ایل سیلواڈور کے شہر سین سیلواڈور میں فٹبال میچ کے دوران بھگدڑ مچنے سے 12 افراد ہلاک اور درجنوں زخمی ہو گئے ہیں۔
خبر رساں ادارے کے مطابق یہ واقعہ اتوار کو پیش آیا، سین سیلواڈور کے اسٹیڈیم میں لیگ میچ کھیلا جا رہا تھا جس کے لیے بڑی تعداد میں لوگوں نے ٹکٹس خرید رکھے تھے۔
رپورٹ کے مطابق اسٹیڈیم فل ہونے اور میچ شروع ہونے کے بعد بڑے گیٹس کو بند کر دیا گیا جبکہ اس کے بعد آنے والے لوگ چھوٹے گیٹوں سے داخل ہو رہے تھے۔
بڑا گیٹ نہ کھولنے پر بعض ٹکٹ لینے والے افراد نے غصے میں آ کر دھکم پیل شروع کر دی جس سے مین گیٹ ٹوٹ گیا اوربھگدڑ مچ گئی اور متعدد شائقین لوگوں کے قدموں تلے کچلے گئے۔
عینی شاہد ڈائیگو ارننڈو نے مقامی ٹی وی چینل کو بتایا کہ وہ اپنے والد کے ساتھ اتوار کی رات کو میچ دیکھتے پہنچے تھے جو کوارٹر فائنل تھا جو الیانہ کلب اور فیز کے درمیان مونومینٹل اسٹیڈیم میں ہو رہا تھا۔
انہوں نے بتایا کہ صورت حال اس وقت خراب ہوئی جب ایک چھوٹے گیٹ پر بہت زیادہ لوگ جمع ہوئے اور دھکم پیل کی وجہ سے وہ گیٹ نیچے گر گیا۔
ڈائیگو نے کہا کہ میں نیچے گر گیا اور کئی لوگ میرے اوپر سے گزرے، کچھ لوگوں نے مجھے کھینچ کر باہر نکالا، قدموں تلے آنے والے دیگر دو افراد نے میرے سامنے دم توڑا۔