبر سکیورٹی ایوارڈز برائے سال 2025 کا انعقاد کیا جس میں سینئر سرکاری عہدیداران، شعبے سے وابستہ ماہرین اور سائبر سکیورٹی ماہرین نے شرکت کی۔
یہ بھی پڑھیں: سینیٹر ایمل ولی نے چیئرمین پی ٹی اے کو معاف کر دیا
اس موقع پر ڈیجیٹل سکیورٹی سے متعلقہ چیلنجو پر تفصیلی تبادلہ خیال کیا گیا۔ ورکشاپ میں پاکستان میں متوقع (5G) کے اجراء لو ارتھ آربیٹ (LED) سیٹلائٹ انٹرنیٹ، مصنوعی ذہانت (AI) کے استعمال اور فن ٹیک کے پھیلاؤ کے سائبر سکیورٹی اثرات پر بات چیت کی گئی۔
پی ٹی اے نے مقامی و بین الا قوامی شراکت داروں کے ساتھ مل کر استعداد کار میں اضافہ، معلومات کے تبادلے اور جدید محفوظ حل کی ضرورت و اہمیت کو اجاگر کیا گیا۔
اس موقع پر وفاقی وزیر برائے آئی ٹی و ٹیلی کام شزہ فاطمہ خواجہ نے پی ٹی اے کی کارکرگی کو سراہتے ہوئے کہا کہ سائبر ریزیلینٹ پاکستان کی تشکیل صرف ٹیکنالوجیکل ترجیح نہیں بلکہ قومی ضرورت ہے۔ حکومت جدید حل اور مضبوط حفاظتی اقدامات کی بھرپور حمایت کرتی ہے تاکہ ہمارے ڈیجیٹل ایکو سسٹم کو محفوظ بنایا جا سکے۔
اس موقع پر چیئر مین پی ٹی اے میجر جنرل (ریٹائرڈ) حفیظ الرحمان نے کہا کہ سائبر ریزیلینس ہمارے ڈیجیٹل مستقبل کی بنیاد ہے۔ پی ٹی اے ایک محفوظ ڈیجیٹل پاکستان کیلیے تعاون اور جدت کے فروغ کا سفر جاری رکھے گا۔
تقریب کے اختتام پر سائبر سکیورٹی میں جدت، پائیداری اور قیادت کے شعبوں میں نمایاں کارکردگی کا مظاہرہ کرنے والوں کو ایوارڈز دیے گئے۔