کراچی: قومی ایئرلائن (پی آئی اے) نے کوئٹہ سے پشاور کے لیے 12سال بعد براہ راست پروازوں کا آغاز کردیا۔
تفصیلات کے مطابق بارہ سال بعد بلوچستان کے دارالحکومت سے خیبرپختونخوا کے دارالحکومت کے لیے براہ راست پی آئی اے کی پروازیں شروع ہوگئیں۔
ابتدائی طور پر کوئٹہ سے پشاور دوطرفہ 2پروازیں جمعہ اور منگل کوروانہ ہوں گی۔
پارلیمانی سیکریٹری اطلاعات بلوچستان بشریٰ رند نے تقریب میں پروازوں کی بحالی سے متعلق افتتاح کیا۔ اس موقع پر بشریٰ کا کہنا تھا کہ 12 سال بعد پروازوں کا دوبارہ آغاز مشترکہ کاوشوں کا نتیجہ ہے۔
سیاحت کے فروغ کیلئے پی آئی اے کا بڑا اقدام
انہوں نے یہ بھی کہا کہ پروازوں سے سفری سہولت، کاروبار اور سیاحت کو بھی فروغ ملے گا۔
یاد رہے کہ اس سے قبل 30 جون کو قومی ایئرلائن نے فیصل آباد سے اسکردو کے لیے پروازیں شروع کرنے کا اعلان کیا تھا جس کے بعد 7جولائی سے اسکردو کے لیے پروازوں کا آغاز ہوا۔
خیال رہے پی آئی اے کراچی اسلام آباد اور لاہور سے پہلے ہی اسکردو پروازیں آپریٹ کررہی ہے۔