ترجمان دفتر خارجہ نے کہا ہے کہ پاکستان مسلم لیگ جموں کشمیر (مسرت عالم ) کو پانچ سال کی مدت کے لیے "غیر قانونی ” قرار دینے کے بھارتی قابض حکام کے فیصلے کی مذمت کرتا ہے،
ترجمان نے ردعمل میں کہا کہ پارٹی کی قیادت ایک ممتاز کشمیری رہنما مسرت عالم بھٹ کر رہے ہیں مسرت عالم 20 سال سے زائد عرصے سے قید ہیں، مسلم لیگ جموں کشمیر پانچویں کشمیری جماعت ہے جسے قابض بھارتی حکام کی طرف سے کالعدم قرار دیا گیا ہے۔
ترجمان کے مطابق جموں و کشمیر لبریشن فرنٹ، جماعت اسلامی جموں و کشمیر، دختران ملت، اور جموں و کشمیر ڈیموکریٹک فریڈم پارٹی کو پہلے ہی کالعدم قرار دیا جا چکا ہے ان جماعتوں کی قیادت کو طویل حراست اور جائیدادوں کی ضبطی کے ذریعے مسلسل ظلم و ستم کا نشانہ بنایا جا رہا ہے اس سال کے اوائل میں سری نگر میں کل جماعتی حریت کانفرنس کے دفتر کو بھی سیل کر دیا گیا تھا۔
دفتر خارجہ کا کہنا تھا کہ سیاسی جماعتوں پر پابندی اور ان کی قیادت پر ظلم و ستم جمہوری اصولوں اور بین الاقوامی انسانی حقوق کی سراسر خلاف ورزی ہے قابض بھارتی حکام کا یہ عمل اختلاف رائے کو دبانے کی خواہش کو ظاہر کرتا ہےجموں و کشمیر کے عوام نے بھارتی ہتھکنڈوں کو مسلسل مسترد کر دیا ہے ایسے اقدامات اقوام متحدہ کے چارٹر کے بنیادی اصولوں کی صریح خلاف ورزی کرتے ہیں بھارتی غیر قانونی طور پر مقبوضہ جموں و کشمیر میں سیاسی جماعتوں پر سے پابندیاں اٹھانی چاہئیں۔
ترجمان دفتر خارجہ نے مطالبہ کیا کہ تمام سیاسی قیدیوں اور مخالفوں کو رہا کیا جائے اور جموں و کشمیر پر اقوام متحدہ کی سلامتی کونسل کی قراردادوں پر عمل درآمد کیا جائے۔