چوہدری شجاعت کی خواہش ہے پرویز الٰہی جیل سے باہر آ جائیں، شافع حسین

لاہور: مسلم لیگ (ق) کے سینئر رہنما چوہدری شافع حسین کا کہنا ہے کہ چوہدری شجاعت کی خواہش ہے کہ پرویز الٰہی جیل سے باہر آ جائیں، مقدمات میں انتقامی کارروائی نہیں ہونی چاہے اور میرٹ پر مقدمات ہونے چاہییں۔

ایک تقریب میں صحافیوں سے گفتگو کرتے ہوئے چوہدری شافع حسین نے کہا کہ ’سیاست اپنی اپنی‘ یہ مونس الٰہی کا فیصلہ تھا، چوہدری سالک اور میری رائے ہے کہ اگر مونس الٰہی نے پی ٹی آئی چھوڑنی ہے تو وہ اپنی جماعت بنالیں۔

اپنی گفتگو میں انہوں نے کہا کہ پیپلز پارٹی اور (ن) لیگ کے معاملات بہتر ہوگئے ہیں ہم نے وزیر اعظم کیلیے کوئی نام نہیں دیا، ابھی تک ہم سے کوئی نام نہیں مانگا گیا اور نہ ہی مشاورت ہوئی ہے۔

انہوں نے کہا کہ مسلم لیگ (ن) کے ساتھ پندرہ سے بیس سیٹوں پر سیٹ ایڈجسٹمنٹ کریں گے، وزیر اعظم سے ملاقات میں سیٹ ایڈجسٹمنٹ کا معاملہ اٹھایا تھا، شہبازشریف نے رانا ثنا اللہ کی سربراہی میں کمیٹی بنانے کا کہا ہے۔

ان کا کہنا تھا کہ گجرات سے پنجاب اسمبلی کا الیکشن لڑوں گا، پی ٹی آئی کے لوگ ہمیں جوائن کر رہے ہیں، آگے جاکر استحکام پاکستان پارٹی سے بھی سیٹ ایڈجسٹمنٹ ہو سکتی ہے، گجرات میں (ق) لیگ کے علاوہ (ن) لیگ اور پی ٹی ائی کا ووٹ بینک ہے، گجرات سے چوہدری شجاعت والی اور چکوال کی سیٹ سے سالک حسین الیکشن لڑیں گے۔

شافع حسین نے کہا کہ آئندہ ملاقات میں چوہدری شجاعت حسین کے ساتھ میں بھی پرویز الٰہی سے ملاقات کیلیے جیل جاؤں گا، ہم سیاسی طور پر مسلم لیگ (ن) اور پیپلز پارٹی دونوں کے ساتھ مل کر چلیں گے۔