صنعتی صارفین کیلئے بجلی کا رعایتی پیکج تیار

کراچی سمیت ملک بھر کے صنعتی صارفین کیلئے بجلی کا رعایتی پیکج تیار کر لیا گیا۔

ذرائع کے مطابق بجلی کے فی یونٹ ٹیرف پر 3.32 روپے سے 17.84 روپے تک ریلیف دینے کی تجویز دی گئی ہے۔ اضافی بجلی کے استعمال پر فی یونٹ ٹیرف کم کر کے 26.29 روپے تک لانے کی تجویز ہے۔

بجلی ٹیرف میں ریلیف کا پیکچ منظوری کیلئے آج کابینہ توانائی کمیٹی میں پیش ہوگا۔ مجوزہ صنعتی پیکج نومبر 2023 سے فروری 2024کیلئے ہو گا۔ پیکج کا اطلاق کےالیکڑک سمیت تمام بجلی کمپنیوں کے صنعتی صارفین پر ہو گا۔

بجلی ٹیرف میں رعایت گزشتہ سال کی کھپت کے مقابلے زائد استعمال پر ملے گی۔ صنعتی پیکج میں بجلی ٹیرف میں ریلیف کیلئے 3 تجاویز دی گئی ہیں۔

پہلی تجویز کے تحت 3روپے 32 پیسے سے 7 روپے 86 پیسے فی یونٹ تک رعایت، دوسری تجویز کے تحت 8روپے 57 سے 14روپے 13 پیسے فی یونٹ تک رعایت اور تیسری تجویز کے تحت 12روپے 28 پیسے سے 17روپے 84 پیسے فی یونٹ تک کی تجویز ہے۔

پہلی تجویز کے تحت ٹیرف کم کرکے 36 روپے 54 پیسے فی یونٹ کرنے، دوسری تجویز کے تحت ٹیرف 30 روپے فی یونٹ کرنے اور تیسری تجویز کے تحت 26 روپے 29 پیسے فی یونٹ کرنے کی تجویز ہے۔