بیانات دینے سے ایڈز کا مرض ختم ہوسکتا ہے تو دے دیتا ہوں، وزیر اعلیٰ سندھ

کراچی: وزیراعلیٰ سندھ مراد علی شاہ نے کہا ہے کہ لاڑکانہ میں ایڈز کے مرض پر تشویش ہے، سیاسی بیانات دینے سے اگر مرض کو ختم کیا جاسکتا ہے کہ تو میں بھی اپوزیشن اور سیاسی مخالفین کی طرح بیان دے دوں۔

مراد علی شاہ کا کہنا تھا کہ لاڑکانہ سمیت سندھ کے مختلف علاقوں سے ایڈز کے مرض مسلسل سامنے آرہے ہیں، جس پر حکومت کو شدید تشویش ہے اور ہم مرض پر قابو پانے کے لیے اقدامات بھی کررہے ہیں۔ اُن کا کہنا تھا کہ ایڈز کو لے کر سیاسی مخالفین صرف بیان بازی سے کام لے رہی ہیں، اگر وہ عوام سے واقعی ہمدردی رکھتے ہیں تو آئیں اور حکومت کو تجاویز دیں تاکہ ہم اس بیماری کا صوبے سے خاتمہ کرسکیں۔

اُن کا کہنا تھا کہ اگربیانات دینےسےایڈزختم ہوسکتاتومیں بھی دے دوں مگر ہماری توجہ کام کی طرف ہے۔ ساتھ ہی وزیراعلیٰ سندھ نے ریلوے کی کارکردگی پر بھی سوالات اٹھائے۔

مزید پڑھیں: رتوڈیرو میں ایڈز کی وبائی صورت حال، وفاقی حکومت کا عالمی اداروں کو اعتماد میں لینے کا فیصلہ

’’سناہےریلوےمیں 28ارب روپےکاخسارہ ہوا، شیخ رشیدکی مرضی ہےریلوے کوڈبوئیں یا چلائیں کیونکہ لوگ مہنگائی کے بوجھ تلے مررہے ہیں مگر حکومت کو یہاں کسی کی پرواہ نہیں ہے‘‘۔

یاد رہے کہ بلاول بھٹو اور فریال تالپور کے حلقے لاڑکانہ کے علاقے رتو نوڈیرو سے گزشہ ماہ ایڈز کے چند کیسز رپورٹ ہوئے جس کے بعد انسداد ایڈز پروگرام کی ٹیم نے سندھ کے مختلف علاقوں میں اسکریننگ کا عمل شروع کیا تو تعداد 500 سے بھی تجاوز کرچکی ہے۔ متاثرہ مریضوں میں بچے، بوڑھے، نوجوان، خواتین تمام ہی عمر کے لوگ شامل ہیں جن میں موذی مرض کی تشخیص ہوئی۔