اسلام آباد (29 جولائی 2025): الیکٹرک بائیک حاصل کرنے کے خواہش مند شہریوں کی آسانی کیلیے حکومت نے اہم فیصلہ کر لیا۔
ذرائع نے اے آر وائی نیوز کو بتایا کہ الیکٹرک بائیک کیلیے اقساط اور سبسڈی اسکیم تیاری کے آخری مراحل میں داخل ہوگئی، وزیر اعظم شہباز شریف 14 اگست یوم آزادی پر اسکیم کا اعلان کریں گے۔
یہ بھی پڑھیں: الیکٹرک بائیک اسکیم سے فائدہ اٹھائیں، اہم معلومات سامنے آگئیں
اسٹیٹ بینک اور بینک ایسوسی ایشن کی جانب سے الیکٹرک بائیک اسکیم تیار کی جا رہی ہے جس کے تحت فی بائیک اور رکشے پر 50 ہزار روپے کی سبسڈی دے گی جبکہ اہلیت کیلیے عمر کی حد 18 سے 65 سال تک ہوگی۔
ذرائع نے بتایا کہ فی الیکٹرک بائیک کی قیمت 2 لاکھ 50 ہزار تک مقرر ہونے کا تخمینہ لگایا گیا ہے، 50 ہزار کی سبسڈی اور بقیہ 2 لاکھ سے زائد اقساط میں ادا کرنا ہوں گے۔
17 کمپنیاں الیکٹرک بائیک بنانے کیلیے لائسنس حصول میں کامیاب ہوئیں، پالیسی کے تحت 2030 تک 30 فیصد الیکٹرک گاڑیوں کا ہدف مقرر ہے۔
ای وی پالیسی کی کامیابی کیلیے 5 سال میں 100 ارب روپے کی سبسڈی دی جائے گی۔ رواں مالی سال کیلیے 9 ارب، 2027 کیلیے 19 ارب، 2028 میں 24 ارب سے زائد جبکہ 2029 میں 26 ارب سے زائد سبسڈی مختص ہوگی۔
سال 2023 میں سبسڈی کی مد میں تقریباً 23 ارب روپے مختص ہوں گے جبکہ سال 2030 تک 22 لاکھ 13 ہزار الیکٹرک گاڑیوں کی تیاری کا ہدف مقرر ہے۔
ذرائع نے مزید بتایا کہ حکومت نے ایک لاکھ 16 ہزار الیکٹرک بائیک 2 سال کی اقساط پر دینے کا فیصلہ کیا ہے۔