اسلام آباد : الیکشن کمیشن نے چیئرمین پیپلزپارٹی بلاول بھٹو کے مالی گوشواروں میں تضاد کا کیس جواب جمع کرانے پر نمٹا دیا۔
تفصیلات کے مطابق الیکشن کمیشن ممبر پنجاب الطاف ابراہیم قریشی کی سربراہی میں 4 رکنی بنچ نے بلاول بھٹو کے مالی گوشواروں میں تضاد کیس کی سماعت کی۔
بلاول بھٹو زرداری کے وکیل فاروق ایچ نائیک الیکشن کمیشن میں پیش ہوئے اور بلاول کی جانب سے الیکشن کمیشن میں جواب جمع کرایا گیا، جس پر الیکشن کمیشن نے بلاول بھٹو زرداری کا جمع کرایا گیا جواب قبول کر لیا۔
بعد ازاں الیکشن کمیشن نے بلاول بھٹو زرداری کے خلاف مالی گوشواروں میں تضاد سے متعلق کیس نمٹا دیا۔
بلاول بھٹو زرداری کے وکیل فاروق ایچ نائیک نے الیکشن کمیشن کے باہر میڈیا سے گفتگو میں کہا کہ تمام چیزوں کی دستاویزات الیکشن کمیشن میں جمع کرائی،اور رپورٹ پیش کی جسے الیکشن کمیشن نے تسلیم کر لیا ہے۔
ان کا کہنا تھا کہ اس وقت سب سے بڑا مسئلہ کورونا کا ہےجب تک کورونا کو کنٹرول نہیں کیا جائے گا تب تک معیشت بہتر نہیں ہو گی، بیرون ممالک میں لاک ڈاون سے کورونا کو کنٹرول کیا گیا۔