آئی جی پنجاب پولیس ڈاکٹر عثمان کا کہنا ہے کہ ہم 8 فروری کو عام انتخابات کے پُر امن انعقاد کے لیے پوری طرح تیار ہیں۔
اے آر وائی نیوز کے مطابق پنجاب کے انسپکٹر جنرل آف پولیس (آئی جی) ڈاکٹر عثمان نے عام انتخابات کے حوالے سے اپنے پیغام میں کہا ہے کہ پنجاب پولیس 8 فروری کو عام انتخابات کے پُر امن انعقاد کے لیے پوری طرح تیار ہے اور الیکشن کے لیے صوبے بھر میں ایک لاکھ 30 ہزار نفری تعینات کی جائے گی۔
آئی جی کا کہنا تھا کہ اسپیشل پروٹیکشن یونٹ، سی ٹی ڈی، اسپیشل برانچ کی نفری سیکیورٹی ڈیوٹی پر ہو گی، اس کے علاوہ 10 ہزار سے زائد خواتین پولیس اہلکاروں کو بھی الیکشن ڈیوٹی پر تعینات کیا جا رہا ہے۔
انہوں نے کہا کہ تمام سیکیورٹی اداروں کی کو آرڈینیشن سے الیکشن کے پُرامن انعقاد کیلیے تیار ہیں اور تمام سیاسی سرگرمیوں کو الیکشن کمیشن کی ہدایات کے مطابق سیکیورٹی دے رہے ہیں۔
آئی جی پنجاب نے مزید کہا کہ ہوائی فائرنگ، اسلحے کی نمائش یا کسی بھی غیر قانونی سرگرمی پر سخت کارروائی کی جائے گی۔