اسلام آباد : قومی اسمبلی میں خواتین کے خلاف جرائم سے متعلق بتایا گیا سال 2019 سے 2021 کے دوران پاکستان میں 3987 خواتین کو قتل کیا گیا۔
تفصیلات کے مطابق قومی اسمبلی اجلاس کے دوران گزشتہ 3 سال ملک بھر میں خواتین کے خلاف جرائم کی تفصیلات پیش کی گئیں۔
تحریری جواب میں بتایا گیا کہ 3 سال میں خواتین کے خلاف جرائم پر 63ہزار 367 کیس رجسٹر ہوئے جبکہ سال 2019 سے 2021 کے دوران ملک بھر میں 3987 خواتین کو قتل کیا گیا۔
تحریری جواب میں کہا ہے کہ 3سال کے دوران خواتین کے ساتھ زیادتی کے دس ہزار 517 کیس رجسٹرڈ ہوئے، اور اجتماعی زیادتی کے 643 واقعات ہوئے۔
خواتین پر تشدد کے5171 واقعات پر مقدمات رجسٹرہوئے جبکہ تین سال کے دوران 1 ہزار 25 خواتین کو غیرت کے نام پر قتل کیا گیا۔
اس کے علاوہ خواتین پر تیزاب پھینکنے کے 103 واقعات ، گھروں میں چولہے پھٹنے سے جھلسنے کے 38 واقعات ہوئے جبکہ ملک بھرمیں خواتین کو اغوا کرنےکے 41513 کیس رجسٹرہوئے۔