اسلام آباد: وفاقی حکومت نے آئندہ مالی سال کیلیے دفاع میں مجموعی طور پر 18 کھرب 4 ارب روپے مختص کر دیے۔ رواں سال کے مقابلے میں آئندہ سال کیلیے دفاعی بجٹ میں 218 ارب کا اضافہ کیا گیا۔
بری فوج کیلیے بجٹ 824 ارب 65 کروڑ جبکہ پاک فضائیہ کو 368 ارب 56 کروڑ سے زائد ملیں گے۔ پاک بحریہ کیلیے آئندہ مالی سال کے بجٹ میں 188 ارب 24 کروڑ روپے سے زائد رکھے گئے ہیں۔
ڈیفنس سروسز، اسٹیبلشمنٹ اور دیگر دفاعی شعبہ جات کیلیے بجٹ میں 352 ارب 53 کروڑ روپے سے زائد رقم مختص کی گئی۔
افواج پاکستان کے ملازمین کی تنخواہوں اور دیگر اخراجات کی مد میں 705 ارب روپے خرچ ہوں گے۔ آپریٹنگ اخراجات کی مد میں 442 ارب روپے مختص کیے گئے ہیں۔ فزیکل اثاثوں کی مد میں 461 ارب اور سول ورکس کیلیے 195 ارب 51 کروڑ روپے مختص کیے گئے۔
وزارت دفاعی پیداوار اور ذیلی اداروں کیلیے 99 کروڑ 76 لاکھ روپے سے زائد کا بجٹ مختص جبکہ ملازمین کے اخراجات کیلیے 29 کروڑ 41 لاکھ روپے مختص ہے۔ آپریٹنگ اخراجات 12 کروڑ سے زائد ہوں گے۔