کراچی: بلدیہ عظمی کراچی نے مقبوضہ کشمیر میں بھارتی حکومت کے ظالمانہ اقدامات کی شدید مذمت کرتے ہوئے قرارداد منظور کرلی۔
تفصیلات کے مطابق بلدیہ عظمیٰ کراچی کی کونسل نے متفقہ طور پر منظور کی گئی قرارداد کے تحت مقبوضہ کشمیر میں بھارتی حکومت کے ظالمانہ اقدامات کی شدید مذمت کرتے ہوئے اقوام عالم بالخصوص انسانی حقوق کی تنظیموں سے مطالبہ کیا کہ کشمیریوں کی نسل کشی روکنے کے لئے فوری اقدامات کئے جائیں۔
قرارداد میں کہا گیا ہے کہ اقوام متحدہ کشمیری عوام کو اپنی مرضی سے زندگی گزارنے کا حق انہیں دلائے اور کشمیر میں بھارتی غنڈہ گردی کو روکے۔
اس موقع پر سٹی کونسل کے اراکین نے کہا کہ کشمیر میں معصوم اور نہتے شہریوں کو مسلسل 48 ویں دن ناقابل بیان اذیت کا سامنا ہے جس پر امت مسلمہ کی خاموشی حیران کن ہے اور اقوام متحدہ بھی اس پر خاموش ہے، حالانکہ کشمیر میں لوگوں کو زندہ درگور کردیا گیا۔
انہوں نے کہا کہ مودی سرکار نے کشمیر میں 8 لاکھ فوج اتار کر بھارت کی مزید تقسیم کی بنیاد رکھ دی ہے، امن نیست و نابود ہو تو جنگ کے آثار بن جاتے ہیں، کشمیر پر اگلی جنگ تیسری عالمی جنگ ثابت ہوسکتی ہے، اگر جنگ چھڑی تو پاکستان کا بچہ بچہ سرحد پر ہوگا۔
بھارت کے یکطرفہ، غیرآئینی اقدام نے خطے کے امن کو خطرے میں ڈال دیا، شاہ محمود قریشی
سٹی کونسل نے کشمیر کی صورتحال پر وزیراعظم اور آرمی چیف کے دوٹوک موقف کی حمایت اور مسئلہ کشمیر کو بین الاقوامی سطح پر اٹھائے جانے کی تائید بھی کی جبکہ اس موقع پر ”کشمیر بنے گا پاکستان“ اور ”لے کر رہیں گے کشمیر“کے نعرے بھی لگائے گئے۔
کونسل کا اجلاس ڈپٹی میئر سید ارشد حسن کی صدارت میں پیر کی سہ پہر کونسل ہال صدر دفتر بلدیہ عظمیٰ کراچی میں منعقد ہواجس میں میٹروپولیٹن کمشنر ڈاکٹر سید سیف الرحمن نے بھی شرکت کی، اجلاس میں مجموعی طور پر 19دیگر قراردادوں کی بھی اتفاق رائے سے منظوری دی گئی۔
جن میں گزشتہ بارشوں کے دوران کراچی میں کرنٹ لگنے سے ہونے والی ہلاکتوں پر اظہار افسوس اور اس کے ذمہ داروں کو قرارواقعی سزا دینے سمیت دیگر اہم امور پر مطالبات درج تھے۔