وزیراعلیٰ پنجاب مریم نواز شریف نے پنجاب میں ممکنہ طوفانی بارشوں کے پیش نظر متعلقہ اداروں کو الرٹ رہنے کا حکم جاری کردیا۔
تفصیلات کے مطابق مریم نواز شریف نے طوفانی بارشوں کے پیش نظر پی ڈی ایم اے پنجاب انتظامیہ، پولیس اور ریسکیو کو ضروری پیشگی اقدامات کی ہدایت کی ہے، وزیراعلی نے ڈپٹی کمشنرز اور دیگر متعلقہ افسران کو فیلڈ میں موجود رہنے کے احکامات دیے ہیں۔
مریم نواز شریف نے کہا کہ ڈپٹی کمشنرز پی ڈی ایم اے پنجاب کی جاری کردہ ہدایات پر عملدرآمد یقینی بنائیں۔
وزیراعلی پنجاب نے بالائی پنجاب میں کلاؤڈ برسٹ کے خدشے کے پیش نظر ضروری اقدامات کی ہدایت کی، وزیراعلی مریم نواز شریف نے کوہ سلیمان رود کوئیوں میں ممکنہ سیلابی ریلوں سے بچاؤ کےلئے پیشگی انتظامات کا حکم بھی دیا۔
مری، راولپنڈی، جہلم، چکوال اور کوہ سلیمان کے اضلاع میں خصوصی اقدامات کا حکم دیا، حفاظتی اقدامات کے پیش نظر مری اور متصل علاقوں کی طرف سیاحتی سفر پر پابندی پر اتفاق کیا گیا ہے۔
کلاؤڈ برسٹ، لینڈ سلائیڈنگ اور طوفانی بارشوں کے پیش نظر سیاحوں کی نقل وحمل محدود کرنے کی ہدایت بھی کی گئی، وزیراعلیٰ مریم نواز کی ہدایت پر پی ڈی ایم اے پنجاب فوری متحرک، درکار وسائل مہیا کرنے کے لیے سرگرم ہوگئی ہے۔
پی ڈی ایم اے پنجاب کی ڈپٹی کمشنرز کو طوفانی بارشوں کے پیش نظر دریاؤں کے بہاؤ میں غیرمعمولی اضافے کے خدشے کے پیش نظر پیشگی اقدامات کی ہدایت کی گئی ہے۔
وزیراعلی مریم نواز شریف کی ہدایت پر آبی گزر گاہوں کے ارد گرد آبادیوں کے لئے کشتیاں،لائف جیکٹ اور دیگر سامان مہیا کردیا گیا ہے۔
مریم نواز شریف نے کہا کہ دریاؤں کے پاٹ میں موجود شہریوں کے فوری انخلاء کو یقینی بنایا جائے، دریاؤں نہروں و ندی نالوں میں طغیانی کے پیش نظر نہانے پر پابندی یقینی بنانے کی ہدایت کی گئی ہے۔
وزیراعلی مریم نوازشریف کی دریاؤں اور ندی نالوں کے کنارو ں پر پولیس پٹرولنگ کی ہدایت بھی کی ہے، وزیراعلی مریم نوازشریف نے اپیل کی کہ والدین بچوں کو دریاؤں اور ندی نالوں کے قریب جانے سے روکیں۔