کراچی : بحرہ عرب میں اٹھنے والے طوفان ماہا کراچی سے770کلومیٹر دور ہے ، جس کے باعث آئندہ اڑتالیس گھنٹوں کے دوران کراچی کی ساحلی پٹی پر ہلکی بارش کا امکان ہے۔
تفصیلات کے مطابق محمکہ موسمیات کا کہنا ہے کہ کراچی میں آج موسم معتدل اور خشک رہےگا، زیادہ سے زیادہ درجہ حرارت 33 سے 35 ڈگری تک رہنے کا امکان ہے جبکہ ہوا 8 کلو میٹر فی گھنٹہ کی رفتار سے چل رہی ہے۔
چیف میٹرولوجسٹ سردار سرفراز کا کہنا ہے کہ ماہا طوفان شہر سے 770 کلومیٹر دور ہے، طوفان کے گرد ہواؤں کی رفتار 120 سے 140 کلومیٹر فی گھنٹہ ہے، طوفان کے باعث باعث اڑتالیس گھنٹوں کے دوران کراچی کی ساحلی پٹی پر ہلکی بارش کا امکان ہے۔
محکمہ موسمیات کا کہنا ہے کہ نئے بننے والے سمندری طوفان ’’ماہا‘‘ کا رخ عمان کی جانب ہے، آنے والے دنوں میں طوفان مزید شدت اختیار کرے گا۔
سردار سرفراز کے مطابق چوبیس گھنٹے میں طوفان کا رخ بھارتی گجرات کی جانب ہوگا اور پاکستان کے ساحلی ،سرحدی علاقے میں تیز ہوائیں چلیں گی جبکہ معتدل بارش بھی متوقع ہے ، ماہی گیر احتیاطاً گہرے سمندر میں جانے سے گریز کریں۔
مزید پڑھیں : سمندری طوفان ‘ماہا ‘ آگے بڑھنے لگا
دوسری جانب ملک کے بیشترعلاقوں میں آج موسم خشک اور شمالی علاقوں میں سرد رہےگا، محکمہ موسمیات نے آئندہ چوبیس گھنٹوں میں کوئٹہ ،لاہور پشاور سمیت ملک کے بشترعلاقوں میں موسم خشک رہنے کی پیشگوئی کی ہے جبکہ اسلام آباد میں مطلع ابرآلود اور کشمیر اور گلگت بلتستان میں بارش اور پہاڑوں برفباری کاامکان ہے۔