اسلام آباد: پی ٹی آئی چیئرمین بیرسٹر گوہر کا کہنا ہے کہ پی ٹی آئی بہت جلد پارلیمنٹ کی سب سے بڑی جماعت بن جائے گی۔
اے آر وائی نیوز کے مطابق چیئرمین پی ٹی آئی بیرسٹر گوہر نے کہا کہ بانی پی ٹی آئی کی رہائی تک ہمارا احتجاج جاری رہے گا، آج علامتی بھوک ہڑتال کا تیسرا روز ہے، ہڑتال مطالبات کی منظوری تک روزانہ کریں گے، ہماری ہڑتال لاقانونیت کے خلاف ہے۔
انہوں نے کہا کہ سپریم کورٹ کے فیصلے پر عملدرآمد ہوا، پی ٹی آئی پارلیمانی پارٹی بن گئی، پی ٹی آئی بہت جلد پارلیمنٹ کی سب سے بڑی جماعت بن جائے گی۔
بیرسٹر گوہر نے کہا کہ آج ہم نے 40 ایم این اے کی تصدیق کرلی ہے لیکن ہمارے ایم این ایز پر دباؤ کا سلسلہ اب بھی جاری ہے۔
چیئرمین پی ٹی آئی نے کہا کہ انشا اللہ ملک میں لاقانونیت کا جلد خاتمہ ہوگا، سپریم کورٹ کا فرض ہے ہر پاکستانی کے حق کا تحفظ کرے، انشا اللہ جب ہمارے کیسز آزاد عدلیہ کے سامنے آئیں گے تو ختم ہوجائیں گے۔
دوسری جانب پی ٹی آئی رہنما اور اپوزیشن لیڈر عمر ایوب نے کہا کہ بانی پی ٹی آئی نے علامتی بھوک ہڑتال کو سراہا ہے، بانی پی ٹی آئی کا پیغام ہے قوم ڈٹی رہے جیت ہماری ہوگی۔
انہوں نے کہا کہ 9 مئی کی سی سی ٹی وی غائب کردی گئیں اس پر بانی پی ٹی آئی خود پٹیشن دائر کریں گے۔