پشاور: وزیر اعلیٰ خیبرپختونخوا محمود خان نے شمالی وزیرستان واقعے میں زخمی و جاں بحق افراد کے ورثا کو مالی معاونت فراہم کرنے کا اعلان کردیا۔
تفصیلات کے مطابق وزیراعلیٰ خیبرپختونخوا محمود خان نے اے آر وائی نیوز سے گفتگو کرتے ہوئے کہا کہ پی ٹی ایم کی جانب سے پاک فوج کی چوکی پر حملہ شرمناک عمل تھا، اپنی فوج کے ساتھ کھڑے ہیں اور آئندہ ایسے واقعات نہیں ہونے دیں گے۔
وزیراعلیٰ کے پی نے کہا کہ جس وقت حملے کی اطلاع ملی اسی وقت وزیرستان کے لیے روانہ ہوگیا تھا، 15 سال دہشت گردی کا شکار رہنے کے بعد وزیرستان امن کی جانب بڑھنے لگا ہے۔
محمود خان نے کہا کہ خیبرپختونخوا میں ہماری حکومت ہے اور میں چیف ایگزیکٹو ہوں، پختونوں نے ووٹ دے کر منتخب کیا، کوئی مسئلہ ہے تو ہم بیٹھیں ہیں، ریاست مخالف عناصر کو آٗئندہ مکمل کنٹرول کیا جائے گا۔
مزید پڑھیں: پی ٹی ایم حملہ ، پانچ فوجی زخمی، جوابی کارروائی میں تین ہلاک 10 زخمی
انہوں نے کہا کہ قبائلی علاقے کے عوام کی محرومیاں دور کریں گے، صوبے کا 30 فیصد ترقیاتی بجٹ قبائلی علاقے کی ترقی پر خرچ کریں گے۔
محمود خان نے پروڈکشن آرڈرز سے متعلق بلاول کے مطالبے کو مسترد کرتے ہوئے کہا کہ علی وزیر کے پروڈکشن آرڈرز سے متعلق فیصلہ وفاقی حکومت کو کرنا ہے۔
وزیر اعلیٰ کے پی نے کہا کہ میری ذاتی رائے میں ایسے عناصر کے ساتھ قانون کے مطابق نمٹنا چاہئے، امن مخالف لوگوں کے خلاف قانون کے مطابق کارروائی ہونی چاہئے، محسن داوڑ علی وزیر جیسے لوگوں کو فری ہینڈ نہیں دینا چاہئے۔