اسلام آباد: سائفر کیس میں سابق وزیر اعظم اور چیئرمین پاکستان تحریک انصاف (پی ٹی آئی) کی درخواست ضمانت سماعت کیلیے مقرر کر دی گئی۔
چیئرمین پی ٹی آئی کی درخواست ضمانت پر سماعت کیلیے بینچ تشکیل دے دیا گیا۔ چیف جسٹس اسلام آباد ہائی کورٹ عامر فاروق درخواست پر پیر کو سماعت کریں گے۔
سابق وزیر اعظم نے آج ہی سائفر کیس میں درخواست ضمانت دائر کی تھی۔ رجسٹرار آفس نے کیس سماعت کیلیے مقرر کرنے کی کاز لسٹ جاری کر دی۔
یاد رہے آفیشل سیکرٹ ایکٹ کے تحت قائم خصوصی عدالت نے سائفر کیس میں چیئرمین پی ٹی آئی کی درخواست ضمانت مسترد کر دی تھی۔
آج سابق وزیر اعظم کے وکلا نے ضمانت کیلیے اسلام آباد ہائی کورٹ سے رجوع کیا۔ بیرسٹر سلمان صفدر کے ذریعے عدالت میں درخواست ضمانت دائر کی گئی۔
درخواست میں کہا گیا کہ استغاثہ نے بدنیتی پر مبنی مقدمہ درج کیا، 14 ستمبر کو آفیشل سیکرٹ ایکٹ کی خصوصی عدالت نے درخواست ضمانت مسترد کی۔
دائر درخواست میں کہا گیا کہ خصوصی عدالت نے بے ضابطگیوں اور استغاثہ کے متعدد تضادات کو نظر انداز کیا، چیئرمین پی ٹی آئی کو بدنیتی سے اس من گھڑت مقدمے میں نامزد کیا گیا۔ درخواست میں ضمانت پر رہا کرنے کی استدعا کی گئی۔