لاہور: وزیراعلیٰ مریم نواز شریف کی پنجاب ٹیم نے انسانیت کی روشن مثال قائم کردی، سیلابی ریلے میں پھنسی 200 بھینسوں کو بچالیا گیا۔
مظفرگڑھ کے قریب دریائے چناب کے سیلابی ریلے میں پھنسی 200بھینسوں کو وزیراعلیٰ مریم نواز شریف کی پنجاب ٹیم نے ریسکیو کرلیا، مظفر گڑھ کے جونا بنگلہ فلڈ ریلیف کیمپ میں وزٹ کے دوران ڈی پی او مظفر گڑھ کو سیلاب میں گرے مویشیوں کے بارے میں بتایا گیا۔
ڈی پی او مظفر گڑھ نے ڈرون کیمروں کا استعمال کرتے ہوئے سیلابی ریلے میں پھنسے ہوئے مویشیوں کو ٹریس کیا۔
بھینسیں اور دیگر مویشی کنارے سے ایک کلومیٹر دور سیلابی ریلے میں پھنسے ہوئے تھے، پولیس اور ریسکیو ٹیم بوٹس لیکر دریا کے اندر پہنچ گئے اور ریسکیو آپریشن شروع کیا۔
پنجاب کی ریسکیو ٹیم کی بروقت کاوشوں کے باعث 200 بھینسوں کو باحفاظت محفوظ مقامات پر منتقل کردیا گیا۔
مویشی مالکان کی جانب سے بھینسوں کو بچانے پر ریسکیو ٹیم سے اظہار تشکر کیا گیا، انھوں نے اسےٍ انسان دوستی کی بہترین مثال قرار دیا۔