اسلام آباد : کراچی کیلئے بجلی ایک روپے 55 پیسے فی یونٹ مہنگی کردی گئی، اضافی وصولیاں مئی، جون اور جولائی کے بلوں میں کی جائیں گی۔
تفصیلات کے مطابق نیشنل الیکٹرک پاور ریگولیٹری اتھارٹی (نیپرا) نے ڈیڑھ سال پرانی سہہ ماہی ایڈجسٹمنٹ کی مد میں کراچی کیلئے بجلی ایک روپے پچپن پیسے فی یونٹ مہنگی کرنے کی منظوری دے دی۔
نیپرا نے گذشتہ مالی سال کی دوسری سہہ ماہی ایڈجسٹمنٹ یعنی اکتوبر تا دسمبر دو ہزار اکیس کی مد میں اضافے کی منظوری دی۔
اضافی وصولیاں تین ماہ میں کی جائیں گی، نیپرا نے فیصلہ نوٹفیکیشن کیلئے وفاقی حکومت کو بھجوادیا۔
نیپرا کے مطابق کے الیکٹرک صارفین سے اضافی وصولیاں مئی، جون اور جولائی کے بلوں میں کی جائیں گی، نیپرا نے وفاقی حکومت کی درخواست پر سماعت کے بعد فیصلہ جاری کیا۔
وفاقی حکومت نے ملک میں یکساں ٹیرف برقرار رکھنے کیلئے نیپرا سے رجوع کیا تھا۔