شہد کی مکھی کے کاٹنے پر متاثرہ شخص کو معاوضہ ملے گا

بھارت کی ریاست اتراکھنڈ کی حکومت نے شہد کی مکھی کے کاٹنے یا ٹڈی کے حملے کی زد میں آنے والے شخص کو معاوضہ دینے کا اعلان کر دیا۔

میڈیا رپورٹس کے مطابق مذکورہ تجویز خود وزیر اعلیٰ پشکر سنگھ دھامی کی جانب سے دی گئی کیونکہ ماضی قریب میں شہد کی مکھیوں اور ٹڈیوں کے حملے کی وجہ سے کئی اموات رپورٹ ہوئیں۔

وزیر جنگلات سبودھ انیال نے اپنے بیان میں بتایا کہ شہد کی مکھیوں اور ٹڈیوں کے حملے سے ہلاکتیں ہوئیں جبکہ کئی لوگ زخمی بھی ہیں۔

سبودھ انیال نے بتایا کہ ریاست نے اسی کو مدِ نظر رکھتے ہوئے متاثرین کیلیے معاوضے کا اعلان کیا تاکہ وہ اپنا علاج کروا سکیں۔

حکومتی اعلان کے مطابق حملے میں معمولی طور پر زخمی شخص کو 15 ہزار روپے معاوضہ دیا جائے گا جبکہ شدید زخمی کی صورت میں 1 لاکھ روپے کی رقم فراہم کی جائے گی۔

اسی طرح، حملے میں ہلاک ہونے والے کے لواحقین کو 6 لاکھ روپے ادا کیے جائیں گے۔

گزشتہ سال ان حملوں سے کسانوں اور ان کے مویشیوں کی اموات ہوئی تھیں۔ صرف سال 2022 میں سات افراد ہلاک ہوئے تھے۔