سی ٹی ڈی نے خفیہ اطلاع پر مستونگ میں کارروائی کرکے شیرین آب روڈ سے کالعدم تنظیم کے 2 مبینہ دہشتگرد گرفتار کرلیے ہیں۔
اے آر وائی نیوز کے مطابق سی ٹی ڈی کو دہشتگردوں کی موجودگی کی خفیہ اطلاع ملی تھی جس پر سی ٹی ڈی نے پر مستونگ میں کارروائی کرکے شیرین آب روڈ سے کالعدم تنظیم کے 2 مبینہ دہشتگرد گرفتار کرکے ان کے قبضے سے بارودی مواد برآمد کرلیا ہے۔
اس حوالے سے سی ٹی ڈی کا کہنا ہے کہ گرفتار ملزمان کا تعلق کالعدم تنظیم سے ہے اور انہوں نے 20 مسافروں کو قتل کرنے کے واقعے میں ملوث ہونے کا اعتراف کرلیا ہے۔
سی ٹی ڈی کے مطابق ملزمان نے کولپور میں گیس پائپ لائن، گیشتری میں کریش پلانٹ تباہ کرنے کا بھی اعتراف کیا ہے جب کہ گرفتار دہشت گرد لیویز تھانہ، تحصیل آفس، ایف سی کیمپ، آرمی گاڑی پر حملےمیں بھی ملوث تھے۔
ترجمان سی ٹی ڈی کے مطابق گرفتار افراد سے تفتیش جاری ہے اور ان سے مزید اہم انکشافات متوقع ہیں۔