مرغ آپ نے پنجرے میں بند دیکھے ہوں گے یا پھر دستر خوان پر لذیذ کھانوں کی صورت میں لیکن بھارت میں ایک مرغ کو عدالت میں پیش کیا جائے گا۔
یہ عجیب وغریب ماجرا بھارتی ریاست پنجاب میں پیش آیا ہے جہاں چند روز قبل مرغوں کی لڑائی کے ایک غیر قانونی مقابلے میں پکڑے گئے مرغ کو عدالت میں پیش کیا جائے گا۔
بھارتی میڈیا کے مطابق انڈین ریاست پنجاب کے ضلع بھٹنڈہ کے علاقے بلوانہ میں 21 جنوری کو مرغوں کی غیر قانونی لڑائی کا انعقاد کیا گیا تھا جس میں پولیس نے چھاپہ مارا تھا اور مقابلے کے تین منتظم میں سے ایک راجویندر سنگھ عرف راجو کے قبضے سے مرغ کو تحویل میں لیا تھا جس کو عدالت میں پیش کیا جائے گا۔
پولیس نے چھاپے کے دوران جائے وقوعہ سے کچھ ٹرافیاں بھی برآمد کی تھیں جو جیتنے والے مرغوں کے مالکان کو دی جانی تھیں۔ تینوں منتظمین کے خلاف مقدمہ بھی درج کر لیا گیا ہے۔
پولیس نے مرغ کو پرندوں کی دیکھ بھال کرنے والے ایک مقامی بریڈر کے حوالے کر دیا ہے۔
اسسٹنٹ سب انسپکٹر نرمل جیت سنگھ کا کہنا ہے کہ جب بھی اس کیس کی سماعت ہوگی تو مرغ کو کیس پراپرٹی کے طور پر عدالت میں پیش کیا جائے گا۔