اسلام آباد : حکومت نے ڈالر کا بوجھ کم کرنے کیلئے آئندہ برس بھی عازمین حج کے لئے اسپانسر شپ اسکیم جاری رکھنے کا فیصلہ کرلیا، اسکیم کےتحت10ہزارعازمین فریضہ حج اداکرسکیں گے۔
تفصیلات کے مطابق مذہبی امور نے حج آپریشن کے لئے وزارت خزانہ سے رابطہ کر لیا اور ڈالر کا بوجھ کم کرنے کیلئے آئندہ برس بھی اسپانسر شپ اسکیم جاری رکھنے کا فیصلہ کرلیا گیا۔
ذرائع مذہبی امور نے کہا کہ اسپانسر شپ اسکیم کےتحت10ہزارعازمین فریضہ حج اداکرسکیں گے، اسپانسر شپ اسکیم میں شمولیت کے لیے پاکستانی پاسپورٹ لازمی ہوگا اور حج اخراجات کی رقم ڈالرز میں وصول کی جائے گی۔
ذرائع کا کہنا تھا کہ دنیا بھر میں مقیم پاکستانی اور ان کے رشتہ دار اسکیم کےتحت حج کرسکیں گے، اسپانسر شپ اسکیم کے درخواست دہندہ قرعہ اندازی سے مستثنیٰ ہوں گے۔
سال 2024 کے حج کےلئے پاکستان کا حج کوٹہ ایک لاکھ 79 ہزار 210ہے، جس میں 50فیصد کوٹہ سرکاری اور 50فیصد نجی حج اسکیم کےلئے مختص ہو گا۔
سرکاری حج اسکیم کے تحت پہلی بار قلیل دورانیہ کاپیکج بھی متعارف کرادیا گیا ہے ، اب پاکستانی 20سے 25دن کا حج بھی کرسکیں گے
ایک ہی خاندان ہونے کی صورت میں عازمین حج کو الگ رہائش دی جا ئے گی ، کابینہ سے نئی حج پالیسی کی منظوری جلد لی جائے گی ، حج پالیسی 2024 منظوری کیلئے وفاقی کابینہ کو بھیج دی گئی۔
سرکاری حج اسکیم کےتحت فی کس11لاکھ روپےوصول کئے جائیں گے۔