اسلام آباد : چینی وزیر خارجہ وانگ ای 21 اگست کو دورہ پاکستان پر اسلام آباد پہنچیں گے، چھٹا پاک چین وزرائے خارجہ اسٹریٹجک ڈائیلاگ اسلام آباد میں ہوگا۔
تفصیلات کے مطابق ترجمان دفتر خارجہ کی جانب سے کہا گیا کہ چین کے وزیر خارجہ وانگ ای 21 اگست کو پاکستان کا دورہ کریں گے، وانگ ای یہ دورہ نائب وزیراعظم و وزیر خارجہ اسحاق ڈار کی دعوت پر کریں گے۔
ترجمان کا کہنا تھا کہ دورے کے دوران چھٹا پاک–چین وزرائے خارجہ اسٹریٹجک ڈائیلاگ اسلام آباد میں منعقد ہوگا، جس کی مشترکہ صدارت اسحاق ڈار اور وانگ ای کریں گے۔
دفتر خارجہ نے کہا کہ پاک چین اعلیٰ سطح روابط دونوں ممالک کے تعلقات کو مزید مستحکم بنانے کا ذریعہ ہیں، ڈائیلاگ میں پاکستان اور چین باہمی دلچسپی کے تمام شعبوں پر بات چیت کریں گے۔
ترجمان کا مزید کہنا تھا کہ دونوں ممالک ایک دوسرے کے بنیادی مفادات پر حمایت کی تجدید کریں گے، جبکہ تجارتی و معاشی تعاون کو فروغ دینے اور علاقائی امن، ترقی اور استحکام کے عزم کا بھی اعادہ کیا جائے گا۔